Jehova well, daut dee twee, waut sikj befrieen, schaftich sent un fa emma vebungen bliewen (Mat. 19:4-6). Woo kaust du eenen feinen Ehepoatna finjen, wan du die befrieen west? Jehova haft ons jemoakt un weet, waut wie doonen kjennen, daut wie eenen feinen Ehestaunt haben. Wan du no siene Gruntsauzen horchst, dan woascht du opp iernst schaftich sennen. See wie mol eenje doavon.

Ieeschtens mott wie vestonen, woo daut met ons steit. De Schreft sajcht: “Daut Hoat es weinja to truen aus sest irjentwaut un doa es kjeene Rot fäa” (Jer. 17:9, NW). Wan doa twee Menschen, waut sikj jieren befrieen wellen, sikj aunfangen kjanen to lieren, dan kjennen doa haustich soone stoakje Jefeelen oppkomen, daut dee nich mea kjennen goode Entscheidungen moaken. Wan dee sikj bloos wäajen soone stoakje Jefeelen befrieen, kjennen dee sikj foaken sea aunschmäaren (Spr. 28:26). Doawäajen es daut nich kluak, wan twee Menschen, waut sikj noch nich goot kjanen, aul äwa deepe Jefeelen räden, waut eena fa dän aundren haft, un sikj aule Sorten vespräakjen.

Spricha 22:3 sajcht: “De kluake seenen daut Ojjlekj komen un brinjen sikj utem Stich, oba de jlikjeltje gonen doa nenn un motten doafäa lieden.” Wuarom kaun daut soo jefäadlich sennen, soone Websieden to brucken, wua eena eenen Ehepoatna finjen kaun? Eenje haben doa wäm kjanen jelieet un haben aunjefongen romtodriewen, un dee haft an dan lota sea aunjeschmäat. Daut jeft uk onopprechtje Menschen, waut soone Websieden brucken, om soone Jelt auftogonen, waut nich väasechtich sent. Eenjemol jäwen dee soogoa väa, daut see Jehova siene Zeijen sent.

Oba doa es noch eene Jefoa. Eenje Websieden haben Komputa-Programs, waut daut uträakjnen, woone Menschen minkj goot tooppaussen wudden. Oba daut jeft kjeenen Bewies, daut soont werkjlich goot utkjemt. Wudd daut kluak sennen, daut een Komputa-Program, waut Menschen jemoakt haben, eenem halpen sull, eenen gooden Ehepoatna to finjen? Opp Komputa-Programs woat eena sikj nienich soo veloten kjennen aus opp biblische Gruntsauzen (Spr. 1:7; 3:5-7).

 Eenen Gruntsauz finj wie en Spricha 14:15, wua daut sajcht: “Een Noa jleeft irjentwaut, oba een vestendja Maun bedenkjt sikj siene Wäaj.” Ea eena doaräwa nodenkjt, aus de aundra wudd een gooda Ehepoatna sennen, mott eena dän ieescht goot kjanen. Oba opp soone Websieden es daut werkjlich schwoa, wäm goot kjanen to lieren. Weetst du aul goot om eene Persoon om, wan du bloos sitst, waut dee doa äwa sikj selfst nenjeschräwen haft, ooda die tiedenlank met dän unjahelst? Eenje dochten, daut see nu dän rajchten Poatna jefungen hauden, un vefieeden sikj dan sea, aus see dän werkjlich mol bejäajenden.

De Psalmenschriewa säd: “Ekj sett nich met daugeniksje Menschen toop un hab uk nich Jemeenschoft met Heichla” (Psa. 26:4). Fa väle es daut gaunz jeweenlich, opp soone Websieden to lieejen, om sikj bäta hantostalen, aus see werkjlich sent. Dee loten sikj daut nich enwoaren, woo see werkjlich sent, un stalen sikj doa gaunz natieedlich opp. Eenje sajen mau rajcht, daut see eent von Jehova siene Zeijen sent. Oba sent dee werkjlich jedeept? Sent dee stoakj em Gloowen? Sent dee goode Frind met Jehova? Denkjen de Breeda en dee äare Vesaumlunk goot äwa dee? Ooda sent dee een schlajchtet Biespel ooda soogoa “schlajchte Jesalschoft”? (1. Kor. 15:33; 2. Tim. 2:20-21). Sent dee no de Schreft no frie sikj to befrieen? Aul daut mott eena weeten, oba daut es nich leicht, wan eena nich met soone Breeda räden kaun, waut dänjanjen goot kjanen (Spr. 15:22). Un true Deena von Jehova wudden nich mol doaraun denkjen, sikj met soone tooptospaunen, “waut nich jleewen” (2. Kor. 6:14; 1. Kor. 7:39).

Daut es aulsoo jefäadlich, soone Websieden to brucken, wua eena eenen Ehepoatna sieekjen kaun. Daut jeft väl bätre Mäajlichkjeiten, eenen feinen Poatna to finjen un dän dan kjanen to lieren. Waut vonne biejlikj? Wan doa Frieheit es toop to sennen, dan kjennen Jehova siene Zeijen wäm kjanen lieren bie äare Toopkomes, Kongressen ooda wan dee wua enjelot sent.

Wan doa nich Frieheit es toop to sennen, biejlikj wäajen de COVID-19-Krankheit, dan hab wie onse Toopkomes äwa Internet un haben doa de Jeläajenheit, Breeda un Sestren kjanen to lieren, waut nich befriet sent. Doa kjenn wie seenen, woo dee bie de Toopkomes metmoaken un äwa äaren Gloowen räden (1. Tim. 6:11-12). Veleicht moaken dee no de Toopkomes dan uk noch kjliene Gruppen, wua du dan met dee vetalen kaust. Veleicht kaust du uk bie aundre Toopkomes von Breeda äwa Internet beoobachten, woo deejanja, waut die intressieet, met aundre omjeit un waut fa een Mensch daut es (1. Pet. 3:4). Met de Tiet kjenn jie junt dan bäta kjanen lieren un seenen, aus jie fein tooppaussen un no dautselwje sträwen doonen.

Wan Onbefriede sikj no biblische Gruntsauzen rechten, wan dee no eenen Ehepoatna sieekjen, dan kaun daut väl ea sennen, daut dee daut beläwen, wua Spricha 18:22 von rät. Doa sajcht daut: “Wäa eene [feine] Fru finjt [ooda eenen feinen Maun], finjt waut goodet, un es vom HARN jesäajent.”