1. Waut es vondoag dän Dach Jehova sien Wellen?

 GOTT sien Wellen es, daut de goode Norecht von sien Kjennichrikj vondoag dän Dach äwa de gaunze Ieed jeprädicht woat (Mar. 13:10; 1. Tim. 2:3-4). Dit es Jehova sien Woakj, un es soon wichtjet, daut hee sienen leewen Sän doaräwa aunjestalt haft. Wiels Jesus dit Woakj leit, kjenn wie ons secha sennen, daut et woat bat aum Enj krakjt soo derchjefieet woaren, aus Jehova daut haben wull (Mat. 24:14).

2. Waut woa wie en disen Artikjel seenen?

² En disen Artikjel woa wie seenen, woo Jesus dän truen, weisen Kjnajcht brukt, om fa jeisteljet Äten to sorjen un Gott siene Deena to leiden, daut jratste Prädichtwoakj derchtofieren, waut et jeemols jejäft haft (Mat. 24:45). Wie woaren uk seenen, woo jieda eena von ons Jesus un dän truen, weisen Kjnajcht unjastetten kaun.

3. Waut vonne Veauntwuatunk haft Jesus jekjräajen?

³ Woo kjenn wie ons secha sennen, daut Jesus daut Prädichtwoakj leit? Een Stootje ea hee nom Himmel fua, wia Jesus met eenje von siene Nofolja toop opp eenen Boajch en Galiläa. Hee säd to dee: “Mie es aule Jewault jejäft em Himmel uk oppe Ieed”. Un kjikj, waut hee daut näakjste säd: “Got nu no de Velkja von de Welt un moakt an to Lieelinja” (Mat. 28:18-19). Soo, daut Prädichtwoakj leiden es eent von dee Veauntwuatungen, waut Jesus jekjräajen haft.

4. Wuarom kjenn wie ons secha sennen, daut Jesus noch emma daut Prädichtwoakj leit?

⁴ Jesus säd, daut se wudden oppe gaunze Welt un mank  “[aule] Velkja” prädjen un Jinja moaken, un daut hee wudd met an sennen “batem Enj von de Welt” (Mat. 28:20). Dit bewiest, daut Jesus bat vondoag dän Dach wudd de Leidunk haben äwa daut Prädichtwoakj.

5. Woo halp wie met, daut de Profezeiunk en Psalm 110:3 sikj erfelt?

⁵ Jesus muak sikj nich Sorjen doaräwa, aus doa wudden jenuach Oabeida sennen, om dit Woakj bat aum Enj von de Welt derchtofieren. Hee wist, daut de Profezeiunk von dän Psalmenschriewa sikj erfellen wudd: “Dien Volkj [woat] die friewellich, em heiljen Schmuck deenen” (Psa. 110:3). Wan du bie dit Woakj metmoakst, dan unjastetst du Jesus un dän truen, weisen Kjnajcht un halpst uk met, daut de Profezeiunk sikj erfelt. Wan daut uk Schwierichkjeiten jeft, jeit dit Woakj oba wieda.

6. Waut vonne Schwierichkjeiten hab wie bie dise Tiet?

⁶ Eene Schwierichkjeit, waut wie bie dise Tiet haben, es de Jäajenstaunt. De Aufjefolne, de Gloowesleidasch un de Rejierungsmana vetalen väl Läajes äwa daut Prädichtwoakj. Wan ons Frintschoft ooda aundre Bekaunde un Oabeitspoatna dise Läajes jleewen, woaren dee ons wellen bat doa brinjen, daut wie sellen opphieren, Jehova to deenen un to prädjen. En eenje Lenda moaken de Jäajna onse Breeda Angst, nämen dee faust ooda stoppen dee soogoa en. Aul dit wundat ons nich sea, wiels Jesus säd: “Wiels jie junt to mienen Nomen bekjanen, woaren junt aule Velkja nich lieden kjennen” (Mat. 24:9). Aul dit, daut dee ons soo sea haussen, es de Bewies, daut wie daut doonen, waut Jehova haben well (Mat. 5:11-12). Wan de Soton uk fa aul dise Vefoljunk veauntwuatlich es, weet wie oba, daut Jesus stoakja es aus de Soton. See wie nu mol, woo de goode Norecht met Jesus siene Help no aule Velkja kjemt.

7. Woo kaust du seenen, daut Openboarunk 14:6-7 sikj erfelt?

⁷ Noch eene Schwierichkjeit, waut wie aus Kjennichrikjsvekjindja haben, es, daut et soo väl veschiedne Sproaken jeft. Jesus säd en de Openboarunk, waut hee Johanes jeef, verut, daut de goode Norecht en de latste Tiet doawäajen wudd jeprädicht woaren (läs Openboarunk 14:6-7). Woo schauft daut? Wie jäwen soo väl Menschen aus mäajlich de Jeläajenheit, no de goode Norecht to horchen. Vondoag dän Dach kjennen Menschen oppe gaunze Welt opp onse Websied jw.org biblische Bieekja läsen, wiels daut dee opp mea aus 1 000 Sproaken jeft! Fa daut Buak Een scheenet Läwen fa emma!, waut wie brucken toom met de Menschen studieren, wort de Frieheit jejäft, daut et opp äwa 700 Sproaken kunn äwasat woaren! Daut jeistelje Äten woat uk opp Videos reedjemoakt fa de Doowe, un doa woaren uk Bieekja opp Blinjeschreft jemoakt. Wie seenen gaunz kloa, woo de Profezeiunk enne Bibel sikj erfelt. “Menschen von veschiedne [Sproaken un] Velkja” lieren de “reine Sproak” ut de Bibel (Sach. 8:23; Zef. 3:9, NW). Aul dit es mäajlich, wäajen Jesus Christus de Leidunk haft.

8. Waut haft daut derch daut Prädichtwoakj aul aules jejäft?

⁸ Vondoag dän Dach jeft daut aul äwa 8 000 000 Menschen en 240 Lenda, waut Poat sent von Jehova siene Organisazion, un jieda Joa loten sikj noch Dusende deepen! Dise Zolen sent nich daut wichtichste, oba daut de niee Jinja no de christelje Ieejenschoften läwen, aulsoo sikj de “niee Natua” auntrakjen (Kol. 3:8-10).  Väle haben oppjehieet, een schwienschet Läwen to fieren, Jewault to brucken, äwa aundre schlajcht to denkjen un äa Launt fa bäta to talen. De Profezeiunk en Jesaja 2:4 erfelt sikj krakjt, wan daut sajcht, daut de Menschen nich mea woaren “toom Kjrich reedmoaken.” Wan wie aun onse niee Natua schaufen, dan woa wie methalpen, daut de Menschen Jehova siene Organisazion kjanen lieren wellen, un wie doonen doaderch uk onsen Leida Jesus Christus no (Joh. 13:35; 1. Pet. 2:12). Wuarom es aul dit soo jekomen? Wäajen Jesus ons dee Help jeft, waut wie brucken.

9. Waut wort no Matäus 24:45-47 no äwa de latste Tiet verutjesajcht?

⁹ Läs Matäus 24:45-47. Jesus säd verut, daut hee wudd enne latste Tiet eenen truen, weisen Kjnajcht aunstalen, om fa jeisteljet Äten to sorjen. Soo, dis Kjnajcht wudd en onse Tiet sea drock sennen. Un krakjt soo es daut uk! Ons Leida Jesus Christus haft eene kjliene Grupp Mana aunjestalt, om Gott siene Deena un soone, waut de Bibel studieren, “to rajchte Tiet [jeisteljet] äten to jäwen”. Dise Mana doonen aundre nich bemotten, waut dee jleewen sellen (2. Kor. 1:24). Enne Städ daut weeten dee, daut Jesus Christus de Leida äwa siene Deena es un äwa dee jebeeden deit (Jes. 55:4, NW).

10. Woont von de Bieekja opp daut Bilt haft die bat doa jebrocht, Jehova to deenen?

¹⁰ Vonne 1919 aun haft de trua, weisa Kjnajcht een deel veschiedne Bieekja reedjemoakt, waut väle de Jeläajenheit jejäft haft, de Bibel bäta kjanen to lieren. Un aune 1921 muaken dee daut Buak Die Harfe Gottes, om de Studiums to halpen, de wichtichste Lieren ut de Bibel to vestonen. Aus de Tieden sikj endaden, muaken  dee noch aundre Bieekja. Met woon Buak hast du onsen himlischen Voda kjanen un leewen jelieet? Wia daut daut Buak “Gott bleibt wahrhaftig”, Die Wahrheit, die zu ewigem Leben führt, Du kannst für immer im Paradies auf Erden leben, Erkenntnis, die zu ewigem Leben führt, Waut lieet de Schreft werkjlich?, Was lehrt uns die Bibel? Ooda wia daut daut gaunz niee Buak Een scheenet Läwen fa emma!? Aul dise Bieekja worden doano aunjepaust, woo de Tiet dan jroz wia, aus dee rutkjeemen.

11. Wuarom es daut läweswichtich, daut wie daut jeistelje Äten kjrieen?

¹¹ De Studiums sent nich de eensje, waut daut stoakje jeistelje Äten brucken. Wie aula brucken daut. De Apostel Paulus schreef: “Stoakje Kost es fa utjewosne Menschen”. Hee säd uk, daut ons daut halpen wudd, “tweschen goot un schlajcht to unjascheeden” wan wie daut nokjeemen, waut wie ut de Schreft lieeden (Heb. 5:14). En dise schwoare Tiet es daut nich leicht, no Jehova siene Jesazen un Gruntsauzen to horchen, wäajen de Menschen soo ojjerajcht sent un een schwienschet Läwen fieren. Oba Jesus sitt doano, daut wie derch daut jeistelje Äten onsen Gloowen stoakj hoolen kjennen. Daut jeistelje Äten kjemt von Gott sien Wuat, de Bibel. Unja Jesus siene Leidunk moakt de trua, weisa Kjnajcht daut jeistelje Äten reed un veschekjt daut.

12. Woo hab wie Gott sienen Nomen krakjt soone Iea jejäft, aus Jesus deed?

¹² Soo aus Jesus hab wie Gott sienen Nomen dee Iea jejäft, waut dän traft (Joh. 17:6, 26). Wie nanen ons biejlikj vonne 1931 aun Jehova siene Zeijen. Doaderch wies wie, daut ons dis Nomen sea wichtich es, un daut de Menschen ons sellen bie disen Nomen von onsen himlischen  Voda kjanen (Jes. 43:10-12, NW). Un von Oktooba 1931 aun kjemt Gott sien Nomen emma oppe väaschte Sied von dän Woaktorm väa. Un butadäm es dis Nomen en de Neue-Welt-Übersetzung wada aulawäajen doa bennen, wua dee hanjehieet. Daut es krakjt aundasch, aus daut bie de Kjoakjen es, waut Gott sienen Nomen ut väle Bibeläwasatungen rutjenomen haben.

13. Wuarom best du die secha, daut Jesus dän truen, weisen Kjnajcht brukt? (Joh. 6:68).

¹³ Jesus haft derch dän truen, weisen Kjnajcht hia oppe Ieed eene besondre Organisazion oppjestalt, waut fa de woare Aunbädunk ensteit. Woo denkjst du äwa dise Organisazion? Veleicht denkjst du aun dän Apostel Petrus siene Wieed, aus hee to Jesus säd: “No wäm sell wie gonen? Diene Wieed sent eewjet Läwen” (Joh. 6:68). Wua wudd jieda eena von ons sennen, wan wie nich hauden Jehova siene Organisazion kjanen jelieet? Derch dee vesorcht Jesus ons met jeisteljet Äten. Hee lieet ons derch dee uk ut, woo wie onsen Prädichtdeenst goot doonen kjennen. Jesus halpt ons uk, de niee Natua auntotrakjen ooda “niee Menschen [to] woaren”, soo daut wie Jehova jefaulen kjennen (Efs. 4:23-24).

14. Woo es die daut en de Tiet von de COVID-19-Krankheit togood jekomen, daut du Poat von Jehova siene Organisazion best?

¹⁴ Jesus jeft ons en schwoare Tieden weise Aunwiesungen. Woo nizlich dise Aunwiesungen sent, wort kloa, aus daut met de COVID-19-Krankheit aunfunk. Wan väle enne Welt sikj uk onsecha wieren, waut se nu doonen sullen, sach Jesus doano, daut wie kloare Aunwiesungen kjrieejen, waut ons toom Schutz wieren. Ons  wort toojerot, daut wie sullen Mulschutz brucken, wan wie mank Menschen wieren un uk proowen, uteneen to bliewen. De Eltestasch wort jesajcht, daut dee sullen räajelmässich met aule Breeda un Sestren vonne Vesaumlunk räden un seenen, waut dee em tieteljen un em jeisteljen fäld (Jes. 32:1-2). Wie kjrieejen uk Moot un Aunwiesungen derch de Berechten vom Väastaunt.

15. Waut fa Aunleidunk kjrieej wie en de Tiet von de Krankheit äwa ons vesaumlen un prädjen?

¹⁵ En de Tiet von de Krankheit hab wie uk kloare Aunleidunk jekjräajen, woo wie onse Toopkomes haben sullen un woo wie prädjen sullen. Daut dieed nich lang, aus wie dan onse Toopkomes un Kongressen äwa Internet hauden. Wie fungen uk aun, meistens bloos noch derch Breew un äwa Fon to prädjen. Jehova säajend daut, daut wie ons soo aunstrenjden. Väle Betels haben jesajcht, daut see nu een Schoof mea Vekjindja haben. Un väle haben en de Tiet von dise Krankheit uk sea scheene Erfoarungen jehaut. (See dän Kausten “ Jehova säajent ons Prädichtwoakj”.)

16. Äwa waut sent wie ons secha?

¹⁶ Eenje haben veleicht jedocht, daut de Organisazion daut met de Krankheit too iernst neem. Oba daut haft sikj emma wada utjewäsen, daut de Aunwiesungen, waut wie kjrieejen, sea weis wieren (Mat. 11:19). Un wan wie doaräwa nodenkjen, woo leeftolich Jesus sien Volkj aunleit, dan sent wie ons gaunz secha, daut Jehova un sien leewa Sän emma met ons sennen woaren, krakjt endoont waut doa noch kjemt (läs Hebräa 13:5-6).

17. Woo feelst du die doaräwa, daut Jesus ons Leida es?

¹⁷ Sent wie nich sea schaftich, daut Jesus ons Leida es? Wie sent eene Organisazion, waut sikj eenich es, wan wie uk von veschiedne Kulturen, Lenda un Sproaken sent. Wie kjrieen väl Aunwiesungen ut Gott sien Wuat un woaren utjelieet, woo wie ons Prädichtwoakj doonen kjennen. Un jieda eena von ons lieet uk, woo wie de niee Natua auntrakjen kjennen un ons unjarenaunda leewen. Wie kjennen met onsen Leida Jesus werkjlich brow sennen!