1. Woo feel wie ons doaräwa, daut wie to Jehova bäden kjennen?

 JEHOVA, dee Himmel un Ieed jemoakt haft, haft ons een gaunz besondret Jeschenkj jejäft. Hee muak daut mäajlich, daut wie to am bäden kjennen. Denkj bloos mol doaraun, daut wie ons aulentiet to Jehova utschedden kjennen, endoont en waut vonne Sproak daut es un onen daut wie bie am brucken een Numma nämen. Aus wie to am bäden, wan wie em Hospitol sent ooda em Jefenkjnis, wie kjennen ons emma secha sennen, daut ons leeftolja Voda no ons horchen woat. Wie sent sea dankboa fa dit Jeschenkj.

2. Woo wees de Kjennich David, daut daut Jebäd fa am väl wieet wia?

² Fa dän Kjennich David wia daut Jebäd sea väl wieet. Hee säd en een Leet to Jehova: “Mucht mien Jebäd ver die komen aus een Ruakopfa” (Psa. 141:1-2). En David siene Tiet wort daut Ruakopfa von de Priesta fa de woare Aunbädunk jebrukt, un dee achten sea doaropp, daut see daut krakjt soo reedmuaken, aus Jehova daut wull (2. Mo. 30:34-35). Krakjt soo aus dee sea doaropp achten deeden, woo se daut Ruakopfa reedmuaken, wull David uk goot doaräwa nodenkjen, waut hee sajen wudd, ea hee to Jehova bäd. Krakjt daut well wie uk doonen. Wie wellen, daut onse Jebäda Jehova jefaulen.

3. Woo sell wie enjestalt sennen, wan wie to Jehova bäden, un wuarom?

³ Wan wie to Jehova bäden, dan well wie nich too driest räden. Enne Städ daut well wie grooten Respakjt wiesen. Denkj bloos mol aun de besondre Visionen, waut Jesaja, Hesekiel, Daniel un Johanes sagen. Dise Visionen sent aula sea veschieden, oba en eenen Stekj sent dee aula äwareen. Dee wiesen aula, waut fa een harlicha Kjennich Jehova es. Jesaja sach “däm HARN huach erhowen un  opp eenen groosoatjen Troon setten” (Jes. 6:1-3). Hesekiel sach Jehova, waut opp sienen himlischen Woagen saut, un “daut jlenzt doa runtom am aus een Räajenboagen” (Hes. 1:26-28). Daniel sach dän, “däm siene Doag nich to talen wieren”, un dee haud witte Kjleeda aun, un ut sienen Troon kjeemen Fiaflaumen rut (Dan. 7:9-10). Un Johanes sach Jehova opp eenen Troon setten, un rom am wia soo waut aus een butajeweenlich schmocka Räajenboagen, dän daut soo sach aus een Smaracht (Opb. 4:2-4). Wan wie äwa Jehova siene butajeweenelje Harlichkjeit nodenkjen, dan kjenn wie vestonen, waut vonne groote Iea daut es, daut wie to am bäden kjennen. Wie vestonen uk, woo wichtich daut es, daut wie daut met Respakjt doonen. Oba om waut sell wie bäden?

4. Waut lia wie von daut, waut Jesus aum Aunfank von daut “Unser-Vater”-Jebäd en Matäus 6:9-10 säd?

⁴ Läs Matäus 6:9-10. Jesus lieed siene Jinja bie de Boajchprädicht soo to bäden, daut Gott daut jefoll. Nodäm aus Jesus säd, “doawäajen sell jie soo bäden”, räd hee von soont, waut met Gott sien Väanämen to doonen haft. Hee bäd doarom, daut Gott sien Nomen sull heilich jehoolen woaren un daut Gott sien Kjennichrikj komen sull, waut Gott siene Jäajna aula venichten woat un daut noch mol aul daut goode komen sull, waut hee sikj fa de Ieed un de Menschen väajenomen haft. Wan wie en onse Jebäda äwa soone Sachen bäden, dan wies wie, daut Gott sien Wellen fa ons wichtich es.

5. Horcht Jehova too, wan wie om perseenelje Sachen bäden?

⁵ En daut “Unser-Vater”-Jebäd wees Jesus, daut et goot es, wan wie om perseenelje Sachen bäden. Wie kjennen Jehova doano froagen, daut hee ons daut Äten fa dän Dach jeft, daut hee onse Sinden vejeft, daut hee ons halpt, daut wie nich vesocht woaren, un daut hee ons von dän beesen rat (Mat. 6:11-13). Wan wie Jehova no soone Sachen froagen, dan wies wie am, daut ons daut aun siene Help fält un daut wie am jefaulen wellen.

6. Kjenn wie bloos om soont bäden, waut en daut “Unser-Vater”-Jebäd väakjemt? Laj daut ut.

 ⁶ Jesus velangd von siene Nofolja nich, daut dee krakjt de Wieed von daut “Unser-Vater”-Jebäd nosäden. Jesus räd en aundre Jebäda von veschiedne Sachen, waut am dan jroz wichtich wieren (Mat. 26:39, 42; Joh. 17:1-26). Biejlikj soo kjenn wie om aules bäden, wuaräwa wie besorcht sent. Wan wie waut entscheiden motten, dan kjenn wie om Weisheit un Vestentnis bäden (Psa. 119:33-34). Wan wie jroz met eene schwieeje Oppgow aunfangen, dan kjenn wie om Help bäden, daut wie dee goot doonen kjennen (Spr. 2:6). Elren kjennen fa äare Kjinja bäden, Kjinja fa äare Elren un wie aula kjennen un sellen fa onse Bibelstudiums bäden un uk fa dee, dee wie prädjen. Oba wan wie bäden, dan sell wie nich bloos emma no Sachen froagen.

7. Wuarom sell wie Jehova en onse Jebäda preisen?

⁷ Wie sellen kjeenmol vejäten, Jehova en onse Jebäda to lowen. Kjeena haft daut dolla vedeent, jeloft to woaren, aus ons Gott. Hee es “goot un reed to vejäwen”. Hee es uk “voll Jnod un Metleet, [un] . . . jeduldich, truhoatich un leeftolich” (Psa. 86:5, 15). Gaunz secha hab wie goode Uasoak, Jehova doafäa to lowen, wäa hee es un waut hee aules fa ons deit.

8. Waut sent Sachen, fa dee wie Jehova danken kjennen? (Psalm 104:12-15, 24).

⁸ Wie preisen Jehova en onse Jebäda, un wie danken am uk fa aul daut goode, waut hee ons jeft. Wie kjennen am biejlikj doafäa danken, woo scheen ons daut jeit, de wundaschmocke Kalieren von de Bloomen to seenen, scheenet Äten to haben ooda met goode Frind toop to sennen. Ons Voda jeft ons aul daut un noch väl mea, daut ons daut kaun scheengonen (läs Psalm 104:12-15, 24). Un daut es noch wichtja, daut wie am doafäa dankscheen sajen, daut wie äwajenuach jeisteljet Äten haben un uk fa de wundascheene Hopninj, waut hee ons jeft.

9. Waut kaun ons halpen, nich doavon to vejäten, Gott to danken? (1. Tessalonicha 5:17-18).

⁹ Wie kjennen soo leicht doavon vejäten, Jehova dankscheen to sajen fa aul  daut, waut hee fa ons deit. Waut kaun ons halpen, daut nich to vejäten? Du wurscht die kjennen eene List moaken von aul daut, wua du om jebät hast, un dan doa emma wada mol noppkjikjen un seenen, woo Jehova diene Jebäda beauntwuat haft. Un dan saj am dankscheen fa siene Help (läs 1. Tessalonicha 5:17-18). Denkj mol han, woo schaftich un jeleeft du die feelst, wan aundre die äare Dankboakjeit wiesen. Biejlikj soo moakt Jehova daut schaftich, wan wie nich doavon vejäten, am doafäa to danken, woo hee onse Jebäda beauntwuat haft (Kol. 3:15). Oba doa es noch een sea wichtja Grunt, Gott to danken.

10. Wuarom hab wie no 1. Petrus 2:21 no Grunt doafäa, Jehova to danken, daut hee sienen Sän no de Ieed schekjt?

¹⁰ Läs 1. Petrus 2:21. Wie sellen Jehova doafäa danken, daut hee sienen leewen Sän schekjt, om ons to lieren. Wan wie von Jesus läsen, dan lia wie sea väl äwa Jehova un woo wie am jefaulen kjennen. Wan wie Gloowen bewiesen aun Jesus sien Opfa, dan kjenn wie goode Frind von Jehova woaren un ons kjemt sienen Fräd togood (Reem. 5:1).

11. Wuarom bäd wie en Jesus sienen Nomen?

¹¹ Wie danken Jehova doafäa, daut wie derch sienen Sän to am bäden kjennen. Jehova brukt Jesus, om ons daut to jäwen, wuano wie jefroacht haben. Soone Jebäda, dee en Jesus sienen Nomen jesajcht woaren, hieet Jehova un hee beauntwuat dee. Jesus säd: “Waut jie en mienen Nomen bäden woaren, daut woa ekj doonen, daut de Voda derch dän Sän jeieet woat” (Joh. 14:13-14).

12. Waut es noch een Grunt, daut wie Jehova fa sienen Sän danken?

¹² Jehova vejeft ons onse Sinden derch daut Leesjelt von Jesus. De Bibel beschrift Jesus aus onsen “Huagenpriesta, dee em Himmel bie däm Aulmajchtjen sien Troon aun de rajchte Sied sett” (Heb. 8:1). Jesus es dee, “dee bie Gott dän Voda fa ons enstonen deit” (1. Joh. 2:1). Wie sent sea dankboa, daut Jehova ons eenen Huagen Priesta jeef, waut onse Schwakheiten vestonen kaun un fa ons bät (Reem. 8:34; Heb. 4:15). Wäajen wie onvolkomen sent, wudd wie onen Jesus sien Opfa kjeenmol to Jehova bäden kjennen. Wie kjennen Jehova goanich jenuach doafäa danken, daut hee ons dit wieetvolle Jeschenkj jeef – sienen leewen Sän!

13. Woo wees Jesus en dee Nacht ver sienen Doot, daut hee siene Jinja leewd?

¹³ Dee Nacht ea Jesus storf, bäd hee lang fa siene Jinja un fruach sienen Voda, daut hee “an verem beesen bewoaren” sull (Joh. 17:15). Daut wees, woo sea Jesus an leewd! Wan hee uk wist, daut hee boolt wudd selfst sea lieden motten, wia hee doch om siene Apostel bekjemmat.

14. Woo kjenn wie wiesen, daut wie onse Breeda un Sestren goot sent?

¹⁴ Wan wie Jesus nodoonen, dan denkj wie nich bloos aun daut, waut ons fält, oba wie bäden uk pinkjlich fa onse Breeda un Sestren. Wan wie daut doonen, dan kom wie Jesus sien Jeboot no, ons unjarenaunda to leewen, un wie wiesen Jehova, woo goot wie onse Breeda un Sestren sent (Joh. 13:34). Fa dee to bäden, woat an werkjlich halpen. Gott sien Wuat sajcht ons: “Daut Jebäd von eenem jerajchten kaun väl utrechten” (Jak. 5:16).

15. Wuarom fält onse Breeda un Sestren daut aun onse Jebäda?

 ¹⁵ Onse Breeda un Sestren fält daut aun onse Jebäda, wäajen dee sea väl schwoaret derchmoaken. Wie kjennen Jehova no Help froagen, daut dee kjennen met Krankheiten foadich woaren, met dän Schoden derch een Owwada, met Kjrich ooda Vefoljunk ooda met aundre Schwierichkjeiten. Wie kjennen uk fa onse Breeda un Sestren bäden, waut väl oppjäwen, om soone to halpen, waut daut needich fält. Veleicht kjanst du mau rajcht selfst wäm, waut en biejlikj soone Loag es. Du wurscht kjennen dän biem Nomen nanen, wan du fa dän bätst. Wan wie Jehova no Help fa dee froagen, dan wies wie, woo sea wie onse Breeda un Sestren leewen.

16. Wuarom sell wie fa dee bäden, waut de Vesaumlunk väastonen?

¹⁶ Dee, waut de Vesaumlunk väastonen, sent sea dankboa, wan wie fa dee bäden un daut halpt an sea. De Apostel Paulus wist uk, daut am daut aun de Jebäda von aundre fäld. Hee schreef: “Bät uk fa mie, daut ekj mucht brow jenuach sennen, daut Jeheemnis em Evangelium soo to prädjen aus sikj daut jehieet” (Efs. 6:19). Vondoag jeft daut uk väle flietje Breeda, waut ons biestonen. Wie wiesen an onse Leew, wan wie Jehova doano froagen, an to halpen.

17-18. Wanea woa wie veleicht jefroacht, ver aundre to bäden, un aun waut sell wie dan denkjen?

¹⁷ Eenjemol woa wie veleicht jefroacht, aus wie ver aundre bäden kjennen. Eene Sesta, waut een Bibelstudium haft, frajcht veleicht de Sesta, waut bie daut Studium bie es, aus see daut Jebäd sajen kaun. Dee Sesta, waut doa bie daut Studium bie es, kjant daut Studium veleicht nich sea goot, un doawäajen well see veleicht leewa daut Jebäd aum Enj sajen. Soo woat daut fa ar leichta sennen to weeten, om waut see fa daut Studium bäden kaun.

¹⁸ Een Brooda woat veleicht jefroacht, aus hee kaun bie een Toopkomen fa dän Prädichtdeenst ooda bie een jeweeneljet Toopkomen daut Jebäd sajen. De Breeda, waut soon Väarajcht haben, sellen doaraun denkjen, fa waut daut Toopkomen jedocht es. Daut Jebäd saul nich doafäa jebrukt woaren, de Vesaumlunk Rot to jäwen  ooda waut bekaunt to moaken. Bie de mieeschte Toopkomes es väajeseenen, daut Leet un Jebäd nich lenja dieet aus fief Minuten. Doawäajen es daut nich needich, daut de Brooda, waut bäden deit, “väl Wieed” brukt, besonda bie daut Aunfangsjebäd von een Toopkomen (Mat. 6:7).

19. Waut woat ons halpen, daut wie fa Gott sienen Dach reed sent?

¹⁹ Je noda Gott sien Dach kjemt, je iernsta sull die daut met daut Jebäd sennen. Äwa daut säd Jesus: “Oba siet waka un bät, daut jie aul daut utem Wäaj komen muchten, waut doa passieren saul” (Luk. 21:36). Wan wie pinkjlich bäden, dan woat ons Gloowen stoakj sennen un wie woaren reed sennen, wan Gott sien Dach kjemt.

20. Woo kjennen onse Jebäda soo sennen aus scheenrikjendet Ruakopfa?

²⁰ Waut hab wie nu jeseenen? Daut Jebäd es ons sea väl wieet. De wichtichste Sachen, om dee wie bäden kjennen, sent dee, dee met Jehova sien Väanämen to doonen haben. Un wie sajen uk dankscheen fa Gott sienen Sän un sien Kjennichrikj, un wie bäden fa onse Breeda un Sestren. Jehova well uk, daut wie om daut tietelje un jeistelje bäden. Wan wie goot doaräwa nodenkjen, waut wie en onse Jebäda sajen, dan wies wie, daut wie dit besondre Väarajcht sea schazen. Onse Wieed woaren dan fa Jehova soo aus scheenrikjendet Ruakopfa sennen, waut am jefelt (Spr. 15:8).