30. ARTIKJEL FA DAUT STUDIUM
Kjrie eene jratre Leew
“Mien Jebäd es, daut june Leew toonämen kunn” (FILIP. 1:9)
LEET 2 Dien Nomen es Jehova
WAUT WIE SEENEN WOAREN a
1. Waut hast du jelieet, aus du aunfungst de Bibel to studieren?
DENKJT die daut noch, aus du aunfungst, de Bibel to studieren? Veleicht wieescht du vewundat, daut Gott eenen Nomen haud. Ooda du freizhd die, aus du enwortst, daut Gott de Menschen nich wudd enne Hal kjwälen. Woomäajlich freizhd du die uk, aus du lieezhd, daut de Doodes oppstonen woaren un daut du woascht fa emma en een Paradies oppe Ieed läwen.
2. Woo haft die daut Bibelstudium noch jeholpen? (Efeesa 5:1-2).
2 Je mea du de Bibel studieezhd, je jratra wort diene Leew fa Jehova. Daut brocht die bat doa, daut uk notokomen, waut du lieezhd. De Rot ut de Schreft holp die, bätre Entscheidungen to moaken. Du hast uk jelieet, aundasch to denkjen un daut rajchte to doonen, wäajen du Gott jefaulen wust. Krakjt soo aus een Kjint siene leeftolje Elren nodeit, krakjt soo deetst du dienen himlischen Voda no (läs Efeesa 5:1-2).
3. Äwa waut vonne Froagen kjenn wie nodenkjen?
3 Wie kjennen mol doaräwa nodenkjen: “Es miene Leew fa Jehova nu aul stoakja jeworden aus don, aus ekj mie deepen leet? Denkj ekj nu dolla soo aus Jehova un bewies daut besonda doaderch, daut ekj miene Breeda un Sestren leew?” Wan “diene ieeschte Leew” uk een bät nojeloten haft, dan woa nich mootloos. Eenje von de ieeschte Christen jinkj daut krakjt soo. Un Jesus jeef nich opp met dee, un dee woat met die uk nich (Opb. 2:4, 7). Hee weet, daut wie dise Leew, waut wie hauden, aus wie de Woarheit kjanen lieden, wada trigjkjrieen kjennen.
4. Waut woa wie en disen Artikjel seenen?
4 Dis Artikjel woat ons wiesen, woo onse Leew fa Jehova un fa aundre emma jrata woaren kaun. Dan woa wie seenen, waut von Nutzen wie un aundre doavon haben, wan wie en onse Leew toonämen.
KJRIE EENE JRATRE LEEW FA JEHOVA
5-6. (a) Waut fa Schwierichkjeiten bejäajend Paulus en sienen Deenst? (b) Waut holp am, Jehova wieda to deenen?
5 De Apostel Paulus wia schaftich em Deenst fa Jehova, oba hee haud uk väl Schwierichkjeiten. Paulus reisd foaken lange Enja un daut wia nich emma leicht en dee Tiet. Opp siene Reisen wia hee eenjemol “derch Riefasch en Jefoa” un “derch Reibasch”. Noch mol wort hee von siene Fiend sea hunjsch behaundelt un mau rajcht vekjielt (2. Kor. 11:23-27). Paulus siene Gloowesbreeda weesen uk nich emma, daut see dankboa wieren fa aules, waut hee fa an deed (2. Kor. 10:10; Filip. 4:15).
6 Waut holp Paulus, Jehova wieda to deenen? Paulus haft väl äwa Jehova jelieet derch de Schreft un uk derch daut, waut hee beläwd. Hee wia sikj gaunz secha, daut Jehova Gott am leewd (Reem. 8:38-39; Efs. 2:4-5). Un hee kjrieech uk eene sea groote Leew fa Jehova. Paulus bewees siene Leew doaderch, daut hee “de heilje” deend un nich opphieed, dee to deenen (Heb. 6:10).
7. Opp woone Wajch kaun onse Leew fa Jehova jrata woaren?
7 Wan wie de Schreft sea studieren, kaun onse Leew fa Gott jrata woaren. Wan du de Bibel läst, proow doaräwa notodenkjen, waut die daut von Jehova lieet. Dan denkj äwa dit no: “Woo wiest mie dit Poat von de Schreft, daut Jehova mie leeft? Woo halpt mie daut, am to leewen?”
8. Woo kaun ons daut Jebäd halpen, daut onse Leew fa Gott jrata woat?
8 Noch eene Wajch, woo onse Leew fa Jehova jrata woaren kaun, es, wan wie ons Hoat ver am utschedden (Psa. 25:4-5). Jehova woat onse Jebäda dan uk beauntwuaten (1. Joh. 3:21-22). Khanh, b eene Sesta en Asien, sajcht: “Ieeschtlich leewd ekj Jehova wäajens daut, waut ekj äwa am lieed. Oba aus ekj dan späad, woo hee miene Jebäda beauntwuad, leewd ekj am noch väl dolla.”
KJRIE EENE JRATRE LEEW FA AUNDRE
9. Woo weesen Paulus siene Wieed, daut Timotäus sikj aunstrenjd, eene jratre Leew fa de Breeda to kjrieen?
9 Eenje Joaren nodäm daut Paulus een Christ jeworden wia, troff hee eenen jungen Maun, waut Timotäus heet. Timotäus leewd Jehova un uk de Menschen. Paulus säd to de Filippa: “Ekj hab sest kjeenem aus … [Timotäus], dee soo opprechtich om jun gootgonen besorcht es” (Filip. 2:20). Paulus deed Timotäus hia nich doafäa lowen, daut dee Sachen goot plonen kunn ooda een feina Rädna wia; oba hee bewundad daut, waut vonne groote Leew Timotäus fa de Breeda un Sestren haud. Gaunz secha freiden de Vesaumlungen, wua Timotäus hanjeschekjt wort, sikj sea to dän (1. Kor. 4:17).
10. Woo weesen Anna un äa Maun de Leew, waut see fa de Breeda un Sestren hauden?
10 Wie sieekjen uk no Jeläajenheiten, woo wie onse Breeda un Sestren uthalpen kjennen (Heb. 13:16). Well wie mol seenen, waut Anna beläwd, von dee wie en dän väajen Artikjel aul jerät haben. Nodäm daut doa een groota Storm jewast wia, besochten see un äa Maun eene Famielje von Breeda un sagen, daut daut Dak von dee äa Hus wia tweijegonen. Doawäajen haud de Famielje nu jroz nich mea reine Kjleeda. Anna vetalt: “Wie neemen dee äare Kjleeda met, deeden dee utwauschen, prassen, tooplajen un brochten dee wada trigj. Fa ons wia daut mau eene kjliene Sach, oba doaderch word wie met dee noch jratre Frind.” Wäajen Anna un äa Maun de Breeda un Sestren leewen, proowden see, an opp dise Wajch uttohalpen (1. Joh. 3:17-18).
11. (a) Woo kunnen aundre doaräwa denkjen, wan wie goodet doonen? (b) No Spricha 19:17 no, waut woat Jehova doonen, wan wie Leew wiesen?
11 Wan wie leeftolich to aundre sent un dee goots doonen, woaren dee seenen, daut wie ons aunstrenjen, Jehova notodoonen. Dee woaren daut veleicht dolla schazen, aus wie enwoaren. Khanh, von dee wie aul ea räden, denkjt daut noch von aul dee, waut ar holpen. See sajcht: “Ekj sie soo dankboa fa aul de leewe Sestren, waut mie met nom Prädichtdeenst neemen. Dee kjeemen mie aufholen, kroagden mie to Meddach un kjeemen uk doafäa opp, daut ekj wada goot no Hus kjeem. Nu kaun ekj vestonen, daut daut sea väl opp sikj haud. Oba dee deeden daut ut Leew.” Secha woaren nich aule de Jeläajenheit haben, äare Dankboakjeit to wiesen fa daut, waut wie fa dee jedonen haben. Khanh sajcht äwa dee, waut ar holpen: “Ekj wensch, ekj kunn fa dee uk waut goodet doonen, oba ekj weet nich mol, wua dee nu aula wonen. Oba Jehova weet daut, un doawäajen bäd ekj to am, daut hee an daut en miene Städ saul trigjjäwen.” Khanh haft rajcht. Jehova sitt aules, waut wie fa aundre doonen, wan daut uk mau kjliene Sachen sent. Hee schazt daut sea un sitt daut mau rajcht soo, aus wan hee ons nu waut schuldich wia, un hee woat ons doafäa beloonen (läs Spricha 19:17).
Wan wäa em jeisteljen veraunkjemt, dan kjikjt dee doano, woo dee aundre halpen kaun (See Varsch 12)
12. Woo kjennen Breeda äare Leew fa de Vesaumlunk wiesen? (See uk de Bilda.)
12 Wan du een Brooda best, woo kaust du dan aundre Leew wiesen un dee halpen? Een junga Brooda, waut Jordan heet, fruach mol eenen Eltesten, woo hee mea en de Vesaumlunk doonen kunn. De Eltesta lowd am ieeschtens doafäa, woo hee aul wia em jeisteljen veraunjekomen, un dan jeef hee am gooden Rot. Biejlikj rod hee Jordan too, tiedich bie de Toopkomes to sennen un de aundre to bejreessen, Auntwuaten to jäwen, pinkjlich met siene Deenstgrupp toop to prädjen un no Jeläajenheiten to sieekjen, woo hee kunn aundre uthalpen. Aus Jordan disen Rot nokjeem, lieed hee nich mau bloos, mea Sachen to doonen, oba uk siene Breeda un Sestren dolla to leewen. Dan wort Jordan eent dietlich: Wan een Brooda Deenstaumthelpa woat, dan fangt dee nich doamet aun, aundre to halpen, oba moakt doamet wieda (1. Tim. 3:8-10, 13).
13. Woo holp de Leew Christian, daut hee wada kunn Eltesta woaren?
13 Waut, wan du ea mol een Deenstaumthelpa ooda Eltesta wieescht? Jehova haft nich von aul diene Oabeit vejäten, waut du ut Leew fa am jedonen hast (1. Kor. 15:58). Un hee sitt uk de Leew, waut du fa wieda wiesen deist. Een Brooda, waut Christian heet, wia enteischt, aus hee nich mea kunn Eltesta sennen. Oba hee sajcht: “Ekj wort mie eenich, soo väl aus mäajlich fa Jehova to doonen, endoont aus ekj nu Eltesta wia ooda nich.” Met de Tiet kunn hee wada Eltesta sennen. Christian sajcht wieda: “Aum Aunfank feeld ekj mie een bät jerettelt. Oba dan docht ekj soo, wan Jehova well, daut ekj wada saul Eltesta sennen, dan woa ekj daut ut Leew fa am un ut Leew fa miene Breeda un Sestren doonen.”
14. Waut lia wie von daut, waut eene Sesta von Georgien sajcht?
14 Jehova siene Deena wiesen uk äaren Näakjsten Leew (Mat. 22:37-39). Biejlikj Elena, eene Sesta, waut en Georgien läft, sajcht: “Aum Aunfank deed ekj daut mieeschte bloos ut Leew fa Jehova prädjen gonen. Oba je jrata miene Leew fa am wort, je jrata wort miene Leew uk fa de Menschen. Ekj proowd mie väatostalen, waut vonne Schwierichkjeiten dee hauden un äwa waut dee wudden jleichen to räden. Je mea ekj äwa dee nodocht, je dolla wull ekj dee uk proowen to halpen” (Reem. 10:13-15).
AUNDRE LEEW TO WIESEN, BRINJT VÄL GOODET
Een mol wäm Leew wiesen kaun sea väle togood komen (See Varsch 15-16)
15-16. Waut fa goodet brinjt daut, aundre Leew to wiesen, soo aus daut nojemoakte Bilt wiest?
15 Wan wie onse Breeda Leew wiesen, dan kjemt nich bloos dee daut togood. Aus daut met de COVID-19-Krankheit aunfunk, weesen Paolo un siene Fru een deel elre Sestren, woo see äare Fons, Tablets un Komputasch brucken kunnen toom aundre Zeichnis jäwen. Fa eene Sesta wia daut schwoa, oba met de Tiet kunn see daut. Doaderch kunn see een deel von äa Frintschoft toom Owentmol enloden. Doa hauden sikj 60 Stekj von dee äwa Internet aunjeknekjt! De Sesta un äa Frintschoft kjeem daut aula togood, daut Paolo un siene Fru sikj aunjestrenjt hauden. Lota schreef de Sesta no Paolo un säd: “Dankscheen, daut jie ons elre Sestren daut jelieet haben. Ekj woa daut kjeenmol vejäten, daut Jehova sea om ons bekjemmat es un daut jie junt soo sea aunstrenjden.”
16 Von aul dit lieed Paolo sea väl. Hee wort en, daut de Leew väl wichtja es, aus väl to weeten ooda väl to kjennen. Hee sajcht: “Ea wia ekj een Kjreisoppsechta. Un wan ekj nu soo trigjdenkj, jleew ekj, daut de mieeschte aul von miene Räden vejäten haben. Oba wua dee secha noch aun denkjen es, daut ekj dee jeholpen hab.”
17. Wäa kjricht noch eenen Nutzen doavon, wan wie aundre Leew wiesen?
17 Wan wie aundre Leew wiesen, dan kjrie wie foaken selfst soonen Nutzen doavon, wua wie nich aun jedocht haben. Jonathan, waut en Nie-Seelaunt wont, haft daut beläft. Eenen heeten Sinowent no Meddach sach hee eenen Pionia-Brooda velenjd dän Wajch prädjen. Dan wort Jonathan sikj eenich, jieda Sinowent no Meddach met disen Brooda toop to prädjen. Hee deed daut ut Leew fa dän Brooda, oba hee haud daut nich jewist, woo goot daut fa am selfst wudd sennen. Jonathan sajcht wieda: “Ekj jleicht dän Prädichtdeenst bat dan goanich sea. Oba aus ekj hieed, woo goot dis Brooda lieren kunn, un aus ekj sach, waut von scheenen Deenst wie hauden, funk ekj aun, daut to jleichen. Dis Brooda wort doaderch uk mien gooda Frint, waut mie holp, em jeisteljen verauntokomen, dän Deenst to jleichen un Jehova noda to komen.”
18. Waut well Jehova von ons haben?
18 Jehova well, daut wie aula eene jratre Leew kjrieen fa am un fa aundre. Soo aus wie jelieet haben, woat onse Leew jrata fa Jehova, wan wie sien Wuat läsen un doaräwa nodenkjen un wan wie foaken to am bäden. Wie kjennen uk eene jratre Leew kjrieen fa onse Breeda un Sestren, wan wie dee opp veschiedne Wäaj halpen. Wan onse Leew noch jrata woat, woa wie bätre Frind sennen met Jehova un met onse jeistelje Famielje. Un dise Frind woaren fa emma bliewen!
LEET 109 Siet junt von Hoaten goot
a Krakjt endoont aus wie nie enne Woarheit sent ooda Jehova aul fa lang deenen, wie aula kjennen em jeisteljen veraunkomen. Dis Artikjel woat ons wiesen, woo wie daut doonen kjennen, daut onse Leew fa Jehova un fa aundre noch jrata woat. Denkj doaräwa no, woo du aul veraunjekomen best un woo du daut wieda doonen kaust.
b Eenje Nomes hab wie hia jeendat.
