1. Wuarom mott wie no Jesus sienen Rot horchen?

AUS Jesus von de latste Tiet räd, säd hee: “Siet väasechtich, daut jie junt nich derch . . . sorjen äwa dit Läwen, daut Hoat beloden” (Luk. 21:34). Wie motten no disen Rot horchen. Wuarom? Wiels wie motten met deeselwje Schwierichkjeiten foadich woaren aus aundre Menschen.

2. Met waut fa Schwierichkjeiten motten onse Breeda un Sestren foadich woaren?

² Eenjemol beläw wie veschiedne Schwierichkjeiten to deeselwje Tiet. See wie mol een poa Biespels. Een Brooda, waut John * heet, haft eene sea schlemme Krankheit un hee bruak gaunz toop, aus siene Fru am veleet, nodäm daut see 19 Joa befriet wieren. Un dan hieeden siene twee Dajchta noch opp, Jehova to deenen. Bob un Linda, een Poa Lied, hauden aundre Schwierichkjeiten. Dee veluaren beid äare Oabeit un dan uk noch äa Hus. Un bowenenn kjrieech Linda noch eene Hoatkrankheit, wua eena aun stoawen kaun, un eene aundre schwoare Krankheit.

3. Wuaräwa kjenn wie ons no Filippa 4:6-7 no secha sennen?

³ Wie kjennen ons secha sennen, daut ons Schepfa un leeftolja Voda Jehova weet, woo ons daut jeit, wan wie Schwierichkjeiten haben. Un hee well ons doamet halpen (läs Filippa 4:6-7). En Gott sien Wuat jeit foaken to läsen, waut fa  Schwierichkjeiten siene Deena derchjinjen. Doa kjenn wie uk läsen, woo Jehova dee doamet jeholpen haft. See wie mol een poa Biespels.

4. (a) Waut fa Schwierichkjeiten beläwd Elia? (b) Äwa waut wia Elia sikj secha?

⁴ Elia deend Jehova en eene sea schwoare Tiet un haud groote Trubbels. De Kjennich Ahab wia eent von de schlajchte Kjennichs en Israel. Hee befried sikj met Isebel; eene sea schlajchte Fru, waut Baal aunbäden deed. Dee beid brochten daut bat doa, daut en daut gaunze Launt Baal aunjebät wort, un dee muaken väl von Jehova siene Profeeten doot. Oba Elia kunn sikj fuatbrinjen. Hee äwaläwd uk eene groote Hungaschnoot, wäajen hee opp Jehova vetrud (1. Kjen. 17:2-4, 14-16). Un Elia veleet sikj uk opp Jehova, aus hee sikj jäajen de Baalsprofeeten stald un jäajen aundre, waut Baal aunbäden deeden. Hee rod de Israeliten too, Jehova auntobäden (1. Kjen. 18:21-24, 36-38). Elia haud väl Bewies doafäa, daut Jehova am en dise schwoare Tieden beschizt un holp.

5-6. (a) Woo feeld Elia sikj, soo aus 1. Kjennichs 19:1-4 sajcht? (b) Woo wees Jehova, daut hee Elia leewd?

⁵ Läs 1. Kjennichs 19:1-4. Elia kjrieech Angst, aus de Kjennijin Isebel am wull dootmoaken. Doawäajen brocht hee sikj fuat un kjeem no de Jäajent von Beerscheba. Hee wia soo mootloos, daut hee “sikj dän Doot [wenscht]”. Wuarom feeld hee sikj soo?  Elia wia onvolkomen; hee wia “een schwaka Mensch soo aus wie” (Jak. 5:17). Woomäajlich wia am aules too väl jeworden un wia sea meed. Elia docht veleicht, daut aules, waut hee fa de woare Aunbädunk jedonen haud, vejäfs wia un daut sikj en Israel nuscht vebätat haud un daut hee de eensja wia, dee Jehova aunbäd (1. Kjen. 18:3-4, 13; 19:10, 14). Veleicht sent wie een bät äwarauscht, daut dis trua Profeet soo docht. Oba Jehova kunn Elia vestonen.

⁶ Jehova beschuljd am nich, aus hee säd, woo hee sikj feeld. Enne Städ daut stoakjt Jehova Elia (1. Kjen. 19:5-7). Lota wees Jehova am siene groote Macht un holp dän doaderch leeftolich, sien denkjen to endren. Jehova säd am dan, daut en Israel noch 7 000 wieren, waut Baal nich aunbäden deeden (1. Kjen. 19:11-18). Doaderch wees Jehova Elia, daut hee am leewd.

7. Waut lieet ons daut, woo Jehova Elia holp?

⁷ Best du nu jroz en eene schwoare Loag? Daut es een Troost to weeten, daut Jehova vestonen kunn, woo Elia daut jinkj. Daut wiest ons, daut hee onse Loag uk vestonen kaun. Hee weet, woo väl wie doonen kjennen un uk waut wie denkjen un feelen (Psa. 103:14; 139:3-4). Wan wie uk soo opp Jehova vetruen, aus Elia deed, dan woat hee ons met de Trubbels halpen (Psa. 55:23).

8. Woo woat Jehova ons halpen, wan wie Schwierichkjeiten haben?

⁸ Wan wie Schwierichkjeiten haben, dan denkj wie veleicht, daut dee kjeenmol een Enj nämen woaren, un daut moakt ons mootloos. Wan daut bie die soo es, dan denkj doaraun, daut Jehova die met de Trubbels halpen woat. Woo woat hee die halpen? Hee well, daut du met am äwa diene Sorjen rätst. Un hee woat die biestonen, wan du am no Help prachascht (Psa. 5:4; 1. Pet. 5:7). Saj Jehova foaken, waut du fa Trubbels hast. Hee woat to die nich soo räden, aus hee to Elia deed, oba hee woat derch sien Wuat un derch siene Organisazion to die räden. Daut, waut du en de Schreft läst, kaun die Troost un Hopninj jäwen. Un diene Breeda un Sestren kjennen die uk Moot toospräakjen (Reem. 15:4; Heb. 10:24-25).

9. Woo kaun een gooda Frint ons halpen?

⁹ Jehova säd to Elia, daut Elisa am halpen sull. Soo kjrieech Elia eenen gooden Frint, waut am secha holp, wan hee daut schwoa haud. Biejlikj soo kaun een gooda Frint ons biestonen, wan wie ons bie dän utschedden (2. Kjen. 2:2; Spr. 17:17). Wan du denkjst, daut du kjeenen Frint hast, met dän du räden kaust, dan bäd to Jehova, daut du eenen riepen Christ finjst, waut die Moot toospräakjen kaun.

10. (a) Woo kaun daut, waut Elia beläwd, ons Moot jäwen? (b) Woo kaun Jesaja 40:28-29 ons halpen?

¹⁰ Jehova holp Elia, met siene Schwierichkjeiten foadich to woaren un am fa väl Joaren tru to deenen. Daut, waut Elia beläwd, jeft ons Moot. Eenjemol hab wie veleicht soo väl Schwierichkjeiten, daut wie gaunz meed un mootloos woaren. Oba wan wie ons opp Jehova veloten, dan woat hee ons de Krauft jäwen, am wieda to deenen (läs Jesaja 40:28-29).

11-13. Waut sad dree von Gott siene Deena ieeschtemma too?

¹¹ Aundre Menschen von de Bibeltiet hauden uk groote Trubbels. Hana biejlikj wia  sea bedrekjt, wiels see nich kunn Kjinja haben un äaren Maun siene aundre Fru ar wäajen daut daut Läwen schwoa muak (1. Sam. 1:2, 6). Hana jinkj daut soo schlajcht, daut see road un nich mea äten wull (1. Sam. 1:7, 10).

¹² De Kjennich David haud uk eenjemol schwoare Tieden. Wuarom? Hee feeld sikj sea schuldich wäajen aul de Fäla, waut hee jemoakt haud (Psa. 40:13). Sien leewa Sän Absalom stald sikj jäajen am un wort tolatst dootjemoakt (2. Sam. 15:13-14; 19:1). Un eent von David siene baste Frind verod am (2. Sam. 16:23–17:2; Psa. 55:13-15). Väl Psalmen, waut David schreef, wiesen, daut hee faust opp Jehova vetrud, wan hee uk sea mootloos wia (Psa. 38:6-11; 94:17-19).

¹³ Lota wort een Psalmenschriewa aufjenstich äwa de schlajchte Menschen. Woomäajlich staumd hee von dän Levit Asaf häa un deend “en Gott sien Heilichtum”. Dis Psalmenschriewa haud daut soo schwoa, daut hee nich mea schaftich un tofräd wia. Hee funk mau rajcht aun to twiewlen, aus sikj daut loond, Gott to deenen (Psa. 73:2-5, 7, 12-14, 16-17, 21).

14-15. Waut lieren ons de dree Biespels von Jehova siene Deena ieeschtemma?

¹⁴ De dree true Deena, von dee wie jroz räden, vetruden opp Jehova. Dee deeden iernstlich bäden un vetalden Jehova äare Sorjen un wuarom see sikj soo feelden. Un dee hieeden nich opp no de Städ to gonen, wua Jehova aunjebät wort (1. Sam. 1:9-10; Psa. 55:23; 73:17; 122:1).

¹⁵ Jehova stunt jieda eenem von dee leeftolich bie. Hana kjrieech wada ennalich Fräd (1. Sam. 1:18). David schreef: “De jerajchta  mott väl lieden, oba de HAR halpt am ut aulem rut” (Psa. 34:20). Un de Psalmenschriewa wort lota en, daut Jehova am “aun de rajchte Haunt” hilt un am leeftolich Rot jeef. Hee sunk: “Fa mie es daut goot dicht bie Gott to sennen. Ekj hab mien vetruen en Gott dän HARN jesat” (Psa. 73:23-24, 28). Waut lia wie von dise Biespels? Eenjemol woa wie uk groote Trubbels haben, waut ons sea toosaten. Oba wie kjennen met dee foadich woaren, wan wie doaraun denkjen, woo Jehova aundre aul jeholpen haft, un to am bäden un daut nokomen, waut hee von ons haben well (Psa. 143:1, 4-8).

16-17. (a) Wuarom sell wie ons nich von aundre trigjtrakjen? (b) Woo kjenn wie wada Krauft kjrieen?

¹⁶ Von dise dree Biespels kjenn wie noch waut lieren: Wie sellen ons nich von Jehova un siene Deena trigjtrakjen (Spr. 18:1). Nancy haud daut sea schwoa, aus äa Maun ar veleet. See sajcht: “Foaken jankad mie daut nich mol, aundre to seenen ooda met dee to räden. Oba je mea ekj mie trigjtrock, je truaja wort ekj.” Dit endad sikj, aus Nancy proowd aundre to halpen, waut uk Trubbels hauden. See sajcht: “Ekj horcht aundre too, wan dee mie  vetalden, waut an toosad. Ekj wort en, daut ekj mie selfst weinja bejaumad, wan ekj mea met aundre metfeeld.”

¹⁷ Wie kjennen wada Krauft kjrieen, wan wie no de Toopkomes wanken. Wan wie doa sent, dan kaun Jehova ons noch bäta halpen un treesten (Psa. 86:17). Doa stoakjt hee ons derch sienen heiljen Jeist, derch sien Wuat un derch siene Deena. Bie de Toopkomes kjenn wie ons unjarenaunda halpen, daut wie “mootja woaren” (Reem. 1:11-12). Eene Sesta, waut Sophia heet, säd: “Jehova un de Breeda holpen mie wiedatomoaken. De Toopkomes wieren fa mie daut wichtichste. Ekj sie enjeworden, daut ekj bäta met miene Sorjen un Trubbels foadich woa, wan ekj em Deenst un en de Vesaumlunk drock sie.”

18. Waut kaun Jehova en ons wirkjen, wan wie mootloos sent?

¹⁸ Wan wie mootloos sent, dan well wie doaraun denkjen, daut Jehova ons nu aul halpt, met onse Trubbels foadich to woaren. Hee wirkjt en ons “daut wellen un daut foadich moaken”, daut wie doamet delenjd komen, wan wie ons mootloos un helploos feelen (Filip. 2:13). Un hee vesprakjt uk, daut hee lota noch mol aule Trubbels wajchnämen woat.

19. Waut vesechat Reema 8:37-39 ons?

¹⁹ Läs Reema 8:37-39. De Apostel Paulus vesechat ons, daut ons nuscht von Gott siene Leew scheeden kaun. Woo kjenn wie onse Breeda un Sestren halpen, met äare Schwierichkjeiten foadich to woaren? En dän näakjsten Artikjel woa wie seenen, woo wie onse Breeda un Sestren Metjefeel wiesen un biestonen kjennen, soo aus Jehova daut deit.