23. ARTIKJEL FA DAUT STUDIUM
“Dien Nomen saul heilich jehoolen woaren”
“Dien Nomen, oo HAR, blift eewich!” (PSA. 135:13)
LEET 10 Loft Jehova, onsen Gott!
WAUT WIE SEENEN WOAREN *
1-2. Woone Sachen sent Jehova siene Zeijen sea wichtich?
WIE motten om twee wichtje Sachen omweeten. Eent es Gott sien Rajcht aus hechsta Harscha un daut aundre es, daut sien Nomen jeheilicht woat. Aus Jehova siene Zeijen jleich wie daut, äwa dise Teemasch to räden.
2 Wie aula weeten, daut Gott sien Nomen jeheilicht mott. Un wie haben uk jelieet, daut sikj daut utwiesen mott, daut Jehova werkjlich de basta Harscha es. Doawäajen sent ons de beid Sachen sea wichtich. Oba sent daut werkjlich twee veschiedne Sachen, waut nich toopjehieren? Nä.
3. Waut es bie Jehova sienen Nomen aules met en?
3 Rajcht jesajcht es bie Jehova sienen Nomen aules met en, waut met onsen Gott to doonen haft, uk waut fa een Harscha hee es. Wan wie sajen, daut nuscht wichtja es aus Jehova sienen Nomen to heiljen, dan jäw wie uk auntovestonen, daut sikj daut utwiesen mott, daut Jehova de basta Harscha es. Bie Jehova sienen Nomen es aulsoo uk met en, woo hee aus hechsta Harscha rejieren deit (see dän Kausten “ Eene sea wichtje Sach un waut doa met en es”).
4. Waut sajcht Psalm 135:13 von Gott sienen Nomen, un waut woa wie en disen Artikjel seenen?
4 Jehova sien Nomen es gaunz besonda (läs Psalm 135:13). Wuarom es dis Nomen soo wichtich? Woo wort toom ieeschte Mol Schaund opp dän jebrocht? Waut deit Gott toom sienen Nomen heiljen? Un woo kjenn wie fa sienen Nomen enstonen? Well wie mol seenen.
WAUT EEN NOMEN BEDIET
5. Waut wunda wie veleicht, wan wie hieren, daut Gott sien Nomen heilich jehoolen saul?
5 Jesus wees, waut eent von daut wichtichste wia, wan wie bäden. Hee säd je to Gott: “Dien Nomen saul heilich jehoolen woaren” (Mat. 6:9). Oba waut bediet daut? Wan wie waut heilich hoolen, dan kom wie doafäa opp, daut daut heilich ooda rein es. Veleicht wunda wie: “Es Jehova sien Nomen nich aul heilich un rein?” Toom dise Froag beauntwuaten woa wie nu mol seenen, waut een Nomen bediet.
6. Waut moakt eenen Nomen soo besonda?
6 Bie onsen Nomen sent nich bloos de Latren met en, waut wie schriewen ooda sajen, wan ons wäa frajcht, woo wie heeten. De Schreft sajcht je: “Een gooda Nomen es mea wieet aus grootet Rikjtum” (Spr. 22:1; Liera 7:1). Wuarom es een Nomen soo wichtich? Wäajen dee auntovestonen jeft, woo deejanja aunjeseenen es, waut dän haft, un woo aundre äwa dän denkjen. Woo een Nomen jeschräwen ooda jesajcht woat, es nich daut wichtichste. Daut es väl wichtja, waut aundre denkjen, wan see disen Nomen seenen ooda hieren.
7. Woo haben de Menschen Gott eenen schlajchten Nomen jemoakt?
7 Wan de Menschen Läajes von Jehova vetalen, dan moaken dee am eenen schlajchten Nomen. Daut funk aul em Goaden Eden aun, daut doa wäa Läajes von Gott vetald toom de Menschen waut schlajchtet von dän enbillen. Waut kjenn wie von dise Jeschicht lieren?
DE IEESCHTE LÄAJES, WAUT VON JEHOVA VETALT WORDEN
8. Waut wisten Adam un Eva, un waut hauden dee kunt doonen?
8 Adam un Eva wisten, daut Gott Jehova heet. Un dee wisten noch väl mea, waut sea wichtich wia, biejlikj daut Jehova de Schepfa wia un an daut Läwen jejäft haud un uk een wundascheenet Paradies un eenen volkomnen Ehepoatna (1. Mo. 1:26-28; 2:18). Oba wudden dee väl äwa daut goode nodenkjen, waut Jehova fa an jedonen haud? Wudd äare Leew un Dankboakjeit fa Jehova emma jrata woaren? Daut wees sikj ut, aus Gott sien Jäajna dee oppe Proow stald.
9. Waut säd Jehova no 1. Mose 2:16-17 un 3:1-5 no to Adam un Eva, un waut bild de Soton dee en?
9 Läs 1. Mose 2:16-17 un 3:1-5. De Soton säd derch eene Schlang to Eva: “Haft Gott werkjlich jesajcht, daut jie von irjent een Boom nich äten sellen?” De Soton brukt eene hinjalestje Froag toom Eva waut orrajchtet von Gott enbillen. En Werkjlichkjeit haud je Gott jesajcht, daut see von aule Beem äten kunnen, buta von dän eenen. Un doa wieren een deel veschiedne Beem (1. Mo. 2:9). Jehova es werkjlich friejäwrich. Daut jeef doa bloos eenen Boom, wua see nich von äten kunnen. Oba dän Soton siene Froag jeef auntovestonen, daut Gott jiezich wia. Un Eva docht dan woomäajlich: “Es doa met eemol irjentwaut goodet, waut Gott ons nich jent?”
10. Woo muak de Soton Gott eenen schlajchten Nomen, un woo kjeem daut ut?
10 Aum Aunfank wia Eva Jehova noch jehuarsom. Dee säd dän Soton krakjt, waut Gott von an haben wull un daut see dän Boom nich mol aunschieren sullen. Dee wist daut goot, daut see stoawen wudden, wan see nich jehuarsom wieren. Oba dan säd de Soton: “Jie woaren goanich stoawen” (1. Mo. 3:2-4). Daut wia sea driest. De Soton muak Jehova eenen schlajchten Nomen un stald daut soo han, aus wan Jehova jeloagen haud. Soo wort de Soton een Fient un een Läajna. Un Eva leet sikj veleiden un jleewd am (1. Tim. 2:14). See vetrud dolla opp dän Fient aus opp Jehova un daut brocht ar bat doa, daut see de schlajchste Entscheidunk muak, waut et jeef. See wort Jehova ojjehuarsom un eet von de Frucht, waut Jehova ar aufjesajcht haud. Un lota jeef see Adam uk von dee (1. Mo. 3:6).
11. Waut hauden Adam un Eva sult doonen, un waut deeden dee nich?
11 Waut haud Eva sult to dän Soton sajen? Stal die mol väa, woo daut utjekomen wia, wan see jesajcht haud: “Ekj kjan die nich. Oba ekj kjan mienen Voda Jehova un ekj räakjen dän väl un velot mie opp am. Aules, waut ekj un Adam haben, hab wie von dän jekjräajen. Woo schämt sikj die daut nich, schlajcht von dän to räden? Go wieda!” Woo sea wudd Jehova sikj nich jefreit haben, wan hee wudd jehieet haben, woo Eva am tru bleef! (Spr. 27:11). Oba Eva haud kjeene truhoatje Leew fa Jehova un Adam uk nich. Doawäajen stunden dee nich fa äaren himlischen Voda en, aus de Fient am eenen schlajchten Nomen muak.
12. Woo brocht de Soton Eva oppem Twiewel, un waut deeden Adam un Eva dan nich?
12 Woo kjeem daut bat doa? Daut ieeschte brocht de Soton Eva oppem Twiewel, daut see beduad, aus Jehova opp iernst een gooda Voda wia. Un aus de Soton dan luach un Jehova eenen schlajchten Nomen muak, stunden Adam un Eva nich fa Jehova en. See horchten no dän Soton un stalden sikj jäajen äaren himlischen Voda. Vondoag dän Dach schauft de Soton noch krakjt soo. Hee well Jehova derch Läajes eenen schlajchten Nomen moaken. Un deejanje, waut am jleewen, kjennen leicht bat doa komen, daut see nich mea no Jehova horchen wellen.
JEHOVA HEILICHT SIENEN NOMEN
13. Woo moakt Hesekiel 36:23 daut dietlich, von waut de Schreft sikj haundelt?
13 Lat Jehova daut toch, wan se am eenen schlajchten Nomen moaken? Sea lang nich! De gaunze Schreft wiest, woo Jehova sienen Nomen von de Läajes reinwauschen woat, waut de Fient em Goaden Eden vetalt haft (1. Mo. 3:15). Rajcht jesajcht haundelt de gaunze Schreft sikj von eene Sach: Jehova woat sienen Sän toom Kjennich moaken un derch daut Kjennichrikj sienen Nomen heiljen un oppe Ieed fa Fräd un Jerajchtichkjeit sorjen. Soo halpt de Schreft ons to vestonen, woo Jehova sienen Nomen heiljen woat (läs Hesekiel 36:23).
14. Woo haft Jehova sienen Nomen jeheilicht, nodäm aus de Trubbel em Goaden Eden oppkjeem?
14 De Soton haft aules jedonen, waut hee kunn, om Jehova sienen Wellen tonuscht to moaken. Oba daut haft am kjeenmol jejlekjt. De Schreft wiest ons, waut Jehova jedonen haft un daut hee de basta Voda un Harscha es, waut et jeft. Hee wia sea truarich, aus de Soton un aundre sikj jäajen am stalden (Psa. 78:40). Oba daut, waut hee met disen Trubbel deed, wees, woo väl Weisheit hee haud un woo jeduldich un jerajcht hee wia. Hee haft uk emma wada jewäsen, woo väl Macht hee haft. Un bie aules, waut hee deed, wia siene Leew to seenen (1. Joh. 4:8). Jehova schauft en eent wajch doaropp, daut sien Nomen jeheilicht woat.
De Soton vetald Eva Läajes äwa Jehova un haft uk noch emma schlajcht äwa dän jerät (See Varsch 9-10, 15) *
15. Woo well de Soton vondoag dän Dach Gott eenen schlajchten Nomen moaken, un waut deit daut aun de Menschen?
15 De Soton well Gott vondoag dän Dach noch eenen schlajchten Nomen moaken. Hee bilt de Menschen en, daut Gott nich väl Macht un Weisheit haft un uk nich jerajcht un leeftolich es. De Soton well dee biejlikj enräden, daut et kjeenen Schepfa jeft. Un wan doa wäa doch jleeft, daut et eenen Gott jeft, dan prooft de Soton dän entobillen, daut Gott un uk siene Jebooten ojjerajcht un too strenj sent. Hee lieet de Menschen mau rajcht, daut Jehova grausom es un de Menschen en een Halenfia kjwält. Wan dee dise schlajchte Läajes jleewen, dan kjennen dee leicht bat doa komen, daut dee goanich no Jehova horchen wellen. Un bat de Soton venicht woat, woat dee nich opphieren met siene Läajes un proowen, ons von Jehova auftobrinjen. Woat dän daut jlekjen?
WAUT WIE DOONEN KJENNEN
16. Waut kjenn wie doonen, waut Adam un Eva nich deeden?
16 Jehova lat onvolkomne Menschen methalpen, sienen Nomen to heiljen. Wie kjennen daut doonen, waut Adam un Eva nich deeden. De gaunze Welt es voll Menschen, waut Läajes von Jehova vetalen un am eenen schlajchten Nomen moaken. Oba wie haben de Jeläajenheit, fa Jehova entostonen un de Woarheit to sajen. Wie kjennen aundre weeten loten, daut Jehova heilich, jerajcht, goot un leeftolich es (Jes. 29:23). Wie kjennen am aus Harscha unjastetten un de Menschen wiesen, daut bloos siene Harschoft jerajcht es un aulem Fräd un Freid brinjen woat (Psa. 37:9, 37; 146:5-6, 10).
17. Woo muak Jesus sienen Voda sienen Nomen bekaunt?
17 Wan wie fa Jehova sienen Nomen enstonen, dan go wie en Jesus Christus siene Footspoaren (Joh. 17:26). Woo muak Jesus sienen Voda sienen Nomen bekaunt? Hee brukt dän un hee lieed de Menschen, woo Jehova werkjlich wia. De Farisäa lieeden de Menschen biejlikj emma wada, daut Jehova strenj, hoat un wiet auf wia un kjeen Metjefeel haud. Oba Jesus lieed de Menschen waut gaunz aundret. Hee muak dee dietlich, daut sien Voda jeduldich un leeftolich wia un daut dee vejäwen deed un nich too strenj wia. Jesus deed Jehova uk krakjt no un wees doaderch, woo dee wia (Joh. 14:9).
18. Woo kjenn wie de Läajes tonuscht moaken, waut von Jehova vetalt woaren?
18 Wie kjennen krakjt soo aus Jesus aundre von daut vetalen, waut wie von Jehova weeten, un dee lieren, woo leeftolich un frintlich hee es. Soo kjenn wie de Läajes tonuscht moaken, waut von Jehova vetalt woaren, un uk sienen Nomen heiljen, wäajen de Menschen dän dan uk heilich hoolen woaren. Un wie kjennen Jehova nodoonen, wan wie uk onvolkomen sent (Efs. 5:1-2). Wan wie aundre derch onse Wieed un onse Woakjen wiesen, woo Jehova werkjlich es, dan halp wie met, sienen Nomen to heiljen. Wie veteidjen dän uk, wan wie wäm halpen, nich mea aun de faulsche Lieren to jleewen, waut et äwa Gott jeft. * Un wie bewiesen uk, daut onvolkomne Menschen Gott tru sennen kjennen (Hiob 27:5, NW).
Wie wellen onse Bibelstudiums lieren, woo leeftolich un frintlich Jehova es (See Varsch 18-19) *
19. Waut sell wie aundre no Jesaja 63:7 no lieren?
19 Doa es noch waut, waut wie doonen kjennen, om Jehova sienen Nomen to heiljen. Wan wie aundre von de Schreft lieren, dan moak wie dee foaken dietlich, daut Jehova daut Rajcht haft, äwa aules to harschen, un doa es uk nuscht met orrajcht. Wie motten dee lieren, waut Jehova velangt, oba daut wichtichste es, daut dee lieren, onsen Voda Jehova to leewen un dän tru to sennen. Doawäajen mott wie von Jehova siene goode Sieden räden un doavon, woo dee werkjlich es (läs Jesaja 63:7). Opp dee Wajch kjenn wie aundre halpen, Jehova to leewen un dän to jehorchen, wiels dee dän wellen tru sennen.
20. Waut woa wie en dän näakjsten Artikjel seenen?
20 Waut kjenn wie doonen, daut onse Woakjen un ons lieren Iea opp Jehova sienen Nomen brinjt un aundre no am trakjt? Daut woa wie en dän näakjsten Artikjel seenen.
LEET 2 Dien Nomen es Jehova
^ Varsch 5 Met waut sellen aule Enjel un Menschen sikj aufjäwen? Wuarom es daut soo wichtich, un waut haft daut met ons to doonen? Wan wie dise un uk aundre Froagen kloa vestonen kjennen, dan woa wie Jehova noch noda komen.
^ Varsch 18 Wäajen doa aulmols kjeena aun jetwiewelt haud, aus Gott daut Rajcht haud, dän Nomen Jehova to haben, säd daut en onse Bieekja eenjemol, daut et nich needich wia, disen Nomen to rajchtfoadjen, ooda to veteidjen, daut hee disen Nomen haben kunn. Oba aune 2017 wort daut bie daut Joarestoopkomen oppem kloaren jebrocht. De Brooda säd doa: “Eefach jesajcht es daut nich orrajcht, wan doa wäa sajcht, daut wie doarom bäden sellen, daut Jehova sien Nomen veteidicht woat, wäajen se Jehova foaken eenen schlajchten Nomen moaken” (see daut huachdietsche Moonatsprogram von Jaunewoa 2018 opp jw.org®. Sieekj en BIBLIOTHEK > JW BROADCASTING®).
^ Varsch 62 BILTBESCHRIEWUNK: De Fient räd schlajcht äwa Gott un jeef Eva auntovestonen, daut Gott jeloagen haud. Hee haft noch von emma faulsche Iedeeen oppjebrocht, biejlikj daut Gott grausom es un daut Gott de Menschen nich jemoakt haft.
^ Varsch 64 BILTBESCHRIEWUNK: Een Brooda moakt bie een Bibelstudium dietlich, woo Gott es.
