1. Waut haft Jehova fa jiedrem eenen von ons jedonen?

JEHOVA haft jiedrem eenen von ons no sikj jetrocken (Joh. 6:44). Waut meent daut krakjt? Aus Jehova no de dusende Millionen Menschen oppe Welt kjikjt, haft hee jeseenen, daut du opprechtich wieescht un am leewen wurscht (1. Chr. 28:9). Jehova kjant die un vesteit die un hee leeft die. Es daut nich wundascheen?

2. Woo muak Jesus daut dietlich, daut Jehova om jieda Schop bekjemmat es?

² Jehova es sea om die bekjemmat un uk om aul diene Gloowesbreeda. Daut muak Jesus dietlich, aus hee Jehova met eenen Hoad vejlikjt. Waut deit de Hoad, wan eent von siene 100 Schop sikj vebeiselt? Hee woat “dee 99 tochloten un en de Boaj gonen, om daut to sieekjen, daut sikj veloaren haud”. Un wan hee daut finjt, dan woat hee daut nich utgrunzen, wiels sikj daut vebeiselt haud, oba hee woat sikj freien. Waut lia wie doavon? Jehova räakjent jieda Schop sea väl. Jesus säd: “Jrod soo es daut uk nich mien Voda sien Wellen, daut von dise kjliene eent veloaren jeit” (Mat. 18:12-14).

3. Von waut woa wie en disen Artikjel räden?

³ Secha well wie onse Gloowesbreeda kjeenmol mootloos moaken. Waut kjenn wie doonen, daut wie aundre nich tofaul brinjen? Un waut kjenn wie doonen, wan ons wäa velazt? Von daut woa wie en disen Artikjel räden. Oba ieescht mol well wie een bät mea von “dise kjliene” lieren, wua Matäus, Kapitel 18 von rät.

4. Wäa sent “dise kjliene”?

⁴ “Dise kjliene” sent Jesus siene Nofolja, endoont waut von Ella dee haben. Dee sent soo aus “Kjinja”, wiels dee sikj  wellich von am lieren loten (Mat. 18:3). Dee komen von veschiedne Städen un Velkja un sent gaunz veschieden. Oba dee jleewen aula aun Jesus un hee räakjent dee sea väl (Mat. 18:6; Joh. 1:12).

5. Woo denkjt Jehova doaräwa, wan doa wäa eent von siene Deena tofaul brinjt ooda velazt?

⁵ Aul “dise kjliene” sent bie Jehova väl wieet. Daut woa wie noch väl bäta vestonen kjennen, wan wie mol äwalajen, woo wie äwa Kjinja denkjen. Wie räakjnen dee väl un wellen dee beschitzen, wiels dee noch nich soo väl Krauft, Erfoarunk un Weisheit haben. Wie jleichen daut nich, wan doa wäa eenen aundren schlajcht behaundelt, oba wie oajren ons noch väl dolla, wan doa wäa een Kjint schlajcht behaundelt. Krakjt soo well Jehova ons beschitzen un oajat sikj sea, wan doa wäa eent von siene Deena tofaul brinjt ooda velazt (Jes. 63:9; Mar. 9:42).

6. Woo denkjt de Welt no 1. Korinta 1:26-29 no äwa Jesus siene Nofolja?

⁶ En waut fa Stekjen sent Jesus siene Nofolja noch soo aus de “kjliene”? Wiels dee fa de Welt to beseenen nich besonda rikj, bekaunt ooda majchtich sent. Doawäajen talt de Welt an fa jerinj (läs 1. Korinta 1:26-29). Oba Jehova denkjt gaunz aundasch.

7. Woo well Jehova, daut wie äwa onse Breeda un Sestren denkjen sellen?

⁷ Jehova leeft aul siene Deena, endoont aus dee am aul Joaren deenen ooda noch mau jroz aunjefongen haben. Fa am sent aule Breeda un Sestren väl wieet un soo saul daut fa ons uk sennen. Wie wellen aule Breeda leewen un nich bloos een poa von dee (1. Pet. 2:17, NW). Wie sellen reed sennen aules to doonen, waut doa needich es, om dee to beschitzen un fa dee to sorjen. Wan wie enwoaren, daut wie wäm velazt ooda beleidicht haben, dan sell wie daut nich eefach tochloten un denkjen, daut deejanja too neiw es un sikj aul wada berujen woat. Wuarom sent eenje beleidicht? Dee feelen sikj veleicht nuscht wieet, un daut kaun doamet to doonen haben, woo dee oppjewossen sent. Aundre sent noch nich lang en de Woarheit un haben daut noch nich jelieet, woo see met aundre äare Fäla omgonen kjennen. Endoont waut de Uasoak es, wie sellen aules doonen, waut wie kjennen, om daut met dee wada goottomoaken. Un eena, waut foaken beleidicht es, mott uk doaraun denkjen, daut daut eene Schwakheit es, wua dee aun schaufen mott. Wan dee daut deit, dan woat dee mea Freid haben un uk met aundre bäta foadich woaren.

8. Waut vonne Enstalunk hauden väle en Jesus siene Tiet?

⁸ Wuarom räd Jesus von “dise kjliene”? Siene Jinja hauden am jefroacht: “Wäa es de jratsta em Himmelrikj?” (Mat. 18:1). Fa väl Juden ieeschtemma wia daut sea wichtich, waut fa een Aumt ooda Oppgowen see hauden. Een Jelieeda sajcht: “Väl Menschen wieren bloos doarom todoonen, daut aundre an ieren sullen un daut se bekaunt wieren.”

9. Waut musten Jesus siene Nofolja doonen?

⁹ Jesus wist, daut väl Juden bäta sennen wullen aus de aundre, un siene Jinja musten sikj sea aunstrenjen aundasch to sennen. Doawäajen säd hee to dee: “Wäa mank junt de jratsta es, saul soo sennen aus de jinjsta, un de väanämsta soo aus een Deena” (Luk. 22:26). Wie sent soo aus “de jinjsta”, wan wie “dän näakjsten hecha [achten]” aus ons selfst (Filip. 2:3). Je mea wie daut doonen, je weinja woat  daut bat doa komen, daut wie aundre tofaul brinjen.

10. Waut fa eenen Rot von Paulus sell wie ons to Hoaten nämen?

¹⁰ Aule Breeda un Sestren sent ons en jewesse Stekjen äwaläajen. Daut woa wie fuaz en, wan wie no dee äare goode Sieden kjikjen. Wie sellen ons dän Rot to Hoaten nämen, waut de Apostel Paulus de Korinta jeef. Hee säd: “Wäa jeft die daut rajcht, die waut entobillen? Un waut hast du, daut die nich es jejäft worden? Un wan du daut jekjräajen hast, wuarom puchst du die dan, aus wan du die daut selfst vedeent hast?” (1. Kor. 4:7). Wie sellen nich proowen de Oppmoakjsomkjeit to kjrieen ooda ons fa bäta talen aus de aundre. Wan een Brooda feine Räden hoolen kaun ooda eene Sesta väl Bibelstudiums aunfangen kaun, dan sellen dee Jehova de Iea doafäa jäwen.

11. Waut kjenn wie von daut Jlikjnis von dän Kjennich un dän Kjnajcht lieren?

¹¹ Nodäm daut Jesus to siene Jinja säd, daut see aundre nich sullen tofaul brinjen, vetald hee een Jlikjnis von eenen Kjennich un sienen Kjnajcht. De Kjennich strikjt sienen Kjnajcht eene groote Schult, waut dee am kjeenmol wudd haben kunt trigjtolen. Oba lota wia dis Kjnajcht nich reed, eenen von siene Metoabeida eene väl kjlandre Schult to strikjen. Tolatst leet de Kjennich disen schlajchten Kjnajcht enstoppen. Waut lia wie doavon? Jesus säd: “Soo woat mien himlischa Voda daut met een jiedrem von junt moaken, wan jie junen Brooda siene Äwaträdungen nich von Hoaten vejäwen” (Mat. 18:21-35).

12. Woo kaun aundre daut schoden, wan wie wäm nich vejäwen wellen?

¹² Daut, waut de Kjnajcht deed, schod am un uk aundre. Ieeschtens schod daut dän aundren Kjnajcht, wiels hee “leet am enstoppen, bat hee aules betolen wudd, waut hee schuldich wia”. Un dan schod daut uk de aundre, waut daut beoobachten kunnen, waut hee deed. “Aus siene Metkjnajchten daut sagen, wieren see sea bedrekjt”. Daut, waut wie doonen, deit uk waut aun aundre. Woo kaun daut utkomen, wan ons wäa orrajcht deit un wie dän nich vejäwen wellen? Ieeschtens schod wie dänjanjen, wiels wie dän nich Leew wiesen un togoodhoolen un dän woomäajlich utem Stich gonen. Tweedens feelen de aundre von de Vesaumlunk sikj uk nich maklich, wan dee enwoaren, daut wie met wäm nich Fräd haben.

13. Waut kjenn wie von eene Pionia-Sesta lieren?

¹³ Wan wie onse Breeda un Sestren vejäwen, dan jeit ons daut bäta un aundre uk. Daut beläwd eene Pionia-Sesta, to dee wie Crystal sajen. Eene Sesta von de Vesaumlunk beleidijd ar. Crystal sajcht: “Daut, waut dee eenjemol to mie säd, spekjt mie soo aus een Massa. Mie jankad nich mol mea, em Deenst en dautselwje Foatich to sennen, wua dee wia. Ekj haud nich mea soo väl Freid aus ea un mie jankad daut nich mea, prädjen to gonen.” Crystal docht, daut see goode Uasoak haud doll to sennen. Oba see bleef nich doll un deed sikj uk nich selfst bejaumren. See wia deemootich un kjeem dän biblischen Rot no, waut see en dän Artikjel funk “Aus dem Herzen heraus vergeben” em Wachtturm vom 15. Oktooba 1999. See hilt de Sesta togood. Crystal sajcht: “Ekj sie enjeworden, daut wie ons aula bemieejen motten niee Menschen to woaren un daut Jehova ons jieda Dach wellich vejeft. Nu feel ekj mie väl leichta un ekj hab wada Freid.”

14. (a) Met waut haud de Apostel Petrus no Matäus 18:21-22 no woomäajlich Trubbel? (b) Waut kjenn wie doonen, wan wie biejlikj en soone Loag sent?

 ¹⁴ Wie weeten, daut wie vejäwen sellen un daut daut daut baste es. Oba daut kaun doawäajen schwoa sennen. Veleicht jinkj dän Apostel Petrus daut eenjemol uk soo (läs Matäus 18:21-22). Waut kaun ons halpen to vejäwen? Ieeschtens kjenn wie doaräwa nodenkjen, woo foaken Jehova ons aul togood jehoolen haft (Mat. 18:32-33). Wie haben daut nich vedeent, oba hee vejeft ons wellich (Psa. 103:8-10). Un “dan sull wie ons uk unjarenaunda goot sennen”. Wie kjennen ons daut nich utläsen, aus wie onse Breeda un Sestren vejäwen wellen ooda nich, oba wie sent daut schuldich (1. Joh. 4:11). Tweedens kjenn wie doaräwa nodenkjen, woo daut utkomen woat, wan wie onse Breeda vejäwen. Doaderch kjenn wie dänjanjen halpen, waut ons orrajcht jedonen haft, un methalpen, daut de Vesaumlunk veeent blift un daut wie kjennen Frind met Jehova bliewen, un wie woaren ons väl leichta feelen (2. Kor. 2:7; Kol. 3:14). Wie kjennen Jehova uk no Help froagen, waut daut haben well, daut wie vejäwen sellen. Lot daut nich too, daut de Soton die un diene Gloowesbreeda uteneenbrinjt (Efs. 4:26-27). Wie brucken Jehova siene Help, daut wie dän Fient nich enne Faul nenjeroden.

15. Waut kjenn wie doonen, wan ons waut baudat, waut een Brooda ooda eene Sesta jedonen haft, soo aus Kolossa 3:13 sajcht?

¹⁵ Waut sell wie doonen, wan een Gloowesbrooda waut jedonen haft, waut ons sea baudat? Dan sell wie aules doonen, waut wie kjennen, om Fräd to hoolen. Bäd iernstlich to Jehova un froag am doano,  daut hee dänjanjen säajnen mucht un daut hee die halpen mucht, dän siene goode Sieden to seenen, waut Jehova bie dän sea jleicht (Luk. 6:28). Wan du daut nich vejäten kaust, waut de Brooda jedonen haft, dan äwalaj die, woo du dän doavon aunräden kaust. Vejät nich, daut dee die secha nich met Fliet weedoonen wull (Mat. 5:23-24; 1. Kor. 13:7). Wan du met dän rätst, kaust du doaraun denkjen, daut dee daut secha nich utem schlajchten Senn jedonen haft. Waut kaust du doonen, wan dee goanich Fräd moaken well? Dan bliew wieda jeduldich met dän un vedroag dän (läs Kolossa 3:13). Daut wichtichste es, daut du dän nich doll blifst, wiels dan wurscht du nich kjennen Frind met Jehova bliewen. Lot die kjeenmol tofaul brinjen. Doaderch bewiest du, daut du Jehova mea räakjenst aus irjent sestwaut (Psa. 119:165).

16. Waut saul jieda eena von ons doonen?

¹⁶ Wie sent sea dankboa, daut wie Jehova veeent deenen kjennen aus “eene Häad” unja eenen Hoad (Joh. 10:16). En daut Buak Organisiert, Jehovas Willen zu tun sajcht daut oppe Sied 165: “Dise Eenheit kjemt ons togood un doawäajen sell wie aula ons Poat doatoo doonen, daut dee uk blift.” Doawäajen sell wie ons “doarenn eewen, daut wie soo äwa onse Breeda un Sestren denkjen, aus Jehova deit.” Fa Jehova sent wie aula kjlien, oba wie sent doawäajen bie am väl wieet. Sent diene Gloowesbreeda bie die uk väl wieet? Jehova sitt aules, waut du deist, om dee to halpen un dee bietostonen, un hee schazt daut sea (Mat. 10:42).

17. To waut sent wie ons eenich?

¹⁷ Wie leewen onse Gloowesbreeda. Doawäajen well wie ons “väanämen däm näakjsten nich een Hindanis en sienen Wajch to sennen” (Reem. 14:13). Wie talen de Breeda un Sestren fa hecha aus ons un wellen dee von Hoaten vejäwen. Lot wie nich too, daut aundre ons kjennen tofaul brinjen. Enne Städ daut well wie “sträwen to doonen, waut toom Fräd deent, un wuaderch wie eena dän aundren halpen” (Reem. 14:19).