DE Israeliten wieren daut aul von lang emma jewant, waut to betolen, om de woare Aunbädunk to unjastetten. Oba en Jesus siene Tiet musten de Juden soo väl Taks betolen, daut daut sea schwoa wort.

Aule utjewosne Juden musten jieda Joa eenen haulwen Schekel (twee Drachma) betolen toom daut Aunbädungszelt unjastetten un lota dän Tempel. En Jesus siene Tiet brukten dee disen Taks toom de Opfa kjeepen un toom dän Tempel unjahoolen, dän Herodes jebut haud. Eenje Juden fruagen Petrus, woo Jesus äwa disen Taks docht. Oba Jesus wia doa nich jäajen. Hee säd Petrus mau rajcht, woo hee daut Jelt towäaj kjrieen kunn toom disen Taks betolen (Mat. 17:24-27).

Gott siene Deena musten ieeschtemma uk dän Tieenden betolen. Daut bediet, een Tieendel von de Arnt un von daut Jelt, waut see sest noch enkjrieejen (3. Mo. 27:30-32; 4. Mo. 18:26-28). De Gloowesleidasch wieren sea neiw un säden, daut de Menschen mau rajcht musten von daut Jreens un “vom Päpakrut, Anies un Dell” dän Tieenden betolen. Jesus wia nich doajäajen, dän Tieenden to betolen, oba hee muak dietlich, waut vonne Heichla de Schreftjelieede un Farisäa wieren (Mat. 23:23).

De Juden musten dan uk noch de Reema väl Taks betolen, wäajen dee äwa an rejieeden. Biejlikj musten dee Taks tolen, waut doa Launt hauden, un dee kunnen daut met Jelt doonen ooda met Sachen. Daut wia woomäajlich von 20 bat 25 Prozent von daut, waut daut Launt enbrocht. Un bowenenn must noch jieda Jud dän Kopptaks betolen. Von disen Taks wia de Räd, aus de Farisäa Jesus Froagen stalden. Hee muak dan dietlich, woo eena äwa Taks tolen denkjen sull, un säd: “Jäft dän Kjeisa waut sient es, un jäft Gott, daut waut Gott sient es” (Mat. 22:15-22).

De Hendla musten uk Taks tolen, wan dee Sachen toom vekjeepen no eene aundre Jäajent fieeden ooda von doa kjrieejen. Daut wort von dee jefoddat biem Howen, bie de Brigjen, bie de Kjriezwäaj un doa, wua daut no eene Staut ooda no eenen Moakjt jinkj.

En de Tiet, aus de Reema äwa de Juden harschten, wia daut sea schwoa, daut dee soo väl Taks betolen musten. De reemischa Jeschichtsforscha Tacitus schreef, daut en de Tiet von dän Kjeisa Tiberius, aus Jesus oppe Ieed wia, “Sierien un Judäa prachaden, daut see weinja Taks tolen wullen, wäajen daut soo schwoa wia.”

Un doaderch, woo se dän Taks kollakjten deeden, wort daut bloos noch schwanda. Daut eena kunn Takskollakjta woaren, recht sikj doano, wäa daut dieeschte betold. Deejanja, waut daut dan wort, neem sikj dan Helpa aun toom daut toopsaumlen. Un aul dee wullen doa biesied noch waut met vedeenen. Daut späat sikj soo, daut Zachäus eent von soone Takskollakjta wia, waut sikj aundre aunjenomen haud (Luk. 19:1-2). Daut es nich toom wundren, daut de Menschen daut Taks tolen nich jleichten un äwa dänjanjen vehaust wieren, dän see daut Jelt jäwen musten.