1. Wuarom feelen Jehova siene Deena sikj eenjemol auleen?

DE MIEESCHTE von ons feelen sikj mol auleen. Bie eenje es daut haustich vebie. Bie aundre blift daut lenja. Eenjemol feel wie ons eensom, wan wie uk mank eene Häad Menschen sent. Fa eenje es daut schwoa, Frind to finjen, wan dee to eene niee Vesaumlunk jehieren. Aundre komen von eene Famielje, waut sea vebungen wia, un dee es daut dan sea schwoa, wan dee wiet wajchtrakjen. Noch aundre bangen sikj sea no wäm, dee aul jestorwen es. Un eenje Breeda un Sestren, besonda dee, waut noch nich lang enne Woarheit sent, feelen sikj auleen, wäajen dee von äare Famielje ooda Frind von ea aufjewäsen ooda vefolcht woaren.

2. Waut woa wie nu derchgonen?

² Jehova kjant un vesteit ons gaunz un goa. Hee weet daut, wan wie ons auleen feelen, un hee well ons halpen. Woo deit hee ons halpen? Waut kjenn wie selfst doamet doonen? Un woo kjenn wie aundre von de Vesaumlunk biestonen, wan dee sikj auleen feelen? Dit woa wie nu seenen.

3. Woo wees Jehova, daut hee om Elia bekjemmat wia?

³ Jehova well, daut jieda eena von siene Deena schaftich es. Hee es jiedrem eenen von ons no aun un weet, wäa sikj truarich un mootloos feelt (Psa. 145:18-19). Denkj mol doaräwa no, woo sea Jehova om dän Profeet Elia  bekjemmat wia. Dis trua Maun läwd en eene schwoare Tiet en Israel. Jehova siene Deena worden sea vefolcht un besonda Elia wullen se dootmoaken (1. Kjen. 19:1-2). Elia docht uk, daut hee de eensja Profeet wia, waut Jehova noch deend, un daut haft am woomäajlich noch dolla toojesat (1. Kjen. 19:10). Gott wort daut fuaz en un hee schekjt eenen Enjel toom am sajen, daut hee nich auleen wia un daut doa noch een deel aundre en Israel wieren, waut am deenden (1. Kjen. 19:5, 18).

4. Woo wiest Markus 10:29-30, daut Jehova dee biesteit, waut nich mea Help von äare Frind un Famielje kjrieen?

⁴ Jehova weet, daut wie veleicht väl oppjäwen motten, daut wie am deenen kjennen. Veleicht wellen onse Frind ooda onse Famielje ons nich mea halpen, waut Jehova nich deenen. Dän Apostel Petrus muak daut veleicht uk Sorjen, aus hee Jesus fruach: “Wie haben aules veloten un sent die nojefolcht. Waut woa wie doafäa kjrieen?” (Mat. 19:27). Jesus säd leeftolich to siene Jinja, daut see eene groote jeistelje Famielje kjrieen wudden (läs Markus 10:29-30). Un Jehova es daut Haupt von dise jeistelje Famielje un vesprakjt, daut hee aul dee unjastetten woat, waut am deenen wellen (Psa. 9:11). Well wie mol seenen, waut du doonen kaust, daut Jehova die halpt, met diene Eensomkjeit foadich to woaren.

5. Wuarom es daut goot, wan wie doaräwa nodenkjen, woo Jehova ons biesteit?

⁵ Denkj doaräwa no, woo Jehova die halpt (Psa. 55:23). Daut woat die halpen, rajcht äwa diene Loag to denkjen. Eene onbefriede Sesta, waut Carol * heet un auleen von äare Famielje enne Woarheit es, sajcht: “Wan ekj doaräwa nodenkj, woo Jehova mie ea bie Trubbels jeholpen haft, dan feel ekj mie nich soo auleen. Un daut wiest mie uk, daut Jehova mie wieda emma biestonen woat.”

6. Woo kaun 1. Petrus 5:9-10 ons halpen, wan wie ons auleen feelen?

⁶ Denkj doaräwa no, woo Jehova siene  Deena halpt, waut sikj auleen feelen (läs 1. Petrus 5:9-10). Hiroshi es een Brooda, waut aul fa väl Joaren de eensja von siene Famielje es, waut enne Woarheit es. Hee sajcht: “En de Vesaumlunk kaun eena daut foaken seenen, daut aule Trubbels haben. Daut to weeten, daut aule äa bastet doonen toom Jehova deenen, kaun ons Moot jäwen, wan wie nich Frintschoft enne Woarheit haben.”

7. Woo kaun daut bäden die halpen?

⁷ Bliew em jeisteljen drock. Doa es met en, daut du Jehova aules sajchst, woo du die feelst (1. Pet. 5:7). Eene junge Sesta, waut Massiel heet, feeld sikj auleen, wäajen see de eensje von äare Famielje wia, waut Jehova deend. See sajcht: “Iernstlich to Jehova bäden wia eent von daut, waut mie daut dolste holp, met miene Eensomkjeit foadich to woaren. Hee wia een werkjelja Voda fa mie un ekj bäd foaken em Dach to am un säd am aules, woo ekj mie feeld.”

8. Woo halpt die daut, Gott sien Wuat to läsen un doaräwa notodenkjen?

⁸ Läs pinkjlich en Gott sien Wuat un denkj äwa de Varzhen no, waut die wiesen, daut Jehova die leeft. Bianca es eene Sesta, waut foaken schlajcht jesajcht kjricht von äare Famielje. See sajcht: “Waut mie halpt, es en de Schreft to läsen un doaräwa notodenkjen un uk de Läwesjeschichten von Jehova siene Deena, waut biejlikj soone Schwierichkjeiten hauden aus ekj.” Eenje lieren sikj Bibelvarzhen utwendich, waut an Moot jäwen, soo aus Psalm 27:10 un Jesaja 41:10. Aundre horchen sikj de Bibel aun, enne Städ daut see dee läsen, ooda daut oppjeschnakte toom sikj fa de Toopkomes reedmoaken. Un daut halpt an, daut see sikj nich soo auleen feelen.

9. Woo halpt die daut, bie de Toopkomes to sennen?

⁹ Sie emma bie de Toopkomes. Daut woat die Moot jäwen un du kaust de Breeda un Sestren bäta kjanen lieren (Heb. 10:24-25). Massiel, von dee wie ea aul räden, sajcht: “Ekj wia sea bleed, oba ekj wort mie doawäajen eenich, bie jieda Toopkomen to sennen un eene Auntwuat to jäwen. Daut holp mie, daut ekj mie uk Poat von de Vesaumlunk feeld.”

10. Wuarom es daut soo needich, daut wie true Breeda un Sestren to Frind haben?

¹⁰ Woa Frint met true Breeda un Sestren. Sieekj die soone Frind von de Vesaumlunk, wua du waut von lieren kaust, endoont waut von Ella dee haben un von wua dee häakomen. De Schreft wiest  ons, daut de Elre väl Weisheit haben (Hiob 12:12, NW). De Elre kjennen uk väl von de Junge en de Vesaumlunk lieren. David wia väl jinja aus Jonatan, oba dee wieren doawäajen goode Frind (1. Sam. 18:1). David un Jonatan holpen sikj unjarenaunda Jehova to deenen, wan dee uk groote Schwierichkjeiten hauden (1. Sam. 23:16-18). Irina es bat nu de eensje von äare Famielje, waut Jehova deent. See sajcht: “Onse Breeda un Sestren kjennen werkjlich soo sennen aus Elren un Jeschwista. Jehova kaun ons derch dee halpen, wan daut fält.”

11. Woo kjenn wie goode Frind kjrieen?

¹¹ Sikj fresche Frind to sieekjen es goanich soo leicht un besonda nich, wan eena bleed es. Ratna es eene Sesta, waut bleed es un väl Jäajenstaunt haud, aus see de Woarheit kjanen lieed. See sajcht: “Ekj must daut vestonen, daut ekj de Help brukt von de Breeda un Sestren.” Daut kaun schwoa sennen, wan wie aundre vetalen wellen, woo wie ons feelen. Oba wan wie daut doonen, dan kjenn wie goode Frind woaren. Onse Frind wellen ons Moot toospräakjen un halpen, oba wie motten dee uk weeten loten, woo see daut doonen kjennen.

12. Waut kaun ons halpen, goode Frind to kjrieen?

¹² Eent von daut baste, woo eena goode Frind kjricht, es, wan eena met dee toop em Deenst es. Carol, von dee wie ea aul räden, sajcht: “Ekj kjrieech väl goode Frind, aus ekj met de Sestren toop em Deenst wia un aundret fa Jehova deed. Un derch soone Frind haft Jehova mie emma wada jeholpen.” Daut es emma goot fa ons, wan wie ons Frind sieekjen, waut Jehova tru deenen. Derch soone Frind kaun Jehova ons halpen, wan wie mootloos sent ooda ons biejlikj auleen feelen (Spr. 17:17).

13. Waut sellen aule en de Vesaumlunk doonen?

¹³ Aule en de Vesaumlunk sellen doa waut too doonen, daut et doa leeftolich un frädlich toojeit, soo daut kjeena sikj gaunz auleen feelt (Joh. 13:35). Daut, waut wie sajen un doonen, kaun aundre sea väl Moot jäwen. Eene Sesta säd: “Aus ekj de Woarheit kjanen lieed, wort de Vesaumlunk fa mie soo aus eene Famielje. Ekj wudd nich haben kunt eent von Jehova siene Zeijen woaren, wan dee mie nich jeholpen hauden.” Woo kaust du soone halpen, waut auleen enne Woarheit sent, daut dee sikj en de Vesaumlunk jeleeft feelen?

14. Woo kjenn wie met de Niee Frind woaren?

¹⁴ Proow, met de Niee Frind to woaren. Nemm dee leeftolich en de Vesaumlunk opp (Reem. 15:7). Wie wellen mea doonen, aus de Niee bloos leeftolich bejreessen. Wie wellen met de Tiet goode Frind woaren met dee. Sie leeftolich un wies, daut du om an bekjemmat best. Wie wellen nich too nieschierich sennen, oba dee proowen to vestonen, waut dee fa Trubbels haben. Eenje es daut schwoa, to sajen, woo see sikj feelen. Dan doo dee nich bemotten, waut to sajen, oba froag dee leeftolich waut un doo dee jeduldich toohorchen. Du kaust dee biejlikj froagen, woo see de Woarheit kjanen jelieet haben.

15. Woo kjennen erfoarne Christen aundre halpen?

¹⁵ Aule en de Vesaumlunk woaren eenen stoakjren Gloowen kjrieen, wan de Eltestasch un uk aundre erfoarne Christen  sikj fa an intressieren. Melissa lieed de Woarheit derch äare Mame kjanen, aus see noch junk wia. See sajcht: “Ekj kaun daut nich utspräakjen, woo dankboa ekj dee Breeda sie, dee to mie soo wieren aus Vodasch. Wan mie daut fäld, met wäm to räden, horchten dee mie emma too.” Mauricio es een junga Brooda, waut sikj sea auleen feeld, aus sien Bibelliera de Woarheit veleet. Hee sajcht: “Mie holp daut sea, daut de Eltestasch om mie bekjemmat wieren. Dee deeden pinkjlich met mie räden. Dee wieren met mie toop em Prädichtdeenst, vetalden mie, waut see bie äa perseeneljet Bibelstudium jelieet hauden, un hauden met mie toop Tietvedrief.” Melissa un Mauricio fungen beid met dän Voltietdeenst aun.

16-17. Woo wudd wie aundre halpen kjennen?

¹⁶ Halp aundre, wan daut fält (Gal. 6:10). Leo es een Missionoa, waut en een Launt deent, waut wiet auf von siene Famielje es. Hee sajcht: “Foaken mott eena to de rajchte Tiet bloos een kjlienet bät waut doonen toom aundre Leew wiesen. Ekj kaun mie noch besennen, aus ekj eenen Dach een Ojjlekj haud met de Koa. Aus ekj dan no Hus kjeem, wia ekj gaunz meed. Oba dan kroagden eene Lied mie han fa eene eefache Moltiet. Ekj weet nich mea, waut wie doa eeten, oba waut mie noch denkjt, es, daut dee mie leeftolich toohorchten. Doahinja jinkj mie daut väl bäta!”

¹⁷ Wie aula jleichen daut, biejlikj met aundre toop oppe Kongressen to sennen un äwa daut to räden, waut wie doa jelieet haben. Oba Carol, von dee wie ea aul räden, sajcht: “Ekj feel mie oppe Kongressen emma sea auleen.” Wuarom? See sajcht: “Ekj sie doa mank hundade ooda soogoa dusende Breeda un Sestren. Oba dee sent doa met äare Famieljes toop. Un wan ekj daut see, dan feel ekj mie sea eensom.” Fa aundre es daut sea schwoa, auleen no eenen Kongress to foaren, nodäm daut äa Ehepoatna jestorwen es. Kjanst du wäm, dee daut met soont schwoa haft? Wurscht du dän dan kjennen froagen, aus dee doa daut näakjste Mol wudd wellen met die un diene Famielje toop sennen?

18. Woo kjenn wie 2. Korinta 6:11-13 nokomen, wan wie wäm hankroagen?

 ¹⁸ Nemm die Tiet fa aundre. Proow, met veschiedne Breeda un Sestren toop Tietvedrief to haben un besonda met dee, waut sikj veleicht auleen feelen. Un moak dien Hoat wiet op fa dee (läs 2. Korinta 6:11-13). Melissa, von dee wie aul jerät haben, sajcht: “Wie wieren emma sea schaftich, wan aundre Breeda un Sestren ons enloden deeden toom met an un äare Famielje toop sennen ooda met an toop reisen.” Es doa wäa en diene Vesaumlunk, dän du wurscht kjennen hankroagen?

19. Wanea kaun daut fa onse Gloowesbreeda eene groote Help sennen, wan wie met dee toop sent?

¹⁹ Daut jeft Tieden, wua onse Breeda daut besonda väl räakjnen, wan wie ons fa dee Tiet nämen. Eenje es daut en dee Tieden sea schwoa, wan äa Frintschoft, waut Jehova nich deenen, Heljedoag haben. Aundre sent jewesse Dotems sea truarich, biejlikj aun dän Dach, wan doa mol wäa jestorwen es. Wan wie soone Breeda un Sestren froagen, aus see en soone Tieden wellen met ons toop sennen, dan wies wie, daut wie opprechtich om dee bekjemmat sent (Filip. 2:20).

20. Woo kjennen Jesus siene Wieed en Matäus 12:48-50 ons halpen, wan wie ons auleen feelen?

²⁰ Daut jeft väl Uasoaken, wuarom eena sikj eenjemol auleen feelen kaun. Oba wie sellen kjeenmol vejäten, daut Jehova doa krakjt omweet, woo wie ons feelen. Hee jeft ons daut, waut wie brucken, un foaken deit hee daut derch onse Gloowesbreeda (läs Matäus 12:48-50). Un wie wiesen, daut wie Jehova fa onse leeftolje jeistelje Famielje dankboa sent, wan wie onse Breeda un Sestren soo goot aus mäajlich unjastetten. Krakjt endoont, woo wie ons feelen, wie sent kjeenmol auleen, wiels Jehova es emma met ons!