Paulus schreef: “Ekj sie derch daut Jesaz fa daut Jesaz jestorwen, daut ekj fa Gott läwen kaun” (Gal. 2:19).

Daut, waut Paulus en disen Varsch schreef, paust met eene wichtje Lia toop, waut hee de Vesaumlungen en de reemische Prowins Galatien utläd. Eenje Christen doa hauden sikj von faulsche Liera veleiden loten. Dee lieeden, daut eena bloos kunn jerat woaren, wan eena sikj aun daut Jesaz Moses hilt, un besonda, wan eena sikj beschnieden leet. Oba Paulus wist, daut Gott daut von siene Deena nich mea velangd, sikj beschnieden to loten. Paulus läd daut gaunz kloa ut, daut daut, waut dise faulsche Liera säden, orrajcht wia, un holp de Breeda, daut dee noch dolla aun Jesus Christus sien Leesjelt jleewden (Gal. 2:4; 5:2).

De Schreft sajcht gaunz kloa, daut een Mensch nuscht mea weet, wan dee jestorwen es, un daut dän daut nuscht mea deit, waut rom am es (Liera 9:5). Aus Paulus säd: “Ekj sie derch daut Jesaz . . . jestorwen”, meend hee, daut daut Jesaz Moses kjeene Macht mea haud äwa am. Un hee wia sikj secha, daut hee “fa Gott läwen” deed, wiels hee aun daut Leesjelt jleewd.

Dise Endrunk en Paulus sien Läwen kjeem “derch daut Jesaz”. Wuarom? Wiels jroz ea säd hee: “Een Mensch [woat] nich derch daut Jesaz hoolen jerajcht . . ., oba derch dän Gloowen aun Jesus Christus” (Gal. 2:16). Dit bedied nich, daut daut Jesaz Moses nich wichtich wia, wiels Paulus säd je to de Galata: “Daut Jesaz wort bowenenn jejäft, daut wie doaraun seenen kunnen waut Sind es, bat dee komen wudd, dee ons vesproaken wia” (Gal. 3:19). Derch daut Jesaz Moses wort daut kloa, daut onvolkomne, sindje Menschen sikj nich volkomen aun daut Jesaz hoolen kunnen un daut doa noch een jratret, volkomnet Opfa needich wia. Doaderch wees daut Jesaz no dän han, “dee ons vesproaken wia”, un daut wia Christus. Un wan doa wäa aun Jesus Christus jleewd, dan kunn Gott dänjanjen fa jerajcht talen (Gal. 3:24). Paulus wort fa jerajcht jetalt, wiels hee derch daut Jesaz bat doa jekomen wia, Jesus auntonämen un aun dän to jleewen. Doaderch wia Paulus soo to sajen “derch daut Jesaz . . . jestorwen”, daut hee “fa Gott läwen” kunn. Nu haud nich mea daut Jesaz de Macht äwa am, oba Gott.

Aus Paulus sienen Breef no de Reema schreef, säd hee biejlikj soowaut. Hee schreef: “Miene Breeda, jrod soo wia daut uk, daut jie derch Christus sienen Doot fa daut Jesaz storwen . . . nu sent wie von daut Jesaz loos un doot fa daut, aun daut wie jebungen wieren” (Reem. 7:4, 6). Hia un en Galata 2:19 räd Paulus nich doavon, daut see veuadeelt worden un stoawen musten, wäajen see jäajen daut Jesaz Moses jesindicht hauden. Enne Städ daut säd hee, daut see wieren friejemoakt worden, wiels daut Jesaz Moses kjeene Macht mea haud äwa am un äwa aundre Christen. Dee wieren friejemoakt worden, wäajen dee aun Christus sien Leesjelt jleewden.