1. Waut mott wie doonen, om Jehova sienen Dach to äwaläwen?

 WAN daut enne Bibel von Jehova sienen Dach rät, dan meent daut soone Tiet, wua Jehova siene Fiend rechten deit un siene Deena raden deit. Daut haft Jehova aul foaken jedonen (Jes. 13:1, 6; Hes. 13:5; Zef. 1:8). Jehova sien Dach en onse Tiet woat doamet aunfangen, daut se jäajen daut Groote Babel komen un dee woat met dän Kjrich von Harmagedon opphieren. Om disen “Dach” to äwaläwen, mott wie ons nu aul reedmoaken. Jesus säd, daut wie fa de “groote Liedenstiet” motten “reed sennen” – daut meent, wie motten ons ieescht reedmoaken un uk reed bliewen (Mat. 24:21, NW; Luk. 12:40).

2. Wuarom kaun 1. Tessalonicha ons halpen?

² De Apostel Paulus brukt en sienen ieeschten Breef aun de Tessalonicha waut Jlikjnisen, om de Breeda doa to halpen, reed to sennen fa Gott sien Jerecht. Paulus wist, daut Jehova sien Dach nich fuaz komen wudd (2. Tess. 2:1-3). Oba hee deed an doawäajen sea tooroden, daut dee sikj sullen soo doaropp reedmoaken, aus wan dee dän näakjsten Dach komen wudd. Daut es uk een gooda Rot fa ons. Paulus räd von dreeatlei: (1) Woo Jehova sien Dach komen wudd, (2) wäa disen Dach nich äwaläwen wudd un (3) woo wie ons reedmoaken kjennen, dän to äwaläwen. See wie mol, woo hee daut utläd.

3. Wuarom sajcht daut, Jehova sien Dach kjemt soo aus een Stäla enne Nacht? (See uk daut Bilt.)

³ Soo “aus een Stäla enne Nacht” (1. Tess. 5:2, NW). Daut es daut ieeschte von dree Jlikjnisen, waut doavon räden, woo Jehova  sien Dach komen woat. Wan Stäla sikj wua nennbräakjen, dan doonen dee daut foaken bosich un em diestren, daut et kjeena enwoat. Krakjt soo woat Jehova sien Dach uk bosich komen un de mieeschte woaren doa nich met räakjnen. Mau rajcht true Christen woaren sikj veleicht vefieren, woo bosich daut aula gonen woat. De Schlajchte woaren dan venicht woaren, oba wie nich.

4. Woo likjent Jehova sien Dach sikj met Jeburtsweedoag?

⁴ “Soo aus de Weedoag äwa eene Fru komen, dee een Kjint to Welt brinjt” (1. Tess. 5:3). Eene Mame kaun daut nich krakjt weeten, wanea see äa Kjlienet to Welt brinjen woat, oba see es sikj gaunz secha, daut et komen woat. Wan daut dan bat doa es, fangen de Jeburtsweedoag met een Mol haustich aun un kjeena kaun daut opphoolen. Wie weeten uk nich dän Dach ooda de Stund, wanea Jehova sien Dach aunfangen woat, oba wie sent ons gaunz secha, daut dee komen woat. Gott sien Jerecht äwa de Schlajchte woat haustich komen un dee woaren sikj nich fuatbrinjen kjennen.

5. En waut fa Stekjen es de groote Liedenstiet soo, aus wan daut aunfangt to doagen?

⁵ Soo, aus wan daut aunfangt to doagen. En Paulus sien dreddet Jlikjnis räd hee wada von Stäla enne Nacht. Oba dit Mol lat daut soo, aus wan hee Jehova sienen Dach doamet vejlikjt, wan daut aunfangt to doagen (1. Tess. 5:4, NW). Een Stäla, waut sikj enne Nacht wua nennbrakjt, kaun soo drock sennen, daut dee nich enwoat, woo bosich de Tiet vejeit. Wan daut dan ieescht schemma woat, es daut kloa to seenen, waut dee deit, un dee kaun sikj nich mea vestäakjen. En de groote Liedenstiet woat daut uk kloa to seenen sennen, wäa doa wieda soont deit, waut Gott nich haben well. Dee woaren sikj dan uk nich mea vestäakjen kjennen. Doawäajen well wie ons nu aul reedmoaken un aules tochloten, waut Gott nich jleicht, un  “goodet, Jerajchtichkjeit un Woarheit verendach” brinjen (Efs. 5:8-12). Daut näakjste räd Paulus noch von twee Jlikjnisen, waut von dee räden, waut doa nich äwaläwen woaren.

6. En waut fa eenen Senn schlopen de mieeschte Menschen? (1. Tessalonicha 5:6-7).

⁶ “Dee waut doa schlopen” (läs 1. Tessalonicha 5:6-7). Paulus vejlikjt dee, waut Jehova sienen Dach nich äwaläwen woaren, met Menschen, waut schlopen. Dee woaren nuscht en, waut doa rom an passieet ooda woo de Tiet vejeit. Doawäajen kjennen dee uk nich haustich waut doonen. De mieeschte Menschen bie dise Tiet schlopen em jeisteljen (Reem. 11:8, NW). Dee es daut krakjt endoont, wan dee uk seenen kjennen, daut wie en de latste Doag läwen un daut de groote Liedenstiet boolt komen woat. Wan doa waut grootet passieet en de Welt, dan wakjen dee veleicht opp un sent een beskje nieschierich to de goode Norecht. Oba dee bliewen nich waka un schlopen wada en. Mau rajcht soone, waut aun eenen Jerechtsdach jleewen, denkjen soo, daut et noch lang nich bat doa es (2. Pet. 3:3-4). Oba wie weeten, daut et emma wichtja woat, waka to bliewen.

7. Wuarom sent soone, waut Gott venichten woat, soo aus Supa?

⁷ “Dee waut sikj bedrinkjen”. Paulus vejlikjt dee Menschen, waut Gott venichten woat, met Supa. Een Supa moakt foaken schlajchte Entscheidungen un haundelt mau sea langsom, wan doa rom am waut passieet. Soo es daut uk met de Schlajchte. Dee hieren Gott siene Woarnungen, oba doonen doa nuscht met. Dee haben sikj een Läwen jewält, waut dee enne Grunt brinjt. Oba Christen sellen nich soo sennen; dee sellen bie kloaret Vestaunt bliewen (1. Tess. 5:6). Daut meent no eenen Bibeljelieeden no, daut dee “ruich sent un sikj nich leicht loten en äa denkjen omschmieten. Dee kjennen kloa denkjen un doaderch goode Entscheidungen moaken.” Wuarom mott wie ruich bliewen un ons en ons denkjen nich loten omschmieten? Na, je noda Jehova sien Dach kjemt, je dolla woaren se ons unja Druck saten, daut wie ons sellen opp eene Sied stalen. Oba wie wellen ons nich metrieten loten von de Menschheit äare Trubbels ooda von polietische Sachen. Un wie brucken nich Angst haben, wiels Gott sien Jeist kaun ons halpen, daut wie ruich bliewen un goode Entscheidungen moaken (Luk. 12:11-12).

8. Met waut woaren de Ieejenschoften en 1. Tessalonicha 5:8 vejlikjt, waut ons halpen woaren, waka un bie kloaret Vestaunt to bliewen? (See uk daut Bilt.)

⁸ “Well wie . . . een Brostschilt droagen un . . . een Schutzhelm.” Paulus deit ons hia met Soldoten vejlikjen, waut reed sent fa dän Kjrich (läs 1. Tessalonicha 5:8). Een Soldot mott aulentiet reed sennen to kjamfen, wan doa Kjrich es. Bie ons es daut uk soo. Eenje Ieejenschoften, waut ons halpen kjennen, reed to bliewen fa Jehova sienen Dach, sent Gloowen un Leew, waut soo aus een Brostschilt sent, un de Hopninj, waut soo aus een Schutzhelm es.

9. Woo deit de Gloowen ons beschitzen?

⁹ Een Brostschilt deed daut Hoat von eenen Soldot beschitzen. Gloowen un Leew beschitzen ons bilteljet Hoat, daut wie kjennen wieda Gott deenen un Jesus nofoljen. Wan wie Gloowen haben, dan woa wie ons secha sennen, daut Jehova ons doafäa beloonen woat, wiels wie am iernstlich sieekjen (Heb. 11:6). De Gloowen woat ons uk bat doa brinjen, onsen Leida Jesus Christus tru to bliewen, wan doa uk schwoaret oppkjemt. Woo kjenn wie onsen Gloowen stoakjen, soo daut wie uthoolen kjennen? Wie kjennen biejlikj von true Breeda lieren, waut vefolcht worden ooda waut daut knaup jinkj. Un  wan wie soone nodoonen, waut een eefachet Läwen fieren un daut Kjennichrikj aun de ieeschte Städ stalen, dan woa wie daut väabieejen, daut wie nom Jelt hinjaraun sent ooda een deel Sachen haben wellen. b

10. Woo halpt de Leew fa Gott un fa de Menschen ons wiedatoprädjen?

¹⁰ De Leew es uk wichtich, daut wie waka un bie kloaret Vestaunt bliewen kjennen (Mat. 22:37-39). De Leew fa Gott halpt ons wiedatoprädjen, wan ons daut uk Trubbel brinjen kunn (2. Tim. 1:7-8). Un wäajen wie mau rajcht dee leewen, waut Jehova nich deenen, doo wie aulawäajen wiedaprädjen, soogoa metem Fon ooda derch Breew. Wie jäwen nich de Hopninj opp, daut eenje sikj eenen Dach endren un aunfangen woaren, daut rajchte to doonen (Hes. 18:27-28).

11. Woo halpt ons de Leew fa onse Gloowesbreeda? (1. Tessalonicha 5:11).

¹¹ Wie leewen onse Gloowesbreeda. Wie wiesen dise Leew, wan wie daut nokomen, waut 1. Tessalonicha 5:11 sajcht: “Moakt junt unjarenaunda Moot un but junt unjarenaunda opp” (läs). Wie moaken ons unjarenaunda Moot, krakjt soo aus Soldoten, waut toop em Kjrich sent. Secha kaun daut mol soont jäwen, daut een Soldot dän aundren velazt, oba dee wudd daut nienich met Fliet doonen. Krakjt soo wudd wie kjeen Mol met Fliet onse Breeda un Sestren Schoden aundoonen ooda dee daut trigjtolen, wan dee ons beleidicht hauden (1. Tess. 5:13, 15). Wie wiesen onse Leew uk, wan wie dee Breeda respakjten, waut äwa de Vesaumlunk aunjestalt sent (1. Tess. 5:12). Aus Paulus disen Breef schreef, jeef daut de Vesaumlunk en Tessalonich noch nich mol een Joa. De Mana, waut äwa dise Vesaumlunk aunjestalt wieren, hauden secha noch nich väl Erfoarunk, un veleicht muaken dee uk Fäla. Oba de Breeda musten dee doawäajen achten. Wäajen de groote Liedenstiet emma noda kjemt, woat daut uk emma dolla doaropp aunkomen, daut wie ons no de Aunwiesungen rechten, waut de Eltestasch ons jäwen. Daut kaun sennen, daut wie eenen Dach nich mea Aunwiesungen von de Breeda enne Hauptoffiz ooda em Betel kjrieen woaren. Doawäajen es daut wichtich, daut wie  daut nu aul lieren, onse Eltestasch väl to räakjnen un to respakjten. Waut emma doa passieren woat, well wie bie kloaret Vestaunt bliewen un nich no de Eltestasch äare Fäla kjikjen. Wie wellen leewa emma em Denkj hoolen, daut Jehova dise true Mana derch Christus aunleiden deit.

12. Woo beschizt onse Hopninj ons denkjen?

¹² Een Schutzhelm deed dän Kopp von eenen Soldot beschitzen; krakjt soo beschizt onse Hopninj ons denkjen. De Hopninj halpt ons to seenen, daut de Welt nuscht wieetvollet auntobeeden haft (Filip. 3:8). Dee halpt ons uk, daut wie ruich bliewen un fauststonen. Krakjt soo wia daut fa Wallace un Laurinda, waut en Afrika deenen. En benna dree Wäakj musten dee beid eent von äare Elren begrowen. Un wäajen daut enne Tiet von de COVID-19-Krankheit wia, kunnen dee doa nich hanfoaren un met äare Famieljes toop sennen. Wallace schreef: “Wäajen de Hopninj, daut de Doodes noch mol oppstonen woaren, stal ekj mie väa, woo dee daut gonen woat, wan dee ieescht em Paradies sennen woaren. Dan denkj ekj nich soo sea doaraun, woo dee daut de latste Doag en dise oole Welt jinkj. Dise Hopninj moakt mie ruich, wan ekj truarich sie ooda daut schwoa hab.”

13. Woo kjenn wie dän heiljen Jeist kjrieen?

¹³ “Unjadrekjt dän Jeist nich” (1. Tess. 5:19). Paulus säd, daut de heilja Jeist en ons wirkjen deit. Wan wie daut nich unjadrekjen, daut dee en ons schauft, dan woa wie eenen grooten Iewa haben, daut rajchte to doonen, un sea fa Jehova schaufen wellen (Reem. 12:11). Woo kjenn wie dän heiljen Jeist kjrieen? Wan wie doarom bäden, Gott sien Wuat studieren un am met sien Volkj toop deenen, waut hee derch sienen Jeist aunleiden deit. Wan wie daut doonen, dan woa wie “dän Jeist siene Frucht” emma bäta wiesen kjennen (Gal. 5:22-23).

14. Fa waut mott wie oppaussen, wan wie Gott sienen Jeist wieda haben wellen? (See uk daut Bilt.)

¹⁴ Wan Gott ons sienen heiljen Jeist jeft, dan mott wie oppaussen, daut wie dän Jeist nich unjadrekjen. Gott jeft bloos dee sienen Jeist, waut reine Jedanken fieren un daut rajchte doonen. Soone, waut orreine Jedanken haben un uk doano haundlen, woat hee sienen Jeist nich jäwen  (1. Tess. 4:7-8). Daut wie wieda Gott sienen Jeist haben kjennen, mott wie uk opp daut achten, “waut profeetisch jesajcht woat” (1. Tess. 5:20). “Profeetisch” meent hia soont, waut von Gott sienen Jeist kjemt, soo aus wan daut von Jehova sienen Dach rät ooda doavon, en waut vonne Tiet wie läwen. Wan wie aun Harmagedon denkjen, dan well wie nich jleewen, daut wie daut aulmols nich beläwen woaren. Wie wellen daut kloa haben, daut daut boolt komen woat, un ons drock hoolen un uk proowen, jieda Dach goodet to doonen (2. Pet. 3:11-12).

15. Waut kjenn wie doonen, daut de beese Jeista äare Läajes ons nich teischen woaren? (1. Tessalonicha 5:21).

¹⁵ Boolt woaren Gott siene Fiend opp irjenteene Wajch sajen: “Aules es ruich un secha” (1. Tess. 5:3). De beese Jeista woaren de mieeschte Menschen dan met äare Läajes veleiden (Opb. 16:13-14). Waut woa wie dan doonen? Wan wie aules unjasieekjen, dan woa wie ons nich loten teischen (läs 1. Tessalonicha 5:21, see de Erkjläarungen toom studieren en nwtsty). Daut griechische Wuat, waut hia met “unjasieekjen” äwasat wort, wort ieeschtemma doafäa jebrukt, wan se utfinjen wullen, aus waut werkjlich von Golt ooda von Selwa jemoakt wia. Un wie motten daut, waut wie hieren ooda läsen, uk goot unjasieekjen toom weeten, aus daut werkjlich soo es. Daut wia aul fa de Tessalonicha wichtich un daut woat uk fa ons väl wichtja woaren, je noda de groote Liedenstiet kjemt. Wie wellen secha nich eefach aules jleewen. Wie wellen ons denkjen brucken un aules, waut wie läsen ooda hieren met daut vejlikjen, waut de Bibel un Jehova siene Organisazion sajcht. Wan wie daut doonen, dan woa wie ons von de beese Jeista äare Läajes nich veleiden loten (Spr. 14:15; 1. Tim. 4:1).

16. Waut vonne sechre Hopninj hab wie, un waut well wie nu doonen?

¹⁶ Aus Volkj woaren Jehova siene Deena de groote Liedenstiet äwaläwen. Oba aus eenselne Menschen weet wie nich, waut morjen komen woat (Jak. 4:14). Wie kjennen ons oba secha sennen, daut wie daut eewje Läwen kjrieen, wan wie tru bliewen, endoont aus wie de groote Liedenstiet äwaläwen ooda aus wie aul ea stoawen. De Jesaulwde woaren äaren Loon kjrieen, wan dee met Christus toop em Himmel sent. Un de aundre Schop woaren en daut Paradies oppe Ieed sennen kjennen. Well wie onse wundascheene Hopninj em Denkj hoolen un doano seenen, daut wie reed bliewen fa Jehova sienen Dach!