1. Waut fa een Väarajcht haben de Eltestasch no 1. Petrus 5:2 no?

 DE Eltestasch vondoag dän Dach haben de Oppgow jekjräajen, sikj om Gott siene wieetvolle Schop to kjemren. Dise true Mana jleichen daut, fa äare Breeda un Sestren schwoa to schaufen, un sent “Hoads . . . waut sikj werkjlich om an kjemren” (Jer. 23:4, NW; läs 1. Petrus 5:2). Sent wie nich dankboa, daut wie soone Mana enne Vesaumlunk haben?

2. Waut fa Schwierichkjeiten haben eenje Eltestasch?

² Een Eltesta sennen es nich emma leicht. Daut es biejlikj sea väl Oabeit, sikj om eene Vesaumlunk to kjemren. Tony, een Eltesta enne Stäts, must daut enseenen, daut hee nich aules doonen kunn. Hee säd: “Aum Aunfank von de COVID-19-Krankheit neem ekj emma mea Oppgowen aun, biejlikj dän Prädichtdeenst un de Toopkomes plonen. Oba krakjt endoont, woo väl ekj deed, doa wia noch emma mea to doonen. Met de Tiet wort ekj too drock toom de Bibel läsen, perseenlich studieren un bäden.” Ilir, een Eltesta en Kosovo, must met waut aundret foadich woaren. Aus hee en eene Jäajent wond, wua daut Kjrich jeef, foll am daut schwoa, de Aunwiesungen von de Organisazion notokomen. Hee vetald: “Ekj wort von daut Betel aunjestalt toom de Breeda un Sestren en eene jefäadelje Jäajent halpen. Dan proowd sikj daut, aus ekj wudd äwanäment sennen. Mie wia angst un mie späad sikj daut soo, daut de Aunwiesungen nich de baste wieren.” Un Tim, een Missionoa en Asien, späad sikj daut soo, daut hee nich mol de Tiet haud toom daut doonen, waut hee jieda Dach doonen sull. Hee säd: “Eenje Mol wia ekj soo meed un utjewrungen, daut ekj mie nich mol kunn om de Breeda un Sestren kjemren.” Waut kaun soone Eltestasch halpen, dee daut krakjt soo jeit?

3. Woo kjemt ons daut aula togood, dän Rechta Gideon sien Biespel to studieren?

 ³ Eltestasch kjennen väl von dän Rechta Gideon lieren (Heb. 6:12; 11:32). Hee deed Gott sien Volkj beschitzen un wia uk een Hoad fa dee (Rech. 2:16; 1. Chr. 17:6). Krakjt soo sent de Eltestasch nu en dise schwoare Tiet uk aunjestalt, fa Gott sien Volkj to sorjen (Apj. 20:28; 2. Tim. 3:1). Wie kjennen väl doavon lieren, daut Gideon bescheiden, deemootich un jehuarsom wia. En sienen Deenst must hee uk bewiesen, daut hee uthoolen kunn. Endoont aus wie selfst een Eltesta sent ooda nich, wie kjennen aula lieren, dankboa to sennen fa daut, waut Eltestasch doonen. Un wie kjennen dee unjastetten (Heb. 13:17).

4. Woo wees Gideon, daut hee deemootich un bescheiden wia?

⁴ Gideon wia bescheiden un deemootich. b Aus Jehova sien Enjel to Gideon säd, daut Gott am jewält haud, om de Israeliten von de Midianita to raden, säd hee gaunz deemootich: “Miene Grupp es de kjlanste em gaunzen Staum Manasse, un ekj sie de jinjsta en miene Famielje” (Rech. 6:15). Hee docht, daut hee nich goot jenuach wia fa dise Oabeit. Oba Jehova wist daut bäta, un met siene Help kunn Gideon dise Oppgow volbrinjen.

5. Wanea kaun daut fa eenen Eltesten schwoa sennen, deemootich un bescheiden to sennen?

⁵ Eltestasch strenjen sikj aun, en aules deemootich un bescheiden to sennen (Micha 6:8, NW; Apj. 20:18-19). Dee puchen nich met daut, waut see doonen kjennen ooda jedonen haben. Oba dee denkjen uk nich, daut see to nuscht to brucken sent, wiels see mol Fäla jemoakt haben. Eenje Mol kaun daut fa eenen Eltesten schwoa sennen, deemootich un bescheiden to sennen. Daut kaun sennen, daut hee too väl Oppgowen aunnemt, waut hee lota oba nich aula nokomen kaun. Veleicht woat am jesajcht, daut see nich tofräd sent met am ooda am woat fa eene Oppgow sea jeloft. Waut kjennen Eltestasch dan von Gideon lieren?

6. Waut kjennen Eltestasch von Gideon lieren äwa bescheiden sennen? (See uk daut Bilt.)

⁶ Froag no Help. Wäa bescheiden es, weet, daut hee nich aules doonen kaun. Gideon wia  bescheiden, wiels hee aundre wellich no Help fruach (Rech. 6:27, 35; 7:24). Goode Eltestasch doonen daut krakjt soo. Tony, von dän wie aul ea räden, sajcht: “Ekj sie soo oppjetrocken, daut ekj leicht too väl Oabeit aunnäm. Doawäajen deed wie bie ons Famieljenstudium von bescheiden sennen räden, un ekj fruach miene Fru, aus ekj mie doarenn noch vebätren kunn. Ekj kjikjt uk daut Video opp jw.org Aundre utlieren, an Veauntwuatunk jäwen un opp an vetruen, soo aus Jesus daut deed”. Tony fruach aundre dan, aus see am met siene Oabeit halpen kunnen. Woo kjeem daut ut? Hee vetalt: “De Oabeit enne Vesaumlunk woat noch krakjt soo jedonen un ekj hab mea Tiet, em jeisteljen stoakj to bliewen.”

7. Woo kjennen Eltestasch Gideon nodoonen, wan wäa jäajen an rät? (Jakobus 3:13, NW).

⁷ Woa nich doll, wan wäa jäajen die rät. Fa de Eltestasch kaun daut uk schwoa sennen, wan an wäa sajcht, daut see nich tofräd sent met an. Kaun Gideon sien Biespel an bie dit uk halpen? Aus de Efraimita mol jäajen am räden deeden, bleef hee ruich, wiels hee woomäajlich doaraun docht, daut hee uk Fäla muak (Rech. 8:1-3). Hee wia deemootich, horcht dee too un auntwuad dee leeftolich. Soo kunn hee an berujen. Weise Eltestasch doonen Gideon no un horchen too, wan aundre äwa an uk ontofräd sent, un auntwuaten dee leeftolich (läs Jakobus 3:13, NW). Soo halpen dee met, daut enne Vesaumlunk Fräd es.

8. Waut sellen Eltestasch doonen, wan an jeloft woat? Jeff een Biespel.

⁸ Jeff Jehova aule Iea. Aus Gideon jeloft wort, wiels hee de Midianita jewonnen haud, jeef hee Jehova aule Iea doafäa (Rech. 8:22-23). Woo kjennen Eltestasch Gideon nodoonen? Dee sellen Jehova de Iea jäwen, wan dee waut volbrinjen (1. Kor. 4:6-7). Toom Biespel: Wan een Eltesta doafäa jeloft woat, daut hee een feina Liera es, dan kaun hee sajen, daut de Lia sikj opp Gott sien Wuat stett ooda daut hee daut doawäajen kaun, wiels Jehova siene Organisazion am utjelieet haft. Daut wudd fein sennen, wan de Eltestasch noch mol doaräwa nodochten, opp wäm de Iea jeit, wan dee lieren. Denkj wie mol doaraun, waut een Eltesta beläwd, dee Timothy heet. Aum Aunfank jinkj am daut sea scheen, Räden to hoolen. Hee sajcht: “Ekj docht mie emma waut besondret ut toom met miene Räden aunfangen un socht mie uk butajeweenelje Jlikjnisen. Doawäajen deeden aundre mie foaken lowen. Oba daut brocht mea Iea opp mie aus opp de Bibel ooda Jehova.” Met de Tiet wort Timothy en, daut hee soo lieren must, daut hee Iea opp Jehova brocht (Spr. 27:21, NW). Woo kjeem daut ut? Hee vetalt: “Veschiedne Breeda un Sestren säden, woo miene Räden an jeholpen hauden, met eenen Trubbel ooda eene Schwierichkjeit foadich to woaren ooda Jehova noda to komen. Ekj kjrie nu doaderch mea Freid aus don, aus see mie soo sea lowden.”

9. Wuarom must Gideon jehuarsom un äwanäment sennen? (See daut Bilt oppe väaschte Sied.)

⁹ Gideon must jehuarsom un äwanäment sennen, aus Jehova am aunstald toom daut Volkj Israel leiden. Jehova säd, hee sull sienen Voda sienen Aultoa toom Baal aunbäden oppriemen, un daut wia sea jefäadlich (Rech. 6:25-26). Lota sull hee twee Mol waut Soldoten von siene Armee no Hus schekjen (Rech. 7:2-7). Un tolatst must hee siene Fiend medden enne Nacht aunjriepen (Rech. 7:9-11).

10. Wuarom kaun Eltestasch daut schwoa sennen to jehorchen?

¹⁰ Een Eltesta, waut jehuarsom es, “lat sikj  sajen” (Jak. 3:17). Un dee es uk fuaz reed, daut notokomen, waut de Schreft sajcht un waut Jehova siene Organisazion fa Aunwiesungen jeft. Doaderch jeft hee aundre een goodet Biespel. Un doch kaun am daut schwoa faulen, jehuarsom to sennen. Biejlikj kaun am daut schwoa sennen, aule Aunwiesungen derchtoläsen, waut hee kjricht. Ooda hee jrebbelt doaräwa, aus eene Aunwiesunk kluak un to brucken es. Ooda am woat jefroacht, eene Oppgow auntonämen, waut am kunn em Jefenkjnis nennbrinjen. Woo kjennen Eltestasch en soone Loagen Gideon nodoonen un jehuarsom sennen?

11. Waut kaun Eltestasch halpen, jehuarsom to sennen?

¹¹ Horch goot no de Aunwiesungen un komm dee no. Gott säd to Gideon, woo hee sienen Voda sienen Aultoa oppriemen sull, wua hee eenen freschen Aultoa fa Jehova buen sull un woon Tia hee doa opfren sull. Gideon deed doa nich äwa grunzen. Hee deed krakjt, waut Jehova am jesajcht haud. Bie dise Tiet kjrieen Eltestasch de Aunwiesungen von Jehova siene Organisazion derch Breew un Bekauntmoakungen, waut ons beschitzen un halpen, dicht bie Jehova to bliewen. Wie räakjnen onse Eltestasch väl, wiels see daut tru nokomen, waut Jehova siene Organisazion an sajcht. Un daut kjemt de gaunze Vesaumlunk togood (Psa. 119:112).

12. Woo kjennen Eltestasch daut nokomen, waut Hebräa 13:17 sajcht, wan de Organisazion niee Aunwiesungen jeft?

¹² Sie reed die auntopaussen. Denkj doaraun, daut Jehova säd, daut Gideon de mieeschte Soldoten no Hus schekjen sull (Rech. 7:8). Veleicht docht hee soo: “Mott ekj dit werkjlich doonen? Woat daut soo aus dit schaufen?” Oba Gideon wia jehuarsom. Wan de Organisazion de Eltestasch Aunwiesungen jeft un dee daut nokomen, dan doonen dee Gideon no (läs Hebräa 13:17). Toom Biespel endad de Väastaunt daut aune 2014, woo daut Jelt jebrukt woat toom Vesaumlungshiesa un Kongresshiesa buen (2. Kor. 8:12-14). De Vesaumlungen brucken nich mea bie de Organisazion Jelt lieen un lota trigjtolen. Nu schekjen de Vesaumlungen oppe gaunze Welt äare Gowen no de Organisazion. Dan kjennen dee aulawäajen Vesaumlungshiesa un Kongresshiesa buen, wua daut fält, wan de Vesaumlunk doa uk nich väl Jelt haft. Aus sikj daut endad, wia daut schwoa fa eenen Brooda, waut José heet. Hee docht bie sikj: “Nich een Vesaumlungshus woat jebut woaren! Dit es nich, woo daut hia bie ons schauft.” Waut holp José, de niee Aunwiesunk to unjastetten? Hee sajcht: “De Wieed ut Spricha 3:5-6 holpen mie denkjen, daut ekj opp Jehova vetruen sull. Un daut es nich to jleewen, waut doabie rutjekomen es! Doa woaren nich bloos mea Vesaumlungshiesa jebut, oba woo de Gowen nu jebrukt woaren, jeft aule de Mäajlichkjeit, sikj unjarenaunda uttohalpen.”

13. (a) Äwa waut wia Gideon sikj secha? (b) Woo kjennen Eltestasch Gideon nodoonen? (See uk daut Bilt.)

 ¹³ Sie äwanäment un doo Jehova sienen Wellen. Gideon jehorcht Jehova, wan am uk angst wia un wan daut uk jefäadlich wia, waut hee doonen sull (Rech. 9:17). Nodäm daut Jehova Gideon Moot jemoakt haud, wia Gideon sikj secha, daut Gott am halpen wudd, sien Volkj to beschitzen. Eltestasch, waut en soone Lenda wonen, wua ons Woakj veboden es, sent soo aus Gideon. Dee sent äwanäment un gonen em Prädichtdeenst un bie de Toopkomes veropp, wan doa uk Jefoaren sent: Dee kunnen faustjenomen un befroacht woaren, äare Oabeit velieren ooda sea schlajcht behaundelt woaren. c En de groote Liedenstiet woaren de Eltestasch uk motten äwanäment sennen toom de niee Aunwiesungen nokomen. Dise Aunwiesungen kjennen doamet to doonen haben, eene Norecht to vebreeden, waut enne Schreft met Hoagelstekja vejlikjt woat, ooda doamet, woo Gott sien Volkj äwaläwen kaun, wan Gog von Magog daut aunjript (Hes. 38:18; Opb. 16:21).

14. Wuarom wia Gideon daut schwoa, uttohoolen?

¹⁴ Aus Rechta must Gideon sikj kjarpalich sea aunstrenjen. Een Mol, aus dee de Nacht Kjrich fieeden, kleiwden de Midianita ut. Gideon juach dee von daut Jesreel-Tol gaunz batem Jordan-Riefa hinjaraun, wua daut woomäajlich ernoa unjajewossen wia (Rech. 7:22). Oba wia daut aules, waut Gideon deed? Nä! Wan hee un siene 300 Mana uk aul meed wieren, juagen dee de Midianita wieda hinjaraun gaunz bat de aundre Kaunt Riefa. Doa kjrieejen dee de Midianita to hoolen (Rech. 8:4-12).

15. Wuarom kaun daut fa eenen Eltesten schwoa sennen, uttohoolen?

¹⁵ Een Eltesta kaun sikj eenje Mol sea meed feelen, wiels hee sikj om de Vesaumlunk un om siene Famielje kjemren mott. Woo kjennen Eltestasch en soone Loagen Gideon nodoonen?

16-17. Waut holp Gideon uttohoolen, un äwa waut kjennen Eltestasch sikj secha sennen? (Jesaja 40:28-31). (See uk daut Bilt.)

 ¹⁶ Vetru doaropp, daut Jehova die stoakjen woat. Gideon vetrud doaropp, daut Jehova am de Krauft jäwen wudd, waut am fäld, un hee haft sikj nich aunjeschmäat (Rech. 6:14, 34). Een Mol randen Gideon un siene Mana twee midianitische Kjennichs hinjaraun, waut veleicht opp Kameelen reisden (Rech. 8:12, 21). Un doch, met Jehova siene Help, kunnen de Israeliten dise Mana nokomen un dän Kjrich jewennen. Eltestasch kjennen krakjt soo opp Jehova vetruen, wiels “hee woat nich meed ooda mootloos”. Hee woat an Krauft jäwen, wan an daut doaraun fält (läs Jesaja 40:28-31).

¹⁷ Denkj wie mol aun eenen Brooda, dee Matthew heet un em Hospitol-Vemedlungs-Kommitee methalpt. Waut halpt am uttohoolen? Matthew vetalt: “Ekj hab Jehova siene Krauft werkjlich jespäat, wua Filippa 4:13 von rät. Foaken wia ekj sea meed un mie feeld sikj daut soo, ekj kunn nich wieda. Dan bäd ekj von Hoaten to Jehova un prachad am, daut hee mie de Krauft jäwen sull toom miene Breeda unjastetten. Un dan späad ekj krakjt, woo Gott sien Jeist mie Krauft jeef toom uthoolen.” Krakjt soo aus Gideon schaufen de Eltestasch sea, om Gott sien Volkj to beschitzen, wan an daut uk nich emma leicht es. Oba dee motten daut uk enseenen, daut see nich aules doonen kjennen, waut see wudden wellen. Dee kjennen sikj secha sennen, daut Jehova no an horchen woat, wan see am no Help froagen, un an stoakjen woat (Psa. 116:1; Filip. 2:13).

18. Waut hab wie jelieet, woo Eltestasch Gideon nodoonen kjennen?

¹⁸ Eltestasch kjennen väl goodet von Gideon lieren. Dee sellen bescheiden un deemootich sennen, wan see entscheiden, woo väl Oabeit see aunnämen, ooda wan wäa jäajen an rät ooda wan see sea jeloft woaren. Dee sellen uk jehuarsom un äwanäment sennen – besonda nu, wiels daut Enj von dise Welt gaunz dicht bie es. Un dee kjennen sikj uk secha sennen, daut Jehova an stoakjen woat, endoont waut dee fa Schwierichkjeiten haben. Onen Twiewel räakjen wie onse flietje Hoads sea väl un wellen dee “väl wieet achten” (Filip. 2:29).