De Bibel sajcht daut nich. Oba wie finjen doabennen eenje intressaunte Eenselheiten, waut veleicht waut aun äare Entscheidunk deed.

Een Enjel säd to Maria, daut see wudd schwanga woaren un een Kjint haben. Aus hee ar daut säd, wonden Maria un Josef en Nazaret, eene Staut en Galiläa (Luk. 1:26-31; 2:4). Aus see lota von Ägipten trigjkjeemen, wonden see wada en Nazaret. Doa woss Jesus opp un wort een Nazarena (Mat. 2:19-23). Daut es, wuarom wie foaken aun Nazaret denkjen, wan wie de Nomes Jesus, Josef un Maria hieren.

Maria haud eene Vewaunte, waut Elisabet heet. Elisabet un äa Maun Zacharias, waut een Priesta wia, wonden en Juda. See wort de Mame von Johanes dän Deepa (Luk. 1:5, 9, 13, 36). Maria reisd no Elisabet un bleef fa dree Moonat bie ar en Juda. Dan jinkj see wada trigj no Nazaret (Luk. 1:39-40, 56). Doaderch wia Maria jewesset met de Jäajent en Juda bekaunt.

Lota reisd Josef von Nazaret no Betlehem, “om sikj enschriewen to loten”, wiels de Rejierunk daut velangd. Betlehem wort uk “David siene Staut” jenant, wua de Messias no de Profezeiunk no sull jebuaren woaren (Luk. 2:3-4, JHF; 1. Sam. 17:15; 20:6; Micha 5:1). Un doa brocht Maria Jesus uk to Welt. Josef velangd nich von Maria, daut see met een gaunz kjlienet Bäbe trigj no Nazaret reisen sull. Doawäajen bleewen dee en Betlehem, waut ojjefäa 9 Kilomeeta (ojjefäa 6 Miel) auf wia von Jerusalem. Daut wia dan uk leichta fa dee, met daut kjliene Bäbe nom Tempel en Jerusalem to reisen toom doa daut Opfa moaken, waut daut Jesaz velangd (3. Mo. 12:2, 6-8; Luk. 2:22-24).

Gott sien Enjel haud Maria aul em verut weeten loten, daut äa Sän wudd “David sienen Troon” kjrieen un “Kjennich sennen”. Josef un Maria woat daut veleicht sennen oppfaulent jewast, daut Jesus krakjt en David siene Staut jebuaren wort (Luk. 1:32-33; 2:11, 17). Veleicht dochten dee soo, daut et weis wia, en dise Staut to bliewen, bat Gott an ieescht weeten leet, waut see wieda doonen sullen.

Wie weeten nich, woo lang Josef un siene Famielje aul en Betlehem jewast wieren, aus de Stiernforscha doahan kjeemen. Oba dee wonden aul en een Hus un Jesus wia nich mea een kjlienet Bäbe; hee wia aul een “Kjint” (Mat. 2:11). Daut lat doano, daut dee nich trigj no Nazaret jinjen, oba lang jenuach en Betlehem bleewen, soo daut see sikj doa gaunz tus feelden.

Herodes “befool daut en Betlehem . . . aule kjliene Kjinja, twee Joa oolt un doarunja, sullen dootjemoakt woaren” (Mat. 2:16). Wiels een Enjel Josef aul doafäa jewoarnt haud, brochten Josef un Maria sikj met dän kjlienen Jesus toop no Ägipten; un dee bleewen doa, bat Herodes storf. Lota brocht Josef siene Famielje no Nazaret. Wuarom jinjen dee oba nich trigj no Betlehem? Wiels to dee Tiet rejieed Herodes sien Sän Archelaus en Judäa, un dee wia sea grausom. Un een Enjel haud Josef wada jewoarnt, daut et jefäadlich wia, doahan to trakjen. En Nazaret wia daut sechra, Jesus opptotrakjen (Mat. 2:19-22; 13:55; Luk. 2:39, 52).

Daut schient soo, daut Josef storf, ea Jesus daut mäajlich muak, daut Menschen kunnen nom Himmel komen. Daut bediet, Josef woat oppe Ieed toom läwen oppstonen. Dan woaren väle am kjennen trafen un mea doaräwa lieren, wuarom hee un Maria en Betlehem bleewen, nodäm daut Jesus jebuaren wia.