En de Tiet von dän Tweeden Weltkjrich trocken onse von Estlaunt no Dietschlaunt, wua ekj dan jebuaren wort. Doano muaken dee sikj reed, no Kanada to trakjen. Aum Aunfank wond wie dicht bie Ottawa en een gaunz kjlienet Huskje, wua uk Heena bennen wieren. Wie wieren kjemmalich oam, oba weens haud wie Eia to Freestikj.

Eenen Dach weesen Jehova siene Zeijen miene Mame Openboarunk 21:3-4. Aus see daut sach, wia see soo schaftich, daut see aunfunk to roaren. Pape un Mame deeden wieda de Schreft studieren un wieren boolt reed, sikj deepen to loten.

Onse kunnen nich fein Enjlisch, oba dee neemen de Woarheit doawäajen sea iernst. Meist jieda Sinowent neem Pape mie un miene jinjre Sesta Sylvia met nom Prädichtdeenst, nodäm daut hee de gaunze Nacht äwa sea schwoa en eene Nickel-Schmeltarie en Sudbury, Ontario, jeschauft haud. Un jieda Wäakj studieed wie toop aus Famielje dän Woaktorm. Pape un Mame holpen mie sea, eene Leew to kjrieen fa Gott. Un daut brocht mie bat doa, mie aune 1956 Jehova hantojäwen, aus ekj tieen Joa oolt wia. De groote Leew, waut miene Elren fa Jehova hauden, haft mie noch emma jeholpen, Jehova wieda to deenen.

Aus ekj ieescht ut de Schooljoaren wia, wort ekj een beskje aufjelenkjt. Ekj docht soo: Wan ekj wudd Pionia sennen, dan wudd ekj kjeen Mol jenuach Jelt haben toom aulawäajen romreisen. Dan funk ekj Oabeit bie een Rädio-Stäschen, wua ekj mie om daut Spell kjemmad, un daut jleicht ekj sea. Oba ekj schauft zeowes un kunn foaken nich bie de Toopkomes sennen. Ekj wia uk väl met soone toop, waut Gott nich leewden. Met de Tiet baudad mie mien Jewessen un ekj endad waut.

Ekj trock no Oshawa, Ontario. Doa troff ekj Ray Norman un siene Sesta Lesli un aundre Pionieren. Dee wieren sea oppnäment. Wäajen dee soo schaftich wieren, funk ekj aun, äwa mien Läwen notodenkjen. Dee rooden mie sea too, Pionia to woaren, un daut deed ekj dan uk em Septamba 1966. Ekj wia soo schaftich un mie jinkj daut eefach scheen. Oba ekj kunn mie don noch nich mol väastalen, woo väl scheenet ekj noch beläwen wudd.

Aus ekj noch enne School wia, haud ekj mie fa daut Betel en Toronto, Kanada, aunjejäft. Aus ekj dan Pionia wia, wort ekj enjelot, doa fa vea Joa to  schaufen. Oba ekj jleicht Lesli sea, un ekj docht soo, wan ekj dise Enlodunk aunneem, dan wudd ekj dee met eenst kjeen Mol mea seenen! Ekj deed sea lang un iernstlich bäden un neem dise Enlodunk dan aun. Ekj säd Lesli Audee, wan mie daut uk sea schwoa foll.

Em Betel schauft ekj enne Wauschstow un lota uk enne Offiz. Em Tweschentiet wort Lesli aus Sondapionia no Gatineau, Quebec, jeschekjt. Ekj docht foaken aun ar un wundad, waut see jroz deed un aus ekj de rajchte Entscheidunk jemoakt haud. Dan met een Mol kjrieech ekj waut scheenet to hieren: Ray, Lesli äa Brooda, wort uk nom Betel jekroacht! Un hee trock krakjt en miene Stow nenn. Doaderch haud ekj wada mea met Lesli to doonen. Wie befrieden ons aun dän latsten Dach, aus miene vea Joa em Betel derch wieren. Daut wia de 27. Feebawoa aune 1971.

Ekj un Lesli worden no eene fraunzeesische Vesaumlunk en Quebec jeschekjt. Een poa Joa lota, aus ekj 28 Joa wia, wort ekj enjelot, Kjreisoppsechta to sennen. Met soont haud ekj nich jeräakjent! Ekj feeld mie too junk un onen Erfoarunk, oba de Wieed von Jeremia 1:7-8 jeewen mie Moot. Oba wäajens Lesli aul miere Mol en eenen Koaren-Ekjsident jewast wia un uk Trubbels met schlopen haud, docht wie, daut daut fa ons em Kjreisdeenst sea schwoa sennen wudd. Oba see säd: “Wan Jehova ons no waut frajcht, sull wie daut dan nich weens proowen?” Wie neemen de Enlodunk aun un wieren 17 Joa em Kjreisdeenst!

Ekj haud sea väl to doonen em Kjreisdeenst un neem mie nich emma jenuach Tiet fa Lesli. Doawäajen must ekj noch waut sea wichtjet lieren. Eenen Mondach tiedich zemorjes puttad wäa aune Däa. Doa wia kjeena buten, oba doa stunt een Korf met eene Deschspreed, Frucht, Kjees, Broot, eene Buddel Wien, Kuffels un noch een Breefkje, wua daut säd: “Foa mol met diene Fru toop no eene schmocke Städ.” Daut wia een scheena Dach met Sonneschien, oba ekj säd to Lesli, daut ekj too drock wia met Räden reedmoaken. See kunn daut vestonen, oba see wia doawäajen een bät truarich. Aus ekj met de Oabeit aunfangen wull, baudad mie daut Jewessen. Ekj docht aun Efeesa 5:25, 28. Wull Jehova mie met eenst denkjen halpen, daut ekj mie sull mea Tiet nämen fa miene Fru? Aus ekj ieescht jebät haud, säd ekj to Lesli: “Well wie foaren!” See freid sikj sea. Wie fuaren no eene schmocke Städ, wua een Riefa wia, un spreeden de Deschspreed ut. Daut wia eent von de scheenste Doag en ons Läwen un ekj kjeem doawäajen noch reed met miene Räden.

Em Kjreisdeenst deend wie opp väl veschiedne Städen von British Columbia bat Newfoundland un wie hauden väl Freid. Ekj kunn daut doonen, waut ekj mie aul aus kjliena Jung jewenscht haud: väl romreisen. Ekj docht foaken äwa de Gilead-School no, oba mie jankad daut nich, aus Missionoa no een aundret Launt jeschekjt to woaren. Ekj docht, Missionoaren wieren butajeweenelje Menschen, un mie späad sikj soo, ekj wia nich to brucken fa daut.  Buta daut haud ekj noch Angst, daut dee ons met eenst wudden no Afrika schekjen, wua daut een deel Krankheiten un Kjrich jeef. Mie wia daut gaunz goot hia en Kanada.

Aune 1992 kunnen Jehova siene Zeijen en miere Lenda, waut ieescht to de Sowjetunion jehieeden, wada frie prädjen. Doawäajen fruagen se ons, aus wie wudden wellen en Estlaunt Missionoaren sennen. Wie wieren sea äwarauscht, oba wie deeden doaräwa bäden. Un wie dochten wada: “Wan Jehova ons no waut frajcht, sull wie daut dan nich mol proowen?” Soo, wie neemen daut aun un dochten: “Na, daut es weens nich Afrika.”

Wie fungen fuaz aun, de Sproak von Estlaunt to lieren. Aus wie een poa Moonat doa wieren, kjrieej wie de Oppgow, em Kjreisdeenst to deenen. Wie sullen 46 Vesaumlungen un waut Gruppen besieekjen en Estlaunt, Litauen un Lettlaunt un uk en Kaliningrad en Russlaunt. Daut bedied, wie musten uk proowen, von aul dise Lenda de Sproaken to lieren. Daut wia sea schwoa, oba de Breeda wieren schaftich, daut wie ons soo aunstrenjden, un dee holpen ons sea. Vonne 1999 aun jeef daut en Estlaunt een Betel un ekj wort toojedeelt, en daut Betelkommitee to deenen, toop met Toomas Edur, Lembit Reile un Tommi Kauko.

Wie haben een deel Breeda un Sestren kjanen jelieet, waut ea wieren aus Jefangne no Sibirien jeschekjt worden. Wan dee daut doa uk sea schwoa jehaut hauden un wiet auf von äare Famieljes jewast wieren, wieren dee oba nich vebettat. Dee wieren doawäajen noch mootich un flietich em Prädichtdeenst. Daut holp ons to seenen, daut wie uk en schwoare Tieden uthoolen kunnen un onse Freid bewoaren.

Fa väl Joaren haud wie daut sea drock un neemen ons nich väl Tiet toom vereiwen. Met eenst funk Lesli aun, sikj sea meed un onen Krauft to feelen. Wie wisten nich, daut daut wäajen eene Krankheit wia, waut Fibromyalgie heet. Wie dochten iernstlich doaräwa no, trigj no Kanada to trakjen. Aus wie enjelot worden fa de School fa Betelkommitee-Breeda en Patterson, New York, enne Stäts, beduad wie, aus wie doa wudden kjennen sennen. Wie deeden sea bäden un neemen de Enlodunk aun. Jehova haft onse Entscheidunk jesäajent. En dee Tiet von de School kunn Lesli entlich doktren un dan kunn wie met onse Oabeit wiedamoaken.

Eenen Zeowes aune 2008, aus wie wada trigj en Estlaunt wieren, fond mie wäa von de Hauptoffiz un fruach, aus wie wudden reed sennen, no Kongo to trakjen. Met daut haud ekj werkjlich nich jeräakjent, besonda aus dee säd, daut see daut dän näakjsten Dach aul weeten wullen. Ieeschtlich säd ekj Lesli nuscht doavon, wiels ekj wist, dan wudd see dee Nacht nich schlopen kjennen. Oba nu kunn ekj dee Nacht nich schlopen, wiels ekj met Jehova doaräwa räd, wuarom ekj soo Angst haud fa Afrika.

Dän näakjsten Dach, aus ekj Lesli doavon vetald, docht wie soo: “Daut es Jehova, waut ons no Afrika kroacht. Woo weet wie, daut wie daut nich woaren  kjennen, wan wie daut nich proowen?” Nodäm daut wie 16 Joa en Estlaunt wieren, fua wie metem Zhett no Kinshasa en Kongo. Daut Betel haud eenen schmocken Goaden un daut wia doa ruich. Lesli stald en onse Stow fuaz een Koatje opp, waut see aul haud, aus wie von Kanada veleeten. Doabowen stunt: “Blieej doa, wua du jeplaunt woascht”. Daut wia scheen, aus Missionoaren met de Breeda toop to sennen un Bibelstudiums to haben. Onse Freid em Deenst fa Jehova wort noch jrata. Met de Tiet haud wie daut Väarajcht, 13 Betels en Afrika to besieekjen. Doaderch hab wie veschiedne Menschen kjanen jelieet un woo dee daut aula haben. De Angst, waut ekj ieeschtlich haud, wia nu gaunz wajch un wie dankten Jehova, daut hee ons haud no Afrika jeschekjt.

En Kongo äten dee soont, waut wie kjeen Mol dochten, daut wie daut wudden kjennen äten, biejlikj Ojjezeffa. Oba aus wie sagen, woo scheen de Breeda daut schmakjt, proowd wie daut uk un jleichten daut.

Wie reisden nom Oosten von daut Launt toom de Breeda doa em jeisteljen uthalpen un Sachen brinjen, waut dee needich fälden. Doa wieren Baunden, waut en de Darpa nennkjeemen un de Frues un Kjinja sea hunjsch behaundelden un toosaden. De mieeschte Breeda jinkj daut sea knaup. Oba dee äare groote Leew fa Jehova jinkj ons sea to Hoaten, uk dee äa Gloowen aun daut Oppstonen vom Doot un daut dee de Organisazion soo tru wieren. Daut brocht ons toom nodenkjen un onsen Gloowen to stoakjen. Eenje Breeda hauden äare Hiesa un Arnten veloaren. Daut wees mie, woo haustich eena em tieteljen aules spretzgonen kunn un woo wichtich daut es, em jeisteljen rikj to sennen. Wan de Breeda daut uk sea schwoa hauden, jaumarieeden dee oba nich foaken. Daut holp ons, mootich to bliewen, wan onse Jesuntheit uk nich goot wia un wie noch aundre Trubbels hauden.

Daut wia eene groote Äwarauschunk, aus se ons fruagen, aus wie wudden wellen no daut Betel en Hong-Kong trakjen. Wie hauden daut newers jedocht, daut wie noch mol wudden no Asien komen! Oba wie hauden bie jieda Oppgow jeseenen, woo leeftolich Jehova met ons wia, un doawäajen  neem wie dise Enlodunk uk aun. Aune 2013 veleet wie onse Frind un daut schmocke Afrika met Tronen enne Uagen, onen to weeten, waut nu komen wudd.

Hong-Kong wia gaunz aundasch: Daut wia eene groote Staut, stiew voll Menschen von aulawäajen oppe Welt. Un de kjneesische Sproak wia sea schwoa to lieren. Oba de Breeda neemen ons wellich opp un wie jleichten daut Äten doa uk sea. Daut jeef emma mea Oabeit em Betel, oba to dee Tiet jinjen de Priesen toom Launt un Jebieda kjeepen sea nopp. Doawäajen wort de Väastaunt sikj eenich, daut mieeschte Launt un Jebieda to vekjeepen, waut daut Betel haud. Korz doano, aune 2015, word wie no Sied-Korea jeschekjt, wua wie noch emma deenen. Hia must wie wada eene niee schwoare Sproak lieren un wie kjennen dee noch emma nich goot. Oba de Breeda moaken ons Moot un sajen ons emma wada, daut wie ons aul vebätat haben.

Met wäm Frind woaren es nich emma leicht. Oba wie haben jemoakjt, daut wan wie oppnäment sent, dan es daut väl leichta. Wie kjennen sajen, daut de Breeda sikj en mea Stekjen likjnen, aus daut dee veschieden sent. Jehova haft ons opp soone scheene Wajch jemoakt, daut wie ons Hoat wiet opmoaken kjennen un een deel Frind väl räakjnen kjennen (2. Kor. 6:11).

Wie haben jelieet, woo wichtich daut es, de Menschen soo to seenen, aus Jehova deit, un doano to kjikjen, woo Jehova ons siene Leew wiest un leiden deit. Wan wie mootloos wieren ooda ons nich secha wieren, aus de Breeda ons jleichten, deed wie wada de Koatjes un Breew läsen, waut Frind ons jejäft hauden. Wie haben daut selfst beläft, woo Jehova onse Jebäda beauntwuat haft, ons siene Leew wees un emma Krauft jeef toom wiedamoaken.

Met de Joaren haben ekj un Lesli jelieet, woo wichtich daut es, daut wie aus Ehelied Tiet toop haben, krakjt endoont woo drock wie sent. Wie haben uk jelieet, woo wichtich daut es, äwa sikj selfst to lachen, besonda wan eena eene niee Sproak lieet. Un jieda Zeowes proow wie, aun waut scheenet to denkjen un Jehova doafäa to danken.

Ekj haud kjeen Mol jedocht, daut ekj kunn Missionoa sennen ooda en een aundret Launt läwen. Un doch hab ekj daut beläft, daut met Jehova siene Help aules mäajlich es. Mie faulen de Wieed von Jeremia bie, aus hee säd: “Har, du hast mie beräd” (Jer. 20:7, JHF). Krakjt, wie haben soo väl kunt beläwen, met waut wie kjeen Mol jeräakjent hauden – un ekj kunn mau rajcht metem Zhett met. Wie reisden no mea Lenda, aus ekj mie bie junk jedocht haud. Wie deeden aulawäajen oppe Welt Betels besieekjen. Un bie aul daut stunt Lesli mie emma bie un daut schaz ekj sea.

Wie proowen emma em Denkj to hoolen, fa wäm wie aules doonen un wuarom. Derch aul daut scheene, waut wie nu beläwen, kjenn wie een beskje schmakjen, woo scheen daut eewje Läwen sennen woat. Jehova moakt dan siene “Haunt op” un woat eenem jiedren daut jäwen, waut dee sikj wenscht (Psa. 145:16).