1-2. Waut mott wie no Psalm 25:14 no doonen, wan wie wellen met Jehova Frind sennen?

 WOO mott eena sennen, wan eena met wäm well goode Frind sennen? Secha wurscht du sajen, daut goode Frind sikj waut räakjnen un unjastetten sellen, un nich, daut eena dän aundren ferchten mott. Oba soo aus de Teemavarsch fa disen Artikjel sajcht, motten dee, waut doa wellen Frind met Jehova sennen, “am ferchten” (läs Psalm 25:14).

² Wie motten aula doaraun schaufen, Jehova wieda oppe rajchte Wajch to ferchten, endoont woo lang wie am aul jedeent haben. Oba waut meent daut, Gott to ferchten? Woo kjenn wie daut lieren, Jehova to ferchten? Un waut kjenn wie von dän Oppsechta Obadja, dän Huagen Priesta Jojada un dän Kjennich Joasch äwa de Gottesforcht lieren?

3. Woo kaun jewesse Forcht ons beschitzen? Laj daut ut.

³ Veleicht fercht wie ons, wan wie jleewen, daut ons opp irjenteene Wajch waut woaren kunn. Dise Sort Forcht kaun soogoa fein sennen, wiels dee kaun ons halpen, goode Entscheidungen to moaken. Wan wie Angst haben, wua rauftofaulen, dan woa wie nich too dicht bie de Kaunt von eenen Boajch gonen. Wan wie Angst haben, ons to velazen, dan woa wie Jefoaren utem Stich gonen. Wan wie Angst haben, eenen gooden Frint to velieren, dan woa wie nuscht sajen ooda doonen, waut am beleidjen kunn.

4. Woo well de Soton, daut wie Jehova ferchten sellen?

 ⁴ De Soton well haben, daut wie Jehova oppe orrajchte Wajch ferchten. Hee well, daut wie daut jleewen, waut Elifas mol säd. Dee jleewd, daut Jehova een dolla Gott wia, waut daut jleicht, sikj auftorajchnen, un niemols met ons tofräd wia (Hiob 4:18-19). De Fient wudd daut jleichen, daut wie ons soo sea fa Jehova grulden, daut wie am nich mol mea deenen wullen. Daut ons daut nich soo jeit, mott wie daut lieren, Jehova oppe rajchte Wajch to ferchten.

5. Waut meent daut, Gott to ferchten?

⁵ Wäa de rajchte Sort Forcht haft, leeft Gott un well nuscht doonen, waut am von Gott aufbrinjen kunn. Bie Jesus wia daut soo, un doawäajen hilt hee Gott “en Ieren” (Heb. 5:7). Hee gruld sikj nich fa Jehova (Jes. 11:2-3). Hee leewd am sea un wull am jehorchen (Joh. 14:21, 31). Krakjt soo aus Jesus bewunda wie Jehova un ieren am, wiels hee leeftolich, weis un jerajcht es un väl Macht haft. Un wie weeten uk, daut Jehova ons sea leeft un daut wie am schaftich ooda truarich moaken kjennen – doano, aus wie no am horchen ooda nich (Psa. 78:41; Spr. 27:11).

6. Derch waut kjenn wie Gottesforcht lieren? (Psalm 34:12).

⁶ De Gottesforcht es ons nich enjebuaren. Wie motten waut doonen toom dee kjrieen (läs Psalm 34:12). Eenatlei, waut ons doabie halpen kaun, es, daut wie ons met de Schepfunk aufjäwen. Aun daut, “waut hee jeschaufen haft”, es Gott siene Weisheit, siene Krauft un siene groote Leew fa ons to seenen. Je kloara wie siene Ieejenschoften enne Natua seenen kjennen, je dolla woa wie am ieren un leewen (Reem. 1:20). Eene Sesta, waut Adrienne heet, sajcht: “Wan ekj Jehova siene Weisheit enne Schepfunk see, dan mott ekj mie eefach tieren, un daut halpt mie, doaraun to denkjen, daut hee weet, waut daut baste es fa mie.” Wiels see doa sea äwa nojedocht haud, sajcht see: “Wuarom wudd ekj waut doonen wellen, waut mie von Jehova aufbrinjen kunn, dee mie daut Läwen jeef?” Wurscht du die dise Wäakj noch kjennen Tiet nämen, äwa waut von de Natua notodenkjen? Wan du daut deist, woascht du Jehova noch dolla ieren un leewen (Psa. 111:2-3).

7. Woo kaun daut Jebäd ons halpen, de rajchte Sort Forcht to haben?

⁷ Eene aundre Wajch toom mea Gottesforcht kjrieen es, pinkjlich to bäden. Je foakna wie bäden, je bäta lia wie Jehova kjanen. Jiedats Mol, wan wie am no Krauft froagen toom waut schwoaret uthoolen, halpt ons daut, aun Jehova siene groote Macht to denkjen. Wan wie am fa daut Leesjelt danken, dan woat ons wada dietlich, woo sea hee ons leeft. Un wan wie Jehova om Help prachren wäajen eenen Trubbel, dan denkj wie doaraun, woo weis hee es. Dise Jebäda kjennen ons halpen, daut wie Jehova dolla ieren. Un wie sent ons dan noch eenja, nuscht to doonen, waut ons von am aufbrinjen kunn.

8. Waut halpt ons, Gott wieda to ferchten?

⁸ Wie kjennen Gott wieda ferchten, wan wie de Schreft studieren un proowen, von de goode un de schlajchte Biespels to lieren. Daut ieeschte woa wie von Jehova siene twee true Deena räden: Eent es de Oppsechta Obadja, waut fa dän Kjennich Ahab schauft, un daut aundre es de Huaga Priesta Jojada. Dan woa wie seenen, waut wie von dän Kjennich Joasch von Juda lieren kjennen, dee Jehova ieeschtlich tru wia un lota oba von am aufkjeem.

9. Woo holp Obadja de Gottesforcht? (1. Kjennichs 18:3, 12).

⁹ De Bibel sajcht, daut Obadja b sea gottesferchtich wia (läs 1. Kjennichs 18:3, 12). Woo holp am daut, dise rajchte Sort Forcht to haben? Doaderch wia hee tru un opp to veloten, un doawäajen stald de Kjennich am aus Oppsechta äwa sienen Hushault aun (see uk Nehemia 7:2). De Gottesforcht holp Obadja uk, daut hee sea äwanäment wia. Am fäld daut uk sea needich, wiels hee en dee Tiet läwd, aus de beesa Kjennich Ahab rejieed. Dee “deed waut däm HARN schlajcht jefoll, un dolla aus aule [Kjennichs] waut ver am jewast wieren” (1. Kjen. 16:30). Ahab siene Fru Isebel deed Baal aunbäden. See kunn Jehova soo schlajcht lieden, daut see de woare Aunbädunk en daut Nuadkjennichrikj utriemen wull. Un see haft mau rajcht väle von Gott siene Profeeten dootjemoakt (1. Kjen. 18:4). Obadja deend Jehova werkjlich en eene sea schwoare Tiet.

10. Woo wees Obadja, daut hee sea äwanäment wia?

¹⁰ Woo wees Obadja, daut hee sea äwanäment wia? Aus Isebel no Gott siene Profeeten socht, om dee doottomoaken, vestuak Obadja 100 von dee. De Schreft sajcht, daut hee “50 en eene Heel un 50 en eene aundre aum Läwen hilt un dee met Broot un Wota vesorjd” (1. Kjen. 18:13-14). Wan daut wäa wia enjeworden, dan wudd disen äwanämenden Obadja daut gaunz secha daut Läwen jekost haben! Secha wull Obadja nich stoawen un am wia angst. Oba hee räakjend Jehova un dän siene Deena mea aus sien ieejnet Läwen.

11. Woo doonen Jehova siene Deena vondoag dän Dach Obadja no? (See uk daut Bilt.)

¹¹ Vondoag dän Dach läwen väle von Jehova siene Deena en Lenda, wua ons Woakj veboden es. Krakjt soo aus Obadja hieren dise leewe Breeda un Sestren nich opp, Jehova to deenen, oba dee doonen doawäajen wieda de Rejierungen de Iea jäwen, waut dee traft (Mat. 22:21). Dee wiesen äare Gottesforcht doaderch, daut see Gott mea jehorchen aus  Menschen (Apj. 5:29). Daut bediet, daut dee wieda de goode Norecht bekauntmoaken un plietsch äare Toopkomes haben (Mat. 10:16, 28). Dee sent doarom todoonen, daut äare Breeda un Sestren daut jeistelje Äten kjrieen, waut an fält. Henri biejlikj läft en een Launt von Afrika, wua ons Woakj mol veboden wia. En dise Tiet jeef hee sikj aun, onse Bieekja no de Breeda un Sestren to brinjen. Hee schreef: “Ekj sie sea bleed. Ekj sie mie secha, daut ekj bloos doawäajen äwanäment sennen kunn, wiels ekj Jehova werkjlich ieren wull.” Kaust du uk soo äwanäment sennen aus Henri? Jo, du kaust, wan du Jehova oppe rajchte Wajch ferchten deist.

12. Woo weesen de Huaga Priesta Jojada un siene Fru, daut see Jehova gaunz tru wieren?

¹² De Huaga Priesta Jojada haud Forcht fa Jehova, un doawäajen wia hee tru un holp aundre, Jehova to deenen. Hia een Biespel: Aus Isebel äare Dochta Atalja sikj onopprechtich selfst to eene Kjennijin en Juda muak, musten de Menschen sikj werkjlich fa dise beese Fru grulen. Ar jankad daut soo sea, Kjennijin to sennen, daut see mau rajcht proowd, aul äare Grootkjinja doottomoaken! Dan wudd doa kjeena mea jewast sennen, waut doa noch kunn Kjennich sennen (2. Chr. 22:10-11). Oba eent von dise Kjinja äwaläwd, wiels Jojada siene Fru Joscheba daut raden deed. See un äa Oomkje vestuaken dän kjlienen Joasch un kjemmaden sikj om am. Soo sagen Jojada un Joscheba doano, daut doa wäa von David siene Nokomen wia, waut lota kunn Kjennich sennen. Jojada wia Jehova tru un haud nich äwamotich Angst fa Atalja (Spr. 29:25).

13. Woo wees Jojada wada, daut hee tru wia, aus Joasch säwen Joa oolt wia?

¹³ Aus Joasch säwen Joa oolt wia, wees Jojada wada, daut hee Jehova tru wia. Hee tald sikj waut äwa, om Joasch toom Kjennich to moaken. Dan wudd wada eent von David siene Nokomen Kjennich sennen. Wan daut nich jlekjen wudd, dan wudd Jojada meist fa secha dootjemoakt woaren. Oba Jehova säajend daut. Met de Help von de Leidasch un de Leviten kunn hee Joasch toom Kjennich moaken un Atalja dootmoaken (2. Chr. 23:1-5, 11-12, 15; 24:1). Jojada “muak eenen Bunt tweschen däm HARN un däm Kjennich un sien Volkj, daut see däm HARN sien Volkj sullen sennen” (2. Kjen. 11:17). “Jojada stald uk Wajchta aun bie de Puaten aum Tempel, daut kjeena nenkjeem, waut sikj aun irjentwaut orrein jemoakt haud” (2. Chr. 23:19).

14. Waut vonne Iea kjrieech Jojada, wiels hee Jehova jeieet haud?

¹⁴ Jehova haud ea mol jesajcht: “Ekj woa dee ieren dee mie ieren” (1. Sam. 2:30). Un krakjt soo wia daut uk: Hee beloond Jojada. Daut goode, waut dis Huaga Priesta deed, wort en de Schreft oppjeschräwen, daut wie doavon lieren kjennen (Reem. 15:4). Un aus Jojada storf, kjrieech hee de besondre Iea, daut hee kunn begroft woaren “en de Davidstaut bie de Kjennichs, wiels hee aun Israel un aun Gott un sienen Tempel goodet jedonen haud” (2. Chr. 24:15-16).

15. Waut kjenn wie von Jojada siene Jeschicht lieren? (See uk daut Bilt.)

¹⁵ Jojada siene Jeschicht kaun ons aula halpen, Forcht fa Gott to haben. Eltestasch kjennen Jojada nodoonen, wan dee emma doano seenen, woo dee de Vesaumlunk beschitzen kjennen (Apj. 20:28). Elre Breeda un Sestren kjennen von am lieren, daut Jehova an brucken kaun toom sienen Wellen derchfieren,  wan dee am ferchten un tru bliewen. Hee woat an kjeen Mol tosied schuwen. Junge Menschen kjennen doavon lieren, woo Jehova met Jojada omjinkj, un dee kjennen uk elre Breeda un Sestren leewen un ieren – besonda dee, waut Jehova aul lang tru jedeent haben (Spr. 16:31). Un wie kjennen uk aula waut von de Leidasch un de Leviten lieren, waut Jojada unjastetten deeden. Wie wellen onse Eltestasch uk tru unjastetten un dee jehorchen (Heb. 13:17).

16. Waut deed de Kjennich Joasch, soofroo aus Jojada doot wia?

¹⁶ Jojada holp Joasch, een gooda Kjennich to sennen (2. Kjen. 12:3). Doawäajen wull de junga Joasch daut doonen, waut Jehova jefoll. Oba aus Jojada ieescht doot wia, horcht Joasch no de aufjefolne väaschte Mana von Juda. Woo kjeem daut ut? Hee un daut Volkj “deenden de Aschera un Jetta Bilda” (2. Chr. 24:4, 17-18). Wiels Jehova soo truarich doaräwa wia, schekjt hee an “Profeeten, om an . . . trigjtoroopen no am, oba see horchten nich no dee”. Een Profeet wia Jojada sien Sän Secharja, c waut uk een Priesta un met Joasch em Frintschoft wia. Oba dee horchten uk nich mol no dän. Joasch leet Secharja mau rajcht dootmoaken, wan dän siene Famielje  am uk daut Läwen jerat haud (2. Chr. 22:11; 24:19-22). Woo onkluak!

17. Woo kjeem daut fa Joasch ut?

¹⁷ Joasch hieed opp, Jehova oppe rajchte Wajch to ferchten, un daut kjeem sea schlajcht ut. Jehova haud jesajcht: “Dee waut mie veachten woa ekj weinich räakjnen” (1. Sam. 2:30). Een kjlienet Häa von aramäische Soldoten jewonn lota Joasch sien “sea grootet Häa” un hee wort “schwoa vewunt”. Aus de Aramäa ieescht wajch wieren, wort Joasch von siene ieejne Deena dootjemoakt, wäajen hee Secharja haud loten ombrinjen. Dis beesa Kjennich wort daut nich mol wieet jetalt, daut se am “en de Kjennichs äare Jräwa” begrowden (2. Chr. 24:23-25).

18. Woo kjenn wie daut no Jeremia 17:7-8 no väabieejen, soo to woaren aus Joasch?

¹⁸ Waut lia wie ut Joasch siene Jeschicht? Hee wia soo aus een Boom, waut eene Stett fäld, wäajens dee nich deepe Wartlen haud. Dee Stett wia Jojada. Aus dee ieescht doot wia, funk Joasch aun, no de Aufjefolne to horchen un wort Jehova ontru. Waut lieet ons daut? Onse Gottesforcht mott nich bloos doavon aufhenjich sennen, daut aundre Breeda ooda wäa von onse Famielje een goodet Biespel fa ons sent. Wan wie wellen em jeisteljen stoakj bliewen, mott wie dicht bie Jehova bliewen un am emma dolla leewen un ieren. Daut kjenn wie, wan wie pinkjlich studieren, doaräwa nodenkjen un bäden (läs Jeremia 17:7-8; Kol. 2:6-7).

19. Waut velangt Jehova von ons?

¹⁹ Jehova velangt goanich väl von ons. En Liera 12:13 woat daut toopjefot: “Hab Ieaforcht fa Gott, un hool siene Jesazen; daut es aules waut von Menschen velangt es.” Wan wie Gott ferchten, woa wie schwoaret kjennen derchstonen un soo aus Obadja un Jojada tru bliewen. Nuscht woat ons kjennen aufhoolen, met Jehova Frind to sennen!