25. ARTIKJEL FA DAUT STUDIUM
LEET 7 Jehowa es onse Krauft
Denkj doaraun: Jehowa es “een Gott, dee doa läft”
“De HAR läft” (PSA. 18:47)
OM WAUT DAUT JEIT
Woo ons daut togood kjemt, doaraun to denkjen, daut wie “een Gott [deenen], dee doa läft”.
1. Wuarom kjennen Jehowa siene Deena am wieda deenen, wan dee uk väl Schwoaret beläwen?
“JRESLICH schwoare Tieden” – dits, waut de Bibel von dee Tiet sajcht, en dee wie läwen (2. Tim. 3:1). Jehowa siene Deena motten en dise Welt met deeselwje Schwierichkjeiten foadich woaren, waut de aundre uk aula motten, un dan haben dee noch Jäajenstaunt ooda woaren vefolcht. Waut halpt ons, Jehowa wieda to deenen, wan wie uk soon Schwoaret beläwen? Eene Help es, daut wie Jehowa kjanen un weeten, “hee es een Gott , dee doa läft” (Jer. 10:10; 2. Tim. 1:12).
2. Waut weet wie äwa Jehowa, waut ons kaun Krauft jäwen?
2 Jehowa es eene werkjelje Persoon, waut ons bie Schwierichkjeiten halpt un no Jeläajenheiten sieekjt, ons bietostonen (2. Chr. 16:9; Psa. 23:4). Wan wie doaraun denkjen, daut hee een läwendja Gott es, dan kjenn wie de Krauft kjrieen, irjent Schwierichkjeiten uttohoolen, waut wie beläwen. See wie mol, woo daut bie dän Kjennich David wia.
3. Waut meend David doamet, aus hee säd, “de HAR läft”?
3 David kjand Jehowa un vetrud opp am. Aus siene Fiend am dootmoaken wullen, biejlikj de Kjennich Saul, fruach David Jehowa no Help (Psa. 18:7). Nodäm daut Gott David sien Jebäd beauntwuat haud un am jerat haud, säd David: “De HAR läft” (Psa. 18:47). Doamet wull David nich bloos sajen, daut daut Gott jeef. No een Buak toom nosieekjen no wull David dietlich moaken, daut Jehowa de woara Gott wia un daut hee emma waut fa siene Deena deit. Wäajen daut, waut David selfst beläft haud, wist hee, daut Gott daut sach, waut hee derchmuak un reed wia, am to halpen. Doaderch kjrieech David dän Moot, Jehowa wieda to deenen un to lowen (Psa. 18:29-30, 50).
4. Woo kjemt ons daut togood, Jehowa aus eenen läwendjen Gott to seenen?
4 Wie kjennen Jehowa iewrich deenen, wan wie ons gaunz secha sent, daut hee een läwendja Gott es. Wie woaren uk de Krauft haben, de Schwierichkjeiten uttohoolen un uk dän Moot toom ons en sienen Deenst wieda aunstrenjen. Un wie woaren ons gaunz eenich sennen, dicht bie Jehowa to bliewen.
DE LÄWENDJA GOTT WOAT DIE KRAUFT JÄWEN
5. Waut kaun ons de Sechaheit jäwen, wan wie waut Schwoaret derchgonen? (Filippa 4:13).
5 Wie woaren irjenteene Schwierichkjeit uthoolen kjennen, krakjt endoont woo groot dee es, wan wie doaraun denkjen, daut Jehowa de läwendja Gott es un ons emma halpen kaun. Wie weeten je, daut doa nich een Trubbel too groot es fa Jehowa. Hee es de Aulmajchtja un hee kaun ons de Krauft jäwen uttohoolen (läs Filippa 4:13, NW). Dit kaun ons de Sechaheit jäwen, wan wie waut Schwoaret derchgonen. Wan wie seenen, woo Jehowa ons nu aul halpt, dan sent wie ons secha, daut hee ons uk en jratre Schwierichkjeiten halpen woat.
6. Waut beläwd David, aus hee junk wia, wuaderch hee noch een jratret Vetruen opp Jehowa kjrieech?
6 Well wie mol seenen, waut David opp twee Sauz beläwd, wuaderch hee noch een jratret Vetruen opp Jehowa kjrieech. Aus David noch een junga Schophoad wia, kjeemen doa een Boa un een Leiw un jreepen sikj beid eent von sienen Voda siene Schop. Beidmol rand David dee hinjaraun un rad de Schop. Oba David wist, daut hee daut nich ut sikj selfst kunn. Hee wist, daut Jehowa doahinja stunt (1. Sam. 17:34-37). David vegaut daut kjeenmol, waut hee beläwd. Wäajen hee doaräwa nodocht, kjrieech hee een jratret Vetruen doaropp, daut de läwendja Gott am lota uk Krauft jäwen wudd.
7. No waut kjikjt David, un woo halpt am daut, jäajen Goliat to kjamfen?
7 Lota, aus hee veleicht noch een Jugentlicha wia, jinkj hee no de Städ, wua de israelitische Soldoten sikj vesaumelt hauden. Hee wort en, daut de Soldoten sea Angst hauden, wäajen Goliat, een groota Filista, de Israeliten vespotten deed (1. Sam. 17:10-11). De Soldoten hauden soo Angst, wäajen dee doano kjikjten, woo groot Goliat wia un waut dee to äant säd (1. Sam. 17:24-25). Oba David kjikjt doa aundasch naun. David wist, daut Goliat nich bloos de Israeliten vespotten deed, oba “dän läwendjen Gott sien Häa” (1. Sam. 17:26). David docht daut ieeschte aun Jehowa. Hee vetrud doaropp, daut Jehowa am en dise Loag wada halpen wudd, wäajen Gott daut uk aul ea jedonen haud, aus hee een Schophoad wia. Wäajen hee sikj secha wia, daut Gott am biestunt, kjamft David jäajen Goliat un jewonn! (1. Sam. 17:45-51).
8. Waut kaun ons Vetruen stoakjen, daut Jehowa ons emma halpen woat? (See uk daut Bilt.)
8 Wie kjennen uk Schwierichkjeit uthoolen, wan wie doaraun denkjen, daut de läwendja Gott fuaz reed es, ons to halpen (Psa. 118:6). Wie kjennen ons Vetruen doaropp stoakjen, wan wie doaräwa nodenkjen, waut hee aul ea fa ons jedonen haft. Läs de biblische Jeschichten, waut die wiesen, woo Jehowa siene Deena ieeschtemma jerat haft (Jes. 37:17, 33-37). Du kaust uk opp jw.org Erfoarungen finjen, waut wiesen, woo Jehowa onse Breeda un Sestren vondoag dän Dach unjastett haft. Un denkj uk doaraun, waut Jehowa aul aules fa die jedonen haft. Veleicht feelt sikj die daut soo, daut Jehowa nich soon Grootet fa die jedonen haft, aus die von eenen Leiw ooda Boa to raden. Oba Jehowa haft doawäajen aul väl Sachen fa die jedonen! Hee haft die jeholpen, daut du kust sien Frint woaren (Joh. 6:44). Bloos met siene Help, kaust du am noch deenen. Du wurscht kjennen Jehowa doano froagen, daut hee die halpt, doaraun to denkjen, woo hee diene Jebäda aul beauntwuat haft, woo hee die to de rajchte Tiet daut jeef, waut die fäld ooda woo hee die en eene schwoare Tiet biejestonen haft. Wan du äwa soont nodenkjst, dan woascht du die noch dolla doaropp veloten, daut Jehowa fa die enstonen woat.
Wan wie derch waut Schwoaret gonen, kjenn wie Jehowa schaftich ooda truarich moaken (See Varsch 8-9)
9. Aun waut well wie denkjen, wan wie derch Schwoaret gonen? (Spricha 27:11).
9 Wan wie Schwierichkjeiten haben, dan well wie aun daut Wichtichste denkjen. De Soton behaupt, daut wan wie Schwierichkjeiten haben, woa wie Jehowa dän Rigjen dreien. Soo doano, waut wie doonen, wan wie derch waut Schwoaret gonen, kjenn wie Jehowa schaftich ooda truarich moaken (Hiob 1:10-11; läs Spricha 27:11). Oba wan wie Jehowa tru bliewen, dan wies wie, daut wie am leewen un daut de Soton een Läajna es. Jeit die daut knaup ooda horchen de Menschen nich too, wua du prädichst? Hast du Jäajenstaunt von de Rejierunk ooda sest irjent aundre Schwierichkjeiten? Wan jo, dan denkj doaraun, daut du de Jeläajenheit hast, Jehowa sien Hoat schaftich to moaken. Hool uk em Denkj, daut hee daut kjeenmol woat tooloten, daut du woascht schwanda aufjeprooft woaren, aus du uthoolen kaust (1. Kor. 10:13). Hee woat die de Krauft jäwen toom uthoolen.
DE LÄWENDJA GOTT WOAT DIE BELOONEN
10. Waut woat de läwendja Gott fa dee doonen, waut am deenen?
10 Jehowa beloont deejanje emma, waut am deenen (Heb. 11:6). Hee jeft ons nu aul Fräd un Tofrädenheit un woat ons lota uk daut eewje Läwen jäwen. Wie kjennen gaunz opp Jehowa vetruen, daut hee ons well beloonen un uk de Krauft doatoo haft. Daut brinjt ons bat doa, Jehowa wieda ons Bastet to jäwen, krakjt soo aus siene true Deena ieeschtemma deeden. Dits, waut Timotäus deed (Heb. 6:10-12).
11. Waut brocht Timotäus bat doa, schwoa fa de Vesaumlunk to schaufen? (1. Timotäus 4:10).
11 Läs 1. Timotäus 4:10. Timotäus haud eenen stoakjen Gloowen, daut de läwendja Gott am beloonen wudd. Dauts, wuarom hee sikj sea fa Jehowa un aundre aunstrenjen deed. Woo deed hee daut? De Apostel Paulus rod am too, een bätra Liera to woaren em Deenst un enne Vesaumlunk. Timotäus sull uk een goodet Biespel sennen fa de jinjre un fa de elre Breeda. Un hee kjrieech uk nich emma gaunz leichte Oppgowen, biejlikj sull hee aundre leeftolich Rot jäwen, wan dee daut fäld (1. Tim. 4:11-16; 2. Tim. 4:1-5). Eenjemol sagen aundre daut nich, waut Timotäus aules deed, un wieren uk nich dankboa doafäa. Oba hee wia sikj secha, daut Jehowa am beloonen wudd (Reem. 2:6-7).
12. Waut kaun de Eltestasch bat doa brinjen, sikj fa de Vesaumlunk sea auntostrenjen? (See uk daut Bilt.)
12 De Eltestasch kjennen sikj bie dise Tiet uk gaunz secha sennen, daut Jehowa äare goode Oabeit sitt un dee väl räakjent. Dee doonen nich bloos Hoadbesuchs moaken ooda enne Vesaumlunk lieren un prädjen; dee halpen uk bie Buwoakjs met ooda wua een Owwada wia. Noch aundre doonen bie eene Besuchsgrupp fa Kranke em Hospitol ooda bie een Hospitol-Vemedlungs-Kommitee methalpen. Soone Eltestasch, waut doa reed sent, bie soowaut mettomoaken, seenen daut nich doafäa aun, daut de Vesaumlunk von Menschen enjerecht es, oba von Jehowa. Doawäajen schaufen dee schwoa fa de Vesaumlunk un vetruen gaunz doaropp, daut Gott äant beloonen woat fa aul daut, waut see doonen (Kol. 3:23-24).
De läwendja Gott woat die fa de schwoare Oabeit beloonen, waut du fa de Vesaumlunk deist (See Varsch 12-13)
13. Woo denkjt Jehowa doaräwa, waut wie fa am doonen?
13 Nich aule kjennen Eltestasch sennen. Oba wie aula kjennen waut fa Jehowa doonen. Hee räakjent daut sea väl, wan wie ons Bastet em Deenst fa am doonen. Hee sitt daut uk, wan wie waut fa daut Weltwiede Woakj jäwen, krakjt endoont woo weinich daut mau es. Hee freit sikj uk, wan wie onse Haunt opphäwen toom eene Auntwuat jäwen, wan wie uk bleed sent. Un hee freit sikj uk, wan wie aundre vejäwen, waut ons beleidicht haben. Wan du uk denkjst, daut du nich soo väl doonen kaust, aus du wurscht wellen, kaust du die oba secha sennen, daut Jehowa daut schazt, waut du doonen kaust. Hee leeft die fa daut un woat die beloonen (Luk. 21:1-4).
BLIEW DICHT BIE DÄN LÄWENDJEN GOTT
14. Woo halpt ons daut, Jehowa tru to bliewen, wan wie goode Frind sent met am? (See uk daut Bilt.)
14 Wan Jehowa fa ons soo es aus eene werkjelje Persoon, dan woat ons daut leichta sennen, am tru to bliewen. Soo wia daut bie Josef. Hee wia sikj gaunz eenich, aule sintelje Sorten Sex auftowiesen. Hee wist, daut et waut aun Gott doonen wudd un hee wull am nich aunschmäaren (1. Mo. 39:9). Daut Jehowa fa ons soo es aus eene werkjelje Persoon, mott wie ons Tiet nämen, to am to bäden un sien Wuat to studieren. Soo woa wie am emma noda komen. Wan wie goode Frind sent met Jehowa, soo aus Josef wia, dan woa wie nuscht doonen wellen, waut am nich jefelt (Jak. 4:8).
Dicht bie dän läwendjen Gott to bliewen, woat die halpen, eenen stoakjen Gloowen to hoolen (See Varsch 14-15)
15. Waut kjenn wie doavon lieren, waut de Israeliten deeden, aus dee enne Wiltnis wieren? (Hebräa 3:12).
15 Soone, waut vejäten, daut Jehowa de läwendja Gott es, kjennen leicht von am aufkomen. See wie mol, waut de Israeliten deeden, aus dee enne Wiltnis wieren. Dee wisten, daut et Jehowa jeef, oba dee fungen aun to twiewlen, aus dee äant daut jäwen wudd, waut äant fäld. Dee fruagen mau rajcht: “Es de HAR bie ons ooda nich?” (2. Mo. 17:2, 7). Wäajen daut stalden dee sikj jäajen Gott. Dits eene Woarnunk fa ons un doawäajen well wie de Israeliten äa schlajchtet Biespel nich nodoonen (läs Hebräa 3:12).
16. Waut kaun onsen Gloowen oppe Proow stalen?
16 De Welt moakt ons daut schwoa, dicht bie Jehowa to bliewen. Väle jleewen daut nich, daut et eenen Gott jeft. Daut lat foaken soo, daut soone fein wiedakomen, waut Gott nich deenen. Daut kaun onsen Gloowen oppe Proow stalen, wan wie soont seenen. Wie sent ons secha, daut et eenen Gott jeft, oba veleicht twiewel wie doaraun, aus hee waut fa ons doonen woat. De Schriewa von dän 73. Psalm docht uk mol soo. Hee sach, daut de Menschen rom am nich no Jehowa siene Jesazen horchten un oba doawäajen een scheenet Läwen hauden. Doawäajen docht hee doaräwa no, aus sikj daut werkjlich loond, Gott to deenen (Psa. 73:11-13).
17. Waut woat ons halpen, dicht bie Jehowa to bliewen?
17 Waut holp dän Psalmenschriewa, doa wada rajcht nauntokjikjen? Hee docht doaräwa no, woo daut met soone utkomen wudd, waut nuscht om Jehowa romjeewen (Psa. 73:18-19, 27). Un hee docht uk doaraun, woo am daut togood kjeem, daut hee Gott deend (Psa. 73:24). Wie kjennen uk äwa aul daut Goode nodenkjen, waut Jehowa aul fa ons jedonen haft. Wie kjennen daut uk jäajenäwa hoolen, woo ons Läwen wudd sennen, wan wie Jehowa nich deenden. Daut woat ons halpen, am tru to bliewen un dautselwje to sajen, waut de Psalmenschriewa: “Oba fa mie es daut goot dicht bie Gott to sennen” (Psa. 73:28).
18. Wuarom bruck wie ons nich fa daut ferchten, waut boolt komen woat?
18 Wie kjennen met irjent Schwierichkjeiten foadich woaren, waut en de latste Tiet oppkomen, wäajen wie “däm woaren un läwendjen Gott deenen” (1. Tes. 1:9). Gott es eene werkjelje Persoon un hee steit fa dee en, waut am deenen. Hee wees ieeschtemma, daut hee met siene Deena wia un hee es uk met ons. Wie gonen nu de jratste Liedenstiet entjäajen, waut et oppe Ieed jeemols jäwen woat. Oba wie brucken nich auleen sennen (Jes. 41:10). Well wie aula “em vetruen sajen: “De Har es dee, dee mie halpt, ekj woa mie nich ferchten”” (Heb. 13:5-6).
LEET 3 Ons Gott jeft ons Hopninj un Krauft
