Om daut to doonen, waut Jehowa haben well, mott wie Gloowen haben. Oba de Schreft sajcht, “de Menschen jleewen nich aula”, ooda haben nich aula Gloowen (2. Tes. 3:2). Aus de Apostel Paulus dit säd, räd hee von “de beese un gottloose Menschen”, waut am vefoljden. Oba daut jeft uk noch aundre Menschen, waut nich Gloowen haben. Eenje biejlikj wellen dän kloaren Bewies nich seenen, daut Gott aules jemoakt haft (Reem. 1:20). Aundre sajen, daut see aun Gott jleewen, oba daut auleen es nich een woara Gloowen.

Wie motten ons gaunz secha sennen, daut et Jehowa jeft un “daut hee dee beloont,” waut eenen stoakjen Gloowen aun am haben (Heb. 11:6). Daut wie soonen Gloowen kjrieen, bruck wie Gott sienen heiljen Jeist. Un daut wie Jehowa sienen Jeist haben kjennen, mott wie am em Jebäd doano froagen (Luk. 11:9-10, 13). Wie kjrieen uk Gott sienen Jeist, wan wie sien Wuat läsen, wiels de Schriewa worden je vom heiljen Jeist jeleit. Wie sellen doa uk äwa nodenkjen un daut proowen notokomen, waut wie lieren. Dan kaun de heilja Jeist ons halpen, soo to läwen, daut et to seenen es, daut wie soonen Gloowen haben, waut Jehowa jefelt.