23. ARTIKJEL FA DAUT STUDIUM
LEET 28 Wäa es Jehowa sien Frint?
Jehowa well, daut wie bie am Jast sent!
“Ekj woa mien Heilichtum [ooda Zelt] opp emma mank an saten … un ekj woa äa Gott sennen” (HES. 37:26-27)
OM WAUT DAUT JEIT
Dis Artikjel woat ons halpen to vestonen, waut daut meent, en Jehowa sien Zelt Jast to sennen un woo hee fa dee oppkjemt, waut hee en sien Zelt oppnemt.
1-2. Waut vonne Iea jeft Jehowa siene true Deena?
WAN die mol wäa fruach: “Wäa es Jehowa fa die?” Waut wurscht du sajen? Veleicht: “Jehowa es mien Voda, mien Gott un mien Frint.” Ooda veleicht nanst du am noch opp eene aundre Wajch. Oba wurscht du sajen: “Jehowa es eena, waut mie bie sikj oppnemt?”
2 De Kjennich David vejlikjt Jehowa met wäm, waut aundre bie sikj oppnemt, un Gott siene true Deena met dee, waut Jast sent. Hee fruach: “HAR, wäa kaun en dienen Tempel [ooda Zelt] nenkomen? Wäa woat opp dienen heiljen Boajch wonen?” (Psa. 15:1). Aun dit es to seenen, daut wie kjennen Jast sennen en Jehowa sien Zelt, aulsoo siene Frind sennen. Es daut nich eene scheene Enlodunk?
JEHOWA WELL ONS BIE SIKJ TO JAST HABEN
3. Wäa wia daut ieeschte bie Jehowa to Jast, un woo feelden dee beid sikj?
3 Ea Jehowa aules muak, wia hee auleen. Oba dan muak hee sienen ieeschtjebuarnen Sän. Jehowa kroagd dän soo to sajen daut ieeschte en sien bilteljet Zelt nenn un freid sikj doa sea äwa. De Schreft sajcht, daut Jesus sienen Voda “aule Dach Freid brocht.” Un hee selfst “wia emma schaftich ver [Jehowa]” (Spr. 8:30, NW).
4. Wäm kroagd Jehowa lota uk en sien Zelt nenn aus siene Jast?
4 Dan muak Jehowa de Enjel, un dee wieren uk siene Jast. De Enjel woaren “Säns Gottes” jenant, un dee sent sea schaftich, met Jehowa toop to sennen (Hiob 38:7, JHF; Dan. 7:10). Fa Joaren wieren Jehowa siene Frind bloos dee, waut met am toop em Himmel wieren. Lota muak hee dan uk Menschen oppe Ieed, un dee wieren uk siene Jast. Eenje von dee wieren biejlikj Henoch, Noah, Abraham un Hiob. De Bibel wiest, daut dit siene Frind wieren, wiels dee “en Jemeenschoft met Gott” läwden (1. Mo. 5:24; 6:9; Hiob 29:4; Jes. 41:8).
5. Waut kjenn wie von de Profezeiunk en Hesekiel 37:26-27 lieren?
5 Met de hundade Joaren haft Jehowa emma wada Menschen aus Jast enjelot (läs Hesekiel 37:26-27). Biejlikj von Hesekiel siene Profezeiunk kjenn wie lieren, daut Gott sikj daut werkjlich wenscht, daut siene true Deena een goodet Veheltnis met am haben. Hee vesprakjt, “eenen Frädensbunt met an [to] moaken”. Dise Profezeiunk rät von dee Tiet, wan dee, waut de himlische Hopninj haben un uk dee, waut de irdische Hopninj haben, en Eenichkjeit woaren en sien bilteljet Zelt aus “eene Häad” sennen (Joh. 10:16). Wanea es dise Tiet? Nu!
GOTT SORCHT FA ONS, ENDOONT WUA WIE WONEN
6. (a) Woo kjenn wie Jast sennen en Jehowa sien Zelt? (b) Es sien Zelt bloos opp eene eensje Städ to finjen?
6 Enne Bibeltiet wia een Zelt eene Städ toom sikj vereiwen un wia uk toom Schutz fa schlajchtet Wada. Eena, waut bie wäm sien Zelt wia, kunn doamet räakjnen, daut deejanja fa am sorjen wudd. Wan wie ons Jehowa hanjäwen, dan sent wie Jast en sien bilteljet Zelt (Psa. 61:4, NW). Doa hab wie äwajenuach jeisteljet Äten un kjennen met aundre toop sennen, waut uk Jehowa siene Jast sent. Dän sien bilteljet Zelt es nich bloos opp eene Städ to finjen, oba aulawäajen, wua siene true Deena sent (Opb. 21:3). Veleicht best du aul mol nom Utlaunt jereist fa eenen besondren Kongress un hast doa aundre kjanen jelieet, waut uk schaftich sent, en Jehowa sien Zelt to sennen.
7. Woo weet wie, daut Jehowa siene true Deena, waut aul jestorwen sent, noch Jast sent en sien Zelt? (See uk daut Bilt.)
7 Oba waut es met de true Deena, waut aul jestorwen sent? Sent dee noch Jast en Jehowa sien Zelt? Jo! Woo weet wie daut? Wiels Jehowa dee noch gaunz kloa em Denkj haft. Jesus säd: “Oba daut de Doodes oppstonen woaren, muak mau rajcht Moses kloa, aus hee von daut Spekja-Bosch schreef. Doa nand hee Jehowa ‘Abraham sien Gott, Isaak sien Gott un Jakob sien Gott.’ Hee es nich de Doodje äa Gott, oba de Läwendje äara, wiels fa am läwen dee aula” (Luk. 20:37-38).
Mau rajcht soone true Deena, waut aul jestorwen sent, sent noch Jast en Jehowa sien Zelt (See Varsch 7)
WOO ONS DAUT TOGOOD KJEMT UN WAUT WIE DOONEN MOTTEN
8. Woo kjemt dee daut togood, waut Jast sent en Jehowa sien Zelt?
8 Krakjt soo aus een Zelt ons fa schlajchtet Wada beschizt, krakjt soo beschizt Jehowa sien bilteljet Zelt ons em Jeisteljen un jeft ons eene Hopninj fa lota. Wan wie dicht bie Jehowa bliewen, dan kaun de Soton ons nuscht doonen, waut ons fa emma schoden woat (Psa. 31:24; 1. Joh. 3:8). En de niee Welt woat Jehowa siene true Frind wieda fa aules beschitzen, waut äant von am aufbrinjen kunn un uk fa dän Doot (Opb. 21:4).
9. Waut well Jehowa von siene Jast haben?
9 Dauts werkjlich eene groote Iea, en Jehowa sien Zelt Jast to sennen. Wie kjennen nu aul groote Frind met Jehowa sennen un uk fa emma. Oba waut mott wie doonen, daut wie wieda kjennen siene Jast sennen? Wan die wäa no sien Hus kroagen wudd, dan wurscht du secha wellen weeten, waut dee jleicht. Veleicht well dee haben, daut du die de Schoo uttrakjen saust, ea du em Hus nennjeist, un du wurscht daut uk wellich doonen. Krakjt soo well wie weeten, waut Jehowa von dee haben well, waut doa wieda wellen Jast sennen en sien Zelt. Onse Leew fa am brinjt ons bat doa, soo väl aus mäajlich to doonen, om “Gott to jefaulen läwen” (Kol. 1:10). Wan Jehowa uk ons Frint es, es hee oba uk ons Gott un Voda un doawäajen sell wie am respakjten (Psa. 25:14, NW). Wie sellen daut kjeenmol vejäten un am emma grooten Respakjt wiesen. Dis Respakjt woat ons halpen, nuscht to doonen, waut hee nich jleicht un emma “deemootich ver Gott” to waundlen (Micha 6:8).
JEHOWA MUAK NICH EENEN UNJASCHEET MANKE ISRAELITEN
10-11. Woo wia daut aun de Israeliten enne Wiltnis to seenen, daut Jehowa nich eenen Unjascheet moakt?
10 Jehowa moakt nich eenen Unjascheet mank siene Jast (Reem. 2:11). Daut kjenn wie doaraun seenen, woo Jehowa met de Israeliten omjinkj, aus dee en Sinai enne Wiltnis wieren.
11 Nodäm daut Jehowa de Israeliten von de Sklowarie en Ägipten friejemoakt haud, stald hee Priestasch aun, waut en daut Aunbädungszelt deenen sullen. De Leviten worden aunjestalt, de aundre Oabeiten bie daut Aunbädungszelt to doonen. Sorjd Jehowa dolla fa deejanje, waut em Aunbädungszelt deenden un fa dee, waut doa dicht bie wonden, aus fa de aundre? Nä! Jehowa moakt nich eenen Unjascheet.
12. Woo es daut doaraun to seenen, woo Jehowa met de Israeliten omjinkj, daut hee kjeenen Unjascheet moakt? (2. Mose 40:38). (See uk daut Bilt.)
12 Jieda Israelit kunn een gooda Frint met Jehowa sennen, endoont aus dee en daut Aunbädungszelt deend ooda aus dee doa dicht bie wond ooda wieda auf. Jehowa sach biejlikj doano, daut daut gaunze Volkj de steile Wolkj un dän Fiastenda seenen kunn, waut bowa daut Aunbädungszelt wia (läs 2. Mose 40:38). Wan de steile Wolkj sikj aunfunk to mowen, kunnen deejanje daut uk seenen, waut daut wietste auf wonden, un kunnen dan aunfangen, äare Sachen reedtomoaken, äare Zelten uteneentonämen un met daut gaunze Volkj metgonen (4. Mo. 9:15-23). Aule Israeliten kunnen daut uk hieren, wan de beid selwane Trompeeten lud jeblost worden, waut äant auntovestonen jeef, daut see nu sullen wiedatrakjen (4. Mo. 10:2). Bloos wiels eena dicht bie daut Aunbädungszelt wond, bedied daut oba nich, daut daut een bätra Frint met Jehowa wia aus dee, waut wieda auf wonden. Enne Städ daut kunn jieda Israelit bie Jehowa Jast sennen un sikj secha sennen, daut hee am leiden un beschitzen wudd. Krakjt soo es daut uk vondoag dän Dach: Jehowa leeft ons, sorcht fa ons un beschizt ons, krakjt endoont wua wie opp dise Welt wonen.
Daut Aunbädungszelt wia emma enne Medd vom Loaga. Aun daut es to seenen, daut Jehowa kjeenen Unjascheet moakt (See Varsch 12)
WOO MOAKT JEHOWA VONDOAG DÄN DACH KJEENEN UNJASCHEET?
13. Woo wiest Jehowa vondoag dän Dach, daut hee kjeenen Unjascheet moakt?
13 Eenje von Gott siene Deena vondoag dän Dach läwen dicht bie de Hauptoffiz ooda dicht bie een Betel. Aundre schaufen bie soone Städen. Doawäajen kjennen dee bie eenje Sachen bie sennen, waut dee bie soone Städen doonen un kjennen perseenlich met soone toop sennen, waut en de Organisazion de Leidunk haben. Un eenje sent em Sondavoltietdeenst, biejlikj de Kjreisoppsechtasch. Oba waut es, wan du nich soon Väarajcht hast? Du kaust die secha sennen, daut Jehowa aule leeft, waut bie am Jast sent. Un hee kjemmat sikj perseenlich om jiedrem eenen von dee (1. Pet. 5:7). Jehowa jeft aul siene Deena daut jeistelje Äten, de Aunleidunk un dän Schutz, waut dee fält.
14. Woo wiest Jehowa noch, daut hee kjeenen Unjascheet moakt?
14 Noch eene Wajch, woo Jehowa wiest, daut hee kjeenen Unjascheet moakt, es daut hee doano sitt, daut de Menschen äwa de gaunze Ieed de Mäajlichkjeit haben, de Schreft to läsen. De Heilje Schreft wort opp dree Sproaken jeschräwen: Hebräisch, Aramäisch un Griechisch. Sent soone, waut de Schreft opp dee Sproaken läsen kjennen, bätre Frind met Jehowa aus soone, waut nich kjennen? Nä, dee sent nich (Mat. 11:25).
15. Woo wiest Jehowa, daut hee kjeenen Unjascheet moakt? (See uk daut Bilt.)
15 Jehowa lot nich bloos soone en, siene Frind to sennen, waut huach utjelieet sent ooda waut de Sproaken kjennen, opp dee de Schreft jeschräwen wort. Enne Städ daut lat hee aule Menschen äwa de gaunze Welt siene Weisheit haben, nich bloos soone, waut huach utjelieet sent. Sien Wuat, de Bibel, wort aul opp hundade Sproaken äwasat. Doawäajen kjemt de Menschen äwa de gaunze Ieed daut togood, waut de Bibel lieet un kjennen weeten, woo see kjennen Jehowa sien Frint woaren (2. Tim. 3:16-17).
De Bibel es aul opp hundade Sproaken äwasat. Woo wiest daut, daut Jehowa nich eenen Unjascheet moakt? (See Varsch 15)
BLIEW JAST BIE JEHOWA
16. Woo kjenn wie no Aposteljeschicht 10:34-35 no Jehowa siene Jast bliewen?
16 Dauts eene groote Iea, daut wie en Jehowa sien bilteljet Zelt kjennen Jast sennen. Kjeena, waut ons bie sikj oppnemt, es soo leeftolich un friejäwrich aus Jehowa. Hee moakt uk kjeenen Unjascheet; hee nemt aulem opp, endoont wua dee wonen, von wua dee aufstaumen, woo sea utjelieet dee sent ooda waut dee fa een Ella haben. Oba bloos soone, waut am jehorchen, kjennen siene Jast sennen (läs Aposteljeschicht 10:34-35).
17. Waut woa wie en dän näakjsten Artikjel seenen?
17 En Psalm 15:1 fruach David: “HAR, wäa kaun en dienen Tempel [ooda Zelt] nenkomen? Wäa woat opp dienen heiljen Boajch wonen?” Jehowa brukt David selfst toom dise Froagen beauntwuaten. En dän näakjsten Artikjel woa wie seenen, waut wie doonen motten, daut wie Frind met Jehowa bliewen kjennen.
LEET 32 Stot en fa Jehowa!
