Eenje Profezeiungen en dit Poat erfellen sikj to deeselwje Tiet. Un dee bewiesen kloa, daut wie en de “Enjtiet” läwen (Dan. 12:4, Friesenbibel).

• Bibelvarzh Opb. 11:7; 12:13, 17; 13:1-8, 12

  Profezeiunk “Daut [wille] Tia” rejieet miere dusent Joa oppe Ieed. En de Enjtiet woat dän sien säwenda Kopp vewunt. Lota woat dee jeheelt un “de gaunze Ieedboddem” stalt sikj opp daut Tia siene Sied. De Soton brukt dit Tia, om jäajen de “äwaje Nokomenschoft to kjriejen”.

  Bediedunk No de Sintflut komen menschelje Rejierungen opp, waut sikj jäajen Jehova stalen. Äwa 3 000 Joa lota velist Enjlaunt väl Krauft en dän Ieeschten Weltkjrich. Daut woat dan wada stoakja, wiels de Stäts Enjlaunt unjastett. Besonda en de Enjtiet brukt de Fient aule Rejierungen oppe Ieed toom Gott siene Deena vefoljen.

• Bibelvarzh Dan. 11:25-45

  Profezeiunk En de Enjtiet wellen de Kjennich vom Nuaden un de Kjennich vom Sieden sikj unjarenaunda jewennen.

  Bediedunk Dietschlaunt kjamft jäajen Enjlaunt un Stäts. Aune 1945 woaren de Sowjetunion un äare Poatna de Kjennich vom Nuaden. Vonne 1991 aun jeft et de Sowjetunion nich mea. Un met de Tiet woaren dan Russlaunt un siene Poatna de Kjennich vom Nuaden.

• Bibelvarzh Jes. 61:1; Mal. 3:1; Luk. 4:18

  Profezeiunk Jehova schekjt sienen Bootschofta toom “dän Wajch reed moaken”, ea Gott sien Rikj oppjestalt woat. Dis Bootschofta brinjt “dee, dee lieden, . . . eene goode Norecht”.

  Bediedunk Von de 1870ja Joaren aun strenjen C. T. Russell un siene Poatna sikj sea aun, daut uttolajen, waut de Schreft werkjlich lieet. En de 1880ja Joaren woaren dee en, daut Gott siene Deena prädjen motten, un dee jäwen opp Enjlisch soone Artikjels rut aus “Wie sieekjen 1 000, waut doa prädjen” un “Toom prädjen jesaulft”.

• Bibelvarzh Mat. 13:24-30, 36-43

  Profezeiunk Een Fient seit Onkrut opp een Weitflekj. Daut Onkrut kaun dän Weit unjawaussen, bat de Arnttiet kjemt, un dan woat daut uteneenjedeelt.

  Bediedunk Vonne 1870 aun wia de Unjascheet tweschen de woare un de faulsche Christen emma dietelja to seenen. En de Enjtiet woaren de woare Christen toopjesaumelt un von de faulsche uteneenjedeelt.

• Bibelvarzh Dan. 2:31-33, 41-43

  Profezeiunk De Feet von Iesa un von jebrenden Leem sent Poat von eene Jestault, waut von veschiednet jemoakt es.

  Bediedunk De Leem es een Jlikjnis fa de Menschen, wua Enjlaunt un Stäts äwa harschen, oba waut sikj jäajen dise Rejierungen stalen. Wäajen dise Menschen kjennen dise stoakje Rejierungen nich soo väl aunfangen.

• Bibelvarzh Mat. 13:30; 24:14, 45; 28:19-20

  Profezeiunk De “Weit” woat “em Spikja” jesaumelt un “de trua, weisa Kjnajcht” woat äwa dän Harn “sien Hushault” aunjestalt. Daut fangt aun, daut “daut Evangelium von Gott sien Rikj . . . en de gaunze Welt” jeprädicht woat.

  Bediedunk Aune 1919 woat de trua Kjnajcht äwa Gott sien Volkj aunjestalt. Von doa aun doonen de Bibelforscha emma mea prädjen. Vondoag dän Dach prädjen Jehova siene Zeijen en mea aus 200 Lenda un moaken opp mea aus 1 000 Sproaken biblische Bieekja.

• Bibelvarzh Dan. 12:11; Opb. 13:11, 14-15

  Profezeiunk Een Tia met twee Hieena brinjt de Menschen bat doa, “een Bilt to moaken, daut [wille] Tia to ieren”. Dan jeft daut Tia met de twee Hieena “daut Bilt . . . Läwen”.

  Bediedunk De Weltmacht Enjlaunt un Stäts seenen doano, daut et dän Velkjabunt jeft, un aundre Lenda gonen uk bie dise Organisazion bie. Vonne 1926 bat 1933 es mau rajcht de Kjennich vom Nuaden Poat von dän Velkjabunt. De Menschen jäwen dän Velkjabunt dee Iea, waut Gott sien Kjennichrikj traft, krakjt soo aus see daut lota bie de Veeende Nazionen (UNO) doonen.

• Bibelvarsch Dan. 8:23-24

  Profezeiunk Een stieekopja Kjennich brinjt soo väl Vedoawen, daut de “Menschen . . . eefach staunen”.

  Bediedunk De Weltmacht Enjlaunt un Stäts haben väl Vedoawen jebrocht. En dän Tweeden Weltkjrich leet de Stäts biejlikj twee Atomm-Bommen mank äare Fiend oppdäwren. Dise Bommen muaken mea Schoden aus aul daut aundre Kjrichsjereetschoft, waut et ea jeef.

• Bibelvarzh Dan. 11:31, NW; Opb. 17:3, 7-11

  Profezeiunk Daut dunkelroode Tia met de tieen Hieena kjemt utem Aufgrunt rut un es de 8. Kjennich. Daut Buak Daniel nant disen Kjennich “de oppscheiselje Sach . . ., waut vestieren deit”.

  Bediedunk En dän Tweeden Weltkjrich kaun de Velkjabunt nuscht mea doonen. No dän Kjrich woat de UNO oppjestalt. De Menschen jäwen de UNO dee Iea, waut Gott sien Kjennichrikj traft, krakjt soo aus see daut ea bie dän Velkjabunt deeden. De UNO woat jäajen aule Gloowes gonen.

• Bibelvarzh 1. Tess. 5:3; Opb. 17:16

  Profezeiunk De Velkja sajen: “Aules es ruich un secha”, un “de tieen Hieena” un “daut [wille] Tia” gonen jäajen “de Hua” un venichten dee. No daut woaren de Velkja venicht.

  Bediedunk De Velkja sajen, daut see en de Welt aules ruich un secha jemoakt haben. Dan venichten de Velkja, waut met de UNO toopschaufen, de faulsche Gloowes. Daut woat de Aunfank sennen von de groote Triebsaul. Dise Triebsaul woat äwa sennen, wan dän Soton siene Welt en Harmagedon venicht woat.

• Bibelvarzh Hes. 38:11, 14-17; Mat. 24:31

  Profezeiunk Gog kjemt en daut Launt von Gott siene Deena nenn. Dan saumlen de Enjel Gott “siene utjewälde” toop.

  Bediedunk De Kjennich vom Nuaden un de aundre Rejierungen komen jäajen Gott sien Volkj. Äwadäm woaren dee Jesaulwde, waut noch oppe Ieed sent, toopjesaumelt toom em Himmel komen.

• Bibelvarzh Hes. 38:18-23; Dan. 2:34-35, 44-45; Opb. 6:2; NW; 16:14, 16; 17:14; 19:20

  Profezeiunk Dee, waut opp “een wittet Pieet” sett, deit doaderch “volstendich jewennen”, daut hee Gog un siene Soldoten venicht. “Daut [wille] Tia” woat “en dän Fiasee jeschmäten” un de groote Jestault woat fien jekjielt.

  Bediedunk Jesus, de Kjennich von Gott sien Kjennichrikj, rat Gott siene Deena. Met siene 144 000 Metharscha un met de Enjel toop woat hee aule Velkja venichten, waut jäajen Gott siene Deena komen. Daut woat daut Enj sennen von dän Soton siene Welt.