1. Waut säd Jesus äwa de Schaza em Himmel?

EENJE wieetvolle Sachen kjenn wie seenen, oba daut jeft uk väle, dee wie nich seenen kjennen. En siene bekaunde Räd opp dän Boajch säd Jesus, daut de Schaza em Himmel väl wieetvolla sent aus de tietelje Sachen. Un dan säd hee noch: “Wua jun Schauz es, doa woat jun Hoat uk sennen” (Mat. 6:19-21). Ons Hoat woat ons bat doa brinjen, daut wie no daut sträwen, waut ons väl wieet es. Wie saumlen ons “Schaza em Himmel”, wan wie ons bie Gott eenen gooden Nomen moaken. Un Jesus säd je, daut soone Schaza kjeenmol kunnen tweijemoakt ooda jestolen woaren.

2. (a) No waut sell wie trachten, soo aus Paulus ons en 2. Korinta 4:17-18 toorot? (b) Waut woa wie ons en disen Artikjel unjastonen?

² De Apostel Paulus rot ons too, no daut to trachten, “waut nich to seenen es” (läs 2. Korinta 4:17-18). Mank daut es uk daut goode, waut wie en Gott siene niee Welt beläwen woaren. Nu woa wie ons vea wieetvolle Jeschenkja unjastonen, waut wie nich seenen kjennen un waut ons nu aul togood komen kjennen: Wie kjennen Frind sennen met Gott un to am bäden, un hee halpt ons met sienen heiljen Jeist, un Jehova, Jesus un de Enjel halpen ons em Deenst. Un wie woaren uk seenen, woo wie onse Dankboakjeit kjennen bewiesen fa dise Jeschenkja.

3. Waut es daut wieetvolste Jeschenkj, un wuaderch kaun ons daut togood komen?

³ Daut wie kjennen Frind sennen met Jehova Gott es daut  wieetvolste Jeschenkj, waut wie nich seenen kjennen (Psa. 25:14). Woo kaun Gott Frint sennen met onvolkomne Menschen un doch gaunz un goa heilich bliewen? Daut es mäajlich, wäajen Jesus sien Läwen jeef, om “de Welt äare Sinden” wajchtonämen (Joh. 1:29). Jehova wist, daut Jesus wudd batem Doot tru bliewen un de Menschen raden. Doawäajen kunn Jehova uk met soone Frind sennen, waut ver Jesus sienen Doot läwden (Reem. 3:25, NW).

4. Woone Menschen, waut ver Jesus läwden, worden Gott siene Frind, un wuarom?

⁴ Räd wie mol von een poa Menschen, waut Gott siene Frind wieren un ver Jesus sienen Doot läwden. Abraham haud eenen sea stoakjen Gloowen. Hee wia aul äwa 1 000 Joa doot un Jehova nand am noch emma sienen “Frint Abraham” (Jes. 41:8). Daut wiest, daut Jehova siene goode Frind nich vejat, wan dee uk aul jestorwen sent. Hee denkjt noch emma aun Abraham (Luk. 20:37-38). Hiob wia uk eent von Gott siene Frind. Aus Jehova siene Enjel em Himmel vesaumeld, wees hee, daut hee opp Hiob vetrud. Hee säd je von Hiob: “Däm es met nuscht to beschuljen un deit emma waut rajcht es; dee haft Forcht fa Gott, un deit nuscht schlajchtet” (Hiob 1:6-8). Un Daniel wia aul ella un deend Jehova aul ojjefäa 80 Joa en een Launt, wua de Menschen aundre Jetta aunbäden deeden. Woo docht Jehova äwa am? Jehova leet am dreemol derch Enjel weeten, daut hee bie am “huach aunjeseenen” wia un am väl räakjend (Dan. 9:23; 10:11, 19). Wie kjennen ons secha sennen, daut Jehova sikj aul sea to dän Dach freit, wan hee siene leewe Frind vom Doot oppwakjen kaun (Hiob 14:15).

5. Waut mott wie doonen, daut wie Jehova kjennen noaun sennen?

⁵ Vondoag dän Dach jeft et millionende Menschen, waut goode Frind met Jehova sent. Daut es doaraun to seenen, daut een deel Mana un Frues un Kjinja oppe gaunze Welt derch äare Woakjen bewiesen, daut see wellen Gott siene Frind sennen. Jehova “es de jerajchte sea noaun” (Spr. 3:32). Hee kaun dee noaun sennen, wäajen dee aun Jesus sien Leesjelt jleewen. Derch daut Leesjelt kjenn wie uk Frind sennen met Jehova un ons am hanjäwen un deepen loten. Wan wie daut doonen, dan kjenn wie soo aus millionende aundre Breeda un Sestren dän Aulahechsten “sea noaun” sennen.

6. Aun waut es daut to seenen, daut wie wellich Gott siene Frind sent?

⁶ Aun waut es daut to seenen, daut wie wellich Gott siene Frind sent? Abraham un Hiob bleewen Gott äwa hundat Joa tru un wie motten Jehova uk tru bliewen, endoont woo lang wie am en dise oole Welt aul deenen. Daut wie kjennen Frind sennen met Jehova mott ons mea wieet sennen aus ons ieejnet Läwen, soo aus bie Daniel (Dan. 6:8, 11, 17, 23). Wan Jehova ons halpt, woa wie kjennen met aule Schwierichkjeiten foadich woaren un wie kjennen uk siene Frind bliewen (Filip. 4:13, NW).

7. (a) Woo denkjt Jehova no Spricha 15:8 no äwa onse Jebäda? (b) Woo halpt Jehova ons, wan wie bäden?

⁷ Bäden es uk een wieetvollet Jeschenkj, waut nich to seenen es. Goode Frind vetalen sikj wellich, waut see denkjen un feelen. Schauft daut tweschen ons un Jehova uk soo? Jo. Jehova rät derch sien Wuat to ons un sajcht ons, waut hee denkjt un feelt. Un wie kjennen met am räden, wan wie bäden. Wie kjennen Jehova aules sajen, waut  wie oppem Hoaten haben, un hee horcht jieren no onse Jebäda (läs Spricha 15:8). Un wäajen Jehova een leeftolja Frint es, horcht hee nich bloos too, oba halpt ons uk. Eenjemol deit hee fuaz waut. Oba opp aundatsmol mott wie veleicht foakna wäajen deeselwje Sach bäden. Wie kjennen ons doaropp veloten, daut Jehova ons emma to de rajchte Tiet un opp de baste Wajch halpen woat. Veleicht deit hee daut nich soo, aus wie daut jedocht haben. Hee kaun ons biejlikj de Weisheit un de Krauft jäwen, daut wie “daut vedroagen kjennen”, enne Städ dän Trubbel wajchtonämen (1. Kor. 10:13).

8. Waut woa wie doonen, wan wie dankboa sent, daut wie bäden kjennen?

⁸ Waut woa wie doonen, wan wie dankboa sent, daut wie bäden kjennen? Dan woa wie Gott sienen Rot nokomen, waut doa sajcht: “Hoolt aun met bäden” (1. Tess. 5:17). Jehova deit ons nich bemotten to bäden. Hee lat ons selfst entscheiden un sajcht ons bloos: “Siet . . . aunhoolent em Jebäd” (Reem. 12:12). Un doaderch, daut wie jieda Dach foaken bäden, kjenn wie wiesen, daut ons daut sea väl wieet es. Un wan wie daut doonen, dan well wie nich doavon vejäten, Jehova to danken un to lowen (Psa. 145:2-3).

9. Woo denkjt een Brooda äwa daut bäden, un woo denkjst du doaräwa?

⁹ Je lenja wie Jehova deenen un seenen, woo hee ons halpt, je mea wudd wie daut Jebäd räakjnen sellen. Chris, een Brooda, waut aul 47 Joa em Voltietdeenst es, sajcht: “Woo scheen es daut nich, wan eena sikj tiedich zemorjes een bät Tiet nemt, om to Jehova to bäden. Daut frescht mie sea opp, wan ekj krakjt dan bäden kaun, wan de Sonn oppjeit un aules soo schmock lat! Daut brinjt mie emma bat doa, Jehova doafäa to danken, daut wie bäden kjennen un uk fa aulet aundre, waut hee mie jeft. Un wan de Dach ieescht derch es un ekj bäden doo, dan kaun ekj met een rujet Jewessen schlopen gonen.”

10. Wuarom sell wie Gott sienen heiljen Jeist väl räakjnen?

¹⁰ Gott sien heilja Jeist es uk een Jeschenkj, waut nich to seenen es. Wie sellen dän väl räakjnen un doawäajen rod Jesus ons too, Gott emma wada doano to froagen (Luk. 11:9, 13). Jehova jeft ons derch sienen Jeist sea väl “jeistliche Krauft” (2. Kor. 4:7; Apj. 1:8). Soo kjenn wie met aule Schwierichkjeiten foadich woaren.

11. Bie waut kaun de heilja Jeist ons halpen?

¹¹ De heilja Jeist kaun ons halpen, daut wie onse Oppgowen em Deenst fa Gott rajcht nokomen kjennen. Derch Gott sienen Jeist kjenn wie daut, waut wie aulmols doonen kjennen, noch bäta doonen un onse Veauntwuatunk aus Christ bäta nokomen. Wie haben daut gaunz kloa, daut aul daut goode, waut wie doonen kjennen, bloos mäajlich es, wäajen Gott sien Jeist ons halpt.

12. Bie waut kaun de heilja Jeist ons no Psalm 139:23-24 no halpen, wan wie bäden?

¹² Wie wiesen, daut wie dän heiljen Jeist väl räakjnen, wan wie Jehova doano froagen, daut hee ons halpt entowoaren, aus wie irjent orrajchte Jedanken ooda Wenschen en ons Hoat haben (läs Psalm 139:23-24). Dan kaun Jehova ons derch sienen Jeist halpen, daut wie daut moakjen. Un wie kjennen dan uk bäden, daut sien Jeist ons halpt, dise orrajchte Jedanken ooda Wenschen nich notogonen. Doaderch wies wie, daut wie nuscht doonen wellen, waut Jehova bat doa brinjt, daut hee ons nich mea met sienen heiljen Jeist halpt (Efs. 4:30).

13. Waut kjenn wie doonen, daut wie noch dankboara sent fa dän heiljen Jeist?

¹³ Wie woaren noch dankboara fa dän heiljen Jeist sennen, wan wie doaräwa nodenkjen, waut dee vondoag dän Dach aules deit. Ea Jesus nom Himmel fua, säd hee to siene Jinja: “Wan de Heilja Jeist äwa junt komen woat, woa jie Krauft  kjrieen, un jie woaren miene Zeijen sennen . . . äwa de gaunze Welt” (Apj. 1:8). Krakjt daut es vondoag dän Dach to seenen. De heilja Jeist haft metjeholpen, daut nu aul ojjefäa achtunhaulf Millionen Menschen von oppe gaunze Welt Jehova deenen. Un wie läwen uk en een jeisteljet Paradies, wiels de heilja Jeist ons halpt, soone goode Ieejenschoften to haben aus Leew, Freid, Fräd, Jedult, Frintlichkjeit, gootjesonnen sennen, Gloowen, Jelindichkjeit un Selfstbeharschunk. Dee jehieren aula to “dän Jeist siene Frucht” (Gal. 5:22-23). Waut fa een wieetvollet Jeschenkj de heilja Jeist nich es!

14. Wäa unjastett ons em Deenst?

¹⁴ Waut es een aundret wieetvollet Jeschenkj, waut nich to seenen es? Daut es, daut wie met Jehova, Jesus un met de Enjel toopschaufen kjennen (2. Kor. 6:1). Daut doo wie, wan wie em Deenst sent. Paulus räd von sikj selfst un von de aundre, waut bie daut Prädichtwoakj metholpen, un säd: “Wie sent Gott siene Metoabeida” (1. Kor. 3:9). Un wie sent dan uk Jesus siene Metoabeida. Hee säd je to siene Nofolja: “Got nu no de Velkja von de Welt un moakt an to Lieelinja”. Un dan vespruak hee uk: “Ekj sie emma bie junt” (Mat. 28:19-20). Un unjastetten de Enjel ons uk? Jo. Wie sent sea dankboa, daut dee ons leiden, wan wie deejanje “een eewjet Evangelium . . . prädjen, dee opp de Ieed wonen”! (Opb. 14:6).

15. Woo halpt Jehova en daut Prädichtwoakj met? Jeff een Biespel.

¹⁵ Woo halpt Jehova en daut Prädichtwoakj met? Wan wie de goode Norecht prädjen, dan felt jewesse Sot en goode Hoaten nenn un waust doa (Mat. 13:18, 23). Wäa moakt de Woarheit doa em waussen, daut dee Frucht brinjt? Jesus sajcht, daut am kjeena nofoljen kaun, “wan de Voda . . . am nich trakjen deit” (Joh. 6:44). De Schreft wiest, woo dee daut biejlikj deit. Woo wia daut, aus Paulus mol butakaunt de Staut Filippi een poa Frues prädjen deed? Eene von dee wia Liedia, un de Schreft sajcht: “Däa muak de Har daut Hoat op, daut see doaropp achten deed, waut Paulus säd” (Apj. 16:13-15). Krakjt soo haft Jehova uk noch millionende aundre no sikj jetrocken.

16. Wäm sell wie de Iea jäwen, wan wie em Deenst waut goodet volbrinjen?

¹⁶ Wäm traft de Iea, wan wie em Deenst waut goodet volbrinjen? Paulus muak daut gaunz kloa, aus hee von de Vesaumlunk en Korint räd. Hee schreef: “Ekj deed plaunten, Apollos goot Wota, oba Gott muak daut waussen. Doawäajen es nich dee waut, dee doa plaunten deit, uk nich dee, dee doa jeeten deit. Wäa waut es, es Gott, dee daut waussen moakt” (1. Kor. 3:6-7). Krakjt soo aus Paulus sell wie emma Jehova de Iea jäwen, wan wie em Deenst waut doonen kjennen.

17. Woo kjenn wie wiesen, daut wie wellich met Gott, Christus un de Enjel toopschaufen?

¹⁷ Woo kjenn wie wiesen, daut wie wellich met Gott, Christus un de Enjel toopschaufen? Daut kjenn wie, wan wie emma no Jeläajenheiten sieekjen, met aundre von de goode Norecht to räden. Eena kaun daut opp veschiedne Wäaj doonen, biejlikj effentlich ooda “von een Hus no daut aundret” (Apj. 20:20). Väle jleichen daut uk, opp Jeläajenheit Zeichnis to jäwen. Wan dee wäm bejäajnen, dan bejreessen dee dän leeftolich un vetalen een bät met dän. Un wan dee dan metmoakt, dan räden dee väasechtich von de goode Norecht.

18-19. (a) Woo kjenn wie de Woarheit jeeten, waut wie jeplaunt haben? (b) Woo haft Jehova wäm jeholpen, waut de Bibel studieed?

 ¹⁸ Aus “Gott siene Metoabeida” sell wie de Woarheit nich bloos plaunten, oba uk jeeten. Wan doa wäa intressieet es, dan well wie ons aunstrenjen, dän wada to besieekjen un een Bibelstudium auntofangen. Ooda wie seenen doano, daut een aundra daut deit. Un wie freien ons dan, wan wie enwoaren, woo Jehova dänjanjen, waut studieet, halpt sien denkjen un siene Wenschen to endren.

¹⁹ Woo wia daut biejlikj bie eenen Zaubadokta en Sied-Afrika, waut Raphalalani heet? Hee jleicht daut sea, waut hee bie sien Bibelstudium lieed. Oba aus hee doa lieed, daut de Schreft sajcht, daut eena nich saul met de vestorwne Väafoaren räden, dan wia am daut sea schwoa (5. Mo. 18:10-12). Met de Tiet endad hee dan sien denkjen un hieed opp aus Zaubadokta to schaufen, wan daut uk siene eensje Oabeit wia. Raphalalani es nu 60 Joa un sajcht: “Ekj sie Jehova siene Zeijen sea dankboa, daut dee mie soo sea jeholpen haben. Dee holpen mie biejlikj, eene aundre Oabeit to finjen. Un äwa aules sie ekj Jehova dankboa, daut hee mie jeholpen haft, mien Läwen to endren, un daut ekj nu prädjen kaun un eent von siene Zeijen sennen.”

20. Waut west du doonen?

²⁰ En disen Artikjel hab wie von vea Jeschenkja jerät, waut nich to seenen sent. Daut wieetvolste es, daut wie kjennen met Jehova Frind sennen. Wan wie siene Frind sent, dan komen ons uk de aundre Jeschenkja togood, waut nich to seenen sent: Wie kjennen to am bäden un beläwen, woo hee ons derch sienen heiljen Jeist halpt un woo hee un Jesus un de Enjel ons em Deenst halpen. Well wie emma doaropp schaufen, daut wie fa aul daut noch dankboara sent. Un well wie Jehova emma danken, daut hee soon feina Frint es.