Hast du daut jewist?
Brukten de Menschen en de Bibeltiet Papierus toom Boots moaken?
Eene Papierus-Plaunt
DAUT es sea bekaunt, daut de Menschen ieeschtemma en Ägipten mieeschtens Papierus brukten toom schriewen. De Griechen un de Reema schreewen uk opp Papierus. * Oba daut es nich soo sea bekaunt, daut de Menschen uk Boots von Papierus muaken.
Soo kunnen de Papierus-Boots jeloten haben, waut se en een ägiptischet Grauf fungen
Äwa 2 500 Joa trigj schreef de Profeet Jesaja, daut de Menschen, waut en “daut Launt Kusch” wonden, “Norecht delenjd däm Niel Riefa [schekjten] en Boots dee von Schelp [ooda Papierus] jemoakt” wieren. Lota säd de Profeet Jeremia verut, waut de Meeda un de Persa doonen wudden, wan see de Staut Babel ennämen wudden. Dee wudden de Babelonia äare “Papierus-Boots” vebrennen, daut dee sikj nich fuatbrinjen kunnen (Jes. 18:1-2; Jer. 51:32, NW).
De Schreft es von Gott, un doawäajen wundat soone, waut de Bibel studieren, daut nich, daut Forscha daut rutjefungen haben, daut se ieeschtemma opp iernst Boots von Papierus jemoakt haben (2. Tim. 3:16). Waut haben dee krakjt rutjefungen? Jeschichtsforscha haben väl Eenselheiten jefungen, woo se ieeschtemma en Ägipten Boots von Papierus muaken.
WOO WORDEN PAPIERUS-BOOTS JEMOAKT?
En eenje ägiptische Jräwa es daut aufjebilt, woo se Papierus-Plaunten aufjemoakt haben un doavon Boots jemoakt. De Menschen muaken de Papierus-Stam auf, muaken doavon Wescha un dan bungen see miere Wescha toop. Papierus-Stam sent dreeakjich un doawäajen es soon Wesch sea stoakj, wan eena daut faust toopbinjt. En daut Buak A Companion to Ancient Egypt sajcht daut, daut een Boot mea aus 17 Meeta (55 Schoo) lank sennen kunn un von 10 bat 12 Roodlen aun jieda Sied haben kunn.
Een ägiptischet Bilt, wua to seenen es, woo se Papierus-Boots muaken
WUAROM BRUKTEN DE MENSCHEN PAPIERUS TOOM BOOTS MOAKEN?
En Ägipten bie dän Niel-Riefa wossen een deel Papierus-Plaunten. Un de Papierus-Boots moaken wia uk gaunz eefach. Lota fungen se aun, de jratre Boots von Holt to moaken, oba de Fescha un de Jäaja brukten de kjlandre Boots ooda Lomkjes von Papierus.
De Menschen ieeschtemma haben sea lang Papierus-Boots jebrukt. De griechischa Schriewa Plutarch läwd en de Aposteltiet un schreef, daut de Menschen en jane Tiet noch emma Papierus-Boots brukten.
^ Varsch 3 Papierus-Plaunten waussen opp sompjet Launt un uk en Riefasch, wua daut nich sea schält. Eene Papierus-Plaunt kaun soo bie 5 Meeta (16 Schoo) huach woaren un de Staum kaun unjen ojjefäa 6 Zoll (15 cm) dikj woaren.
