1-2. Waut fa Trubbels haben väl Breeda un Sestren?

DE Apostel Paulus rod Timotäus too, em Deenst sien bastet to doonen (2. Tim. 4:5). Wie aula sellen ons disen Rot uk to Hoaten nämen. Oba daut es nich emma leicht. Väl Breeda un Sestren motten sea äwanäment sennen toom prädjen (2. Tim. 4:2). Doa sent biejlikj dee Breeda met en, waut en Lenda wonen, wua ons Woakj veboden ooda nich en aule Stekjen frie es. Dee doonen flietich prädjen, wan see wäajen daut uk wudden kjennen enjestopt woaren.

² Jehova siene Deena haben een deel Trubbels, wuaderch dee leicht wudden kjennen mootloos woaren. Väle motten biejlikj schwoa schaufen, bloos daut äare Famielje daut needichste haft. Dee wudden wellich mea em Deenst doonen, oba wan daut ieescht utgangs Wäakj es, dan sent dee gaunz meed. Aundre kjennen nich soo väl doonen, wiels dee schwoa krank ooda aul ella sent, un woomäajlich kjennen dee nich mol mea von tus. Wada aundre feelen sikj emma sea wieetloos. Mary * sajcht biejlikj: “Ekj mott soo sea jäajen miene Mootloosichkjeit kjamfen, daut ekj doavon gaunz meed woa. Un dan feel ekj mie schlajcht, wiels ekj nich mea soo väl Tiet un Krauft fa dän Deenst hab.”

3. Waut woa wie en disen Artikjel derchnämen?

³ Jehova kaun ons de Krauft jäwen, daut wie am soo goot aus mäajlich deenen kjennen, endoont waut vonne Trubbels wie haben. Ea wie nu derchnämen, woo Jehova ons halpen kaun, woa wie ons unjastonen, woo hee Paulus un Timotäus stoakjt, daut see äaren Deenst uk en schwoare Tieden derchfieren kunnen.

4. Waut fa Schwierichkjeiten haud Paulus?

⁴ Paulus haud een deel Schwierichkjeiten. Hee brukt Jehova siene Help besonda, aus se am vekjielden, steenjen deeden un enstopten (2. Kor. 11:23-25). Paulus stunt uk too, daut hee eenjemol sea jäajen Mootloosichkjeit kjamfen must (Reem. 7:18-19, 24). Hee must uk met eenen “Stachel en daut Fleesch” foadich woaren un fruach Gott ieremol iernstlich doano, daut hee dän wajchnämen sull (2. Kor. 12:7-8).

5. Waut kunn Paulus volbrinjen, wan hee uk väl Schwierichkjeiten haud?

⁵ Jehova jeef Paulus de Krauft, sienen Deenst derchtofieren, wan dee uk väl Schwierichkjeiten haud. Waut kunn Paulus aules volbrinjen? Aus hee biejlikj en Room en een Hus faust wia, kunn hee de judische Leidasch prädjen un woomäajlich uk eenje Rejierungsbeaumte (Apj. 28:17; Filip. 4:21-22). Hee jeef uk een deel Soldoten Zeichnis un aul dee, waut am besochten (Apj. 28:30-31; Filip. 1:13, NW). En dise Tiet leet Gott Paulus uk miere Breew oppschriewen, waut true Christen bat vondoag dän Dach noch halpen. Un Paulus sien Biespel stoakjt uk de Vesaumlunk en Room un dee kjrieejen “mea Moot . . ., Gott sien Wuat noch driesta un forchtloosa to prädjen” (Filip. 1:14). Eenjemol kunn Paulus nich soo väl doonen, aus hee sikj wudd jewenscht haben. Oba hee deed sien bastet, un daut holp met, “daut Evangelium to vebreeden” (Filip. 1:12).

6. Waut holp Paulus no 2. Korinta 12:9-10 no, sienen Deenst derchtofieren?

⁶ Paulus wort en, daut hee bloos doawäajen soo väl em Deenst doonen kunn, wiels Gott am holp. Un hee säd, daut Gott siene Krauft “en schwake Menschen stoakj” wia (läs 2. Korinta 12:9-10). Paulus wort vefolcht, enjestopt un haud een deel aundre Schwierichkjeiten. Oba Jehova jeef am derch sienen heiljen Jeist de Krauft, sienen Deenst volstendich derchtofieren.

7. Met waut vonne Schwierichkjeiten must Timotäus foadich woaren, daut hee sienen Deenst derchfieren kunn?

⁷ Paulus sien junga Frint Timotäus must sikj uk opp Gott siene Krauft veloten,  daut hee sienen Deenst derchfieren kunn. Paulus un Timotäus muaken toop lange Prädichtreisen. Un Paulus schekjt am uk no miere Vesaumlungen toom dee Moot toospräakjen (1. Kor. 4:17). Veleicht docht Timotäus, daut hee daut nich kunn, un Paulus säd doawäajen to am: “Lot kjeenem opp die rauf kjikjen doawäajen, daut du noch junk best” (1. Tim. 4:12). En dise Tiet haud Timotäus uk eenen Stachel en daut Fleesch, wiels hee “foaken krank” wia (1. Tim. 5:23). Oba hee wist, daut Jehova am derch sienen heiljen Jeist de Krauft jäwen wudd, daut hee de goode Norecht prädjen kunn un siene Gloowesbreeda halpen (2. Tim. 1:7).

8. Woo stoakjt Jehova vondoag dän Dach siene Deena?

⁸ Vondoag dän Dach jeft Jehova siene Deena “jeistliche Krauft”, daut dee am wieda tru deenen kjennen (2. Kor. 4:7). Well wie mol veatlei seenen, waut Jehova ons jeft, om ons to stoakjen, daut wie am kjennen tru bliewen: Daut es daut Jebäd, de Schreft, de Gloowesbreeda un de Deenst.

9. Woo kaun daut Jebäd ons halpen?

⁹ Daut Jebäd jeft ons Krauft. Paulus rot ons en Efeesa 6:18 too: “Bät emma”. Dan woat Gott ons stoakjen. Krakjt daut beläwd Jonnie, waut en Bolivien wont, aus hee een deel groote Trubbels haud. Siene Fru un siene Elren worden to deeselwje Tiet sea krank. Daut wia fa Jonnie sea schwoa, sikj om de dree to kjemren. Siene Mutta storf un daut dieed lang, bat siene Fru un sien Voda wada jesunt wieren. Waut holp Jonnie? Hee sajcht: “Emma, wan ekj daut sea schwoa haud, säd ekj Jehova krakjt, woo ekj mie feeld.” Jehova jeef Jonnie de Krauft, daut hee kunn uthoolen. Ronald, een Eltesta en Bolivien, wort en, daut siene Mutta Kjräft haud, un eene Moonat lota storf see dan. Woo kunn hee doamet foadich woaren? Hee sajcht: “Wan ekj to Jehova bäd, dan kaun ekj mie to am utschedden un am aules sajen, waut ekj oppem Hoaten hab. Hee vesteit mie bäta aus sest irjentwäa, mau rajcht bäta aus ekj selfst.” Eenjemol feel wie ons veleicht äwafoddat un weeten goanich, no waut wie Gott froagen sellen. Oba Jehova sajcht, daut wie mau rajcht dan to am bäden sellen, wan wie nich weeten, waut wie sajen sellen (Reem. 8:26-27).

10. Wuarom sell wie no Hebräa 4:12 no en de Schreft läsen un doaräwa nodenkjen?

¹⁰ De Schreft jeft ons Krauft. Paulus läsd de Schreft toom Krauft un Troost kjrieen un ons kaun daut uk halpen (Reem. 15:4). Wan wie de Schreft läsen un doaräwa nodenkjen, dan kaun Jehova ons derch sienen Jeist halpen, daut wie vestonen, woo de Schreft ons met onsen Trubbel halpen kaun (läs Hebräa 4:12). Ronald, wua wie ea aul von räden, sajcht: “Ekj sie dankboa, daut ekj mie daut aunjewant hab, jieda Zeowes een bät en de Schreft to läsen. Ekj denkj väl doaräwa no, woo Jehova es un woo leeftolich hee met siene Deena omjeit. Daut jeft mie wada fresch Krauft.”

11. Woo holp de Schreft eene Sesta, waut truaren deed?

¹¹ Wan wie äwa Gott sien Wuat nodenkjen, dan kaun ons daut halpen, rajcht äwa onse Trubbels to denkjen. See wie mol, woo de Schreft eene Wätfru holp, waut truaren deed. Een Eltesta säd to dee, daut daut Buak Hiob ar halpen kunn.  Aus see daut läsd, wort see fuaz en, daut Hiob schlajcht enjestalt wia. See stald sikj väa, woo see to dän säd: “Hiob, denkj nich bloos emma äwa diene Trubbels no!” Oba dan wort see en, daut see biejlikj soone Enstalunk haud aus Hiob. Daut holp ar, wada rajcht to denkjen un doamet foadich to woaren, daut äa Maun jestorwen wia.

12. Woo stoakjt Jehova ons derch onse Gloowesbreeda?

¹² Onse Gloowesbreeda jäwen ons Krauft. Jehova stoakjt siene Deena uk derch de Gloowesbreeda. Paulus wenscht sikj, daut hee met siene Breeda un Sestren kunn toop sennen, daut see sikj unjarenaunda kunnen Moot toospräakjen (Reem. 1:11-12). Mary, wua wie ea aul von räden, jleicht daut sea, met de Breeda un Sestren toop to sennen. See sajcht: “Jehova haft mie derch Breeda un Sestren jeholpen, waut nich mol om mienen Trubbel omwisten. Dee spruaken mie Moot too ooda schreewen mie eene Koat, un daut wia krakjt daut, waut ekj brukt. Daut es uk eene groote Help, wan eena sikj to soone Sestren utschedden kaun un von dee lieren, waut biejlikj soone Schwierichkjeiten haben. Un de Eltestasch wiesen mie emma, daut ekj en de Vesaumlunk väl wieet sie.”

13. Woo kjenn wie ons bie de Toopkomes unjarenaunda stoakjen?

¹³ Eent von de baste Städen toom ons unjarenaunda Moot toospräakjen sent onse Toopkomes. Doa kjenn wie aundre Moot toospräakjen, wan wie dee sajen, daut wie an väl räakjnen un daut wie daut schazen, waut dee doonen. Een Eltesta, waut Peter heet, säd biejlikj mol ver een Toopkomen to eene Sesta, dee äa Maun nich Jehova deend: “Du kaust die nich väastalen, woo väl Moot mie daut jeft, daut du hia best. Du moakst june sas Kjinja emma sea fein reed un halpst dee, daut dee kjennen Auntwuaten jäwen.” See kjrieech gaunz blanke Uagen un säd: “Du kaust die nich denkjen, woo väl Krauft mie daut jeft, daut du mie daut vondoag sajchst.”

14. Woo halpt de Prädichtdeenst ons?

¹⁴ De Deenst jeft ons Krauft. Wan wie met aundre äwa de Woarheit ut de Schreft räden, dan kjrie wie fresch Moot un Krauft, endoont aus dee toohorchen ooda nich (Spr. 11:25). Eene Sesta, waut Stacy heet, haft daut beläft. Aus doa wäa von äare Famielje utjeschloten wort, wia see sea truarich un docht emma wada: “Haud ekj kunt mea doonen, om dän to halpen?” Stacy kunn meist nich mea aun waut aundret denkjen. Waut holp ar, met dise schwoare Loag foadich to woaren? De Deenst! Aus see prädjen deed, docht see doaräwa no, woo needich de Menschen Help fäld. See sajcht: “En dise Tiet jeef Jehova mie een Bibelstudium, waut bosich wiedakjeem. Daut jeef mie sea väl Moot. Waut mie daut mieeschte jeholpen haft, es de Prädichtdeenst.”

15. Waut kjenn wie von Mary lieren?

¹⁵ Eenje denkjen veleicht, daut see nich väl em Deenst doonen kjennen. Wan die daut uk soo jeit, dan denkj doaraun, daut Jehova met die tofräd es, wan du dien bastet deist. Soo wia daut uk bie Mary, wua wie ea von räden. Aus see no eene Jäajent trock, wua de Menschen eene aundre Sproak räden, docht see, daut see nich väl doonen kunn. See sajcht: “Eene jewesse Tiet kunn ekj bloos eefache Auntwuaten jäwen ooda eenen Bibelvarsch väaläsen ooda em Deenst een  Zeichnisblaut wajchjäwen.” Doawäajen späad sikj ar daut soo, daut et met ar nich soo väl enhilt aus met dee, waut de Sproak fein kunnen. Oba see lieed, aundasch to denkjen. Ar wort dietlich, daut see waut fa Jehova doonen kunn, wan see de Sproak uk noch nich sea fein kunn. See sajcht: “De Woarheit ut de Schreft es gaunz eefach to vestonen un dee kaun de Menschen äa Läwen endren.”

16. Waut kaun deejanje Krauft jäwen, waut nich von tus kjennen?

¹⁶ Veleicht kjenn wie nich von tus, oba Jehova freit sikj, wan wie doawäajen dän Wensch haben to prädjen. Hee kaun ons halpen, daut wie biejlikj Doktasch ooda Nursen Zeichnis jäwen kjennen ooda aundre, waut ons fläajen. Wan wie daut, waut wie nu doonen kjennen, met daut jäajenäwa hoolen, waut wie ea doonen kunnen, dan woa wie veleicht mootloos. Oba wan wie doano kjikjen, woo Jehova ons nu halpt, dan woa wie de Krauft haben, met aule Schwierichkjeiten foadich to woaren un nich de Freid to velieren.

17. Woo wiest Liera 11:6 ons, daut wie nich opphieren sellen to prädjen, wan doa uk nich fuaz waut bie rutkjemt?

¹⁷ Wan wie prädjen, dan weet wie nich, woont von de Sot, waut wie utstreien, oppgonen un waussen woat (läs Liera 11:6). Barbara es aul äwa 80 Joa un deit pinkjlich äwa Fon un derch Breew prädjen. Opp eene Sauz schreef see eenen Breef un deed doa dän Wachtturm vom 1. Moaz 2014 nenn, wua de Artikjel bennen wia “Was Gott für uns getan hat”. See wist daut nich, daut deejanje, waut dän Breef kjrieejen, ea mol Jehova siene Zeijen wieren. Dit Ehepoa läsd de Tietschreft emma wada. Dän Maun späad sikj daut soo, aus wan Jehova doa to am räd. Dee fungen beid aun, wada no de Toopkomes to wanken, un kjeemen dan wada bie, nodäm daut see äwa 27 Joa utjeschloten wieren. Denkj mol han, woo schaftich Barbara wia, aus see enwort, waut äa Breef jedonen haud!

18. Waut kjenn wie doonen, daut Gott ons stoakjt?

¹⁸ Jehova well ons halpen un hee jeft ons väl, waut ons stoakjen kaun, biejlikj daut Jebäd, de Schreft, onse Gloowesbreeda un daut Prädichtwoakj. Wan wie aul daut nutzen, dan wies wie, daut wie ons opp siene Help veloten. Well wie emma opp onsen himlischen Voda vetruen, waut wellich deejanje biesteit, “waut am met een onjedeeldet Hoat vetruen” (2. Chr. 16:9).