1-2. Waut säd een Schriewa, un äwa waut woa wie en disen Artikjel räden?

VONDOAG dän Dach sajen millionende, daut see aun Jesus jleewen, oba dee komen daut nich no, waut hee lieed (2. Tim. 4:3-4). Een Schriewa säd mol: “Wan doa vondoag een Jesus oppe Ieed wia, waut krakjt daut säd, waut Jesus ieeschtemma . . . , wudd wie dän dan krakjt soo aufwiesen, aus dee daut tweedusent Joa trigj deeden? De Auntwuat es: ‘Jo, wie wudden.’”

² Ieeschtemma hieeden väle, woo Jesus lieed, un sagen mau rajcht siene Wunda, oba dee jleewden doawäajen nich aun am. Wuarom nich? En dän väajen Artikjel hab wie veatlei jeseenen, wuarom de Menschen sikj aun daut stieeden, waut Jesus säd un deed. Well wie ons nu noch eemol veatlei unjastonen. Doa woa wie seenen, wuarom de Menschen vondoag dän Dach Jesus siene Nofolja nich jleichen un waut wie doonen kjennen, daut wie nich tofaul komen.

3. Wäajen waut jleichten eenje Jesus nich?

³ Aus Jesus oppe Ieed wia, wia hee met väl veschiedne Menschen toop. Hee eet met de Rikje un Majchtje toop, un hee vebrocht uk väl Tiet met de Oame un Unjadrekjte. Hee haud uk Metleet met dee, waut de Menschen aus Sinda aunsagen, un doawäajen jleichten eenje Stolte Jesus nich. Dee fruagen Jesus siene Jinja: “Wuarom doo jie met Takskollakjta un Sinda toop äten un drinkjen?” Jesus säd dan to dee: “De jesunde brucken dän Dokta nich; dän brucken mau de kranke. Ekj sie jekomen, de Sinda auntospornen  omtokjieren, un nich de jerajchte” (Luk. 5:29-32).

4. Waut hauden de Juden äwa dän Messias sult weeten no Jesaja siene Profezeiunk no?

⁴ Waut säd de Schreft? Lang ea de Messias no de Ieed kjeem, säd de Profeet Jesaja, daut de Menschen am nich jleichen wudden. Hee schreef: “Hee wea veacht un veloten vonne Menschen . . . un aus eena, ver däm maun daut Aunjesecht vestakjt; hee wea veacht, un wie ha am fe nuscht jeacht” (Jes. 53:3, JHF). Dise Profezeiunk wiest, daut de Messias wudd veacht woaren. Doawäajen haud de Juden daut nich sult wundren, daut väle nich aun am jleewen wudden.

5. Woo denkjen vondoag dän Dach väle äwa Jesus siene Nofolja?

⁵ Woo es daut vondoag dän Dach? Een deel Gloowesleidasch nämen wellich soone en äare Jemeent opp, waut sea rikj ooda bekaunt sent ooda waut enne Welt fa kluak jetalt woaren. Un dee baudat daut uk nuscht, wan dee Sachen doonen, waut Gott nich fa rajcht talt. Krakjt dise Gloowesleidasch kjikjen opp Jehova siene flietje, aunstendje Deena rauf, wiels dee enne Welt nich huach aunjeseenen sent. Soo aus Paulus säd, wält Gott sikj dee, waut fa aundre “nuscht wieet” sent (1. Kor. 1:26-29). Oba Jehova räakjent aul siene true Deena sea väl.

6. Waut säd Jesus en Matäus 11:25-26, un woo kjenn wie am nodoonen?

⁶ Waut kjenn wie doonen, daut wie nich vom Gloowen aufkomen? (Läs Matäus 11:25-26.) Lot die nich doavon metrieten, woo de Welt äwa Gott siene Deena denkjt. Hool em Denkj, daut Jehova bloos de deemootje Menschen brukt toom sienen Wellen doonen (Psa. 138:6). Un denkj doaraun, woo väl Jehova derch dise aul tostaund jebrocht haft, waut fa de Welt nich kluak ooda huach utjelieet sent.

7. Wuarom nand Jesus de Farisäa Heichla, un waut deeden dee dan?

⁷ Jesus dakjt gaunz frie daut Jeheichel von de Gloowesleidasch op. Hee muak biejlikj gaunz dietlich, daut de Farisäa väl dolla doarom todoonen wieren, woo see sikj de Henj wauschen sullen, aus woo see sikj om de Elren kjemren sullen (Mat. 15:1-11). Veleicht wieren Jesus siene Jinja äwarauscht, aus see daut hieeden. Un dee fruagen am: “Weetst du uk daut de Farisäa sikj oajaden, aus dee hieeden, waut du sätst?” Jesus säd: “Aule Plaunten, dee mien himlischa Voda nich jeplaunt haft, woaren utjeräten woaren. Lot dee toch. Daut sent blinje Blinjenleida! Un wan een blinja Maun een aundren blinjen leit, faulen see beid em Growen” (Mat. 15:12-14). Wan de Gloowesleidasch uk sea doll wieren äwa Jesus, hieed hee oba nich opp, de Woarheit to räden.

8. Woo wees Jesus, daut Gott nich aule Gloowes fa rajcht tald?

⁸ Jesus dakjt uk faulsche Lieren op. Hee säd nich, daut Gott aule Gloowes fa rajcht tald. Enne Städ daut säd hee, daut de mieeschte opp dän breeden Wajch wieren, waut no de Venichtunk fieed, oba mau weinich opp dän schmaulen Wajch wieren, dee toom Läwen fieed (Mat. 7:13-14). Hee muak daut gaunz kloa, daut doa eenje wudden väajäwen Gott to deenen, oba en Werkjlichkjeit deeden dee goanich. Hee säd: “Seet junt väa fa de faulsche Profeeten, dee en Schopskjleeda no junt komen, oba ennalich sent see rietende Wilw. Jie sullen dee aun äare Frucht kjanen” (Mat. 7:15-20).

9. Waut vonne faulsche Glooweslieren dakjt Jesus op?

 ⁹ Waut säd de Schreft? De Bibel säd verut, daut de Messias wudd iewrich fa Jehova sien Hus enstonen (Psa. 69:10; Joh. 2:14-17). Dis Iewa brocht Jesus bat doa, faulsche Glooweslieren un Sitten optodakjen. De Farisäa jleewden biejlikj aun eene onstoafelje Seel, oba Jesus lieed, daut de Doodes bloos schleepen (Joh. 11:11). De Saduzäa jleewden nich aun daut oppstonen vom Doot, oba Jesus wuak sienen Frint Lazarus opp (Joh. 11:43-44; Apj. 23:8). De Farisäa jleewden, daut Gott ooda eene aundre Krauft aules lenkjen deed, oba Jesus lieed, daut de Menschen sikj daut selfst wälen kunnen, aus see Gott deenen wullen ooda nich (Mat. 11:28).

10. Wuarom jleichen väle daut nich, waut wie lieren?

¹⁰ Woo es daut vondoag dän Dach? Väle oajren sikj, daut wie an daut met de Bibel bewiesen, daut eenje Glooweslieren faulsch sent. De Gloowesleidasch lieren de Menschen, daut Gott de Schlajchte enne Hal kjwält, daut see dee kjennen unja Kontroll hoolen. Oba wie deenen dän leeftoljen Gott Jehova un wiesen de Menschen, daut dise Lia faulsch es. De Gloowesleidasch lieren uk, daut daut eene onstoafelje Seel jeft. Wie oba wiesen dee, daut daut goanich met de Schreft stemt, wiels dan wudd je daut goanich needich sennen, daut de Doodes oppstunden. En väl Kjoakjen woat jelieet, daut Gott ooda sestwäa aules oppe Welt lenkjt. Oba wie lieren de Menschen, daut wie eenen frieen Wellen haben un ons daut wälen kjennen, Gott to deenen. Waut sajen de Gloowesleidasch doatoo? Foaken woaren dee doll.

11. Waut velangt Jehova von siene Deena, soo aus Johanes 8:45-47 wiest?

¹¹ Waut kjenn wie doonen, daut wie nich vom Gloowen aufkomen? Wan wie de Woarheit leewen, dan mott wie daut uk nokomen, waut Gott sajcht (läs Johanes 8:45-47). Wie sent nich soo aus de Soton, waut de Woarheit veleet. Wie doonen kjeenmol waut, waut jäajen onsen Gloowen  es (Joh. 8:44). Gott velangt von siene Deena, daut dee “een Aufschu [haben] fa daut, waut schlajcht es”, un aun daut fausthoolen, “waut goot es”, krakjt soo aus Jesus deed (Reem. 12:9; Heb. 1:9).

12. Wuarom stieed väl Juden daut, opp woone Wajch Jesus dootjemoakt wort?

¹² Waut wia noch een Grunt, wuarom de Juden nuscht von Jesus wullen? Paulus säd: “Wie oba prädjen dän jekjriezichten Christus, aun dän de Juden sikj steeten” (1. Kor. 1:23). Wuarom stieeden väl Juden sikj doaraun, daut Jesus aun eenen Pol storf? Doaderch leet daut soo, daut hee een Vebräakja un Sinda wia un nich de Messias (5. Mo. 21:22-23, NW).

13. Waut wullen deejanje nich aunerkjanen, waut sikj aun Jesus stieeden?

¹³ Dee Juden, waut sikj aun Jesus stieeden, deeden daut nich aunerkjanen, daut Jesus nich schuldich wia un daut se dän faulsch aunjekloacht hauden un ojjerajcht behaundelt. Dee, waut Jesus rechten deeden, jeewen nuscht om de Jerajchtichkjeit rom. Daut hechste judische Jerecht kjeem haustich toop un deeden Jesus nich soo rechten, aus daut Jesaz daut velangd (Luk. 22:54; Joh. 18:24). Enne Städ daut see sikj daut ieescht mol unjastunden, aus de Beschuldjungen rajcht wieren, sochten see “no faulsche Zeichnisen jäajen Jesus, daut see am doot moaken kunnen”. Aus daut dan nich schauft, wull de Huaga Priesta, daut Jesus waut säd, wuamet see am beschuljen kunnen. Dit wia gaunz jäajen daut Jesaz (Mat. 26:59; Mar. 14:55-64). Nodäm daut Jesus vom Doot oppjestonen wia, bekoften de ojjerajchte Rechta de reemische Soldoten, waut bie daut Grauf oppaussen deeden, met “eene groote Somm Jelt”, daut see Läajes vebreeden sullen, wuarom daut Grauf ladich wia (Mat. 28:11-15).

14. Waut säd de Schreft äwa dän Messias verut?

¹⁴ Waut säd de Schreft? Väl Juden dochten nich, daut de Messias wudd motten stoawen, oba daut wia en de Schreft  verutjesajcht. Doa steit: “Hee haft sien Läwen bat däm Doot hanjejäft, un leet sikj met Sinda jlikj jetrocken woaren. Hee nemt väle äare Sinden auf, un steit fa de Sinda en” (Jes. 53:12). Rajcht jesajcht hauden de Juden kjeenen Grunt, sikj doaraun to stieren, daut Jesus aus een Sinda dootjemoakt wort.

15. Wuarom jleichen väle Jehova siene Zeijen nich?

¹⁵ Woo es daut vondoag dän Dach? Jesus wort ojjerajcht beschulcht un veuadeelt un Jehova siene Zeijen woaren vondoag dän Dach biejlikj soo ojjerajcht behaundelt. Besee wie ons mol waut Biespels. Tweschen 1930 un 1950 musten Jehova siene Zeijen en de Stäts emma wada verem Jerecht, daut see Gott frie deenen kunnen. Eenje Rechta hauden gaunz orrajchte Iedeeen äwa ons. En Quebec, Kanada, schauften de Kjoakj un de Rejierunk sea toop, om ons Woakj opptohoolen. Väl Vekjindja worden enjestopt, bloos wiels dee met aundre äwa Gott sien Kjennichrikj vetalt hauden. En de Tiet von de Nazi-Rejierunk en Dietschlaunt worden een deel junge Breeda dootjemoakt wäajen äaren Gloowen. En de lotre Joaren sent väl von onse Breeda en Russlaunt veuadeelt un enjestopt worden, wäajen dee met aundre äwa de Schreft räden. De Rechta talen daut doafäa, daut daut jäajen de Rejierunk es. Dee haben mau rajcht de rusche Neue-Welt-Übersetzung veboden, wäajen dee jleewen, daut dee uk jäajen de Rejierunk es, wiels doa Jehova sien Nomen bennen steit.

16. Wuarom sell wie ons no 1. Johanes 4:1 no nich loten von de onwoare Jeschichten teischen?

¹⁶ Waut kjenn wie doonen, daut wie nich vom Gloowen aufkomen? See, woo daut werkjlich es. En de Boajchprädicht woarnd Jesus siene Toohiera, daut eenje an wudden “aulahaunt schlajchtet noräden, wan daut nich soo [wia]” (Mat. 5:11). Soone Läajes komen von dän Soton. Hee brinjt de Jäajna bat doa, daut dee beese Läajes äwa soone vebreeden, waut de Woarheit leewen (Opb. 12:9-10). Wie motten nich no soone Läajes horchen. Wie sellen nich tooloten, daut soone Läajes ons Angst moaken ooda vom Gloowen aufbrinjen (läs 1. Johanes 4:1).

17. Waut hauden eenje kunt denkjen, aus dee sagen, waut ver Jesus sienen Doot aules aunjinkj?

¹⁷ Een Stootje ea Jesus storf, deed eena von siene 12 Apostel Jesus veroden. Een aundra Apostel veluach Jesus dreemol un aule Apostel veleeten am en dee Nacht, ea hee storf (Mat. 26:14-16, 47, 56, 75). Jesus wia nich äwarauscht. Hee haud daut aul verutjesajcht, daut daut soo romkomen wudd (Joh. 6:64; 13:21, 26, 38; 16:32). Aul daut haud eenje kunt stieren. Dee hauden kunt denkjen: “Wan Jesus siene Apostel soont deeden, dan well ekj nuscht met dee to doonen haben.”

18. Waut vonne Profezeiungen erfelden sikj derch daut, waut ver Jesus sienen Doot passieed?

¹⁸ Waut säd de Schreft? Jehova haud daut aul hundade Joaren ea en sien Wuat verutjesajcht, daut de Messias wudd fa 30 Selwastekja verot woaren (Sach. 11:12-13). De Veroda wudd eent von Jesus siene Frind sennen (Psa. 41:10). De Profeet Sacharja schreef: “Schlo däm Hoad, un lot de Häad sikj vespreeden” (Sach. 13:7). Aul dit haud de Opprechtje nich sult stieren. Daut haud dee kunt em Gloowen stoakjen, wan dee sagen, woo dise Profezeiungen sikj aun Jesus erfelden.

19. Waut weeten de opprechtje Menschen?

 ¹⁹ Woo es daut vondoag dän Dach? Met de Joaren haben een poa bekaunde Breeda de Woarheit veloten. Daut sent Aufjefolne jeworden un haben jeprooft noch aundre mettorieten. Dee haben äwa Post, Rädio, Tellewizhen un Internet schlajchte Jeschichten äwa Jehova siene Zeijen vebreet ooda soone, wua mau de Halft aun soo es, ooda soone, waut gaunz plaut jeloagen sent. Oba opprechtje Menschen loten sikj von soont nich teischen. Dee weeten, daut de Schreft soont aul verutjesajcht haft (Mat. 24:24; 2. Pet. 2:18-22).

20. Waut kaun ons halpen, daut wie nich tofaul komen derch soone, waut de Woarheit veloten haben? (2. Timotäus 4:4-5).

²⁰ Waut kjenn wie doonen, daut wie nich vom Gloowen aufkomen? Wie motten pinkjlich studieren, aunhoolent bäden un drock bliewen en daut Woakj, waut Jehova ons oppjejäft haft, daut ons Gloowen stoakj bliewen kaun (läs 2. Timotäus 4:4-5). Wan wie Gloowen haben, dan woa wie ons nich Sorjen moaken, wan wie schlajchtet äwa Jehova siene Zeijen hieren (Jes. 28:16). Onse Leew fa Jehova un sien Wuat un fa de Breeda woat ons halpen, daut wie nich tofaul komen derch soone, waut de Woarheit veloten haben.

21. Äwa waut kjenn wie ons secha sennen, wan de mieeschte uk nich no onse Norecht horchen?

²¹ Ieeschtemma stieeden väle sikj aun Jesus un neemen am doaderch nich aun. Oba daut jeef doawäajen noch een deel, waut Jesus aus dän Messias aunneemen. Un mank dee wia oppet weinichste eena von daut hechste judische Jerecht un uk noch “väl Priesta” (Apj. 6:7; Mat. 27:57-60; Mar. 15:43). Vondoag dän Dach sent sikj uk millionende eenich jeworden, Jesus notofoljen. Wuarom? Wiels dee de Woarheit ut de Schreft kjanen un leewen. Gott sien Wuat sajcht: “Groote Fräd haben dee, dee dien Jesaz ieren, un nuscht kaun dee tofaul brinjen” (Psa. 119:165).