1. Äwa waut wieescht du secha äwarauscht, aus du aundre vetalsd, waut du ut de Schreft jelieet hautst?

DENKJT die daut noch, woo daut wia, aus du enwortst, daut du de Woarheit jefungen hautst? Die wia daut gaunz dietlich, waut du ut de Schreft lieezhd, un du dochst, daut de aundre daut uk aula wudden jleichen. Du wieescht die gaunz secha, daut dee daut nu aul en äa Läwen halpen wudd un daut see doaderch wudden eene wundascheene Hopninj kjrieen (Psa. 119:105). Doawäajen rädsd du sea oppjebrocht to aul diene Frind un Frintschoft von daut, waut du ut de Schreft jelieet hautst. Oba woo kjeem daut ut? Secha wieescht du sea äwarauscht, daut de mieeschte doa nuscht von weeten wullen.

2-3. Woo dochten de mieeschte Menschen äwa Jesus?

² Daut saul ons nich wundren, wan aundre nich no daut horchen, waut wie prädjen. Jesus deed väl Wunda, waut beweesen, daut Gott met am wia. Oba de mieeschte wullen doawäajen nuscht von am. Hee wuak biejlikj Lazarus vom Doot opp, un daut wia een Wunda, waut siene Jäajna nich vestrieden kunnen. Oba de judische Gloowesleidasch jleewden doawäajen nich, daut hee de Messias wia. Dee wullen Jesus un Lazarus mau rajcht dootmoaken! (Joh. 11:47-48, 53; 12:9-11).

³ Jesus wist, daut de mieeschte Menschen nich jleewen wudden, daut hee de Messias wia (Joh. 5:39-44). Doawäajen säd hee to eenje Jinja von Johanes dän Deepa: “Seelich es, wäa sikj nich oajat äwa mie” (Mat. 11:2-3, 6). Wuarom wullen soo väle nuscht von Jesus weeten?

4. Waut woa wie en disen Artikjel seenen?

 ⁴ En disen un en dän näakjsten Artikjel woa wie veschiednet seenen, wuarom ieeschtemma väle nich aun Jesus jleewden. Un wie woaren uk seenen, wuarom väle vondoag dän Dach nich no onse Norecht horchen. Un daut wichtichste es, daut wie lieren woaren, wuarom wie faust aun Jesus jleewen kjennen, soo daut wie nich von am aufkomen.

5. Wuarom dochten eenje veleicht, daut Jesus nich de vesproakna Messias wia?

⁵ Väle stieeden sikj doaraun, von wua Jesus häakjeem. Dee stunden too, daut hee een sea feina Liera wia un Wunda doonen kunn. Oba dee dochten, hee wia bloos de Sän von eenen oamen Holtoabeida. Un hee wia von Nazaret, waut väle fa eene eefache Staut hilden. Mau rajcht Natanael, waut lota Jesus sien Jinja wort, säd ea: “Kaun von Nazaret waut goodet komen?” (Joh. 1:46). Veleicht jleicht Natanael de Staut nich, wua Jesus don wond. Ooda hee docht aun de Profezeiunk en Micha 5:1, wua daut säd, daut de Messias en Betlehem wudd jebuaren woaren un nich en Nazaret.

6. Woo hauden de Menschen ieeschtemma kunt weeten, daut Jesus de Messias wia?

⁶ Waut säd de Schreft? De Profeet Jesaja säd verut, daut Jesus siene Jäajna sikj nich “met Eenselheiten” äwa dän Messias aufjäwen wudden (Jes. 53:8, NW). Doa wieren väl Eenselheiten von dän verutjesajcht. Wan dee sikj de Tiet jenomen hauden, sikj de Sach krakjt to unjastonen, dan wudden dee sennen enjeworden, daut Jesus en Betlehem jebuaren wia un von dän Kjennich David aufstaumd (Luk. 2:4-7). Jesus wia aulsoo krakjt doa jebuaren worden, wua Micha 5:1 von räd. Wuarom jleewden dee dan nich aun am? Wiels dee too schwind doabie wieren to rechten. Dee wisten nich krakjt om de Sach om, un doawäajen neemen dee Jesus nich aun.

7. Wuarom sent vondoag dän Dach väle jäajen Jehova siene Deena?

⁷ Woo es daut vondoag dän Dach? De mieeschte von Jehova siene Deena sent nich rikj ooda bekaunt, un väle talen dee fa “ojjeschoolde, jeweenelje Menschen” (Apj. 4:13). Eenje denkjen, daut Gott siene Deena aundre goanich von de Schreft lieren kjennen, wiels dee kjeene besondre Bibelschoolen derchjegonen sent. Aundre sajen, daut Jehova siene Zeijen “eene stätsche Jemeent” sent. Oba en Werkjlichkjeit komen de mieeschte von dee von aundre Lenda. Wada aundre haben sikj loten enbillen, daut Jehova siene Zeijen nich aun Jesus jleewen ooda daut dee Kommunisten ooda stätsche Spionen sent ooda jäajen de Rejierunk schaufen. Un wiels väle Menschen dise Jeschichten jleewen un sikj daut nich unjastonen, sent dee jäajen Jehova siene Zeijen.

8. Woo kaun eena daut no Aposteljeschicht 17:11 no rutfinjen, wäa vondoag dän Dach Gott siene woare Deena sent?

⁸ Waut kaun eena doonen, daut eena nich vom Gloowen aufkjemt? Eena mott sikj de Sach krakjt unjastonen. Krakjt daut deed de Bibelschriewa Lukas. Hee haud “aules von Aunfank aun jrintlich unjasocht”, daut siene Läsa “een fausten Grunt” fa daut hauden, waut see äwa Jesus jehieet hauden (Luk. 1:1-4). De Juden en de ieeschtemmasche Staut Beria wieren krakjt soo aus Lukas. Aus dee de goode Norecht äwa Jesus hieeden, sochten dee en de Hebräische Schreften no, om to seenen, aus daut werkjlich soo wia, waut se an säden (läs Aposteljeschicht 17:11). De Menschen vondoag dän Dach sellen dautselwje doonen un daut, waut Gott siene  Deena an lieren, met daut jäajenäwa hoolen, waut de Schreft sajcht. Dee sellen uk doavon studieren, waut Jehova siene Deena en de vondoagsche Tiet jedonen haben. Wan dee daut doonen, dan woaren dee sikj nich derch oppjemoakte Jeschichten ooda orrajchte Iedeeen teischen loten.

9. Waut passieed, aus Jesus kjeen Tieekjen vom Himmel moaken wull?

⁹ Fa eenje en Jesus siene Tiet wia daut nich jenuach, daut hee soon feina Liera wia. Dee wullen “een Tieekjen vom Himmel” seenen aus Bewies, daut hee de Messias wia (Mat. 16:1). Veleicht wullen dee daut, wäajen dee Daniel 7:13-14 nich rajcht vestonen kunnen. Oba fa Jehova wia daut don noch nich de rajchte Tiet, daut dise Profezeiunk sikj erfeld. Jesus siene Lieren hauden sult jenuach Bewies sennen, daut hee de Messias wia. Oba aus hee nich daut Tieekjen muak, wua de Menschen am no fruagen, jleewden dee nich aun am (Mat. 16:4).

10. Woo kjeem Jesus daut no, waut Jesaja äwa dän Messias verutsäd?

¹⁰ Waut säd de Schreft? De Profeet Jesaja schreef von dän Messias: “Hee woat nich schrieen ooda lud roopen, soo daut hee oppe Gaussen to hieren es” (Jes. 42:1-2). Jesus fieed sienen Deenst ruich un deemootich derch. Hee bud nich oppfaulende Tempels un brukt uk kjeene besondre Kjleeda un leet sikj uk nich met besondre Tietels aunräden, om to wiesen, daut hee een Gloowesleida wia. Un aus hee verem Jerecht wia un sien Läwen en Jefoa wia, deed hee uk kjeen Wunda, om dän Kjennich Herodes tofrädtostalen (Luk. 23:8-11). Jesus deed eenje Wunda, oba de goode Norecht to prädjen wia daut ieeschte fa am. Hee säd to siene Jinja: “Daut es wuatoo ekj jekomen sie” (Mar. 1:38).

11. Waut fa orrajchte Iedeeen haben eenje vondoag dän Dach?

¹¹ Woo es daut vondoag dän Dach? Vondoag dän Dach jleichen väle de groote Kjoakjen, waut dia utjestraumt sent, un de Gloowesleidasch, waut besondre Tietels  haben un uk de Sitten, wua de mieeschte nich mol weeten, von wua dee häakomen un waut dee bedieden. Oba rajcht jesajcht lieren de Menschen en soone Kjoakjen nich väl von Gott un von dän sien Väanämen. Deejanje, waut no onse Toopkomes wanken, lieren, waut Jehova von ons haben well un woo wie sienen Wellen doonen kjennen. Onse Vesaumlungshiesa sent rein un fein enjerecht, oba dee sent nich dia utjestraumt. Dee, waut de Vesaumlunk väastonen, brucken kjeene besondre Kjleeda ooda besondre Tietels. Un aules, waut wie jleewen un aundre lieren, kjemt von Gott sien Wuat. Oba väle wellen doawäajen nich no ons horchen, wiels an daut too eefach lat, woo wie Gott deenen. Un wie lieren je dee uk nich daut, waut dee hieren wellen.

12. Woo woat ons Gloowen no Hebräa 11:1, 6 no stoakja?

¹² Waut kjenn wie doonen, daut wie nich vom Gloowen aufkomen? De Apostel Paulus säd to de Christen en Room: “Dee Gloowe kjemt derch heare, en heare kjemt derch Christus sien Wuat” (Reem. 10:17, NTR). Ons Gloowen woat stoakja, wan wie de Schreft studieren un nich, wan wie bie Gloowessitten metmoaken, waut nich met Gott sien Wuat stemmen, endoont woo moakhauftich dee veleicht loten. Wie motten goot om de biblische Woarheit omweeten un em Gloowen stoakj woaren, wiels “onen Gloowen es daut ommäajlich, Gott to jefaulen” (läs Hebräa 11:1, 6). Dan bruck wie nich een besondret Tieekjen vom Himmel, waut ons wiest, daut wie de Woarheit jefungen haben. Wan wie ons de biblische Lieren goot unjastonen, waut ons em Gloowen stoakjen, dan woa wie kjeenen Twiewel mea haben.

13. Wuarom jleewden väle nich aun Jesus?

¹³ Johanes dän Deepa siene Jinja wundaden sikj, daut Jesus siene Jinja nich fausten deeden. Oba Jesus säd, daut wia nich needich, soo lang hee noch aum Läwen wia (Mat. 9:14-17). Oba de Farisäa un aundre  Jäajna veuadeelden Jesus, wiels hee sikj nich aun dee äare Sitten un Jewanheiten hilt. Dee worden doll, aus hee aum Sabat Kranke heeld (Mar. 3:1-6; Joh. 9:16). Von eene Sied wia dee daut grulich wichtich, dän Sabat to hoolen, oba von de aundre Sied baudad dee daut nuscht, em Tempel Schacharieen to driewen. Un dee oajad daut sea, aus Jesus daut fa orrajcht tald (Mat. 21:12-13, 15). Un de Menschen en de Judenschool en Nazaret worden flaument doll, aus Jesus an daut derch Biespels von ieeschtemma dietlich wees, daut see bloos aun sikj dochten un daut see nich nuach Gloowen hauden (Luk. 4:16, 25-30). Väle jleewden nich aun Jesus, wiels hee nich daut deed, waut see sikj väajestalt hauden (Mat. 11:16-19).

14. Wuarom tald Jesus soone Sitten fa schlajcht, waut nich met de Schreft stemden?

¹⁴ Waut säd de Schreft? Jehova säd derch dän Profeet Jesaja: “Wiels dit Volkj schmocke Wieed rät, un feine Dinja von mie sajcht, oba sikj nich werkjlich no mie kjieet, – dee wiesen mie äare Forcht bloos met Menschen Räajlen dee see haben lieet nosajen” (Jes. 29:13). Daut wia rajcht, daut Jesus soone Sitten fa schlajcht tald, waut nich met de Schreft stemden. Dee, waut Menschenjebooten un Sitten fa hecha talden aus de Schreft, weesen Jehova auf un uk dän, waut hee aus dän Messias jeschekjt haud.

15. Wuarom jleichen vondoag dän Dach väle Jehova siene Zeijen nich?

¹⁵ Woo es daut vondoag dän Dach? Väle woaren doll äwa Jehova siene Zeijen, wan dee nich met an toop soone Heljedoag hoolen, waut jäajen de Schreft sent, soo aus Wienachten un Jeburtsdach. Aundre oajat daut, wan Jehova siene Zeijen bie de Laundesfasten nich metmoaken ooda bie een Bejrafnis nich Sitten uteewen, waut rajcht jesajcht jäajen de Schreft sent. Dee, waut doa doll woaren, jleewen secha, daut see Gott rajcht deenen. Oba rajcht jesajcht haft Gott kjeenen Jefaulen aun dee, wan dee de Welt äare Sitten fa hecha talen aus de kloare biblische Lieren (Mar. 7:7-9).

16. Waut mott wie doonen, un waut sell wie nich doonen? (Psalm 119:97, 113, 163-165).

¹⁶ Waut kjenn wie doonen, daut wie nich vom Gloowen aufkomen? Wie motten eene groote Leew fa Jehova siene Jesazen un Gruntsauzen kjrieen (läs Psalm 119:97, 113, 163-165). Wan wie Jehova leewen, dan woa wie aule Sitten tochloten, waut am nich jefaulen. Dan woat onse Leew fa Jehova fa ons daut väaschte sennen.

17. Wuarom neemen väle Jesus nich aun?

¹⁷ En Jesus siene Tiet wenschten eenje sikj, daut daut fuaz eene aundre Rejierunk jäwen sull. Dee dochten, daut de Messias an von de Reema friemoaken wudd, waut an sea toosaden. Oba aus se Jesus toom Kjennich moaken wullen, säd hee daut auf (Joh. 6:14-15). De Priesta un aundre hauden Angst, daut Jesus eene fresche Rejierunk oppstalen wudd un daut de Reema dan doll woaren wudden un an de Macht wajchnämen, waut see an jejäft hauden. Wäajen aul soont neemen väl Juden Jesus nich aun.

18. Om woone Profezeiungen äwa dän Messias jeewen väle nich väl rom?

¹⁸ Waut säd de Schreft? Daut jeef väl Profezeiungen, waut verutsäden, daut de Messias een Kjrichsmaun sennen wudd, waut siene Fiend wudd jewennen. Oba aundre Profezeiungen weesen, daut hee ieescht mol wudd fa onse Sinden stoawen motten (Jes. 53:9, 12). Wuarom hauden de  Juden orrajchte Iedeeen äwa dän Messias? Wiels väle nich väl om soone Profezeiungen romjeewen, waut sikj nich von äare Trubbels haundelden un woo dee fuaz kunnen jeleest woaren (Joh. 6:26-27).

19. Wuarom wellen väle vondoag dän Dach nich no ons horchen?

¹⁹ Woo es daut vondoag dän Dach? Väle jleichen ons nich, wiels wie nuscht met de Politikj to doonen haben. Dee wellen, daut wie uk wälen gonen. Oba wie weeten, daut wie rajcht jesajcht Jehova aufwiesen wudden, wan wie ons eenen menscheljen Harscha wälden (1. Sam. 8:4-7). Eenje denkjen uk, daut wie wudden sellen Schoolen un Hospitäla buen un aundre goode Woakjen doonen. Dee wellen nich no ons horchen, wiels wie daut ieeschte om daut Prädichtwoakj todoonen sent un nich doarom, de Trubbels to fiksen, waut et nu jeft.

20. No waut sell wie daut ieeschte kjikjen, soo aus Matäus 7:21-23 sajcht?

²⁰ Waut kjenn wie doonen, daut wie nich vom Gloowen aufkomen? (Läs Matäus 7:21-23.) Wie sellen daut ieeschte doano kjikjen, daut Woakj to doonen, waut Jesus ons oppjejäft haft (Mat. 28:19-20). Wie sellen ons daut kjeenmol doamet drock moaken, daut wie de Trubbels von dise Welt fiksen wellen. Wie leewen de Menschen un wellen dee met äare Trubbels halpen. Oba wie weeten, daut wie dee daut baste halpen kjennen, wan wie dee von Gott sien Kjennichrikj lieren un dee halpen, Frind met Jehova to woaren.

21. To waut sell wie ons gaunz eenich sennen?

²¹ En disen Artikjel hab wie veatlei jeseenen, wuarom väle ieeschtemma Jesus nich aunneemen un wuarom eenje vondoag dän Dach nich no dän siene Nofolja horchen wellen. Oba jeft daut noch mea Sachen, wua wie fäa oppaussen sellen? Jo. En dän näakjsten Artikjel woa wie noch vea Sachen seenen. Well wie ons gaunz eenich sennen, kjeenmol von Jesus auftokomen un eenen stoakjen Gloowen to hoolen!