1-2. Wuarom woaren eenje Varzhen veleicht noch wichtja fa ons, wan sikj waut en ons Läwen endat?

 WAN een Poa sikj befriet, dan jeft daut aun dän Kjastdach foaken eene biblische Räd, waut sikj von de Ehe haundelt. De Gruntsauzen, von dee doa jerät woat, sent nuscht nich waut nieet fa dee. Oba von nu aun sent dee fa an perseenlich noch wichtja. Wuarom? Wäajen nu woaren see daut selfst aus eene Lied nokomen.

² Wan de Lied ieescht Elren woaren, dan es daut krakjt soo. Met de Joaren haben dee aul väl Räden jehieet, waut sikj doavon haundelden, woo eena Kjinja fein opptrakjen kaun. Oba nu woat de Rot von dise Räden fa an perseenlich noch wichtja. Nu woaren dee selfst een Kjint opptrakjen. Daut es eene besondre Veauntwuatunk! Wan sikj en ons Läwen waut endat, dan kjikj wie aun eenje Varzhen veleicht aundasch naun, aus wie ea deeden. Daut es eent, wuarom Jehova siene Deena en de Schreft läsen un wuarom de Kjennichs von Israel “auledach” musten doaräwa nodenkjen (5. Mo. 17:19, von ons dunkel un schroz jemoakt).

3. Waut woa wie en disen Artikjel seenen?

³ Jie Elren, jie haben eent von daut jratste Väarajcht, waut een Christ haben kaun, un daut es, june Kjinja von Jehova to lieren. Jie wellen secha mea doonen, aus dee bloos väl von Gott lieren. Jie wellen dee halpen, daut dee eene groote Leew fa Jehova kjrieen. Waut kjenn jie doonen, daut june Kjinja soone Leew fa Jehova kjrieen? En disen Artikjel woa wie äwa vea biblische Gruntsauzen räden, waut junt aus Elren  halpen kjennen (2. Tim. 3:16). Wie woaren uk seenen, woo eenje christelje Elren daut togood kjeem, daut see dän Rot von ut de Schreft nokjeemen.

4. Woont es een Gruntsauz, waut Elren brucken kjennen, om äare Kjinja to halpen, Jehova von Hoaten to leewen? (Jakobus 1:5).

⁴ 1. Gruntsauz: Sieekjt bie Jehova no Rot. Froag Jehova no Weisheit, daut du diene Kjinja halpen kaust, Leew fa am to kjrieen (läs Jakobus 1:5). Hee es de basta Rotjäwa. Daut jeft veschiedne Jrind, wuarom wie daut sajen kjennen. See wie mol twee. Daut ieeschte es, wäajen Jehova de mieeschte Erfoarunk haft aus Voda (Psa. 36:10). Un daut tweede es, wäajen sien weisa Rot emma toom gooden es (Jes. 48:17).

5. (a) Waut vonne Help kjrieen de Elren derch Jehova siene Organisazion? (b) Waut hast du doavon jelieet, woo Brooda un Sesta Amorim äare Kjinja opptrocken, soo aus daut en daut Video to seenen wia?

⁵ Jehova jeft de Elren derch siene Organisazion äwajenuach jeisteljet Äten, waut an halpen kaun, äare Kjinja soo opptotrakjen, daut dee Jehova leewen (Mat. 24:45). Jie kjennen gooden Rot opp onse Websied jw.org finjen, biejlikj bie de Artikjels “Help fa de Famielje” ooda bie BIBLISCHE LIEREN > EHE UN FAMIELJE. Daut jeft doa uk sea väl Videos, waut Elren wiesen, woo see Jehova sienen Rot brucken kjennen, wan dee äare Kjinja opptrakjen (Spr. 2:4-6). *

6. Woo denkjt een Voda äwa dän Rot, waut see von Jehova siene Organisazion kjrieen?

⁶ Väle Elren säden, woo dankboa see wieren fa dee Help, waut Jehova an derch siene Organisazion jejäft haft. Een Voda, waut Joe heet, sajcht: “Dree Kjinja en de Woarheit opptotrakjen, es nich leicht. Miene Fru un ekj bäden emma, daut Jehova ons halpen saul. Un ons haft sikj daut aul foaken soo jespäat, daut een Video ooda Artikjel krakjt dan rutkjeem, wan ons daut aun Help fäld, met eene Schwierichkjeit foadich to woaren. Wie haben ons emma aun Jehova sienen Rot jehoolen.” Joe un siene Fru sent enjeworden, daut  dise Videos un Artikjels äare Kjinja halpen, Jehova noch noda to komen.

7. Wuarom es daut soo wichtich, daut Elren een goodet Biespel sent? (Reema 2:21).

⁷ 2. Gruntsauz: Sie een goodet Biespel. Kjinja beoobachten äare Elren krakjt un doonen dee foaken no. Daut jeft nich Elren, waut volkomen sent (Reem. 3:23). Oba dee doonen doawäajen äa bastet, om fa äare Kjinja een goodet Biespel to sennen (läs Reema 2:21). Een Voda säd äwa Kjinja: “Dee sent soo aus een Lasch, waut aules oppsucht, waut doa naun kjemt. Aun dee es to seenen, aus ons Biespel met daut tooppaust, waut wie an proowen to lieren.” Soo, wan wie wellen, daut onse Kjinja Jehova leewen, dan mott onse ieejne Leew fa am stoakj un kloa to seenen sennen.

8-9. Waut kaust du von daut lieren, waut Andrew un Emma säden?

⁸ Daut jeft väl veschiedne Wäaj, woo Elren äare Kjinja lieren kjennen, Jehova to leewen. See wie mol, waut Andrew, een 17-joascha Brooda, sajcht: “Miene Elren haben mie emma jelieet, woo wichtich daut es to bäden. Miene Pape deed jieda Zeowes met mie toop bäden, wan ekj uk aul selfst jebät haud. Onse säden emma: ‘Du kaust soo foaken met Jehova räden aus du west.’ Doawäajen wort daut bäden sea wichtich fa mie. Nu feel ekj mie goot, to Jehova to bäden un kaun am aus eenen Voda seenen, dee mie leeft.” Jie Elren, vejät daut kjeenmol, daut june ieejne Leew fa Jehova june Kjinja halpen kaun, am uk to leewen.

⁹ See wie mol Emma äa Biespel. Aus äa Voda de Famielje veleet, must äare Mame eene groote Schult betolen, waut hee jemoakt haud. Emma sajcht: “Wan miene Mame uk foaken nich jenuach Jelt haud, räd see oba emma doavon, woo Jehova sikj om siene Deena kjemmat. Ekj kaun aun ar seenen, daut see sikj doaräwa gaunz secha es. Miene Mame kjeem daut selfst no, waut see mie lieed.” De Lia fa ons? Elren kjennen äare Kjinja uk en eene schwoare Loag derch äa Biespel lieren (Gal. 6:9).

10. Waut vonne Jeläajenheiten hauden de israelitische Elren, met äare Kjinja äwa Jehova to räden? (5. Mose 6:6-7).

¹⁰ 3. Gruntsauz: Räd foaken met diene Kjinja. Jehova velangd von de Israeliten ieeschtemma, daut dee foaken to äare Kjinja von am vetalden (läs 5. Mose 6:6-7). To jane Tiet hauden dee dän Dach äwa väl Jeläajenheiten, met äare Kjinja to räden un an to halpen, Jehova von Hoaten to leewen. Een israelitischa Jung wia veleicht stundenlank met siene Pape toop oppe Stap un holp am to plaunten ooda to arnten. Siene Sesta holp äare Mame veleicht meist dän Dach äwa met Zeich moaken, neien un aundre Husoabeit. Wäajen de Elren un de Kjinja dän Dach äwa toop wieren, kunnen dee äwa väl wichtje Sachen räden. Dee kunnen biejlikj doaräwa räden, woo goot Jehova wia un woo hee äare Famielje holp.

11. Wanea haben christelje Elren de Jeläajenheit, met äare Kjinja to räden?

¹¹ De Tieden haben sikj oba jeendat. En väl Lenda kjennen de Elren un de Kjinja nich dän Dach äwa toop sennen. Veleicht motten de Elren opp Oabeit gonen un de Kjinja motten no School gonen. Doawäajen motten de Elren no Jeläajenheiten sieekjen, wua dee met äare Kjinja räden kjennen (Efs. 5:15-16; Filip. 1:10). Daut Famieljenstudium es eene goode Jeläajenheit doatoo. Een junga Brooda, waut Alexander heet, sajcht: “Miene Pape moakt emma feine Plons, daut wie daut Famieljenstudium  haben kjennen. Hee lat sikj von nuscht aufhoolen, daut wie nich dise Tiet toop haben kjennen. No daut Studium vetal wie foaken noch een bät.”

12. Aun waut saul een Voda denkjen, wan hee daut Famieljenstudium leit?

¹² Wan du een Famieljenvoda best, waut kaust du dan doonen, daut june Kjinja daut Famieljenstudium scheen jeit? Wuarom nich mol daut feine niee Buak Een scheenet Läwen fa emma! met de Kjinja studieren? Dit Buak moakt daut leicht, eene goode Unjahoolunk to haben. Du west je, daut diene Kjinja die daut vetalen, woo dee daut jeit un waut dee fa Trubbels haben. Doawäajen bruck de Tiet fa daut Famieljenstudium nich doatoo, dee strenj trajchttowiesen. Un woa nich doll, wan diene Kjinja veleicht uk mol soont sajen, waut nich met de Schreft toopstemt. Sie leewa dankboa, daut dee krakjt sajen, woo an daut jeit un moakt dee daut leicht, daut dee daut uk fa wieda doonen kjennen. Du kaust diene Kjinja bloos dan daut baste halpen, wan du weetst, woo dee daut opp iernst jeit.

13. Waut haben de Elren noch fa Jeläajenheiten, äare Kjinja to halpen, Jehova noda to komen?

¹³ Jie Elren, sieekjt no Jeläajenheiten, woo jie june Kjinja dän Dach äwa halpen kjennen, Jehova noda to komen. Jie motten nich wachten, bat jie met de Kjinja studieren, daut jie dee von onsen leeftoljen Gott lieren kjennen. See wie mol, waut eene Mame sajcht, waut Lisa heet: “Wie holpen onse Kjinja to seenen, woo dee derch de Natua von Jehova lieren kunnen. Wan ons Hunt biejlikj waut deed, wuaräwa de Kjinja lachen musten, dan räd wie doavon, woo daut wees, daut Jehova een schaftja Gott es un daut hee uk soone Sachen muak, waut fa ons sposich sent.”

14. Wuarom es daut wichtich, daut Elren äare Kjinja halpen, sikj goode Frind to sieekjen? (Spricha 13:20).

¹⁴ 4. Gruntsauz: Halpt june Kjinja, sikj goode Frind to sieekjen. De Schreft moakt dietlich, daut onse Frind waut aun ons doonen – entwäda toom gooden ooda toom schlajchten (läs Spricha 13:20). Jie Elren, kjan jie june Kjinja äare Frind? Hab jie dee mol jeseenen un sent mol een bät  met dee toop jewast? Waut kjenn jie doonen, om june Kjinja to halpen, met dee Frind to woaren, waut Jehova leewen? (1. Kor. 15:33). Jie kjennen june Kjinja halpen, goode Frind to finjen, wan jie soone no junt kroagen, waut jeistlich jesonnen sent un met dee toop waut doonen (Psa. 119:63).

15. Waut kjennen Elren doonen, om äare Kjinja to halpen, goode Frind to haben?

¹⁵ Een Voda, waut Tony heet, vetalt, waut hee un siene Fru deeden toom äare Kjinja halpen, daut see goode Frind fungen. Hee sajcht: “Wie haben fa väle Joaren von veschiedne Städen elre un jinjre Breeda un Sestren no ons jekroacht. Wie doonen toop äten ooda moaken toop ons Famieljenstudium. Daut es eene sea goode Jeläajenheit, soone kjanen to lieren, waut Jehova leewen un am met Freid deenen. Wie hauden aul Kjreisoppsechtasch, Missionoaren un aundre bie ons to Jast. To hieren, waut dee fa Erfoarungen vetalden, woo iewrich dee wieren un waut dee aules oppjeewen, deed sea väl aun onse Kjinja. Daut holp dee, Jehova noch noda to komen.” Jie Elren, doot aules waut jie kjennen, om june Kjinja to halpen, goode Frind to haben.

16. Waut saul eena doonen, wan een Kjint sajcht, daut dee nich mea well Jehova deenen?

¹⁶ Oba waut, wan jie junt sea aunjestrenjt haben un eent von june Kjinja doawäajen sajcht, daut hee Jehova nich deenen well? Daut bediet noch lang nich, daut jie aus Elren nich june Fliet jedonen haben. Jehova haft jiedrem eenen, uk jun Kjint, dän frieen Wellen jejäft, daut dee sikj wälen kaun, aus dee Gott deenen well ooda nich. Wan jun Kjint sikj jewält haft, Jehova nich to deenen, dan jeff nich Hopninj opp, daut dee eenen Dach wada trigj no am kjemt. Denkjt aun daut Jlikjnis von dän veloarnen Sän (Luk. 15:11-19, 22-24). Dee deed sea väl schlajchtet, oba tolatst kjeem dee trigj. Eenje sajen veleicht: “Daut es bloos eene Jeschicht. Kaun daut opp iernst soont jäwen?” Jo, daut kaun! Daut es krakjt daut, waut de Erfoarunk von eenen jungen Maun Elie wiest.

17. Wuarom jeft die Elie siene Erfoarunk Moot?

 ¹⁷ Elie sajcht von siene Elren: “Dee deeden äa bastet, om mie to lieren, Jehova un sien Wuat väl to räakjnen. Oba aus ekj soo rom 15 Joa wia, wull ekj mie nuscht mea sajen loten.” Elie funk aun, plietsch schlajchte Sachen to doonen. Siene Elren proowden am to halpen, dicht bie Jehova to bliewen. Oba hee horcht nich no dee. Aus hee von tus veleet, wort daut met sien Schlajchtet emma oaja. Oba hee räd doawäajen eenjemol met sienen Frint äwa de Schreft. Elie sajcht: “Je mea ekj to mienen Frint von Jehova vetald, je dolla funk ekj aun, selfst äwa Jehova notodenkjen. De Woarheitssot, waut miene Elren mie aul bie kjlien proowden to lieren, funk soo bie sacht wada aun to waussen.” Met de Tiet kjeem Elie wada trigj no de Woarheit. * Stal die väa, woo schaftich siene Elren wieren, daut dee am aul von kjlien aun jelieet hauden, Jehova to leewen! (2. Tim. 3:14-15).

18. Woo denkjst du äwa Elren, waut sikj aunstrenjen, äare Kjinja to lieren, Jehova to leewen?

¹⁸ Jie Elren haben daut besondre Väarajcht jekjräajen, eene niee Jennerazion von true Aunbäda opptotrakjen (Psa. 78:4-6). Daut haft noch waut opp sikj un wie lowen junt doafäa, daut jie junt soo sea aunstrenjen un nich meed woaren, june Kjinja to halpen! Wan jie wieda june Kjinja opp de baste Wajch halpen, Jehova to leewen un to jehorchen, dan kjenn jie junt secha sennen, daut ons leeftolja himlischa Voda tofräd sennen woat (Efs. 6:4).