1-2. Wuarom sell wie ons fa daut Buak Openboarunk intressieren?

 HAST du die mol eenen aundren sien Bildabuak beseenen? Wan jo, dan sitst du, daut de mieeschte doa bowen soone sent, waut du nich kjanst. Oba met eemol sitst du een Bilt, waut die oppfelt. Wuarom? Wiels du opp daut Bilt best. Du besitst die daut Bilt gaunz jeneiw un denkjst doaräwa no, wanea un wua daut Bilt aufjenomen wort. Du kjikjst uk doano, aus du de aundre opp daut Bilt kjanst. Daut Bilt es waut besondret fa die.

² Daut Buak Openboarunk es soo aus dit Bilt. Wuarom? Daut jeft oppet weinichste twee Jrind. Daut ieeschte es, daut de Openboarunk fa ons jeschräwen wort. En dän gaunz ieeschten Varsch steit: “Dit es de Openboarunk dee Gott Jesus Christus jeef, siene Deena to wiesen, waut em korten passieren must” (Opb. 1:1, von ons dunkel un schroz jemoakt). Daut, waut en dit Buak bennen steit, es nich fa de Menschen em auljemeenen jeschräwen, oba fa ons aus Gott siene Deena. Aus Gott siene Deena saul ons daut nich wundren, wan wie seenen, daut wie doa met en sent, wan de Profezeiungen von dit besondre Buak sikj erfellen. Wie sent soo to sajen opp dit Bilt.

3-4. Wanea wudden de Profezeiungen en Openboarunk sikj erfellen, un waut haft daut met ons to doonen?

³ Daut tweede, wuarom wie ons fa de Openboarunk intressieren sellen, es wäajen de Tiet, wanea de Profezeiungen sikj erfellen. Aus de Apostel Johanes aul ella wia, säd hee, wanea daut sennen wudd. Hee schreef: “Ekj wia aum Harn sien Dach em Jeist” (Opb. 1:10, JHF; von ons dunkel un schroz jemoakt). Aus Johanes dise Wieed aune 96 n. Chr. oppschreef, wia dän “Harn sien Dach” noch wiet auf (Mat. 25:14,  19; Luk. 19:12). Oba no de biblische Profezeiungen no funk dis Dach aune 1914 aun, aus Jesus em Himmel toom Kjennich jemoakt wort. Von doa aun haben de Profezeiungen von de Openboarunk sikj aunjefongen to erfellen, wua uk Gott siene Deena met en sent. Soo, wie läwen nu jroz en dän “Harn sien Dach”!

⁴ Wäajen wie en dise besondre Tiet läwen, es daut besonda needich fa ons, daut wie no daut horchen, waut daut en Openboarunk 1:3 sajcht. Doa sajcht daut: “Seelich [ooda schaftich] es dee, dee dit Profeeten Wuat last un uk dee, dee daut hieren un sikj doaraun hoolen, waut doabennen jeschräwen steit, wiels de Tiet es boolt hia.” Daut es needich, daut wie daut “Profeeten Wuat” läsen un uk “hieren” un ons “doaraun hoolen”. Woont sent eenje von de Wieed, waut wie nokomen motten?

5. Woo wiest de Openboarunk, woo wichtich daut es, doaropp to achten, daut wie Jehova rajcht aunbäden?

⁵ Fuaz von daut ieeschte Kapitel en de Openboarunk aun kjenn wie seenen, daut Jesus doa krakjt omweet, waut en de Vesaumlungen von siene Deena aunjeit (Opb. 1:12-16, 20; 2:1). Daut wees hee, aus hee biejlikj de säwen Vesaumlungen von Kjlien-Asien Norechten schekjt. En dise Norechten jeef hee de Christen ieeschtemma krakjte Aunwiesungen, woo see doaropp achten kunnen, Jehova rajcht auntobäden. Oba waut en dise Norechten jesajcht woat, talt uk noch fa Gott siene Deena vondoag dän Dach. Waut es de Lia fa ons? Jesus Christus, waut ons Leida es, weet doa krakjt om, woo daut bie ons em jeisteljen es. Hee leit un beschizt ons un weet krakjt, waut wie doonen. Hee weet uk, waut wie doonen motten, daut Jehova wieda kaun met ons tofräd sennen. Waut vonne Aunwiesunk jeef hee, wua wie ons vondoag dän Dach aun hoolen motten?

6. (a) Waut fa eenen Trubbel haud de Vesaumlunk en Efesus, soo aus Jesus en Openboarunk 2:3-4 säd? (b) Waut kjenn wie doavon lieren?

⁶ Läs Openboarunk 2:3-4. Wie motten nich onse ieeschte Leew fa Jehova velieren. Aun de Norecht, waut Jesus de Vesaumlunk en Efesus schekjt, wia to seenen, daut dee utjehoolen hauden un Jehova wieda jedeent hauden, wan dee uk veschiedne Schwierichkjeiten jehaut hauden. Oba dee hauden nich mea dee Leew, waut see aum Aunfank hauden. Wan see sikj nich aunstrenjen wudden, dise Leew trigjtokjrieen, wudd Jehova äare Aunbädunk nich aunnämen. Krakjt soo es daut uk vondoag. Wie sellen nich bloos staunthauft bliewen, oba daut uk utem rajchten Senn doonen. Gott es nich bloos doarom todoonen, waut wie doonen, oba uk wuarom wie daut doonen. Fa am es daut sea wichtich, wiels hee well, daut wie am aunbäden sellen, wäajen wie am sea leewen un dankboa sent, waut hee fa ons deit (Spr. 16:2; Mar. 12:29-30).

7. (a) Waut von Trubbel haud de Vesaumlunk en Sardes no Openboarunk 3:1-3 no? (b) Waut mott wie doonen?

⁷ Läs Openboarunk 3:1-3. Wie motten wieda waka bliewen. De Breeda von de Vesaumlunk en Sardes hauden eenen aundren Trubbel. Wan dee uk wieren flietich jewast em jeisteljen, wieren dee daut nu oba nich. Doawäajen säd Jesus to dee, daut dee sullen “oppwakjen”. Waut es de Woarnunk fa ons? Secha woat Jehova kjeenmol vejäten, waut wie fa am jedonen haben (Heb. 6:10). Oba wie kjennen nich denkjen, daut wie Jehova nu nich mea deenen brucken, wäajen wie daut enne Vegonenheit jedonen haben. Wan wie nu veleicht uk nich mea soo väl fa  am doonen kjennen aus ea, mott wie doawäajen wieda drock bliewen en de “Oabeit fa dän Harn” un bat aum Enj waka bliewen (1. Kor. 15:58; Mat. 24:13; Mar. 13:33).

8. Waut lia wie von daut, waut Jesus to de Breeda en Laodizea säd, soo aus daut en Openboarunk 3:15-17 sajcht?

⁸ Läs Openboarunk 3:15-17. Wie motten Jehova flietich un met ons gaunzet Hoat deenen. Jesus siene Norecht aun de Vesaumlunk en Laodizea wiest, daut dee eenen aundren Trubbel hauden. Dee wieren “leiwoam” jeworden en äaren Deenst fa Jehova. Wäajen dee soo jlikjeltich wieren, säd Jesus, daut daut met an “jaumalich” un miseraublich wia. Dee musten Jehova wada sea flietich un met äa gaunzet Hoat deenen (Opb. 3:19). Waut es de Lia fa ons? Wan wie en onsen Deenst nojeloten haben, dan mott wie eene jratre Dankboakjeit kjrieen fa aul daut jeistelje Äten, waut Jehova ons jeft (Opb. 3:18). Wie wudden nienich wellen, daut daut jeistelje bie ons hinjastalich bleef, bloos wäajen wie too sea no een jemieteljet Läwen hinjaraun wieren.

9. Fa waut vonne Jefoaren mott wie oppaussen, soo aus Jesus siene Norechten aun de Vesaumlungen en Pergamon un Tiatira wiesen?

⁹ Wie motten ons nich met de Aufjefolne äare Lieren aufjäwen. Jesus wees eenje en de Vesaumlunk en Pergamon trajcht, wäajen dee Oneenichkjeit mank de Breeda veuasoakten (Opb. 2:14-16). Oba hee lowd dee von de Vesaumlunk en Tiatira, waut sikj nich “bat opp dän Grunt met däm Soton aufjejäft” hauden, un rod dee too, sikj faust aun de Woarheit to hoolen (Opb. 2:24-26). Soone Christen, waut schwak jeworden wieren un sikj hauden loten hinjaret Licht fieren von soone Lieren, musten wada omkjieren. Woo es daut vondoag dän Dach? Wie motten ons uk nuscht met de Aufjefolne äare Lieren aufjäwen, waut jäajen Jehova sien denkjen sent. Aufjefolne “jäwen noch väa gottesferchtich to sennen, oba jleewen nich aun siene Krauft” (2. Tim. 3:5). Wan wie deep Gott sien Wuat studieren, dan es daut fa ons leichta, de faulsche Lieren to kjanen un auftowiesen (2. Tim. 3:14-17; Jud. 3-4).

10. Waut lia wie noch von daut, waut Jesus de Vesaumlungen en Pergamon un Tiatira säd?

¹⁰ Wie sellen met kjeene Sort Onmoral to doonen haben un dee uk nich dulden. De Vesaumlungen en Pergamon un Tiatira hauden noch eenen aundren Trubbel. Jesus veuadeeld eenje von dee, wäajen dee daut schwiensche Läwen nich fa schlajcht talden (Opb. 2:14, 20). Waut es de Lia fa ons? Wie  derwen nich denkjen, daut Jehova daut dulden woat, wan wie irjentwaut met Onmoral to doonen haben, mau rajcht, wan wie am uk aul fa väle Joaren jedeent haben un eenje Väarajchten haben (1. Sam. 15:22; 1. Pet. 2:16). Hee velangt von ons, daut wie soo läwen, aus hee daut fa rajcht talt, krakjt endoont woo schwiensch daut Läwen enne Welt woat (Efs. 6:11-13).

11. Waut hab wie bat hia jelieet? (See uk dän Kausten “ De Lieren fa ons”.)

¹¹ Waut hab wie bat hia jelieet? Wie haben jeseenen, daut wie opp onse Aunbädunk achten motten, daut Jehova dee kaun aunnämen. Wan wie irjentwaut doonen, wuaderch hee dee nich mea aunnämen kaun, dan mott wie bosich waut endren un daut wada trajchtstalen (Opb. 2:5, 16; 3:3, 16). Oba Jesus räd noch von waut aundret en siene Norechten aun de Vesaumlungen. Waut wia daut?

12. Waut kjenn wie doavon lieren, waut Jesus to de Breeda en Smierna un Filadelfia säd? (Openboarunk 2:10).

¹² Well wie nu mol een bät de Norechten unjasieekjen, waut Jesus de Vesaumlungen en Smierna un Filadelfia schekjt. Hee säd to de Christen doa, daut see nich sullen Angst haben fa Vefoljunk, wiels see wudden sea beloont woaren, wan see tru bleewen (läs Openboarunk 2:10; 3:10). Waut kjenn wie doavon lieren? Wie motten uk met Vefoljunk räakjnen un reed sennen, staunthauft to bliewen (Mat. 24:9, 13; 2. Kor. 12:10). Wuarom es daut goot, äwa dit notodenkjen?

13-14. Waut haben Gott siene Deena beläft wäajen daut, waut daut en Openboarunk, Kapitel 12 sajcht?

¹³ Daut Buak Openboarunk sajcht, daut Gott siene Deena en de latste Tiet wudden vefolcht woaren – aulsoo en dän “Harn sien Dach”. En daut Kapitel 12 sajcht daut, daut em Himmel een Kjrich utbrakjt, fuaz nodäm daut Gott sien Kjennichrikj doa oppjestalt woat. Michael, aulsoo Jesus Christus, waut wada em Himmel es, kjamft met siene Enjel toop jäajen dän Soton un dän siene beese Enjel (Opb. 12:7-8). Dise Fiend vespälen un woaren vom Himmel no de Ieed jeschmäten, wua dee väl Lieden äwa de Menschen brinjen (Opb. 12:9, 12). Oba waut haft daut met Gott siene Deena to doonen?

¹⁴ De Openboarunk sajcht wieda, waut de Soton dan deit. Wäajen dee nich mea trigj nom Himmel kaun, brukt dee aul siene Krauft, om jäajen de Jesaulwde hia oppe Ieed to kjamfen, waut de Veträda fa Gott sien Kjennichrikj sent un “aun äa Zeichnis fa Jesus fausthoolen” (Opb. 12:17; 2. Kor. 5:20; Efs. 6:19-20). Woo haft dise Profezeiunk sikj erfelt?

15. Wäa stalt de “twee Zeichnisjäwa” väa, wua Openboarunk, Kapitel 11 von rät, un waut wort met dee?

 ¹⁵ De Soton brukt Gott siene Fiend, om jäajen de Jesaulwde Breeda to kjamfen, waut hia oppe Ieed daut Prädichtwoakj leiden deeden. Dise Breeda, waut de Leidunk hauden, stalden de “twee Zeichnisjäwa” väa, waut soo to sajen dootjemoakt worden (Opb. 11:3, 7-11). * Aune 1918 worden acht von dise Breeda faulsch veuadeelt un sullen fa väle Joaren ensetten. Fa Menschen to beseenen, leet daut soo, aus wan de Jesaulwde äa Woakj wia dootjemoakt worden.

16. Waut passieed aune 1919, waut meist nich to jleewen wia, un waut haft de Soton von dan aun wieda jedonen?

¹⁶ De Profezeiunk en Openboarunk, Kapitel 11 säd uk, daut de “twee Zeichnisjäwa” no eene korte Tiet wada wudden toom Läwen komen. Daut wia nich to jleewen, daut dise Profezeiunk sikj en weinja aus een Joa lota erfeld, von dan aus dise Breeda enjestopt worden. Aum Aunfank vonne 1919 kjeemen de jesaulwde Breeda frie, un de Aunkloag, waut se jäajen an hauden, wort lota jestrikjt. De Breeda fungen fuaz wada aun met daut Kjennichrikjswoakj. Oba de Soton hieed doawäajen nich opp, jäajen Jehova siene Deena to kjamfen. Von doa aun haft dee eenen “Wotastroom” von Vefoljunk äwa Gott siene Deena jebrocht (Opb. 12:15). Wie aula motten staunthauft bliewen un Gloowen haben (Opb. 13:10, NW).

17. Waut vonne Help kjrieejen Gott siene Deena, wua see nich met jeräakjent hauden, wan de Soton uk emma wieda jäajen dee kjamfen deed?

¹⁷ En Openboarunk, Kapitel 12 sajcht daut dan, daut Gott sien Volkj wudd von wua Help kjrieen, wua dee nich met jeräakjent hauden. Daut wudd soo sennen, aus wudd “de Ieed . . . dän Stroom” Vefoljunk oppschlucken (Opb. 12:16). Un krakjt daut passieet uk. Eenjet von dän Soton siene Welt, soo aus de Jerechtssachen, haben Gott siene Deena emma wada jeholpen. Jehova siene Deena haben foaken biem Jerecht jewonnen, wuaderch see eenje Moten Frieheiten kjrieejen. Woo haben dee dise Frieheit jebrukt? Dee haben jieda Jeläajenheit utjenuzt, om daut Woakj derchtofieren,  waut Jehova an jejäft haft (1. Kor. 16:9). Waut es bie dit Woakj aules met en?

18. Waut es daut wichtichste Woakj, waut wie en de latste Tiet doonen?

¹⁸ Jesus säd verut, daut siene Deena wudden “daut Evangelium von Gott sien Rikj” prädjen, ea daut Enj kjeem (Mat. 24:14). Dee, waut doa prädjen, kjrieen Help von eenen Enjel, ooda von een deel Enjel, waut “een eewjet Evangelium [haben], dee to prädjen, dee opp de Ieed wonen, daut es, aule Menschen von aule Velkja, Raussen, Stam un Sproaken” (Opb. 14:6).

19. Waut fa eene Norecht motten deejanje, waut Jehova leewen, noch bekauntmoaken?

¹⁹ De goode Norecht von Gott sien Kjennichrikj es nich de eensje Norecht, waut Gott siene Deena woaren bekaunt moaken. Dee motten uk daut Woakj von de Enjel unjastetten, waut en Openboarunk, Kapitel 8 bat 10 beschräwen woat. Dise Enjel moaken miere Ploagen bekaunt, waut äwa deejanje komen, waut Gott sien Kjennichrikj nich aunnämen. Doawäajen haben Jehova siene Zeijen eene Jerechtsbootschoft bekaunt jemoakt, waut soo es aus “Hoagel . . . [un] Fia”, un waut wiest, waut Gott fa de veschiedne Poats von dän Soton siene Welt bestemt haft (Opb. 8:7, 13). De Menschen motten daut weeten, daut daut Enj dicht bie es, daut dee äa Läwen noch endren kjennen, om dän Dach to äwaläwen, wan Gott Jerecht hoolen woat (Zef. 2:2-3). Oba de Menschen wellen dise Norecht nich hieren. Un daut brukt väl Moot, om dise Norecht bekaunttomoaken. Wan de latste Jerechtsbootschoft en de groote Triebsaul woat bekauntjemoakt woaren, woaren de Menschen noch wutja woaren (Opb. 16:21).

20. Äwa waut woa wie en de näakjste beid Artikjels räden?

²⁰ Wie motten ons werkjlich aun daut “Profeeten Wuat” hoolen, wiels wie sent doa met en, wan sikj daut erfelt, waut en daut Buak Openboarunk steit (Opb. 1:3). Oba woo kjenn wie staunthauft bliewen, wan wie vefolcht woaren, un wieda ons bastet jäwen un Moot haben, dise Norecht bekaunttomoaken? Wie woaren derch tweeatlei Krauft kjrieen: Ieeschtens derch daut, waut de Openboarunk äwa Gott siene Fiend sajcht, un tweedens derch de Säajnungen, waut wie kjrieen woaren, wan wie tru bliewen. Äwa dit woa wie en de näakjste beid Artikjels räden.