1. Fa waut motten de Menschen sikj vondoag dän Dach entscheiden?

 VONDOAG dän Dach motten de Menschen sikj fa waut wichtjet entscheiden. Woaren dee sikj opp Jehova siene Sied stalen, waut daut rajcht haft to harschen, ooda woaren dee dän Soton unjastetten, waut Jehova sien groota Jäajna es? Daut jeft kjeenen Meddelsträakj. Doano fa waut dee sikj entscheiden, woaren dee daut eewje Läwen kjrieen ooda nich (Mat. 25:31-33, 46). En “de groote Vefoljunk”, ooda Triebsaul, woaren dee jetieekjent woaren toom äwaläwen ooda toom venicht woaren (Opb. 7:14; 14:9-11; Hes. 9:4, 6).

2. (a) To waut rot Hebräa 10:35-39 ons too? (b) Woo kaun daut Buak Openboarunk ons halpen?

² Läs Hebräa 10:35-39. Wan du die best eenich jeworden, Jehova siene Harschoft to unjastetten, dan hast du eene goode Entscheidunk jemoakt. Nu west du uk aundre halpen, daut dee sikj fa daut rajchte entscheiden. Du kaust daut brucken, waut en daut Buak Openboarunk steit, om dee to halpen. Dit besondre Buak wiest, waut met dee woaren woat, waut sikj jäajen Jehova stalen un waut vonne Säajnungen dee beläwen woaren, waut Jehova siene Harschoft tru unjastetten. Daut es goot, wan wie ons dise Sachen unjastonen. Wan wie daut doonen, woat ons daut halpen, daut wie ons noch sechra sent, Jehova wieda tru to deenen. Un wie kjennen daut uk brucken, om aundre to halpen, de rajchte Entscheidunk to trafen un doabie to bliewen.

3. Von waut woa wie en disen Artikjel räden?

³ En disen Artikjel woa wie äwa dise Froagen räden: Waut woat met dee woaren, waut Gott siene Harschoft tru  unjastetten? Un waut woat met dee passieren, waut sikj entscheiden, daut dunkelroode Tia to unjastetten, wua de Openboarunk von rät?

4. Waut vonne Grupp sach Johanes met Jesus toop em Himmel?

⁴ De Apostel Johanes sitt en siene Vision twee Gruppen, waut Jehova siene Harschoft tru unjastetten un daut eewje Läwen kjrieen. En de ieeschte Grupp wieren 144 000 (Opb. 7:4). Dee sent von de Ieed loosjekoft, om met Jesus toop em Himmel äwa de Ieed to rejieren (Opb. 5:9-10; 14:3-4). Johanes sitt en siene Vision, woo dee met Jesus toop em Himmel opp däm Zions Boajch stonen (Opb. 14:1).

5. Waut woat boolt met de äwaje von de 144 000 passieren?

⁵ Von de Aposteltiet aun sent doa dusende Menschen utjewält worden, om Poat von de 144 000 to sennen (Luk. 12:32; Reem. 8:17). To Johanes wort jesajcht, daut en de latste Tiet nich mea väl wudden von dee oppe Ieed läwen. Dise “äwaje” woaren tolatst daut “Säajel”, ooda daut Stampel, kjrieen, jroz ea de groote Triebsaul aunfangt (Opb. 7:2-3; 12:17). Irjentwanea en de groote Triebsaul woaren dise nom Himmel jenomen woaren, wua de aundre von de 144 000 aul sent. Dee woaren met Jesus toop en Gott sien Kjennichrikj rejieren (Mat. 24:31; Opb. 5:9-10).

6-7. (a) Waut vonne Grupp sach Johanes noch, un waut lia wie äwa dee? (b) Wuarom saul Openboarunk, Kapitel 7 fa de kjliene Häad, uk fa de “[groote] Häad” intressaunt sennen?

⁶ Nodäm daut Johanes de Grupp jeseenen haud, waut em Himmel läwen woaren, sach hee “eene [groote] Häad”. Dee wieren nich soo aus de 144 000, wiels dee hauden eene ontalboare Zol (Opb. 7:9-10). Waut lia wie äwa dee? To Johanes wort jesajcht: “Dit sent dee, dee ut de groote Vefoljunk, [ooda Triebsaul] jekomen sent. Dee haben äare Kjleeda em Bloot vom Laum kloa witt jewoschen” (Opb. 7:14). Nodäm daut dee de groote Triebsaul äwaläft haben, woat dise “[groote] Häad” fa emma met Freiden oppe Ieed läwen kjennen (Psa. 37:9-11, 27-29; Spr. 2:21-22; Opb. 7:16-17).

⁷ Tal wie ons aus Poat von daut, wua daut en Openboarunk, Kapitel 7 von rät, endoont aus wie utjewält sent toom em Himmel läwen ooda oppe Ieed? Wie wudden sellen. Waut fa eene besondre Tiet daut nich woat fa beid Gruppen sennen! Wie woaren sea froo sennen, daut wie ons eenich jeworden sent, Jehova siene Harschoft to unjastetten. Waut lieet ons daut Buak Openboarunk noch äwa de groote Triebsaul? (Mat. 24:21).

8. Woo woat de groote Triebsaul aunfangen, un waut woat daut fa de mieeschte Menschen bedieden?

⁸ Soo aus wie en dän väajen Artikjel jeseenen haben, woat de Politikj boolt jäajen daut groote Babel komen, aulsoo aule faulsche Gloowes oppe Welt (Opb. 17:16-17). Dit woat de Aunfank sennen von de groote Triebsaul. Oba woaren doa dan noch een deel Menschen aunfangen, Jehova to deenen? Nä. Openboarunk, Kapitel 6 wiest, daut daut fa dee, waut Jehova nich deenen, eene schlemme Tiet sennen woat, un daut dee woaren bie de menschelje Rejierungen un de Haundelswelt no Schutz sieekjen, waut met Boaj vejlikj woaren. Wäajen dee nich Gott sien Kjennichrikj unjastetten, woat Jehova dee fa siene Jäajna talen (Luk. 11:23; Opb. 6:15-17).

9. Woo woaren Jehova siene Deena en de groote Triebsaul uttieekjnen, un waut woat dan passieren?

 ⁹ Jehova siene Deena woaren en dise schwoare Tiet von de groote Triebsaul kloa uttieekjnen. Daut woat de eensje Grupp sennen oppe Ieed, waut Jehova deent un nich “daut Tia” unjastett (Opb. 13:14-17). Dit woat Jehova siene Jäajna sea enoajren. Doawäajen woaren de Velkja, waut sikj toopstonen, jäajen Jehova siene Deena oppe gaunze Welt komen. De Schreft sajcht verut, daut dit Gog von Magog sennen woat, waut sien Volkj aunjriepen woat (Hes. 38:14-16).

10. Waut woat Jehova no Openboarunk 19:19-21 no doonen, wan dee sien Volkj aunjriepen?

¹⁰ Waut woat Jehova doonen, wan dee jäajen sien Volkj komen woaren? Hee sajcht: “Miene Wutt [woat] stieen”, ooda oppflaumen (Hes. 38:18, 21-23). Openboarunk, Kapitel 19 wiest, waut doahinja komen woat. Jehova woat sienen Sän schekjen, om siene Deena to beschitzen un siene Fiend to jewennen. Daut woat Jesus toop met siene “Armeeen em Himmel” doonen, aulsoo de true Enjel un de 144 000 (Opb. 17:14; 19:11-15). Woo woat dis Kjrich utkomen? Aule Menschen un Gruppen, waut sikj jäajen Jehova stalen, woaren volstendich venicht woaren! (Läs Openboarunk 19:19-21.)

11. Waut es daut wichtichste, waut enne Openboarunk beschräwen woat?

¹¹ Proow die mol väatostalen, woo daut fa Jehova siene true Deena oppe Ieed sennen woat, wan dee seenen, daut Jehova an jerat haft un aul siene Fiend venicht haft! Waut vonne groote Freid daut nich jäwen woat! Wan dit em Himmel uk aul eene groote Freid sennen woat, daut daut groote Babel venicht es, jeft daut oba noch waut, waut noch eene jratre Freid es (Opb. 19:1-3). Daut es de Kjast von daut Laum. Daut es daut wichtichste, waut en daut Buak Openboarunk beschräwen woat (Opb. 19:6-9).

12. Woo halpt Openboarunk 21:1-2 ons to vestonen, wanea daut Laum Kjast haben woat?

¹² De 144 000 woaren nom Himmel jenomen woaren, jroz ea Harmagedon aunfangt. Oba dan woat noch nich de Tiet sennen, daut de Kjast aunfangt (läs Openboarunk 21:1-2). Wanea woat de Kjast dan sennen? Dee woat no dän Kjrich von Harmagedon sennen, wan aule von Gott siene Fiend woaren venicht sennen (Psa. 45:4-5, 14-18).

13. Waut bediet de Kjast von daut Laum?

¹³ Waut bediet de Kjast von daut Laum? Soo aus eene jeweenelje Kjast eenen Maun un eene Fru veeenicht, soo veeenicht dise biltelje Kjast dän Kjennich Jesus Christus met de 144 000, aulsoo siene “Brut”. Met dit woat de niee Rejierunk enjesäajent, waut fa 1 000 Joa äwa de Ieed rejieren woat (Opb. 20:6).

14-15. Met waut woaren de 144 000 en Openboarunk, Kapitel 21 vejlikjt? (See daut Bilt oppe väaschte Sied.)

¹⁴ En Openboarunk, Kapitel 21 woaren de 144 000 met eene butajeweenlich schmocke Staut vejlikjt, un daut es “daut niee Jerusalem” (Opb. 21:2, 9). Dise Staut haft 12 Gruntsteena un doa bowen sent “daut Laum siene 12 Apostel äare Nomes” jeschräwen. Wuarom wia daut soo besonda fa Johanes? Wiels hee sach sienen Nomen opp eent von dee Steena jeschräwen. Daut wia eene groote Iea! (Opb. 21:10-14; Efs. 2:20).

¹⁵ Dise Staut es met kjeene aundre to  vejlikjen. Dee haft Gaussen von reinet Golt, 12 Puaten von Parlen, de Wenj un de Grunt von aulahaunt diere Steena un es volkomen trajchtjemäten (Opb. 21:15-21). Oba doa fält noch waut! See wie mol, waut Johanes sajcht: “Oba ekj sach doa kjeen Tempel bennen, wiels de aulmajchtjen Gott un Har un daut Laum, sent fa an de Tempel. De Staut haft daut uk nich needich daut de Sonn ooda de Mon doa nenn schienen, wiels Gott siene Harlichkjeit schient doa nenn, un daut Laum es äare Laump” (Opb. 21:22-23). Dee, waut Poat sent von daut niee Jerusalem, woaren met Jehova toop sennen (Heb. 7:27; Opb. 22:3-4). Soo, Jehova un Jesus sent de Tempel en de Staut.

16. Waut woaren de Menschen en daut dusentjoasche Rikj beläwen?

¹⁶ Fa de Jesaulwde es daut waut gaunz besondret, äwa dise Staut notodenkjen. Oba uk fa dee, waut noch mol woaren oppe Ieed läwen, es daut sea intressaunt. En daut dusentjoasche Rikj woat daut niee Jerusalem väl Säajnungen oppe Ieed brinjen. Johanes sach dise Säajnungen soo aus eenen reinen “Stroom von Läwenswota”. Aun beid Sieden von dän Riefa stunden Läwesbeem, un dee äare Bläda “deenden de Velkja to de Jesuntheit” (Opb. 22:1-2). Aule Menschen, waut dan läwen woaren, woat aul dit togood komen. Un aule, waut Jehova jehorchen woaren, woaren soo bie sacht volkomen woaren. Doa woat daut kjeene Krankheiten, kjeene Weedoag un kjeene Truatronen mea jäwen (Opb. 21:3-5).

17. No Openboarunk 20:11-13 no, wäm woat daut dusentjoasche Rikj togood komen?

¹⁷ Wäm woaren aul dise besondre Säajnungen togood komen? De ieeschte, waut daut togood kjemt, es de groote Häad, waut Harmagedon äwaläft haft, un uk de Kjinja, waut en de niee Welt woomäajlich jebuaren woaren. Oba Openboarunk, Kapitel 20 vesprakjt uk, daut daut woat een Oppstonen von de Doodes jäwen (läs Openboarunk 20:11-13). True “jerajchte”, waut aul jestorwen sent, un uk de “ojjerajchte”, waut nich de Jeläajenheit hauden, Jehova kjanen to lieren, aus see noch läwden, woaren hia oppe Ieed wada toom Läwen komen (Apj. 24:15; Joh. 5:28-29). Bediet daut nu, daut aule Menschen woaren oppstonen en daut dusentjoasche Rikj? Nä. Deejanje, waut mootwellens  nich de Jeläajenheit woaneemen, Jehova to deenen, aus see noch aum Läwen wieren, woaren nich oppstonen. Dise hauden aul de Mäajlichkjeit, aus see noch aum Läwen wieren, un weesen, daut see daut nich wieet wieren, em Paradies hia oppe Ieed to läwen (Mat. 25:46; 2. Tess. 1:9; Opb. 17:8; 20:15).

18. Woo woat daut hia oppe Ieed aum Enj von de 1 000 Joa sennen?

¹⁸ Aum Enj von de 1 000 Joa woaren dan aul dee, waut hia oppe Ieed läwen, volkomen sennen. Kjeena woat mea wäajen Adam siene Sind lieden brucken (Reem. 5:12). De Fluch von de Sind, waut Adam aunjerecht haft, woat dan gaunz veschwungen sennen. En disen Senn woaren aul dee hia oppe Ieed wada “toom Läwen” jekomen sennen, wäajen dee aum Enj von de 1 000 Joa dan volkomen sent (Opb. 20:5).

19. Wuarom mott daut noch eene latste Proow jäwen?

¹⁹ Wie weeten, daut Jesus Gott tru bleef, wan de Soton am uk vesocht. Oba woaren aule volkomne Menschen daut uk doonen, wan de Soton woat de Jeläajenheit kjrieen, dee to vesieekjen? Jieda eena kaun daut selfst bewiesen, wan de Soton aum Enj von de 1 000 Joa woat utem Aufgrunt rutjeloten woaren (Opb. 20:7). Deejanje, waut dise latste Proow tru bliewen, woaren daut eewje Läwen kjrieen, un werkjlich frie sennen (Reem. 8:21). Oba dee, waut sikj jäajen Gott stalen, woaren met dän Soton un siene beese Jeista toop fa eewich venicht woaren (Opb. 20:8-10).

20. Woo denkjst du äwa de besondre Profezeiungen en daut Buak Openboarunk?

²⁰ Woo feelst du die, nodäm daut wie daut Buak Openboarunk een bät unjasocht haben? Es daut nich waut sea scheenet, to seenen, daut wie bie dise besondre Profezeiungen uk met en sent? Brinjt ons daut nich bat doa, aundre daut uk to sajen, daut dee kjennen met ons toop Gott rajcht aunbäden? (Opb. 22:17). Nu, daut onse Jedanken un Hoat voll von dise Sachen sent, well wie secha uk daut sajen, waut de Apostel Johanes säd: “Amen, jo komm, Har Jesus!” (Opb. 22:20.)