20. ARTIKJEL FA DAUT STUDIUM
Waut woat no Openboarunk no met Gott siene Fiend woaren?
“See saumelden dee opp dän Plauz toop, dee opp hebräisch Harmagedon heet” (OPB. 16:16)
LEET 150 Sieekjt Gott, daut jie jerat woaren
WAUT WIE SEENEN WOAREN *
1. Waut sajcht daut Buak Openboarunk äwa Jehova siene Deena?
DAUT Buak Openboarunk sajcht, daut Gott sien Kjennichrikj aul es em Himmel oppjestalt un daut de Soton es vom Himmel no de Ieed jeschmäten worden (Opb. 12:1-9). Doaderch jeef daut em Himmel Fräd, oba daut brocht väl Trubbels fa ons hia oppe Ieed. Wuarom? Wäajen de Soton sea doll es un jäajen Jehova siene true Deena hia oppe Ieed kjamfen deit (Opb. 12:12, 15, 17).
2. Waut woat ons halpen, staunthauft to bliewen?
2 Woo kjenn wie staunthauft bliewen, wan de Soton uk jäajen ons kjamft? (Opb. 13:10). Eent, waut ons halpen woat, es to weeten, waut lota passieren woat. De Apostel Johanes räd biejlikj en de Openboarunk von eenje Säajnungen, waut wie boolt beläwen woaren. Eent von dee es, daut Gott siene Fiend venichten woat. See wie nu mol, waut de Openboarunk äwa dise Fiend sajcht un waut met dee passieren woat.
GOTT SIENE FIEND WOAREN DERCH TIEEKJENS BESCHRÄWEN
3. Woont sent eenje Tieekjens, wua de Openboarunk von rät?
3 De ieeschta Varsch von de Openboarunk sajcht ons, daut daut, waut wie nu läsen woaren, “en Tieekjens” jewäsen woat. Gott siene Fiend woaren aulsoo biltlich beschräwen (Opb. 1:1, NW). Wie woaren von miere wille Tieren läsen. Biejlikj rät daut von een Tia, waut “ut daut Mäa” kjemt, un daut “haud säwen Kjap un tieen Hieena” (Opb. 13:1). No dit Tia kjemt “een aundret Tia ut de Ieed rut”. Daut rät soo aus een Droak un lat “Fia vom Himmel” faulen (Opb. 13:11-13). Dan see wie een aundret, een “dunkelroodet Tia”, wua eene Hua bowen rieden deit. Dise dree wille Tieren stonen fa Fiend, waut aul lang jäajen Jehova Gott un sien Kjennichrikj jekjamft haben. Doawäajen es daut soo wichtich, daut wie vestonen, wäa dise Fiend sent (Opb. 17:1, 3).
VEA GROOTE TIEREN
Dee kjeemen “ut daut Mäa” rut. (Dan. 7:1-8, 15-17) Dee stonen fa de Weltmachten, waut en Daniel siene Tiet aunfungen un väl met Gott sien Volkj to doonen hauden (See Varsch 4, 7)
4-5. Woo halpt Daniel 7:15-17 ons, de Tieekjens von ut de Openboarunk to vestonen?
4 Daut wie weeten kjennen, wäa dise Fiend sent, mott wie vestonen, wäm de wille Tieren un de Hua väastalen. Daut wie daut vestonen kjennen, es daut daut baste, wie loten de Bibel daut selfst utlajen. Välet von daut, wua de Openboarunk von rät, woat aul en aundre Bibelbieekja utjelajcht. De Profeet Daniel haud biejlikj eenen Droom, wua hee sach, daut “vea groote Tieren ut daut Mäa” rutkjeemen (Dan. 7:1-3). Daniel schreef opp, waut dee bedieden. Dise groote Tieren stonen fa vea “Kjennichs”, ooda Rejierungen (läs Daniel 7:15-17). Dit halpt ons to vestonen, daut de Tieren en de Openboarunk uk motten fa Rejierungen stonen.
5 Well wie nu mol äwa eenje Tieekjens von ut de Openboarunk räden. Wie woaren seenen, woo de Bibel ons halpt, dise Tieekjens to vestonen. Wie woaren äwa vea wille Tieren räden un wäm dee väastalen. Wie woaren uk seenen, waut lota met dee passieren woat. Un tolatst woa wie seenen, waut aul daut met ons to doonen haft.
WÄA GOTT SIENE FIEND SENT, WOAT OPENBOAT
DAUT SÄWENKOPJE WILLE TIA
Daut kjemt “ut daut Mäa rut” un haft säwen Kjap, tieen Hieena un tieen Kroonen (Opb. 13:1-4). Daut stalt aule polietische Machten väa, waut noch emma, bat vondoag dän Dach, äwa de Menschen jeharscht haft. De säwen Kjap stalen säwen Weltmachten väa, waut noch emma met Gott sien Volkj to doonen jehaut haben (See Varsch 6-8)
6. Waut es met daut säwenkopje wille Tia en Openboarunk 13:1-4 jemeent?
6 Waut es daut säwenkopje wille Tia? (Läs Openboarunk 13:1-4.) Dit wille Tia lat no eenen Leopard, haft oba Feet aus een Boa, eene Frät aus een Leiw un haft tieen Hieena. Dit sent krakjt dee Poats von de vea wille Tieren, waut en Daniel, Kapitel 7 beschräwen woaren. Oba en de Openboarunk sent daut nich vea veschiedne Tieren, oba een eensjet. Dit Tia stalt nich bloos eene eensje Rejierunk ooda Weltmacht väa, wiels Johanes säd uk, daut et “äwa aule Volkjsstam un Sproaken un Velkja” rejieren deed. Soo, daut mott aulsoo jrata sennen aus bloos eene eensje Rejierunk (Opb. 13:7). Dit wille Tia stalt dan aulsoo aule Rejierungen väa, waut bat nu äwa de Menschheit jeharscht haben (Liera 8:9, NW). *
7. Waut bediet jieda Kopp von daut säwenkopje Tia?
7 Fa waut steit jieda Kopp von de säwen? Doamet halpt ons Openboarunk, Kapitel 17. Doa woat daut Bilt von daut wille Tia beschräwen, waut en Kapitel 13 es. En Openboarunk 17:10 sajcht daut: “Doa sent uk säwen Kjennichs, fief sent jefollen; eena es; un dee aundra saul noch komen; un wan dee kjemt, dee woat mau eene korte Tiet bliewen.” Von aul de Rejierungen oppe Welt, waut de Soton jebrukt haft, wieren säwen besonda. Dee woaren met Kjap vejlikjt, wäajen dee väl Macht hauden. Dit sent de Weltmachten, waut äwa Gott siene Deena jeharscht haben ooda väl met dee to doonen hauden. En de Tiet von dän Apostel Johanes hauden aul fief von dee jeharscht: Ägipten, Assierien, Babel, Medien un Persien, un Griechenlaunt. De saste Weltmacht, aulsoo Room, wia noch aune Macht, aus Johanes de Openboarunk kjrieech. Wäa wudd de säwenda Kopp, ooda de säwende un latste Weltmacht, sennen?
8. Wäa es de säwenda Kopp von daut wille Tia?
8 Wie woaren seenen, daut daut Buak Daniel ons halpt to vestonen, wäa de säwenda Kopp es von daut wille Tia. Waut vonne Weltmacht haft de latste Tiet jeharscht, aulsoo en de Tiet von dän “Harn sien Dach”? (Opb. 1:10, JHF). Daut sent twee majchtje Rejierungen, waut toopschaufen, aulsoo de Weltmacht von Enjlaunt un Stäts. Dit halpt ons to vestonen, daut dit de säwenda Kopp es von daut wille Tia, wua Openboarunk 13:1-4 von rät.
EEN WILLET TIA MET TWEE HIEENA SOO AUS EEN LAUM
Daut kjemt “ut de Ieed rut” un rät “soo aus een Droak.” Daut lat “Fia vom Himmel opp de Ieed faulen” un volbrinjt aus faulscha “Profeet” Tieekjens (Opb. 13:11-15; 16:13; 19:20). Dit Tia, met twee Hieena, stalt de Rejierunk von Enjlaunt un Stäts väa, waut een faulscha Profeet jenant woat un de gaunze Ieed veleit un sajcht, daut dee sellen “een Bilt . . . moaken” von “daut Tia”, waut säwen Kjap un tieen Hieena haft (See Varsch 9)
9. Wäm stalt daut Tia väa met “twee soone Hieena aus een Laum”?
9 En Openboarunk, Kapitel 13 sajcht daut, daut de säwenda Kopp, aulsoo de Weltmacht von Enjlaunt un Stäts, sikj uk soo vehelt aus een willet Tia met “twee soone Hieena aus een Laum, un räd soo aus een Droak.” Dit Tia “deit groote Wundatieekjen, moakt soogoa fa de Menschen to seenen, Fia vom Himmel opp de Ieed faulen” (Opb. 13:11-15). Openboarunk, Kapitel 16 un 19 beschrift dit Tia aus eenen “faulschen Profeet” (Opb. 16:13; 19:20). Daniel rät von biejlikj soont, aus hee sajcht, daut de Weltmacht Enjlaunt un Stäts väl “vedoawen . . . uteewen” wudd (Dan. 8:19, 23-24). Un daut es krakjt daut, waut em Tweeden Weltkjrich passieed. De twee Atomm-Bommen, waut doatoo biedruagen, daut et met dän Tweeden Weltkjrich to Enj jinkj, worden von Forscha jemoakt, waut von Enjlaunt un de Stäts wieren. Doaderch, daut de Weltmacht von Enjlaunt un Stäts dise Atomm-Bommen muak, leeten dee “Fia vom Himmel opp de Ieed faulen.”
EEN DUNKELROODET WILLET TIA
Eene Hua, daut groote Babel, ritt opp dit wille Tia. Dit Tia woat aus een achta Kjennich jetalt (Opb. 17:3-6, 8, 11). Ieeschtlich deit de Hua daut Tia kontrollen, oba lota woat see dan von daut Tia venicht. De Hua stalt aule faulsche Gloowes oppe Welt väa. Daut Tia stalt vondoag dän Dach de Veeende Nazionen (UNO) väa, waut fa de Politikj oppe gaunze Welt stritt (See Varsch 10, 14-17)
10. Fa waut steit “daut Bilt vom ieeschten Tia”? (Openboarunk 13:14-15; 17:3, 8, 11).
10 Daut näakjste rät daut von een willet Tia, waut meist soo es, aus daut säwenkopje wille Tia, bloos, daut es dunkelroot. Dit woat “daut Bilt vom . . . Tia” jenant un woat beschräwen aus een “achta [Kjennich]” (läs Openboarunk 13:14-15; 17:3, 8, 11). * Von disen Kjennich sajcht daut, daut dee verendach kjeem, dan veschwunk un dan wada verendach kjeem. Dit paust sea fein met de Veeende Nazionen (UNO) toop, waut fa de Politikj oppe gaunze Welt strieden deit! Dit wort ea de Velkjabunt jenant. Oba dan veschwunk dee en dän Tweeden Weltkjrich. Lota kjeem dee dan wada verendach aus de Veeende Nazionen.
11. Waut doonen de wille Tieren, ooda Rejierungen, un wuarom woa wie ons nich ferchten brucken?
11 Johanes sajcht, daut “de Kjennichs opp de Ieed äwa de gaunze Welt” doatoo jebrocht woaren, sikj to dän Kjrich von Harmagedon to vesaumlen, “dän aulmajchtjen Gott sien grooten Dach” (Opb. 16:13-14, 16). Daut doonen de wille Tieren, ooda Rejierungen, un dee vesaumlen dee doaderch, daut dee de Menschen tooroden, sikj jäajen Jehova un siene Deena to stalen. Oba wie woaren ons nich ferchten brucken. Ons groota Gott Jehova woat bosich haundlen, om aul deejanje to raden, waut siene Harschoft unjastetten (Hes. 38:21-23).
12. Waut woat met aul de Tieren passieren?
12 Waut woat met aul de Tieren passieren? Openboarunk 19:20 sajcht: “Daut Tia wort faustjenomen, un met am uk de Läajesprofeet, dee om sient haulwen Wundatieekjen jedonen haud, wuaderch hee dee veleid, dee daut Tia sien Tieekjen neemen, un daut Tia sien Bilt aunbäden. Un dee worden beid läwendich en dän Fiasee jeschmäten, dee met Schwäwelblitt brent.” Dise Rejierungen woaren noch fa voll aum harschen sennen, un dan woat Gott dee fa emma venichten.
13. Waut fa Schwierichkjeiten moaken de Rejierungen de Christen?
13 Waut bediet dit fa ons? Aus Christen mott wie Gott un sien Kjennichrikj tru bliewen (Joh. 18:36). Daut wie daut kjennen, mott wie nuscht met de Politikj von dise Welt to doonen haben. Soont kaun sea schwoa sennen, wiels de Rejierungen wellen ons bemotten, daut wie an volstendich unjastetten, derch daut, waut wie sajen un waut wie doonen. Deejanje, waut sikj loten metrieten un de Rejierungen unjastetten, kjrieen daut Tieekjen von daut wille Tia (Opb. 13:16-17). Un deejanje, waut dit Tieekjen haben, woat Jehova veuadeelen un nich daut eewje Läwen jäwen (Opb. 14:9-10; 20:4). Doawäajen es daut soo needich, daut wie ons opp kjeenem siene Sied stalen, krakjt endoont woo sea de Rejierungen ons unja Druck saten, daut wie an unjastetten sellen!
EEN SCHAUNDHAUFTET ENJ FA DE GROOTE HUA
14. Waut sach de Apostel Johanes no Openboarunk 17:3-5 no, wua hee sea vewundat äwa wia?
14 De Apostel Johanes sajcht, daut hee sea vewundat wia äwa daut, waut hee sach. Waut wia daut? Hee sach eene Fru, waut opp eent von de jreselje Tieren rieden deed (Opb. 17:1-2, 6). See es de “groote Hua” un woat “daut groote Babel” jenant. See drift “Huararie” met “de Kjennichs opp de Ieed” (läs Openboarunk 17:3-5).
15-16. Waut es met “daut groote Babel” jemeent, un woo weet wie daut?
15 Wäa es “daut groote Babel”? Dise Fru kaun nich de Politikj väastalen, wiels daut sajcht, daut see met de polietische Harscha soo to sajen Huararie bejeit (Opb. 18:9). Un daut see opp daut wille Tia rieden deit, wiest, daut see vesieekjt, dise Harscha to kontrollen. See kaun uk nich de bejieeje Haundelswelt von dän Soton väastalen, wiels von dee rät daut aul opp eene aundre Städ en de Openboarunk, un dee woaren “de Haundelslied oppe Ieed” jenant (Opb. 18:11, 15-16).
16 En de Schreft woat Ehe bräakjen un Huararie uk fa soone jebrukt, waut väajäwen, Gott to deenen, un to deeselwje Tiet oba aundre Jetta deenen ooda opp eene aundre Wajch proowen, Frind met de Welt to sennen (Hes. 16:2, 35-36; Jak. 4:4, JHF). Oba deejanje, waut Gott tru deenen, woaren en de Schreft aus rein jetalt ooda aus eene “Junkfru” (2. Kor. 11:2, JHF; Opb. 14:4). En daut ieeschtemmasche Babel wort daut mieeschte Aufjettarie jedräwen. Doawäajen mott met daut groote Babel aule Sorten faulsche Aunbädunk jemeent sennen, aulsoo aule faulsche Gloowes oppe gaunze Welt (Opb. 17:5, 18; see dän Artikjel opp jw.org “Wer oder was ist die Hure Babylon?”).
17. Waut woat met daut groote Babel passieren?
17 Waut woat met daut groote Babel passieren? Openboarunk 17:16-17 jeft ons de Auntwuat: “Daut Tia un de tieen Hieena, dee du jeseenen hast, woaren de Hua nich lieden kjennen un ar en de Grunt brinjen, bat see noaktich un vewillat es, un woaren äa Fleesch äten un ar met Fia vebrennen. Wiels Gott haft an daut en daut Hoat jejäft, om sienen Wellen uttofieren”. Daut bediet, Jehova woat de Velkja, ooda Nazionen, daut enjäwen, daut see daut dunkelroode Tia brucken, aulsoo de Veeende Nazionen (UNO), om aule faulsche Gloowes oppe Welt auntojriepen un volstendich to venichten (Opb. 18:21-24).
18. Woo kjenn wie ons secha moaken, daut wie nuscht met daut groote Babel to doonen haben?
18 Waut bediet dit fa ons? Wie motten wieda een Läwen fieren, waut “een reina un ajchta Gottesdeenst ver Gott” es (Jak. 1:27). Wie sellen nienich tooloten, daut de faulsche Lieren un de heidnische Fasten irjentwaut aun ons doonen kjennen. Un wie wellen ons uk nich vonne Welt väasajen loten, waut rajcht un orrajcht es, un nuscht met daut groote Babel äare Hakjsarie to doonen haben. Wie woaren uk wieda to de Menschen sajen, daut dee ut ar rutgonen sellen, soo daut dee aun dee äare Sinden nich metschuldich woaren (Opb. 18:4).
GOTT SIEN JERECHT AUN SIENEN JRATSTEN FIENT
DE ROODA DROAK
De Soton jeft daut wille Tia Macht (Opb. 12:3, 9, 13; 13:4; 20:2, 10). Jehova sien jratsta Fient, de Soton, woat fa 1 000 Joa em Aufgrunt jeschmäten woaren. No daut woat de Soton “em Fia un Schwäwelsee” nenjeschmäten (See Varsch 19-20)
19. Wäa es de “groota, rooda Droak”?
19 Daut Buak Openboarunk sajcht uk, daut doa “een groota, rooda Droak” es (Opb. 12:3). Dis Droak kjamft jäajen Jesus un dän siene Enjel (Opb. 12:7-9). Dee kjamft uk jäajen Gott siene Deena un jeft de menschelje Rejierungen Macht (Opb. 12:17; 13:4). Wäa es dis Droak? Daut es de “oole Schlang, dee de beesa Fient un Soton jenant woat” (Opb. 12:9; 20:2). Hee es deejanja, waut aul dee kontrolt, waut sikj jäajen Jehova stalen.
20. Waut woat met dän Droak passieren?
20 Waut passieet met dän Droak? En Openboarunk 20:1-3 rät daut von eenen Enjel, waut dän Soton en eenen Aufgrunt schmitt, waut fa dän soo es, aus een Jefenkjnis. Wan dee en dit Jefenkjnis sennen woat, dan woat dee nich kjennen “gonen de Velkja veleiden, bat dee 1. 000 Joa äwa” sent. Tolatst woat de Soton met de beese Jeista toop fa emma venicht woaren, waut doamet vejlikjt woat, daut dee en eenen “Fia un Schwäwelsee” jeschmäten woaren (Opb. 20:10). Stalt junt väa, woo daut en eene Welt sennen woat onen dän Soton un de beese Jeista. Woo scheen daut nich sennen woat!
21. Wuarom kjenn wie ons doaräwa freien, waut wie en daut Buak Openboarunk jeläst haben?
21 Daut jeft eenem väl Moot, de Tieekjens von daut Buak Openboarunk to vestonen. Wie haben nich bloos jeseenen, wäa Gott siene Fiend sent, oba uk, waut met dee passieren woat. En Openboarunk 1:3 sajcht daut: “Seelich [ooda schaftich] es dee, dee dit Profeeten Wuat last un uk dee, dee daut hieren”. Oba waut fa Säajnungen woa wie beläwen, wan Gott siene Fiend ieescht venicht haft? Daut woa wie en dän näakjsten Artikjel seenen.
LEET 23 Jehova sien Kjennichrikj rejieet
^ Varsch 5 Daut Buak Openboarunk brukt Tieekjens, daut wie seenen kjennen, wäa Gott siene Fiend sent. Un daut Buak Daniel halpt ons, dise Tieekjens to vestonen. En disen Artikjel woa wie eenje von Daniel siene Profezeiungen met Profezeiungen en daut Buak Openboarunk vejlikjen, waut änlich sent. Daut woat ons halpen, daut wie seenen kjennen, wäa Gott siene Fiend sent. Un wie woaren uk seenen, waut met dee passieren woat.
^ Varsch 6 Daut daut säwenkopje Tia “tieen Hieena” haft, jeft uk auntovestonen, daut et fa aule Rejierungen oppe Welt steit. Daut Numma 10 woat en de Bibel foaken fa waut volstendjet jebrukt.
^ Varsch 10 Daut Bilt von daut ieeschte Tia haft nich “Kroonen” oppe Hieena, soo aus daut wille Tia selfst (Opb. 13:1). Dit es, wäajen daut staumt “von de säwen” aundre Kjennichs un kjricht siene Macht von dee. (See dän Artikjel opp jw.org “Wofür steht das scharlachrote Tier aus Offenbarung 17?”)
