1. Woo beschrift de Bibel de woare Leew?

 DE Leew “äare Flaumen sent een grootet Fia, daut es Jah siene Flaum” (Leet 8:6, NW). b “Daut Fia von de Leew jeit nich ut von een Wota, un Riefasch kjennen daut nich wajch wauschen” (Leet 8:7). Jo, woare Leew es werkjlich waut sea scheenet! Dise Wieed kjennen een Poa Lied uk sea Moot moaken, wäajen daut bediet: Jie kjennen woare Leew haben eena fa dän aundren!

2. Waut motten eene Lied doonen, daut äare Leew emma stoakj blift?

² Eene Lied motten sikj aunstrenjen, wan dee wellen, daut äare Leew daut gaunze Läwen stoakj blift. Well wie daut mol vejlikjen: Een Fia wudd rajcht jesajcht fa emma brennen kjennen – oba doafäa mott eena emma Holt aunlajen. Wan eena daut bloos tochleet, dan wudd daut Fia irjentwanea mol utgonen. Biejlikj soo kaun uk de Leew tweschen eenen Maun un eene Fru fa emma stoakj bliewen – oba doafäa motten dee uk emma waut doonen. Eenje Mol kaun een Poa Lied sikj daut soo späaren, daut äare Leew nolat, besonda wan dee daut knaup jeit, wan dee nich gaunz koasch sent ooda wan dee too drock met de Kjinja sent. Wan du befriet best, waut kaust du dan doonen, om “Jah siene Flaum” en dienen Ehestaunt aum brennen to hoolen? En disen Artikjel woa wie äwa dree Sachen räden, woo jie junen Ehestaunt noch bäta moaken kjennen un daut junt daut scheen jeit. c

3. Woo halpt eene Lied daut, äare Leew stoakj to hoolen, wan dee goode Frind met Jehova sent? (Liera 4:12). (See uk daut Bilt.)

³ Daut dee “Jah siene Flaum” aum brennen hoolen kjennen, motten de Maun uk de Fru emma doaraun schaufen, jratre Frind met Jehova to woaren. Woo halpt an daut en äaren Ehestaunt? Wan beid daut wichtich es, Jehova to jefaulen, dan woaren dee emma reed sennen, sienen Rot notokomen. Daut woat dee halpen, Trubbels, waut äare Leew schoden kunnen, utem Stich to gonen ooda doamet foadich to woaren (läs Liera 4:12). Frind von Jehova proowen am uk notodoonen un soone Ieejenschoften to haben aus hee, soo aus leeftolich sennen, jeduldich sennen un vejäwen (Efs. 4:32 – 5:1). Wan de Maun uk de Fru soone Ieejenschoften haben, dan woaren dee sikj emma dolla no aun feelen. Eene Sesta, waut Lena heet un aul fa äwa 25 Joa befriet es, sajcht: “Daut es verheipts nich schwoa, soonen Mensch to leewen un to respakjten, waut jeistlich jesonnen es.”

4. Wuarom wäld Jehova Josef un Maria ut, daut dee sullen dän Messias siene Elren sennen?

⁴ See wie mol daut Biespel von Josef un Maria. Jehova haud dee utjewält, dän Messias siene Elren to sennen – wan David uk een deel aundre Nokomen haud. Wuarom jroz dee? Na, wäajen dee wieren beid groote Frind met Jehova. Un hee wist, daut daut emma daut ieeschte sennen wudd en äaren Ehestaunt. Waut kjennen de Befriede von Josef un Maria lieren?

5. Waut kjennen Ehemana von Josef lieren?

⁵ Wuarom wia Josef soo een gooda Ehemaun? Wäajen hee daut wellich nokjeem, waut Jehova am säd. Oppet weinichste dree Mol kjrieech hee von Gott Aunwiesungen fa siene Famielje, un jiedat Mol kjeem hee daut fuaz no, mau rajcht wan daut noch waut opp sikj haud (Mat. 1:20, 24; 2:13-15, 19-21). Doaderch kunn Josef Maria beschitzen, ar unjastetten un fa ar sorjen. Waut Josef deed, holp Maria secha, eene groote Leew un deepen Respakjt fa Josef to kjrieen. Jie Ehemana, jie kjennen Josef nodoonen, wan jie enne Bibel no Rot sieekjen, woo jie fa june Famielje sorjen kjennen. d Komt disen Rot dan no, mau rajcht wan daut noch waut opp sikj haft. Soo kjenn jie june Frues groote Leew wiesen un junen Ehestaunt vebätren. Eene Sesta en Vanuatu, waut aul äwa 20 Joa befriet es, sajcht: “Wan mien Maun bie Jehova no Rot sieekjt un daut dan uk deit, dan mott ekj am eefach respakjten. Ekj feel mie dan secha un vetru doaropp, daut hee goode Entscheidungen traft.”

6. Waut kjennen Ehefrues von Maria lieren?

⁶ Maria äa Gloowen wia nich doavon  aufhenjich, waut Josef deed. See wia selfst een gooda Frint met Jehova. See kjand de Schreft sea goot. (See uk de Erkjläarunk toom studieren von Lukas 1:46 en de Studiabibel nwtsty.) See neem sikj uk emma Tiet toom nodenkjen (Luk. 2:19, 51). Wäajen Maria soo jeistlich jesonnen wia, wia see eene feine Ehefru. Bie dise Tiet sent väl Frues soo aus Maria. Eene Sesta, waut Emiko heet, sajcht biejlikj: “Aus ekj noch nich befriet wia, haud ekj mie daut selfst soo enjerecht, daut ekj em jeisteljen aules nokjeem. Oba aus ekj mie ieescht befriet haud, deed mien Maun fa ons bäden un uk daut Famieljenstudium leiden. Dan foll mie opp, daut ekj mie sea doaropp veleet, daut hee daut aules fa ons deed. Ekj wort en, daut ekj selfst doano seenen must, dicht bie Jehova to bliewen. Nu näm ekj mie Tiet, om met mienen Gott auleen to sennen – toom bäden, om de Schreft to läsen un toom doaräwa nodenkjen” (Gal. 6:5). Jie Frues, wan jie noch jratre Frind met Jehova woaren, dan haben june Mana noch mea Uasoak, junt to lowen un junt goot to sennen (Spr. 31:30).

7. Waut kjennen Lied von Josef un Maria lieren äwa Jehova toop aunbäden?

⁷ Josef un Maria deeden oba uk toop waut, om äaren Gloowen to stoakjen. Dee wisten, daut daut sea wichtich wia, daut dee Jehova aus Famielje toop aunbäden deeden (Luk. 2:22-24, 41; 4:16). Daut wia veleicht nich emma leicht, besonda aus de Famielje ieescht jrata wia, oba dee kunnen daut. Dee sent werkjlich een sea goodet Biespel fa Lied! Wan jie, soo aus Josef un Maria, uk Kjinja haben, dan kaun daut noch mol schwoa sennen, bie de Toopkomes to sennen ooda sikj Tiet to nämen fa daut Famieljenstudium. Un daut kunn noch väl schwanda sennen, daut jie junt aus Lied Tiet nämen toom studieren un toop bäden. Oba denkjt emma aun daut: Wan jie Jehova toop aunbäden, dan woa jie Jehova emma noda komen uk junt unjarenaunda. Seet doawäajen doano, daut Jehova deenen daut väaschte bie junt es.

8. Woo kaun eene Lied daut scheen gonen, daut Famieljenstudium to haben, wan dee uk nich goot delenjd komen?

⁸ Waut kjenn jie doonen, wan jie nich goot delenjd komen? Dan hieet sikj daut veleicht nich sea no Scheengonen, daut jie sullen Famieljenstudium haben. Wan junt daut soo jeit, dan fangt doamet aun, een bät waut to studieren, waut jie beid jleichen. Daut kaun junt halpen, daut jie junt wada mea räakjnen un daut jie Jehova toop aunbäden wellen.

9. Wuarom es daut goot, wan Lied Tiet toop vebrinjen?

⁹ Jie kjennen june Leew uk stoakj hoolen, wan jie toop waut doonen. Daut kaun halpen to weeten, woo de Poatna denkjt un woo dee sikj feelt (1. Mo. 2:24). Lilia un Ruslan vetalen, woo an daut jinkj, aus dee noch mau korz befriet wieren. Daut es nu aul äwa 15 Joa trigj. See vetalt: “Wie worden boolt en, daut wie nich soo väl Tiet toop haben wudden, aus wie ons daut jedocht hauden. Wie wieren drock met utschaufen, de Husoabeit un lota uk met de Kjinja. Dan wist wie: Wan wie ons nich wudden Tiet nämen toom toop sennen, dan wudd onse Leew schwaka woaren.”

10. Woo kaun een Poa Lied daut nokomen, waut en Efeesa 5:15-16 steit?

¹⁰ Jie motten daut veleicht goot plonen un junt uzhent Tiet nämen, daut jie kjennen toop sennen (läs Efeesa 5:15-16). Een Brooda en Nigeria, waut Uzondu heet, sajcht: “Wan ekj mie eenen Plon moak,  dan schriew ekj mie daut aul opp, wanea wie aus Lied toop waut doonen wellen, un dise Tiet es fa mie dan eent von daut wichtichste” (Filip. 1:10). Anastasia es met eenen Kjreisoppsechta en Moldawien befriet. See wie mol, woo see äare Tiet daut baste utnuzt. See sajcht: “Ekj proow, miene Sachen dan to doonen, wan mien Maun aulmols drock es. Soo kjenn wie dan lota noch Tiet toop haben.” Oba waut es, wan jie soo drock sent, daut junt meist nich Tiet blift?

11. Waut deeden Aquilla un Priszilla aules toop?

¹¹ Aquilla un Priszilla sent een goodet Väabilt fa Ehelied. Väle von de ieeschte Christen räakjenden dee väl (Reem. 16:3-4). De Bibel sajcht nich väl äwa dee äaren Ehestaunt, oba dee sajcht ons, daut dee een deel toop deeden, biejlikj schaufen, prädjen un aundre halpen (Apj. 18:2-3, 24-26). Emma, wan de Bibel von Aquilla un Priszilla rät, woaren dee beid toop jenant.

12. Waut kjennen eene Lied doonen, daut dee mea Tiet toop haben? (See uk daut Bilt.)

¹² Woo kjennen Lied Aquilla un Priszilla nodoonen? Na, denkj mol aun aul de Sachen, waut du un dien Poatna aulmols doonen motten. Wudd jie waut von dee Sachen nich kjennen toop doonen? Aquilla un Priszilla deeden biejlikj toop prädjen. Doo jie uk pinkjlich toop prädjen? Aquilla un Priszilla deeden uk toop schaufen. Jie woaren veleicht nich deeselwje Oabeit haben, oba wudd jie tus nich eenje Mol kjennen toop schaufen? (Liera 4:9). Wan jie junt unjarenaunda uthalpen, dan woa jie noch bäta toopschaufen un goode Jeläajenheiten haben toom vetalen. Robert un Linda sent aul äwa 50 Joa befriet. Hee sajcht: “Ekj mott sajen, wie sent soo drock, daut wie nich väl Tiet fa Scheengonen haben. Oba wan ekj oppwauschen doo un miene Fru daut Teetich aufdrieejen deit ooda wan ekj buten em Goaden schauf un see dan biesied mie schauft, dan sie ekj schaftich. Wan wie waut toop doonen, dan feel wie ons noch dolla no aun. Onse Leew woat dan bloos noch jrata.”

13. Waut motten Ehelied doonen, wan dee werkjlich veeent sennen wellen?

¹³ Bloos Tiet toop haben meent oba nich onbedinjt, daut de Lied veeent sent. Eene Ehefru en Brasilien sajcht: “Bie dise Tiet sent wie aula soo drock, daut eena denkjen kunn, daut wie aulmols toop sent, wäajen wie toop wonen. Oba daut es lang nich jenuach! Ekj mott uk doarom bekjemmat sennen, waut mienen Maun fält!” Bruno un siene Fru Tays proowen uk, doano to seenen, waut dän aundren fält. Hee sajcht: “Wan wie Tiet toop haben, dan laj wie onse Fons tosied un loten ons onse Tiet toop scheen gonen.”

14. Waut kjennen eene Lied doonen, wan dee daut nich scheen jeit, toop to sennen?

¹⁴ Oba waut, wan junt daut nich scheen  jeit, Tiet toop to haben? Veleicht intressieet junt nich dautselwje ooda die oajat daut mau rajcht, woo dien Poatna daut haft. Waut kjenn jie dan doonen? Denkjt noch Mol aun daut Fia. Daut fangt nich fuaz aun, sea to brennen. Doa motten soo bie sacht emma jratre Bieta Holt aunjelajcht. Bie junen Ehestaunt es daut krakjt soo. Jie wudden kjennen aunfangen, jieda Dach bloos een poa Minuten toop Tiet to vebrinjen. Oba paust opp, daut jie soont doonen, waut junt beid scheen jeit, un nich soont, wua Striet oppkomen kunn (Jak. 3:18). Wan jie sachelkjes emma mea Tiet toop haben, dan woat june Leew wada kjennen jrata woaren.

15. Wuarom es Respakjt en eenen Ehestaunt needich, daut doa wieda Leew es?

¹⁵ Een Ehestaunt schauft bloos dan, wan de Lied sikj omzajcht respakjten. Sikj respakjten es soo, aus wan bie Fia Loft bie kaun. Wan eena een grootet Fia well haben, dan mott eena weiflen, daut et brent, sest jeit daut bosich ut. Krakjt soo es daut uk em Ehestaunt. Wan doa nich Respakjt es, dan woat de Leew bosich noloten. Oba wan dee beid proowen, sikj Respakjt to wiesen, dan doonen dee werkjlich waut, daut äare Leew kaun stoakj bliewen. Vejät oba nich, daut et nich doarom jeit, aus du denkjst, daut du Respakjt wiest, oba väl mea doarom, woo sikj dienen Poatna daut späat! Penny un Aret sent aul äwa 25 Joa befriet. See sajcht: “Wäajen wie ons omzajcht respakjten, es doa Leew bie ons tus. Wie feelen ons frie to sajen, waut wie denkjen, wäajen wie weeten, daut dän aundren daut wichtich es, daut to hieren.” Waut kaust du dan doonen, daut dien Poatna daut werkjlich späaren kaun, daut du am ooda ar respakjten deist? See wie mol daut Biespel von Abraham un Sara.

16. Waut kjennen Ehemana von Abraham lieren? (1. Petrus 3:7). (See uk daut Bilt.)

¹⁶ Abraham jinkj met Sara respakjtvoll om. Hee horcht Sara too un kjikjt uk doano, woo see äwa bestemde Sachen docht. Opp eene Sauz wia Sara sea vetwiewelt, un see leet Abraham daut weeten un jeef am mau rajcht de Schult. Oba säd Abraham ar bloos hunjsch trigj? Nä. Hee kjand Sara un hee wist, daut see am emma unjastett haud un eene feine Fru wia. Abraham horcht ar too un proowd, dän Trubbel to leesen (1. Mo. 16:5-6). Waut lia wie doavon? Mana, jie sent dee, waut enne Famielje de Entscheidungen trafen (1. Kor. 11:3). Oba daut wudd leeftolich sennen, wan jie doano kjikjen wudden, waut june Frues denkjen, ea jie eene Entscheidunk moaken, besonda wan daut uk waut aun an deit (1. Kor. 13:4-5). Un eenje Mol sent Frues veleicht sea unja Druck un dan motten dee veleicht doaräwa räden, woo dee sikj feelen. Doo jie äare Jefeelen dan respakjten  un an oppmoakjsom toohorchen? (Läs 1. Petrus 3:7.) Angela un Dmitry sent aul meist 30 Joa befriet. See vetalt, woo äa Maun daut deit, daut see sikj respakjt feelt: “Dmitry es emma reed, mie tootohorchen, wan ekj doll sie ooda uk wan ekj bloos vetalen well. Hee es jeduldich met mie, mau rajcht dan, wan ekj biem vetalen een bät too sea oppjebrocht sie.”

17. Waut kaun eene Ehefru von Sara lieren? (1. Petrus 3:5-6).

¹⁷ Sara deed Abraham doaderch respakjten, daut see siene Entscheidungen unjastett (1. Mo. 12:5). Opp eene Sauz kjrieejen dee onverhofs Jast, un Abraham neem dee opp. Sara wia secha met irjentwaut drock, oba hee fruach ar, aus see nich kunn schwind een deel Broot baken (1. Mo. 18:6). Un Sara kjeem daut fuaz no! Jie Frues kjennen Sara nodoonen, wan jie de Entscheidungen von june Mana unjastetten. Wan jie daut doonen, kjenn jie junen Ehestaunt vebätren (läs 1. Petrus 3:5-6). Dmitry, von dän wie em väajen Varsch räden, vetalt, woo siene Fru daut deit, daut hee sikj respakjt feelt. Hee sajcht: “Ekj räakjen daut väl, daut Angela doano sitt, daut see miene Entscheidungen unjastett – mau rajcht dan, wan wie nich toopstemmen. Un wan daut nich sea goot utkjemt, schmitt see mie daut oba nich väa.” Daut es leicht, wäm goot to sennen, waut eenem respakjten deit!

18. Woo kjemt Ehelied daut togood, wan dee emma doaraun schaufen, äare Leew stoakj to hoolen?

¹⁸ Vondoag dän Dach well de Soton haben, daut Ehelied sikj nuscht mea räakjnen. Hee weet goot, daut wan doa em Ehestaunt nich mea Leew es, woaren dee veleicht aunfangen, von Jehova auftokomen. Oba woare Leew blift eewich! Mucht june Leew soo sennen aus dee Leew, wua daut en daut Scheenste Leet von rät. Kjikjt doano, daut Jehova en jun Läwen daut väaschte es, un nämt junt Tiet eena fa dän aundren. Habt Respakjt doafäa, woo de aundra sikj feelt un waut dän fält. Wan jie daut doonen, woat jun Ehestaunt Iea opp Jehova brinjen – von dän de woare Leew kjemt! Dan woa jie june Leew krakjt soo aus een Fia fa emma aum brennen hoolen kjennen.