1. Waut well Jehova von siene Deena haben? (See uk daut Bilt.)

 NO WÄM kjenn wie gonen, wan ons Troost un Rot fält? Wie weeten de Auntwuat: Wie kjennen emma to Jehova Gott bäden. Hee well, daut wie daut doonen un uk, daut wie daut foaken doonen, wiels daut sajcht: “Hoolt aun met bäden” (1. Tess. 5:17). Wie kjennen ons frie feelen un am emma no Rot froagen fa irjentwaut en ons Läwen (Spr. 3:5-6). Wäajen Gott soo friejäwrich es, nemt hee sikj emma Tiet, krakjt endoont woo foaken wie to am bäden.

2. Waut woa wie en disen Artikjel seenen?

² Wie räakjnen daut sea väl, daut wie bäden kjennen. Oba wäajen wie emma soo drock sent, finj wie veleicht meist nich de Tiet toom bäden. Wie wellen veleicht uk, daut onse Jebäda mea enhoolen. Oba daut goode es, enne Schreft finj wie een deel Help un Rot en disen Stekj. En disen Artikjel woa wie seenen, woo wie Jesus nodoonen kjennen, waut sikj emma Tiet neem toom bäden. Wie woaren uk seenen, waut wie doonen kjennen, daut onse Jebäda noch mea enhoolen, un doatoo woa wie fief Sachen seenen.

3. Waut wist Jesus äwa de Jebäda?

³ Jesus haud daut selfst beläft, woo väl wieet daut fa Jehova wia, daut wie to am bäden. Aul lang ea hee no de Ieed kjeem, sach hee, woo sien Voda de Jebäda von siene true Deena beauntwuaten deed. Jesus wia doa biejlikj met bie, aus sien Voda de iernste Jebäda von Hana, David, Elia un  uk noch aundre beauntwuaten deed (1. Sam. 1:10-11, 20; 1. Kjen. 19:4-6; Psa. 32:5). Kjeen Wunda, daut Jesus siene Jinja lieed, foaken un met een grootet Vetruen to bäden! (Mat. 7:7-11).

4. Waut lia wie von Jesus äwa daut bäden?

⁴ Jesus jeef siene Jinja een sea goodet Biespel, woo dee bäden kunnen. Aus hee oppe Ieed wia, bäd Jesus foaken. Hee neem sikj uzhent Tiet, wiels hee wia drock un foaken mank Menschen (Mar. 6:31, 45-46). Hee stunt tiedich zemorjes opp, daut hee Tiet haud toom auleen sennen un toom bäden (Mar. 1:35). Opp eene Sauz bäd hee de gaunze Nacht äwa, aus hee sull eene wichtje Entscheidunk moaken (Luk. 6:12-13). Un de Nacht ea Jesus storf, bäd hee foaken, wiels sien latstet Poat von sienen Deenst hia oppe Ieed sea schwoa sennen wudd (Mat. 26:39, 42, 44).

5. Woo kjenn wie Jesus nodoonen, wan daut om daut bäden jeit?

⁵ Aun Jesus kjenn wie seenen, woo wichtich daut es, daut wie ons Tiet nämen toom bäden, krakjt endoont woo drock wie sent. Soo aus Jesus mott wie ons de Tiet nämen, wan wie veleicht uk motten een bät tiedja oppstonen ooda een bät lota schlopen gonen. Wan wie daut doonen, dan wies wie Jehova, daut wie daut väl räakjnen, daut wie bäden kjennen. Eene Sesta, waut Lynne heet, denkjt daut noch, woo väl see daut räakjend, aus see daut lieed, daut see to Jehova bäden kunn. See sajcht: “Aus ekj lieed, daut ekj aulentiet to Jehova bäden kunn, holp mie daut sea, am noch aus eenen jratren Frint to seenen. Un ekj wull miene Jebäda vebätren.” Gaunz secha jeit väle daut soo. Well wie nu mol fief Sachen seenen, waut wie bie onse Jebäda met ennämen kjennen.

6. Waut vedeent Jehova sikj no Openboarunk 4:10-11 no?

⁶ Low Jehova. En eene besondre Vision sach de Apostel Johanes 24 Eltestasch em Himmel, waut Jehova aunbäden deeden. Dee lowden Gott un säden, daut bloos am aule “Harlichkjeit un Iea un Krauft” troff (läs Openboarunk 4:10-11). Mau rajcht de true Enjel haben sea väl Uasoak, Jehova to lowen un to preisen. Wäajen dee met am toop em Himmel sent, haben dee am goot kjanen jelieet. Dee seenen aul daut, waut Jehova deit, un lieren emma mea doaräwa, woo Jehova es. Wäajen see beoobachten  kjennen, woo goot hee aules deit, wellen see am preisen (Hiob 38:4-7).

7. Fa waut kjenn wie Jehova lowen?

⁷ Wie kjennen Jehova en onse Jebäda uk lowen un am sajen, waut wie von am jleichen un schazen. Wan du de Bibel läsen un studieren deist, dan proow, soone Ieejenschoften von Jehova to finjen, waut die sea to Hoaten gonen (Hiob 37:23; Reem. 11:33). Un dan saj Jehova daut, woo du äwa dise Ieejenschoften denkjst. Wie kjennen Jehova uk doafäa lowen, daut hee sikj soo sea om de jeistelje Famielje oppe gaunze Welt kjemmat. Hee sorcht emma fa ons un beschizt ons (1. Sam. 1:27; 2:1-2).

8. Fa waut aules kjenn wie Jehova dankscheen sajen? (1. Tessalonicha 5:18).

⁸ Dank Jehova. Wie haben soo väl Uasoak, Jehova dankscheen to sajen (läs 1. Tessalonicha 5:18). Wie kjennen am dankscheen sajen fa aule goode Sachen, waut wie haben, wäajen aulet goode kjemt von am (Jak. 1:17). Wie kjennen biejlikj dankscheen sajen fa de wundaschmocke Ieed un fa aulet schmocke, waut hee jemoakt haft. Wie kjennen am uk sajen, woo dankboa wie sent fa ons Läwen, fa onse Famielje, fa onse Frind un fa de wundascheene Hopninj. Un wie wellen am uk dankscheen sajen, daut hee daut fa ons mäajlich jemoakt haft, met am Frind to sennen.

9. Wuarom sell wie daut lieren, dankboa to sennen?

⁹ Woomäajlich mott wie ons sea aunstrenjen, doaräwa notodenkjen, woo väl Uasoak wie selfst haben, Jehova dankboa to sennen. De Menschen bie dise Tiet sent sea ondankboa. De mieeschte kjemren sikj nich doarom, woo see äare Dankboakjeit wiesen kjennen; an jeit daut dolla doarom, waut see aules haben wellen. Wan wie wudden aunfangen, soo to denkjen, dan wudden onse Jebäda bloos noch eene gaunze List sennen, von waut wie aules haben wellen. Daut well wie gaunz secha nich! Wie wellen leewa lieren, dankboa to sennen fa aules, waut Jehova fa ons jedonen haft, un daut uk bewiesen (Luk. 6:45).

10. Woo holp de Dankboakjeit eene Sesta, en eene schwoare Loag uttohoolen? (See uk daut Bilt.)

¹⁰ Dankboa to sennen kaun ons halpen, en schwoare Tieden uttohoolen. See wie biejlikj mol daut Biespel von Kyung-sook, waut wie en dän Wachtturm vom 15. Jaunewoa 2015 finjen kjennen. De Doktasch säden ar, daut see Lungenkjräft haud un daut see aul sea krank wia. See säd: “Aus ekj dit enwort, feeld ekj mie sea mootloos. Mie späad sikj daut soo, daut ekj aules veloaren haud, un ekj haud groote Angst.” Waut holp ar, met dise schwoare Loag foadich to woaren? See säd, see jinkj jieda Zeowes verem schlopen gonen opp daut plaute Dak von äa Hus nopp un deed doa bäden. See bäd opp ludes äwa fief Sachen, fa dee see dän Dach dankboa wia. Daut holp ar, nich mea soone groote Angst to haben, un brocht ar bat doa, Jehova  to sajen, daut see am leewd. See haft daut selfst beläft, woo Jehova siene Deena en schwoare Tieden biesteit. Un see wort en, daut doa en ons Läwen emma mea Säajnungen sent aus Schwierichkjeiten. Krakjt soo aus Kyung-sook hab wie uk een deel Uasoak, Jehova dankboa to sennen, mau rajcht wan wie uk jroz waut schwoaret derchmoaken. Wan wie Jehova em Jebäd sajen, fa waut wie aules dankboa sent, kaun ons daut halpen uttohoolen un onse Freid un onsen Fräd to hoolen.

11. Wuarom musten de Jinja äwanäment sennen, nodäm daut Jesus nom Himmel trigjfua?

¹¹ Froag Jehova, daut du kaust biem prädjen äwanäment sennen. Jroz ea Jesus wada trigj nom Himmel fua, holp hee siene Jinja aun de Oppgow denkjen, waut see jekjräajen hauden. See sullen von am Zeichnis jäwen “en Jerusalem, en gaunz Judäa, en Samaria, un äwa de gaunze Welt” (Apj. 1:8; Luk. 24:46-48). Een Stootje lota hauden de judische Gloowesleidasch de Apostel Petrus un Johanes faustjenomen un ver dän Huagen Rot jebrocht. Dee velangden, daut dise true Mana sullen opphieren met prädjen, un dee proowden dee mau rajcht entoenjsten (Apj. 4:18, 21). Waut deeden Petrus un Johanes dan?

12. Waut deeden de Jinja no Aposteljeschicht 4:29, 31 no?

¹² Petrus un Johanes leeten sikj nich enenjsten. Enne Städ daut säden dee to de Gloowesleidasch: “Recht fa junt selfst, auf daut en Gott siene Uagen rajcht es, daut wie mea no junt horchen aus no Gott. Wiels wie kjennen nich aundasch, aus doavon räden, waut wie jehieet un jeseenen haben” (Apj. 4:19-20). Aus Petrus un Johanes ieescht frie wieren, deeden see met de aundre Jinja toop to Jehova bäden, daut see kunnen wieda sienen Wellen doonen. See säden em Jebäd: “Jeff diene Kjnajchts, daut see brow dien Wuat prädjen”. Jehova beauntwuad dit opprechtje Jebäd (läs Aposteljeschicht 4:29, 31).

13. Waut lia wie von Brooda Jin-hyuk?

¹³ Wan de Rejierungen ons daut prädjen aufsajen wellen, dan kjenn wie de Jinja nodoonen un wiedaprädjen. Besee wie ons mol daut Biespel von eenen Brooda, waut Jin-hyuk heet. Hee wort enjestopt, wiels hee nich een Soldot sennen wull. Em Jefenkjnis kjrieech hee de Oppgow, sikj om soone Jefangne to kjemren, waut auleen en eene Stow enjestopt wieren. Hee haud bloos de Frieheit, met an äwa soont to räden, waut an fäld – von sest nuscht, uk nich von de Bibel. Hee bäd, daut hee kunn äwanäment sennen un väasechtich jieda Jeläajenheit utnutzen toom prädjen (Apj. 5:29). Hee sajcht: “Jehova haft miene Jebäda beauntwuat. Hee jeef mie Moot un Weisheit, daut ekj met een deel von dee Jefangne kunn fief-minutsche Bibelstudiums aunfangen. Zeowes schreef ekj dan Breew, waut ekj dee dän näakjsten Dach jeef.” Wie kjennen uk doaropp vetruen, daut Jehova ons halpen woat, wieda to prädjen. Krakjt soo aus Jin-hyuk kjenn wie am no Moot un Weisheit froagen.

14. Waut kaun ons halpen, wan wie met schwoare Loagen foadich woaren motten? (Psalm 37:3, 5).

¹⁴ Froag Jehova no Help, daut du kaust en Schwierichkjeiten uthoolen. Väle von ons motten met Krankheiten foadich woaren ooda sent met de Narfen rauf. Väle haben must wäm begrowen, haben Trubbels enne Famielje, woaren vefolcht ooda dee haben aundre Trubbels. Un wan doa dan noch soone wiet vespreede Krankheiten oppkomen ooda Kjrich, dan woat daut noch schwanda, en soone schwoare Loagen uttohoolen. Waut kaust du dan doonen?  Schedd die ver Jehova ut. Saj am, woo die daut jeit, krakjt soo aus du met eenen gooden Frint doaräwa räden wurscht. Vetru doaropp, daut Jehova die halpen un aules “goot moaken” woat (läs Psalm 37:3, 5).

15. Woo kaun bäden ons halpen, Trubbels jeduldich uttohoolen? Jeff een Biespel.

¹⁵ Wan wie nich opphieren met bäden, woat ons daut halpen, jeduldich to sennen un uttohoolen, wan wie lieden (Reem. 12:12). Jehova weet neiw, waut siene Deena derchmoaken – “hee hieet wan see schrieen” (Psa. 145:18-19). Eene 29-joasche Pionia-Sesta, waut Kristie heet, haft daut selfst beläft. Met een mol haustich wort see krank, un daut brocht ar met de Narfen gaunz rauf. Lota wort see uk noch en, daut äare Mame soone schlemme Krankheit haud, wua see wudd aun stoawen. Kristie sajcht: “Ekj prachad Jehova jieda Dach om Krauft, daut ekj dän Dach kunn derchstonen. Ekj proowd uk wieda, miene jeistelje Jewanheiten notokomen, soo aus no de Toopkomes to wanken un perseenlich to studieren.” Un dan sajcht see noch: “Wan aules rom mie diesta leet, holp bäden mie, wiedatomoaken. Ekj wist, daut Jehova doa wia, un daut jeef mie sea väl Troost. Wan ekj uk noch fa een Stoot Trubbels met de Jesuntheit haud, weet ekj oba, daut Jehova miene Jebäda beauntwuad, wiels hee mie Fräd jeef un mie ruich muak.” Well wie kjeen Mol vejäten, daut Jehova siene true Deena “ut de Vesieekjungen rut raden” kaun (2. Pet. 2:9).

16. Wuarom fält ons daut aun Jehova siene Help toom Vesieekjungen wadastonen?

¹⁶ Froag Jehova no Help, daut du kaust Vesieekjungen wadastonen. Wäajen wie onvolkomen sent, mott wie emma doajäajen schaufen, orrajchtet to doonen. De Soton well ons daut oba noch schwanda moaken. Wan wie ons biejlikj met schwienschet aufjäwen, kaun hee daut brucken, om waut aun ons denkjen to doonen.  Soon Tietvedrief kaun en ons orreine Jedanken oppkomen loten, waut ons ennalich schwiensch moaken un to growe Sinden fieren kjennen (Mar. 7:21-23; Jak. 1:14-15).

17. Waut mott wie doonen, wan wie ieescht jebät haben? (See uk daut Bilt.)

¹⁷ Ons fält daut aun Jehova siene Help, daut wie kjennen de Vesieekjunk wadastonen, soont to doonen, waut orrajcht es. Doawäajen lieed Jesus ons uk soo aus dit bäden: “Brinj ons nich en Vesieekjunk, oba bewoa ons fa dän beesen” (Mat. 6:13). Jehova well ons halpen, oba wie motten am doano froagen. Un waut wie dan doonen, mott uk met onse Jebäda tooppaussen. Wie motten proowen, soo weinich aus mäajlich von soont auntohorchen ooda to läsen, waut voll met dän Soton siene Iedeeen es (Psa. 97:10). Enne Städ daut kjenn wie äwa goode Sachen nodenkjen, doaderch daut wie de Bibel läsen un studieren. Wie kjennen ons denkjen uk beschitzen, wan wie no de Toopkomes wanken un prädjen gonen. Un Jehova vesprakjt ons, daut wie nich schwanda vesocht woaren, aus wie Krauft haben (1. Kor. 10:12-13).

18. Waut mott wie aules doonen, wan daut om bäden jeit?

¹⁸ Wan wie en dise schwoare latste Tiet wellen tru bliewen, es daut onbedinjt needich, daut wie aula soo foaken bäden aus noch kjeen Mol ea. Nemm die aulsoo jieda Dach Tiet, om von Hoaten to bäden. Jehova sajcht mau rajcht: “Schett jun Hoat ver . . . [mie] ut” (Psa. 62:9). Low Jehova un dank am fa aules, waut hee deit. Froag am no Help, daut du kaust äwanäment sennen biem prädjen, met Schwierichkjeiten foadich woaren un Vesieekjungen wadastonen. Lot daut kjeen Mol too, daut irjentwäa ooda irjentwaut die doavon aufhelt, to Jehova to bäden. Oba woo deit Jehova onse Jebäda beauntwuaten? Daut woa wie en dän näakjsten Artikjel seenen.