Rajcht jesajcht kaun vondoag dän Dach kjeena sajen, woo Paulus werkjlich leet. De Bilda en onse Bieekja sent soo, aus de Mola sikj dän väastalen, wiels de Jeschichtsforscha nich weeten, woo dän krakjt leet.

Oba daut jeft eenje Beschriewungen, woo Paulus kunn jeloten haben. En Zion’s Watch Tower vom 1. Moaz 1902 sajcht daut biejlikj: “Woo leet Paulus? . . . En de Jeschichten ‘Akten des Paulus und der Thekla’, . . . waut ojjefäa 150 n. Chr. jeschräwen worden, es Paulus woomäajlich daut baste beschräwen un uk soo, aus väle jleewen, daut dän kunn jeloten haben. Doa sajcht daut, hee wia nat von Jewauss, kolkoppich, haud een bät kromme Been, wia forsch, haud breede Uagenbronen un een bät eene lange Näs.”

Daut Buak The Oxford Dictionary of the Christian Church (Utgow von 1997) sajcht äwa dise oole Jeschichten: “Daut kaun leicht sennen, daut jewesset werkjlich soo es, aus daut en de ‘Akten’ steit.” Daut de Akten des Paulus und der Thekla ieeschtemma huach aunjeseenen wieren, es doaraun to seenen, daut et von dee 80 griechische Aufschreften jeft un uk Utgowen opp aundre Sproaken. Doawäajen paussen de Bilda en onse Bieekja met eenje Beschriewungen von ieeschtemma toop, woo dän Apostel Paulus mucht jeloten haben.

Daut es uk goot, doaraun to denkjen, daut et nich daut wichtichste es, woo Paulus leet. Mau rajcht aus Paulus noch sienen Deenst derchfieed, räden eenje, waut fleeschlich jesonnen wieren, jäajen am un säden: “Wan hee selfst doa es, sitt hee schwak ut un sien räden meent nich väl” (2. Kor. 10:10). Oba wie weeten je, daut dee een Christ wort, wiels Jesus sikj von dän leet derch een Wunda seenen. Un denkj wie mol doaraun, waut Paulus aules doonen kunn, wäajen Jesus sikj dän toom “Hauntlanga”, ooda Helpa, wäld toom sienen “Nomen ver de Velkja . . . brinjen” (Apj. 9:3-5, 15; 22:6-8). Un woo väl goodet kjenn wie nich ut de Bibelbieekja lieren, waut Jehova von Paulus oppschriewen leet!

Paulus deed sikj nich groot met daut, waut hee tostaund jebrocht haud, ea hee een Christ wort, un hee beschreef uk nich, woo am sach (Apj. 26:4-5; Filip. 3:4-6). Hee säd: “Ekj sie de jerinjsta von de Apostel un sie daut nich wieet, een Apostel jenant to woaren” (1. Kor. 15:9). Un lota schreef hee: “Wan ekj uk de jerinjsta von aule Heilje sie, mie es dise Jnod jeschonken worden, de Velkja daut Evangelium to prädjen, daut doa väl rikja es aus sikj irjentwäa denkjen kaun” (Efs. 3:8). Dit Evangelium es secha väl wichtja, aus sikj doamet auftojäwen, woo Paulus mucht jeloten haben.