1. Waut sajcht de Schreft äwa trajchtwiesen?

WAN du de Wieed “belieren” ooda “trajchtwiesen” hieescht, aun waut denkjst du dan? Veleicht denkjst du fuaz aun strofen, oba doa es noch väl mea met en. De Schreft wiest, daut et goot fa ons es, wan wie trajchtjewäsen woaren, un dee sajcht eenjemol uk, daut trajchtwiesen met Vestentnis, Weisheit, Leew un Läwen to doonen haft (Spr. 1:2-3, NW; 1:4-7; 4:11-13). Wan Gott ons trajchtwiest, dan es daut, wäajen hee ons leeft un wäajen hee well, daut wie daut eewje Läwen kjrieen (Heb. 12:6). Eenjemol es doa uk Strof met en, oba hee deit daut kjeenmol too hunjsch ooda grausom. Un jeweenlich bediet je “trajchtwiesen” uk, daut eena waut lieren saul – krakjt soo aus leeftolje Elren äare Kjinja belieren.

2-3. Waut kaun doa aules met en sennen, wan wäa trajchtjewäsen woat? Laj daut ut. (See daut Bilt aum Aunfank.)

² Well wie mol een Biespel seenen: Een kjliena Jung, waut Johnny heet, spält bennen metem Baul. Siene Mame sajcht to am: “Jung, du weetst je, daut du bennen nich saust metem Baul spälen! Doa kaun waut tweikjielen.” Oba hee horcht nich no siene Mame un spält wieda un dan kjielt hee eenen Bloomentopp  twei. Waut deit de Mame nu? See wiest am trajcht. Doa kaun lieren uk strofen met en sennen. Wan see dän lieet, dan halpt see dän denkjen, wuarom daut orrajcht wia, waut hee deed. See well, daut hee vesteit, daut et toom gooden es to jehorchen, un daut de Räajlen needich un rajcht sent, waut de Elren oppstalen. Un toom wiesen, daut see daut iernst meent, woat see am veleicht noch strofen. Biejlikj kunn see Johnny fa een Stootje dän Baul fuatnämen. Soo kaun dee lieren, daut et schlajcht utkjemt, wan eena nich jehuarsom es.

³ Aus Christen jehia wie to Gott sienen Hushault (1. Tim. 3:15). Doawäajen haft ons Voda Jehova daut Rajcht, ons to sajen, waut goot un schlajcht es, un kaun ons uk ut Leew trajchtwiesen, wan wie am nich jehorchen. Un wan wie waut doonen un daut dan schlajchte Foljen haft ooda wie eene Strof kjrieen, dan halpt Jehova ons doaderch denkjen, woo wichtich daut es, no am to horchen (Gal. 6:7). Gott es sea bekjemmat om ons un well nich, daut wie lieden (1. Pet. 5:6-7).

4. (a) Woone Belierunk säajent Jehova? (b) Waut woa wie en disen Artikjel derchnämen?

⁴ Wan wie ons Kjint ooda Bibelstudium soo belieren, aus de Schreft daut sajcht, dan kjenn wie dee halpen bat doa to komen, daut dee Jesus nofoljen. Gott sien Wuat es onse baste Help toom wäm utlieren un “unjarechten, woo rajcht to läwen”. Daut kaun ons Kjint ooda Bibelstudium halpen, aules to vestonen un to doonen, waut Jesus befolen haft (2. Tim. 3:16; Mat. 28:19-20). Soone Belierunk säajent Jehova, un soo kjennen deejanje lota uk aundre halpen, Jesus notofoljen (läs Titus 2:11-14). Well wie nu mol dree wichtje Froagen derchnämen: 1. Wuarom es daut een Bewies von Gott siene Leew, daut hee ons trajchtwiest? 2. Waut kjenn wie von soone lieren, waut en de Vegonenheit von Gott trajchtjewäsen worden? 3. Woo kjenn wie Jehova un sienen Sän nodoonen, wan wie wäm trajchtwiesen?

5. Woo jeit Jehova met ons om, wan hee ons trajchtwiest, un wuarom?

⁵ Jehova lieet ons un wiest ons trajcht, wiels hee ons leeft un well, daut wie en siene Leew bliewen un noch mol eewich läwen kjennen (1. Joh. 4:16). Hee rät newers too hunjsch met ons ooda soo, daut wie ons nuscht wieet feelen (Spr. 12:18). Enne Städ daut kjikjt Jehova no onse goode Sieden. Hee bemott ons uk nich, daut rajchte to doonen. Tal wie daut aus eenen Bewies fa Gott siene Leew, wan hee ons derch sien Wuat, derch onse Bieekja, onse Elren ooda Eltestasch trajchtwiest? Wan wie ons vesindicht haben un daut veleicht nich mol enjeworden sent un de Eltestasch ons dan leeftolich trajchthalpen wellen, dan es daut werkjlich een Bewies von Jehova siene Leew (Gal. 6:1).

6. Es daut uk een Bewies fa Gott siene Leew, wan wäa trajchtjewäsen woat un dan jewesse Oppgowen nich mea doonen kaun? Laj daut ut.

⁶ Biem trajchtwiesen es eenjemol mea met en aus bloos Rot kjrieen. Wan wäa eene schwoare Sind begonen haft, dan kaun dee jewesse Oppgowen en de Vesaumlunk nich mea doonen. Oba mau rajcht daut es een Bewies von Gott siene Leew. Wan eena biejlikj een Aumt velist, dan kaun dee enwoaren, woo wichtich daut es, sikj mea Tiet to nämen toom Bibel studieren, nodenkjen un bäden. Doaderch kaun dee em Gloowen stoakja woaren (Psa. 19:8). Met de Tiet kjricht dee sien Aumt ooda siene Oppgowen veleicht wada trigj. Mau rajcht de Utschluss es een Bewies fa Jehova siene Leew, wiels daut schizt de Vesaumlunk fa  schlajchtet (1. Kor. 5:6-7, 11). Gott deit emma met Mot trajchtwiesen. Wan wäa utjeschloten woat, kaun dän daut halpen to vestonen, woo iernst siene Sind wia, un kaun am bat doa brinjen, omtokjieren (Apj. 3:19).

7. Wäa wia Schebna, un woo wort hee met de Tiet?

⁷ Toom vestonen woo wieetvoll daut es, wan Jehova wäm trajchtwiest, woa wie mol twee Biespels seenen: Schebna, waut en de Tiet von dän Kjennich Hiskia läwd, un Graham, een Brooda von onse Tiet. Schebna wia “de Äwasechta fa däm Paulaust”, woomäajlich Hiskia sien Paulaust, un haud väl Macht (Jes. 22:15). Oba hee wort stolt un wull von aundre jeieet woaren. Hee leet sikj mau rajcht een groosoatjet Grauf moaken un fua met “straume Kjrichswoages” (Jes. 22:16-18).

8. Woo wees Jehova Schebna trajcht, un waut kjeem doabie rut?

⁸ Wäajen Schebna no siene ieejne Iea sträwd, deed Gott am ut sien “Aumt rutschmieten” un jeef Eljakim daut (Jes. 22:19-21). Dit passieed, aus de assierischa Kjennich Sanherib jeräakjent haud, Jerusalem entonämen. Lota schekjt Sanherib Huachbeaumte met een deel Soldoten toop no Jerusalem, om de Juden entoenjsten un Hiskia bat doa to brinjen, sikj hantojäwen (2. Kjen. 18:17-25). Hiskia schekjt Eljakim toom met de Beaumte räden un dee jinkj noch met twee aundre toop. Eena von dee wia Schebna, waut nu een Schriewa wia. Kunn dit nich auntovestonen jäwen, daut Schebna sikj nich haud vebetren loten ooda doll wort, oba deemootich met een läajret Aumt tofräd wia? Well wie mol dreeatlei seenen, waut wie von dise Jeschicht lieren kjennen.

9-11. (a) Waut kjenn wie von Schebna siene Jeschicht lieren? (b) Woo denkjst du doaräwa, woo Jehova Schebna behaundeld?

⁹ Daut ieeschte es, daut Schebna sien Aumt velua. Daut wiest ons: “Wäa stolt es, jeit en de Grunt, un huachnäsich sennen kjemt ver däm faulen” (Spr. 16:18). Bliew wie deemootich, wan wie besondre Oppgowen en de Vesaumlunk haben un aundre ons veleicht jewesse Iea jäwen? Jäw wie Jehova de Iea fa aules, waut wie tostaund brinjen ooda doonen kjennen? (1. Kor. 4:7). De Apostel Paulus schreef: “Ekj [saj] junt, een jieda eenem, denkjt von junt nich mea aus jie werkjlich sent” (Reem. 12:3).

¹⁰ Daut tweede es, daut Jehova Schebna veleicht doawäajen strenjen Rot jeef, wiels hee hopt, daut Schebna sikj endren wudd (Spr. 3:11-12). Es daut nich eene goode Lia  fa soone, waut eene besondre Oppgow en de Vesaumlunk velieren? Enne Städ doll ooda beleidicht to sennen, kjennen dee Jehova wieda soo goot aus mäajlich deenen un doaraun denkjen, daut Jehova an ut Leew trajchtwees. Ons himlischa Voda woat nich jleewen, daut fa ons kjeene Rot mea es, wan wie deemootich sent (läs 1. Petrus 5:6-7). Doaderch, daut Jehova ons leeftolich trajchtwiest, formt dee ons un wie wellen ons uk formen loten.

¹¹ Daut dredde es, daut wie väl von daut lieren kjennen, woo Jehova met Schebna omjinkj. Jehova haust de Sind, oba hee es doawäajen om dänjanjen bekjemmat, waut jesindicht haft. Wan du diene Kjinja trajchtwiesen deist ooda een Eltesta best un wäm trajchtwiest, woascht du dan krakjt soo jesonnen sennen aus Jehova un bie deejanje uk no daut goode kjikjen? (Jud. 22-23).

12-14. (a) Waut doonen eenje, wan dee von Gott trajchtjewäsen woaren? (b) Woo holp de Schreft eenen Brooda, siene Enstalunk to endren, un woo kjeem daut ut?

¹² Eenje feelen sikj soo schlajcht doaräwa, wan see trajchtjewäsen woaren, daut see sikj doawäajen von Gott un von de Vesaumlunk trigjtrakjen (Heb. 3:12-13). Bediet daut dan, daut dee aul nich to halpen jeit? See wie mol, woo Graham daut jinkj. Dee wort utjeschloten un lota wada oppjenomen, oba dan hieed dee opp met prädjen un kjeem nich mea no de Vesaumlunk. Eenje Joa lota wort een Eltesta Frint met am un Graham fruach dän, aus hee nich wull met am de Bibel studieren.

¹³ De Eltesta vetald: “Graham wia stolt. Hee grunzt äwa de Eltestasch, waut am mol utjeschloten hauden. Doawäajen studieed wie de näakjste poa Mol von Bibelvarzh, waut sikj von stolt sennen haundelden un waut doabie rutkjeem. Gott sien Wuat wia soo aus een Spieejel, wua Graham sikj selfst seenen kunn, un hee jleicht daut nich, waut hee sach. Daut wia nich to jleewen, waut daut aun am deed! Hee wort en, daut sien stolt sennen soo aus een Baulkjen wia, waut am blint muak, un daut sien jratsta Trubbel siene schlajchte Enstalunk wia. Dan funk hee sikj bosich aun to vebätren: Hee kjeem wada pinkjlich no de Toopkomes, studieed flietich Gott sien Wuat un wand sikj daut aun, jieda Dach to bäden. Un hee jinkj uk siene Famielje em jeisteljen veropp un daut freid siene Fru un Kjinja sea” (Luk. 6:41-42; Jak. 1:23-25).

¹⁴ De Eltesta säd wieda: “Eenen Dach säd Graham waut to mie, waut mie sea to Hoaten jinkj. Hee säd: ‘Ekj hab de Woarheit aul fa Joaren jekjant un ekj wia mau rajcht Pionia. Oba nu kaun ekj toom ieeschte Mol sajen, daut ekj Jehova werkjlich leew.’ Daut dieed nich lang, dan wort am jefroacht, aus hee nich wudd bie de Toopkomes met de Mikrofoons halpen wellen. Dise Oppgow wia am väl wieet. Graham sien Biespel lieed mie, daut een Mensch sea jesäajent woat, wan dee deemootich es un sikj von Gott trajchtwiesen lat.”

15. Waut mott wie doonen, daut aundre daut to Hoaten jeit, wan wie dee trajchtwiesen?

¹⁵ Toom aundre fein lieren mott eena ieescht selfst lieren (1. Tim. 4:15-16). Dee, waut Jehova de Veauntwuatunk jejäft haft, aundre to belieren, motten selfst reed sennen, sikj von Jehova leiden to loten. Wan aundre seenen, daut dee deemootich sent, dan woaren see dee mea achten un dee woaren daut leichta aunnämen, wan dee Rot kjrieen ooda trajchtjewäsen woaren. Jesus es een goodet Väabilt.

16. Waut kjenn wie von Jesus lieren, wan wie aundre belieren ooda trajchtwiesen?

¹⁶ Jesus horcht emma no sienen Voda un  mau rajcht dan, wan daut uk sea schwoa wia (Mat. 26:39). Hee muak emma kloa, daut siene Lia un Weisheit von Jehova kjeemen (Joh. 5:19, 30). Jesus wia deemootich un jehuarsom. Daut holp am, Metleet to haben un een feina Liera to sennen un daut trock de opprechtje Menschen no am (läs Lukas 4:22). Siene leeftolje Wieed jinjen soone to Hoaten, waut soo mootloos ooda schwak wieren aus een enjekjnekjtet Rua ooda een Licht, waut meist utjinkj (Mat. 12:20). Mau rajcht wan Jesus Uasoak haud doll to woaren, bleef hee jeduldich un leeftolich. Daut wia to seenen, aus hee siene Apostel trajchtwees, wäajen dee aufjenstich wieren un bloos fa sikj streeden (Mar. 9:33-37; Luk. 22:24-27).

17. Waut woat de Eltestasch halpen, fa Gott siene Häad to sorjen?

¹⁷ Wan Eltestasch wäm met de Schreft belieren, dan sellen dee Christus sien Biespel nodoonen, waut daut Haupt von de Vesaumlunk es. Doamet wiesen dee, daut dee sikj von Gott un sienen Sän wellen formen loten. De Apostel Petrus schreef: “Sorcht fa Gott siene Häad, äwa dee hee junt jesat haft, nich jedwungen, doot daut jieren, nich ut Jewennsucht, oba leeftolich, aus een Deenst fa dän Harn. Jie sellen uk nich too strenj äwa de Häad sennen. See sellen aun junt seenen kjennen, woo see läwen sellen” (1. Pet. 5:2-4). Wan Eltestasch Gott un Christus wellich unjadon sent, dan es dee daut selfst toom gooden un uk dee, äwa dee see aunjestalt sent (Jes. 32:1-2, 17-18).

18. (a) Waut velangt Jehova von de Elren? (b) Woo halpt Gott Elren, äare Veauntwuatunk notokomen?

¹⁸ Woo es daut met trajchtwiesen un belieren en de Famielje? Jehova sajcht to dee, waut daut Haupt von de Famielje sent: “Vezoajcht june Kjinja nich. Trakjt dee christlich opp un doot dee em christlichen Senn trajchtwiesen” (Efs. 6:4). Woo wichtich es daut? Spricha 19:18 sajcht: “Belia dienen Sän soo lang aus doa Hopninj es daut hee lieren woat; wan du daut nich deist, halpst du am sikj selfst en de Grunt to brinjen.” Wan christelje Elren äare Kjinja nich trajchtwiesen, dan motten dee Jehova doafäa Räakjenschoft aufjäwen (1. Sam. 3:12-14). Jehova jeft Elren de needje Weisheit un Krauft, wan see am deemootich un iernstlich doarom bäden un sikj opp sien Wuat un sienen heiljen Jeist veloten (läs Jakobus 1:5).

19-20. (a) Woo woa wie jesäajent, wan wie ons loten von Gott trajchtwiesen? (b) Waut woa wie en dän näakjsten Artikjel seenen?

¹⁹ Wan wie ons loten von Jehova trajchtwiesen un wan wie am un Jesus nodoonen, wan wie aundre trajchtwiesen, dan woa wie soo sea jesäajent woaren, daut et nich mol to talen jeit. Biejlikj woat doa nu aul en de Famielje un en de Vesaumlunk Fräd sennen un aule woaren sikj secha un väl wieet feelen. Un lota woa wie noch väl mea Freid un Fräd haben (Psa. 72:7). Jehova es ons Voda un hee deit ons doawäajen belieren un trajchtwiesen, daut wie noch mol fa emma kjennen aus Famielje en Fräd un Eenichkjeit toopläwen (läs Jesaja 11:9). Wan wie dit em Denkj hoolen, dan woa wie vestonen, daut Gott ons trajchtwiest, wiels hee ons leeft.

²⁰ En dän näakjsten Artikjel woa wie noch mea seenen äwa belieren un trajchtwiesen en de Famielje un en de Vesaumlunk. Wie woaren uk seenen, woo wie ons selfst belieren kjennen un daut et noch waut väl schlemret jeft aus trajchtjewäsen to woaren.