1. Waut kjennen de junge Breeda doonen?

JIE junge Breeda, jie sent sea väl wieet fa de Vesaumlunk. Väle von junt sent noch stoakj un haben väl Krauft (Spr. 20:29). Jie doonen väl fa de Gloowesbreeda. Veleicht denkj jie doaraun, daut jie mol wellen Deenstaumthelpa woaren. Oba veleicht jleew jie, daut de aundre denkjen, daut jie noch too weinich Erfoarunk haben ooda noch too junk sent. Jie kjennen nu oba aul waut doonen, daut de aundre von de Vesaumlunk junt vetruen un respakjten.

2. Waut woa wie en disen Artikjel seenen?

² En disen Artikjel woa wie seenen, waut de Kjennich David beläwd. Un wie woaren ons uk unjastonen, waut twee Kjennichs von Juda, Asa un Joschafat, beläwden. Wie woaren seenen, waut dee fa Schwierichkjeiten hauden un woo dee doamet omjinjen un waut de junge Breeda von dee lieren kjennen.

3. Woo kjennen de junge Breeda de Elre von de Vesaumlunk halpen?

³ David wia Jehova sien Frint un lieed sikj waut, waut aundre sea holp. Aus Jugentlicha lieed hee sikj emma bäta Musikj spälen, waut dän Kjennich Saul holp, dän Gott aunjestalt haud (1. Sam. 16:16, 23). Vesto jie junt met waut, waut aundre von de Vesaumlunk halpen kaun? Bie väle es daut soo. Biejlikj eenje Elre räakjnen daut sea  väl, wan jie an wiesen, woo see met äa Tablet, Fon ooda Komputa waut studieren ooda sikj fa de Toopkomes reedmoaken kjennen. Dee kjemt daut sea togood, waut jie jelieet haben.

4. Woo kjennen junge Breeda David nodoonen? (See daut Bilt oppe väaschte Sied.)

⁴ David bewees daut jieda Dach, daut opp am to veloten wia. Aus hee junk wia, paust hee biejlikj sea no sienen Voda siene Schop opp, wan daut uk eenjemol jefäadlich wia. Lota säd David to dän Kjennich Saul: “Aus ekj mienen Voda siene Schop heeden deed, kjeemen doa han un wada een Leiw ooda een Boa om een Laum to nämen. Dan jinkj ekj dee hinjaraun, kjield dee doot, un brocht mien Laum trigj” (1. Sam. 17:34-35). Wäajen David soo sea om de Schop bekjemmat wia, haud hee dän Moot fa dee to kjamfen. Jie junge Breeda, jie kjennen David nodoonen, wan jie flietich aule Oppgowen doonen, waut jie kjrieen.

5. Waut es no Psalm 25:14 no daut wichtichste, waut junge Breeda doonen kjennen?

⁵ De junga David wia sea met Jehova vebungen. Daut wia wichtja, aus daut hee äwanäment wia un sikj fein met de Hoap vestunt. Jehova wia nich bloos David sien Gott, oba sien Frint – un Jehova vetrud opp am (läs Psalm 25:14). Jie junge Breeda, daut wichtichste, waut jie doonen kjennen, es, daut jie noch jratre Frind woaren met Jehova. Dan woa jie secha uk mea fa de Vesaumlunk doonen kjennen.

6. Woo dochten eenje äwa David?

⁶ David must doamet foadich woaren, daut aundre schlajcht äwa am dochten. Aus hee biejlikj jäajen Goliat kjamfen wull, proowd de Kjennich Saul am doavon auftoroden un säd: “Du best mau een Jung” (1. Sam. 17:31-33). Een Stootje ea haud David sien ieejna Brooda to am jesajcht, daut opp am nich to veloten wia (1. Sam. 17:26-30). Oba Jehova sach am gaunz aundasch, wiels hee am kjand. Un wiels David sikj opp sienen Frint Jehova veleet, kunn hee Goliat dootmoaken (1. Sam. 17:45, 48-51).

7. Waut kjenn wie von David lieren?

⁷ Waut kjenn wie von David lieren? Wie kjennen lieren jeduldich to sennen.  Daut dieet veleicht een Stoot, bat dee, waut die von kjlien aun kjanen, daut jleewen, daut du nu groot best. Oba du kaust die secha sennen, daut Jehova nich doano kjikjt, woo die lat. Hee weet, wäa du best un waut du doonen kaust (1. Sam. 16:7). Strenj die aun Gott emma noda to komen. David deed daut doaderch, daut hee de Natua beoobachten deed un doaräwa nodocht, waut am daut äwa Jehova lieed (Psa. 8:4-5; 139:14; Reem. 1:20). Froag Jehova uk om Krauft. Spotten diene Schoolpoatna eenjemol äwa die, wäajen du eent von Jehova siene Zeijen best? Wan jo, dan bäd Jehova doarom, daut du met dise Schwierichkjeiten kaust foadich woaren. Hool die uk aun dän gooden Rot ut Gott sien Wuat un ut onse Bieekja un Videos. Jiedatsmol, wan Jehova die halpt met Schwierichkjeiten foadich to woaren, woat dien Vetruen emma stoakja. Un wan aundre daut seenen, daut du die opp Jehova velatst, woaren dee die uk vetruen.

8-9. Waut holp David jeduldich to wachten, bat hee Kjennich wort, un waut kjennen de junge Breeda von am lieren?

⁸ David haud noch aundre Schwierichkjeiten. Nodäm aus hee toom Kjennich jesaulft wort, must hee noch väle Joaren wachten, ea hee kunn äwa Juda rejieren (1. Sam. 16:13; 2. Sam. 2:3-4). Waut holp am jeduldich to wachten? Enne Städ bloos mootloos to sennen, deed hee waut. Aus hee sikj biejlikj fuatbrinjen must un en de Filista äare Jäajent wond, deed hee jäajen de Fiend von Gott sien Volkj kjamfen un beschizt doaderch de Jäajent von Juda (1. Sam. 27:1-12).

⁹ Waut kjennen de junge Breeda von David lieren? Doot aules, waut jie kjennen, om waut fa Jehova un de Breeda to doonen. See wie mol, waut een junga Brooda beläwd, waut Ricardo * heet. Aus hee ojjefäa 10 Joa wia, wull hee aul Pionia woaren. Oba de Eltestasch säden, daut hee nich reed wia. Ricardo jeef nich opp un deed emma mea em Deenst, enne Städ sikj to oajren. Hee sajcht: “Wan ekj nu trigjkjikj, dan see ekj, woo goot daut wia, mie em Deenst to vebätren. Ekj muak aulawäajen Wadabesuchs, wan doa wäa een bät intressieet wia, un muak mie uk fa dee reed. Ekj kjrieech uk mien ieeschtet Bibelstudium. Je mea ekj prädjen deed, je weinja wia ekj nerwees.” Ricardo es nu een flietja Pionia un Deenstaumthelpa.

10. Waut deed David opp eene Sauz, ea hee eene wichtje Entscheidunk muak?

¹⁰ See wie mol, waut David noch beläwd. Aus David un siene Poatna sikj vestäakjen musten, musten dee opp eene Sauz Kjrich fieren un äare Famieljes bleewen tus auleen. Äwadäm kjeemen de Fiend un bestoolen dee un neemen de Famieljes met. Docht David dan nu, daut hee soon gooda Kjrichsmaun wia un selfst Plons moaken kunn toom dee raden? Nä. Hee fruach Jehova no Rot. Derch dän Priesta Abjatar fruach hee Jehova: “Saul ekj dise Reiba hinjaraun joagen?” Jehova säd to David, daut hee daut sull un daut am daut jlekjen wudd (1. Sam. 30:7-10). Waut kjenn wie von dit lieren?

11. Waut kaust du doonen, ea du waut entscheiden deist?

 ¹¹ Froag aundre no Rot, wan du waut entscheiden west. Räd met diene Elren ooda met erfoarne Eltestasch, waut die gooden Rot jäwen kjennen. De Eltestasch sent soo aus Gowen, waut Jehova de Vesaumlunk jejäft haft (Efs. 4:8). Jehova velat sikj opp dee un du kaust daut uk. Wan du de Eltestasch äaren Gloowen nodeist un no dee äaren gooden Rot horchst, dan kaust du goode Entscheidungen moaken. Nu well wie mol seenen, waut wie von dän Kjennich Asa lieren kjennen.

12. Woo wia Asa, aus hee de Kjennich wort?

¹² Aus de Kjennich Asa junk wia, wia hee deemootich un äwanäment. Aus biejlikj sien Voda Abija storf, wort hee de Kjennich un riemd aule Aufjetta opp. Hee “foddad daut Volkj von Juda opp, däm HARN, äare Vodasch äaren Gott, to jehorchen un sien Jesaz met aule Jebooten to befoljen” (2. Chr. 13:23–14:6). Un aus Serach von Kusch met eene Million Soldoten jäajen Juda kjeem, fruach Asa Jehova om Help un säd: “HAR, wan een schwaka met eenen stoakjen kjamfen mott, kaun am kjeena soo biestonen aus du. Halp ons, HAR, ons Gott; wie veloten ons gaunz opp die!” Dit bewees gaunz kloa, daut Asa sikj opp Jehova veleet, daut hee am un sien Volkj raden wudd. Asa vetrud opp sienen himlischen Voda un dee “schluach de Armee von Kusch” (2. Chr. 14:7-11).

13. Waut wort lota met Asa, un wuarom?

¹³ Aus de eene Million Soldoten jäajen Asa kjeemen, veleet hee sikj opp Jehova un daut kjeem goot ut. Oba aus de schlajchta Kjennich Bascha von Israel sikj jäajen am stald, fruach hee dän Kjennich von Aram no Help un nich Jehova. Un daut kjeem sea schlajcht ut! Doawäajen schekjt Jehova dän Profeet Hanani no Asa toom am sajen: “Wiels du die opp dän Kjennich von Aram veloten hast un nich opp däm HARN, dienen Gott, doawäajen es däm Kjennich von Aram sien Häa ut diene Macht jekomen”. Von dan aun haud Asa emma  Kjrich (2. Chr. 16:7, 9; 1. Kjen. 15:32). Waut lia wie doavon?

14. Woo kaust du die opp Jehova veloten, un woo woat daut no 1. Timotäus 4:12 no utkomen?

¹⁴ Bliew deemootich un velot die wieda opp Jehova. Aus du die deepen leetst, hautst du eenen stoakjen Gloowen un vetrudsd opp Jehova. Un Jehova neem die wellich opp en siene Famielje. Daut es wichtich, daut du die nu uk fa wieda opp Jehova velatst. Veleicht es daut nich schwoa, wan eena groote Entscheidungen moaken mott. Oba waut es met de kjliene? Daut es sea needich, daut eena sikj emma opp Jehova velat, uk wan eena entscheiden mott, waut fa eenen Tietvedrief eena haben well, waut vonne Oabeit ooda no waut eena en sien Läwen sträwen well. Velot die nich opp diene ieejne Weisheit. Enne Städ daut sieekj no biblische Gruntsauzen, waut fa diene Loag paussent sent, un hool die doaraun (Spr. 3:5-6). Wan du daut deist, dan woascht du Jehova schaftich moaken un de Breeda von de Vesaumlunk woaren die respakjten (läs 1. Timotäus 4:12).

15. Waut vonne Fäla muak de Kjennich Joschafat no 2. Chronik 18:1-3; 19:2 no?

¹⁵ Wie aula sent onvolkomen un doawäajen woascht du uk eenjemol Fäla moaken. Oba daut saul die nich doavon aufhoolen, Jehova dien bastet to jäwen. See wie mol, waut de junga Joschafat beläwd. Hee haud een deel sea feine Ieejenschoften. Aus hee de Kjennich wort, “socht [hee] siene Vodasch äaren Gott un befoljd siene Jebooten”. Un hee schekjt uk Beaumte no de Städa von Juda toom de Menschen von Jehova lieren (2. Chr. 17:4, 7). Oba Joschafat muak uk eenjemol schlajchte Entscheidungen. Opp eene Sauz schekjt Jehova wäm no am toom am Rot jäwen (läs 2. Chronik 18:1-3; 19:2). Waut kjenn wie doarut lieren?

16. Waut kaust du von Rajeev lieren?

¹⁶ Nemm daut wellich aun, wan du Rot kjrichst. Veleicht jeit die daut uk soo aus väl aundre junge Breeda, waut doa nich neiw weeten, waut see en äa Läwen doonen sellen. Dan woa oba nich mootloos. See wie mol, woo eenen jungen  Brooda daut jinkj, waut Rajeev heet. Hee sajcht: “Eenjemol wist ekj nich, waut ekj en mien Läwen doonen wull. Krakjt soo aus väl aundre Jugentliche jankad mie leewa Sport to moaken un Spos to haben enne Städ no de Toopkomes to wanken ooda em Deenst to gonen.” Waut holp Rajeev? Een leeftolja Eltesta jeef am eenen gooden Rot. Rajeev sajcht: “Hee holp mie äwa 1. Timotäus 4:8 notodenkjen.” Rajeev kjeem disen Rot deemootich no un docht doaräwa no, waut hee en sien Läwen doonen wull. Hee sajcht: “Ekj wort mie eenich no jeisteljet to sträwen.” Woo kjeem daut ut? Rajeev sajcht wieda: “Een poa Joa lota kunn ekj Deenstaumthelpa woaren.”

17. Woo denkjen de Elre äwa de junge Breeda, waut Jehova deenen?

¹⁷ De aundre von de Vesaumlunk räakjnen de junge Breeda sea väl, waut met an toop Jehova deenen (Zef. 3:9, NW). Dee räakjnen daut sea väl, daut jie de Oabeit, waut jie kjrieen, flietich un met Moot nokomen. Dee sent werkjlich brow met junt (1. Joh. 2:14).

18. Woo denkjt Jehova äwa de flietje junge Breeda soo aus Spricha 27:11 wiest?

¹⁸ Jie junge Breeda, denkjt emma doaraun, daut Jehova junt leeft un opp junt vetrut. Hee haft verutjesajcht, daut doa en de latste Tiet wudden een deel junge Mana sennen, waut am friewellich deenen wudden (Psa. 110:1-3). Hee weet, daut jie am leewen un am soo goot aus mäajlich deenen wellen. Siet jeduldich met aundre un uk met junt selfst. Wan jie Fäla moaken, dan nämt daut aun, wan aundre junt Rot jäwen un junt trajchtwiesen, wiels en Werkjlichkjeit kjemt daut von Jehova (Heb. 12:6). Strenjt junt sea aun aule Oppgowen, waut jie kjrieen, flietich to doonen. Daut wichtichste es, daut jie en aules, waut jie doonen, junen himlischen Voda froo moaken (läs Spricha 27:11).