1. Wuarom es daut nich toom vefieren, wan de Welt ons nich lieden kaun, soo aus Matäus 24:9 sajcht?

JEHOVA muak ons toom aundre leewen un toom jeleeft woaren. Doawäajen sat ons daut sea too un moakt ons veleicht soogoa Angst, wan ons wäa schlajcht lieden kaun. Eene Sesta, waut Georgina heet un en Europa wont, sajcht biejlikj: “Aus ekj 14 Joa wia, kunn miene Mame mie schlajcht lieden, wiels ekj Jehova deend. Ekj feeld mie aufjewäsen un beduad, aus ekj eene feine wia.” * Een Brooda, waut Danylo heet, schrift: “Aus de Soldoten mie beleidijden, vekjielden un säden, daut see mie waut aundoonen wudden, wäajen ekj Jehova deend, haud ekj Angst un feeld mie gaunz tonuscht.” Daut sat ons too, wan de Menschen ons haussen. Oba daut es nich toom vefieren, wiels Jesus säd je, daut se ons nich wudden lieden kjennen (läs Matäus 24:9).

2-3. Wuarom woaren Jesus siene Nofolja jehaust?

² De Welt kaun Jesus siene Nofolja nich lieden. Wuarom nich? Wiels dee, krakjt soo aus Jesus, “nich von dise Welt” sent (Joh. 15:17-19). Wie respakjten de menschelje Rejierungen, oba wie veieren dee nich un uk nich dee äare Laundestieekjens. Wie deenen bloos Jehova. Wie stonen doafäa en, daut hee daut Rajcht haft äwa de Menschen to harschen, wan de Soton un siene “Nokomen” daut uk vestrieden (1. Mo. 3:1-5, 15). Wie prädjen, daut bloos Gott sien Kjennichrikj met de Menschen äare Trubbels een Enj moaken kaun un daut dit Kjennichrikj boolt aule venichten woat, waut doajäajen sent (Dan. 2:44; Opb. 19:19-21). Daut es eene goode Norecht fa  de Deemootje, oba eene schlajchte fa de Gottloose (Psa. 37:10-11).

³ De Welt haust ons uk, wiels wie ons aun Gott siene Jebooten hoolen. Dee sent gaunz aundasch aus daut, waut de Welt fa rajcht un orrajcht talt. Biejlikj talen väle nu soon schwienschet Läwen fa rajcht, aus de Menschen en Sodom un Gomorra hauden, waut Gott venichten deed (Jud. 7). Un wiels wie soo läwen wellen, aus Gott daut fa rajcht talt, spotten väle äwa ons un sajen, daut wie aundre nuscht achten (1. Pet. 4:3-4).

4. Waut halpt ons, wan de Menschen ons schlajcht lieden kjennen?

⁴ Waut kaun ons halpen, wan de Menschen ons haussen un beleidjen? Wie motten gaunz faust doaraun jleewen, daut Jehova ons halpen woat. Ons Gloowen es soo aus een “Schilt, wua de beesa met siene brennende Feilen nich derchscheeten kaun” (Efs. 6:16). Oba wie brucken nich bloos Gloowen, oba uk Leew. Wuarom? Wiels de Leew “lat sikj nich vebetren”. Dee drajcht jeduldich aules un halpt ons en schwoare Tieden uttohoolen (1. Kor. 13:4-7, 13). Well wie nu mol seenen, woo de Leew fa Jehova un fa onse Gloowesbreeda un mau rajcht fa onse Fiend ons halpt met Hauss foadich to woaren.

5. Waut kunn Jesus doonen, wäajen hee sienen Voda leewd?

⁵ Dän Zeowes ea se Jesus dootmuaken, säd hee to siene true Nofolja: “De Welt mott weeten, daut ekj dän Voda goot sie, un daut ekj doawäajen aules doo, waut hee mie oppjedroacht haft” (Joh. 14:31). Wiels Jesus Jehova leewd, kunn hee met daut schwoare foadich woaren, waut noch ver am wia. Un wiels wie Jehova leewen, kjenn wie dautselwje doonen.

6. Waut denkjen Jehova siene Deena no Reema 5:3-5 no doaräwa, wan de Welt an haust?

⁶ De Leew fa Jehova haft siene Deena noch emma jeholpen tru to bliewen, wan dee vefolcht worden. Aus biejlikj daut hechste judische Jerecht to de Apostel säd, daut see nich mea prädjen sullen, deeden see “Gott mea jehorchen aus Menschen”, wiels see dän leewden (Apj. 5:29; 1. Joh. 5:3). Onse Breeda, waut von stoakje Rejierungen schlajcht behaundelt woaren, kjennen uk tru bliewen, wiels dee Jehova sea leewen. Wan de Welt ons haust, dan woa wie nich mootloos, oba wie freien ons (Apj. 5:41; läs Reema 5:3-5).

7. Waut sell wie doonen, wan de Famielje jäajen ons es?

⁷ Daut kaun besonda schwoa sennen, wan wie Jäajenstaunt von de Famielje haben. Wan eena sikj fa de Woarheit intressieet, dan denkjen eenje von de Famielje woomäajlich, daut se eenem veleit haben. Aundre denkjen woomäajlich, daut eena nich mea kluak em Kopp es (see uk Markus 3:21). Woomäajlich woaren dee eenem mau rajcht schlajcht behaundlen. Daut saul ons nich wundren, wiels Jesus säd je: “Een Mensch siene Fiend woaren ut sien ieejnet Hushault sennen” (Mat. 10:36). Oba wie woaren kjeenmol spietich sennen äwa ons Frintschoft, endoont woo dee ons behaundlen. Je mea wie Jehova leewen, je mea woa wie uk aundre Menschen leewen (Mat. 22:37-39). Oba wie woaren kjeenmol jäajen de biblische Jesazen un Gruntsauzen gonen, bloos om aundre toom Jefaulen to läwen.

8-9. Woo kunn eene Sesta tru bliewen, waut väl Jäajenstaunt haud?

⁸ Georgina, wua wie aul ea von räden, kunn tru bliewen, wan äare Mame uk gaunz jäajen ar wia. See sajcht: “Ekj un miene Mame fungen toop aun de Bibel to  studieren. Aus ekj sas Moonat studieet haud, wull ekj dan no de Toopkomes wanken, oba miene Mame wort gaunz jäajen mie. Ekj wort en, daut see met Aufjefolne jerät haud, un see brukt dee äare Iedeeen jäajen mie. See deed mie uk beleidjen, aun de Hoa rieten un warjen un miene Bieekja wajchschmieten. Aus ekj 15 Joa wia, leet ekj mie deepen. Om daut ekj sull opphieren Jehova to deenen, brocht miene Mame mie no eene Städ, wua se no soone Jugentliche oppausten, waut nich fein wieren. Eenje von dee deeden biejlikj Droggs brucken ooda deeden sestwaut schlajchtet. Daut es sea schwoa, wan eena von soone Jäajenstaunt kjricht, waut eenem wudden leewen sellen un fa eenem sorjen.”

⁹ Woo kunn Georgina doamet foadich woaren? See sajcht: “Dän Dach, aus miene Mame aunfunk jäajen mie to sennen, haud ekj jroz verecht met de gaunze Bibel eemol derchläsen. Ekj wia mie gaunz secha, daut ekj de Woarheit jefungen haud, un ekj feeld mie dicht bie Jehova. Ekj bäd foaken un hee horcht no mie. Aus ekj opp dee Städ wonen must, wua miene Mame mie hanjebrocht haud, kroagd eene Sesta mie no äa Hus un wie studieeden toop de Bibel. Un em Vesaumlungshus spruaken de Breeda un Sestren mie emma Moot too. Daut wia soo, aus wan ekj to dee äare Famielje jehieed. Ekj hab daut beläft, daut daut kjeenen Jäajna jeft, waut stoakja es aus Jehova.”

10. Waut woat Jehova Gott fa ons doonen?

¹⁰ De Apostel Paulus schreef, daut nuscht “ons von Gott siene Leew scheeden kaun, dee en Christus Jesus, onsen Harn es” (Reem. 8:38-39). Veleicht mott wie fa een Stoot lieden, oba Jehova woat emma aun onse Sied sennen un ons treesten un Krauft jäwen. Un hee halpt ons uk derch onse leeftolje Gloowesbreeda – krakjt soo, aus hee daut bie Georgina deed.

11. Woo holp Jesus siene Jinja de Leew, wua Johanes 15:12-13 von rät? Jeff een Biespel.

¹¹ Dän Zeowes ea Jesus storf, säd hee to siene Nofolja, daut see Leew unjarenaunda haben sullen (läs Johanes 15:12-13). Hee wist, daut de Welt an schlajcht lieden kunn un daut de Leew an halpen wudd, veeent to bliewen un doamet foadich to woaren. Daut es aun de Vesaumlunk en Tessalonich to seenen. De Breeda doa worden von Aunfank aun vefolcht. Oba dee bleewen tru un weesen Leew un jeewen aundre  een goodet Biespel (1. Tess. 1:3, 6-7). Paulus rod dee too, wieda Leew to haben un “doarenn noch tootonämen” (1. Tess. 4:9-10). Soo wudden see kjennen de Betriepte treesten un de Schwake biestonen (1. Tess. 5:14). Dee kjeemen Paulus sienen Rot no un ojjefäa een Joa lota kunn hee an schriewen: “June Leew to eenaunda nemt emma too” (2. Tess. 1:3-5). Dise Leew holp an met Schwierichkjeiten un Vefoljunk foadich to woaren.

12. Woo weesen de Breeda un Sestren sikj unjarenaunda Leew, aus daut en een Launt Kjrich jeef?

¹² See wie mol, waut Danylo beläwd, wua wie ea aul von räden. Aus daut en dee Staut, wua hee un siene Fru wonden, Kjrich jeef, hieeden dee nich opp, no de Toopkomes to wanken un soo goot aus mäajlich to prädjen. Un dee deelden sikj daut Äten, waut see dan noch hauden, met äare Breeda un Sestren toop en. Oba eenen Dach kjeemen Soldoten met Jewäaren no Danylo sien Hus. Hee sajcht: “Dee velangden, daut ekj mienen Gloowen aufsajen sull. Aus ekj daut nich deed, vekjielden dee mie un säden, daut see mie scheeten wudden. Oba dee schooten bloos bowa mienen Kopp. Un ea dee veleeten, säden dee noch, daut see wudden trigjkomen un met miene Fru met Jewault Schaund driewen. Aus de Breeda daut enworden, brochten dee ons fuaz nom Zuach, waut no eene aundre Staut fua. Ekj woa dee äare Leew kjeenmol nich vejäten. Un aus wie no de aundre Staut kjeemen, jeewen de Breeda ons doa Äten un holpen mie eene Oabeit un een Hus to finjen. Opp dee Wajch kunn wie mau rajcht aundre Breeda oppnämen, waut sikj uk wäajen dän Kjrich fuatbrinjen musten.” Soone Jeschichten wiesen, daut de breedaliche Leew ons halpen kaun uttohoolen.

13. Woo halpt de heilja Jeist ons, daut wie Jehova tru bliewen kjennen, wan aundre ons haussen?

¹³ Jesus säd to siene Nofolja, daut see äare Fiend leewen sullen (Mat. 5:44-45). Daut es nich leicht, oba met de Help von Gott sienen heiljen Jeist kjenn wie daut. To dän Jeist siene Frucht jehieren biejlikj Leew, Jedult, Frintlichkjeit, Jelindichkjeit un Selfstbeharschunk (Gal. 5:22-23). Dise Ieejenschoften halpen ons, met Hauss foadich to woaren. Väl Jäajna haben sikj jeendat, wiels dee äa Ehepoatna, Kjint ooda Noba soone Ieejenschoften haud. Un väl von dee sent soogoa onse leewe Breeda  un Sestren jeworden. Wan die daut schwoa felt, deejanje to leewen, waut die wäajen dienen Gloowen haussen, dan froag Jehova no sienen heiljen Jeist (Luk. 11:13). Un velot die doaropp, daut et emma daut baste es, no Gott to horchen (Spr. 3:5-7).

14-15. Woo holp Reema 12:17-21 Yasmeen, daut see äaren Maun kunn Leew wiesen, wan dee uk schlajcht jesonnen wia?

¹⁴ Well wie mol seenen, waut eene Sesta beläwd, waut Yasmeen heet. Aus see eent von Jehova siene Zeijen wort, wull äa Maun ar doavon aufhoolen, wiels hee docht, daut aundre ar veleit hauden. Hee beleidijd ar un säd to daut Frintschoft un to eenen Priesta un eenen Zaubra, daut see to ar sajen sullen, daut see ar waut aundoonen wudden un daut see wudd äare Famielje uteneenbrinjen. Hee flieekjt mau rajcht de Breeda ut bie een Toopkomen! Yasmeen road foaken, wiels see soo ojjerajcht behaundelt wort.

¹⁵ Wan Yasmeen em Vesaumlungshus wia, dan spruaken de Breeda un Sestren ar Moot too un treesten ar. Un de Eltestasch säden, daut see daut nokomen sull, waut Reema 12:17-21 säd (läs). Yasmeen sajcht: “Daut wia nich leicht. Oba ekj fruach Jehova no Help un ekj deed mien bastet, om daut notokomen, waut de Schreft säd. Un wan mien Maun doll wia un en de Kjäakjstow Ieed nenschedd, dan muak ekj daut rein. Wan dee mie beleidijd, dan räd ekj leeftolich to dän. Un wan hee krank wia, dan kjemmad ekj mie om am.”

16-17. Waut kjenn wie von Yasmeen äare Jeschicht lieren?

¹⁶ Daut kjeem goot ut, daut Yasmeen äaren Maun Leew wees. See sajcht: “Mien Maun funk aun dolla opp mie to vetruen, wiels hee wist, daut ekj emma de Woarheit säd. Un hee funk aun mie respakjtvoll tootohorchen, wan wie von Gloowessachen räden, un wia envestonen tus Fräd to moaken. Nu sajcht hee, daut ekj wellich no de Toopkomes wanken kaun. Wie haben nu eenen väl bätren Ehestaunt un feelen ons sondasorj. Ekj hop, daut mien Maun eenen Dach uk de Woarheit aunnämen woat un met mie toop Jehova deenen.”

¹⁷ Aun Yasmeen äare Jeschicht es to seenen, daut daut soo es, waut 1. Korinta 13:4, 7 sajcht: “Leew vedrajcht aules, . . . see hopt aules, jeduldich drajcht see aules.” De Leew es väl stoakja aus de Hauss un kaun väl aun aundre doonen. Un wan wie Leew wiesen, dan moak wie Jehova schaftich. Oba wie kjennen mau rajcht dan schaftich  sennen, wan onse Jäajna sikj nich endren. Woo schauft daut?

18. Wuarom kjenn wie schaftich sennen, wan se ons haussen?

¹⁸ Jesus säd: “Seelich [ooda schaftich] sent jie, wan de Menschen junt . . . nich lieden kjennen” (Luk. 6:22). Wie wellen nich, daut de Menschen ons haussen ooda wäajen onsen Gloowen vefoljen. Wuarom kjenn wie dan schaftich sennen, wan dee daut doonen? Well wie mol dreeatlei seenen. Ieeschtens es Gott met ons tofräd, wan wie en schwoare Tieden uthoolen (1. Pet. 4:13-14). Tweedens woat doaderch ons Gloowen ajchta un stoakja (1. Pet. 1:7). Un dreddens woa wie dan sea beloont woaren un daut eewje Läwen kjrieen (Reem. 2:6-7).

19. Wuarom wieren de Apostel schaftich, nodäm daut se an vekjielt hauden?

¹⁹ Nich lang no Jesus sien oppstonen vom Doot beläwden de Apostel, daut daut soo wia, waut Jesus jesajcht haud. See freiden sikj, wan se an uk vekjielt un daut prädjen aufjesajcht hauden. Wuarom? Wiels “see wieren wieet jeacht worden, fa Jesus sienen Nomen Schaund to lieden” (Apj. 5:40-42). Äare Leew fa äaren Harn wia väl jrata aus de Angst fa äare Fiend. Un dee weesen äare Leew doaderch, daut see nich opphieeden de goode Norecht to prädjen. Vondoag dän Dach jeft et uk väl Breeda, waut Jehova uk en schwoare Tieden tru deenen. Dee weeten, daut Jehova äare Woakjen un äare Leew fa sienen Nomen nich vejäten woat (Heb. 6:10).

20. Waut woa wie en dän näakjsten Artikjel seenen?

²⁰ De Welt woat ons bat aum Enj haussen (Joh. 15:19). Oba wie brucken nich Angst haben. En dän näakjsten Artikjel woa wie seenen, daut Jehova siene true Deena “stoakj moaken un . . . bewoaren” woat (2. Tess. 3:3). Well wie wieda Jehova leewen un uk onse Breeda un Sestren un mau rajcht onse Fiend. Dan woa wie veeent bliewen un em Gloowen stoakj sennen un wie woaren Jehova ieren un bewiesen kjennen, daut de Leew väl stoakja es aus de Hauss.