1. Wuarom fruach Jesus Jehova doano, daut hee siene Jinja bewoaren sull?

DÄN latsten Owent ea se Jesus dootmuaken, docht hee doaräwa no, waut vonne Schwierichkjeiten siene Jinja haben wudden. Hee bäd to Jehova, daut hee “an verem beesen bewoaren” sull, wiels Jesus siene Jinja leewd (Joh. 17:14-15). Jesus wist, daut hee boolt wudd nom Himmel foaren un daut de Soton jäajen aul dee kjamfen wudd, waut doa wudden wellen Jehova deenen. Un doawäajen wudd Jehova siene Deena daut aun Schutz fälen.

2. Wuarom kjenn wie ons secha sennen, daut Jehova no onse Jebäda horcht?

² Jehova horcht no Jesus siene Jebäda, wiels hee am leewd. Wan wie ons aunstrenjen Jehova to jefaulen, dan woat hee ons uk leewen un ons halpen un beschitzen, wan wie am doano froagen. Jehova haft eenen gooden Nomen aus leeftolja Voda. Woo wudd hee sikj dan nich fein om siene Kjinja kjemren?

3. Wuarom fält ons vondoag dän Dach Jehova sien Schutz?

³ De Soton wort utem Himmel rutjeschmäten un “es schrakjlich wuttent” (Opb. 12:12). Doawäajen fält ons Jehova sien Schutz vondoag dän Dach needja aus jeemols ea. De Soton haft daut mau rajcht bat doa jebrocht, daut eenje, waut ons vefoljen, “meenen, see doonen Gott eenen Deenst” (Joh. 16:2). Aundre, waut nich aun Gott jleewen, vefoljen ons, wiels wie nich soo sent aus dise Welt. Oba endoont, wuarom se ons vefoljen – wie brucken nich Angst haben. Wuarom nich? Wiels Gott sien Wuat sajcht: “Gott . . . es tru; dee woat junt stoakj moaken un ver däm beesen bewoaren” (2. Tess. 3:3). Woo deit Jehova ons beschitzen? Well wie mol tweeatlei seenen.

4. Waut haft Jehova ons no Efeesa 6:13-17 no jejäft toom ons beschitzen?

⁴ Jehova jeft ons daut jeistelje Kjrichsjereetschoft toom ons beschitzen, wan de Soton ons aunjript (läs Efeesa 6:13-17). Dit Kjrichsjereetschoft es stoakj un fein to brucken. Daut kaun ons fein beschitzen, wan wie nich opphieren, jieda Poat goot to brucken. Well wie mol seenen, waut jieda eenselnet Poat bediet.

5. Waut es daut Belt von de Woarheit, un wuarom mott wie ons daut omschnalen?

⁵ De Gort, ooda Belt, stalt de Woarheit ut Gott sien Wuat väa. Wuarom mott wie ons dit Belt omschnalen? Wiels de Soton es “de Voda äwa aule Läajes” (Joh. 8:44). Hee haft aul fa dusende Joaren jeloagen un haft “de gaunze Welt veleit” (Opb. 12:9). Oba de Woarheit ut de Schreft beschizt ons, daut wie nich veleit woaren. Woo kjenn wie ons dit Belt em jeisteljen omschnalen? Daut doo wie, wan wie de Woarheit äwa Jehova lieren un am “em Jeist un en de Woarheit” aunbäden un en aules een opprechtjet Läwen fieren (Joh. 4:24; Efs. 4:25; Heb. 13:18).

6. Waut es daut jeistelje Brostschilt, un wuarom mott wie daut brucken?

⁶ Daut Brostschilt stalt Jehova siene jerajchte Väaschreften, ooda Gruntsauzen väa. Wuarom mott wie dit Brostschilt brucken? Een Brostschilt bewoat eenen Soldot doafäa, daut dee dän nich em Hoat spekjen kjennen. Krakjt soo woat ons jeisteljet Hoat von Jehova siene jerajchte Väaschreften bewoat, daut ons daut schlajchte von de Welt nuscht aundoonen kaun (Spr. 4:23, JHF). Jehova well, daut wie am von gaunzen Hoaten leewen un deenen (Mat. 22:36-37). De Soton well oba, daut wie opphieren, Jehova met ons gaunzet Hoat to leewen. Hee well, daut wie daut leewen, waut dise Welt auntobeeden haft, waut Jehova oba haust (Jak. 4:4; 1. Joh. 2:15-16). Un wan daut nich schauft, woat hee ons unja Druck saten, waut to doonen, waut jäajen Jehova siene jerajchte Väaschreften es.

7. Woo kjenn wie daut jeistelje Brostschilt brucken?

⁷ Wie brucken daut jeistelje Brostschilt, wan wie daut fa rajcht un orrajcht talen, waut Jehova deit, un no siene jerajchte Väaschreften läwen (Psa. 97:10). Eenje jleewen, daut eena dan weinja Frieheit haft. Oba wan wie opphieren wudden, no biblische Gruntsauzen to läwen, wudd wie soo sennen aus een Soldot, waut medden em Kjrich sien Brostschilt tochloten wudd, bloos wiels am daut too schwoa wia. Woo onkluak wudd daut nich sennen! Fa dee, waut Jehova leewen, sent “siene Jebooten . . . nich schwoa”, oba raden dee daut Läwen (1. Joh. 5:3).

8. Waut bediet daut, sikj de goode Norecht soo aus Schoo auntotrakjen?

⁸ Paulus säd: “Daut Evangelium, daut dän Fräd brinjt, trakjt aun soo aus Schoo opp june Feet.” Daut bediet, daut wie emma sellen reed sennen, de goode Norecht von daut Kjennichrikj to prädjen. Wan wie met aundre äwa de Schreft räden, dan woat ons Gloowen stoakja. Un daut jeft ons uk Moot, wan wie seenen, woo Jehova siene Deena äwa de gaunze Welt no Jeläajenheiten sieekjen, de goode Norecht to prädjen. Dee doonen daut oppe Oabeit, bie de School un wan dee en Jeschafta ooda von Hus to Hus prädjen, wan dee enkjeepen un wan dee met Frintschoft ooda met Bekaunde räden, waut nich aun Jehova jleewen, un mau rajcht dan, wan dee nich von tus kjennen. Wan wie ut Angst wudden opphieren met prädjen, dan wudd daut  soo sennen, aus wan een Soldot sikj medden em Kjrich wudd siene Schoo uttrakjen. Dan wudd hee sikj leicht siene Feet velazen kjennen un hee wudd sikj nich mea soo goot wäaren kjennen un wudd nich daut doonen kjennen, waut sien Väaschta haben wull.

9. Wuarom bruck wie dän Gloowen, waut soo es aus een grootet Schilt?

⁹ Daut groote Schilt bediet, daut wie Gloowen aun Jehova haben. Wie vetruen doaropp, daut hee aules doonen woat, waut hee vesproaken haft. De Gloowen halpt ons, daut wie dän Beesen “siene brennende Feilen” utmoaken kjennen. Wuarom sell wie dit Schilt emma metdroagen? Daut beschizt ons, wan Aufjefolne ons met äare Lieren veleiden wellen un wan Menschen äwa ons spotten un ons engrulen wellen. Un onen Gloowen wudd wie uk nich de Krauft haben Jehova tru to bliewen, wan aundre ons to waut schlajchtet veleiden wullen. Un jiedatsmol, wan wie oppe Oabeit ooda enne School fa onsen Gloowen enstonen, droag wie ons Schilt (1. Pet. 3:15). Daut doo wie biejlikj, wan wie eene bätre Oabeit aufsajen, daut wie fa wieda jenuach Tiet haben toom Jehova deenen (Heb. 13:5-6). Un ons Schilt beschizt ons  uk, wan wie bie Jäajenstaunt nich opphieren Jehova to deenen (1. Tess. 2:2).

10. Waut es de Schutzhelm von de Radunk, un wuarom mott wie dän brucken?

¹⁰ De Schutzhelm von de Radunk es de Hopninj, waut Jehova ons jeft. Daut es de Hopninj, daut Jehova aul dee beloonen woat, waut sienen Wellen doonen, un hee kaun ons mau rajcht vom Doot oppwakjen (1. Tess. 5:8; 1. Tim. 4:10; Tit. 1:1-2). Krakjt soo aus een werkjelja Helm eenen Soldot sienen Kopp beschizt, soo beschizt de Hopninj ons denkjen. Woo schauft daut? De Hopninj halpt ons, Gott siene Vespräakjungen em Uag to hoolen un rajcht äwa onse Trubbels to denkjen. Woo doo wie ons disen Helm oppsaten? Wan wie doano seenen, daut wie soo denkjen, aus Gott denkjt. Wie hopen biejlikj nich opp daut onsechre Jelt, oba opp Gott (Psa. 26:2; 104:34, NW; 1. Tim. 6:17).

11. Waut es daut Schwieet, waut de Jeist ons jeft, un wuarom sell wie daut brucken?

¹¹ Daut Schwieet, waut de Jeist ons jeft, es Gott sien Wuat, de Bibel. Dit Schwieet haft de Macht, aule Läajes tonuscht to moaken un de Menschen von faulsche Glooweslieren un schlajchte Jewanheiten frietomoaken (2. Kor. 10:4-5; 2. Tim. 3:16-17; Heb. 4:12). Woo kjenn wie lieren, dit Schwieet rajcht to brucken? Wan wie fa ons perseenlich studieren un ons von Gott siene Organisazion utlieren loten (2. Tim. 2:15). Oba Jehova jeft ons noch waut, waut ons beschitzen deit. Waut es daut?

12. Waut bruck wie noch, un wuarom?

¹² Een erfoarna Soldot weet, daut hee nich auleen jäajen eene groote Armee jewennen kaun. Hee brukt de Help von de aundre Soldoten. Biejlikj soo kjenn wie uk nich auleen jäajen dän Soton un siene Poatna jewennen. Wie brucken Help. Doawäajen haft Jehova ons oppe gaunze Welt Breeda un Sestren jejäft, waut ons wellich doabie unjastetten (1. Pet. 2:17, NW).

13. Woo komen de Toopkomes ons togood, soo aus Hebräa 10:24-25 wiest?

¹³ Wie kjrieen biejlikj derch de Toopkomes Help (läs Hebräa 10:24-25). Wie aula feelen ons mol mootloos, un doa kjrie wie wada Moot. De feine Auntwuaten von onse Breeda un Sestren stoakjen ons. De biblische Räden un de Väafierungen halpen ons, Jehova wieda to deenen. Un daut muntat ons opp, wan wie ver un no de Toopkomes met onse Breeda vetalen (1. Tess. 5:14). Un bie de Toopkomes kjenn wie uk aundre halpen un daut jeft ons Freid (Apj. 20:35; Reem. 1:11-12). Oba daut es nich aules. Doa lia wie, noch bäta to prädjen un to lieren. Biejlikj lia wie doa uk, woo wie ons Jereetschoft fa dän Deenst bäta brucken kjennen. Moak die fa de Toopkomes reed un horch doa goot too. Un proow daut lota uk notokomen, waut du doa jelieet hast. Soo woascht du “een gooda Soldot fa Christus Jesus” woaren (2. Tim. 2:3).

14. Waut vonne Help hab wie noch?

¹⁴ Daut jeft uk millionende stoakje Enjel, waut ons halpen kjennen. Denkj mol han, waut een eensja Enjel aul doonen kunn! (Jes. 37:36). Un dan denkj mol no, waut Jehova siene groote Armee von Enjel nich aules wudden doonen kjennen. Nich een Mensch ooda beesa Jeist wudd dee jewennen kjennen! Jehova es de gaunz stoakjsta un wan hee opp onse Sied es, kaun kjeena jäajen ons, endoont woo väl daut sent (Rech. 6:16). Opp dit kjenn wie ons gaunz veloten. Hool dit emma em Denkj, wan die waut Angst moakt, waut diene Oabeitspoatna ooda Schoolpoatna ooda dien Frintschoft sajen ooda doonen. Denkj  doaraun, daut du nich auleen kjamfst. Jehova steit die bie un jeft die Rot.

15. Wuarom kaun kjeena Gott siene Deena stellmoaken, soo aus Jesaja 54:15, 17 wiest?

¹⁵ Dän Soton siene Welt kaun ons wäajen väl veschiednet nich lieden. Wie menjen ons nich manke Rejierungssachen un moaken nich em Kjrich met. Wie moaken Gott sienen Nomen bekaunt un sajen, daut bloos sien Kjennichrikj fa Fräd oppe Ieed sorjen kaun. Wie hoolen ons aun siene jerajchte Jesazen un Gruntsauzen. Wie sajen de Menschen uk, daut de Harscha von dise Welt een beesa Lieeja un een Merda es (Joh. 8:44). Un wie moaken uk bekaunt, daut dän Soton siene Welt boolt venicht saul. Un doch woaren de Soton un siene Helpa ons kjeenmol kjennen stellmoaken. Enne Städ daut woa wie aules doonen, waut wie kjennen, om Jehova wieda to preisen! De Soton es sea stoakj, oba dee kaun daut nich opphoolen, daut daut Kjennichrikj nich oppe gaunze Welt jeprädicht woat. Dit es bloos mäajlich, wiels Jehova ons beschizt (läs Jesaja 54:15, 17).

16. Woo woat Jehova siene Deena en de groote Triebsaul raden?

¹⁶ Waut licht noch ver ons? En de groote Triebsaul woat Jehova siene Deena tweemol von waut besondret raden. Ieeschtlich woat hee daut doonen, wan hee doano sitt, daut de Kjennichs oppe Ieed daut groote Babel venichten, waut aule faulsche Gloowes väastalt (Opb. 17:16-18; 18:2, 4). Un dan woat hee siene Deena raden, wan hee daut äwaje von dän Soton siene Welt en Harmagedon venichten woat (Opb. 7:9-10; 16:14, 16).

17. Woo kjemt ons daut togood, wan wie dicht bie Jehova bliewen?

¹⁷ Wan wie dicht bie Jehova bliewen, kaun de Soton ons nuscht doonen, waut ons fa emma schoden woat. Oba hee selfst woat fa emma venicht woaren (Reem. 16:20). Bruck daut gaunze Kjrichsjereetschoft, waut Gott ons jeft, un laj daut nich tosied! Proow nich, auleen jäajen dän Soton un siene Welt to kjamfen. Halp diene Breeda un Sestren. Un lot die von Jehova Rot jäwen. Wan du daut deist, dan kaust du die gaunz secha sennen, daut dien leeftolja himlischa Voda die stoakjen un bewoaren woat (Jes. 41:10).