1. Waut fa Schwierichkjeiten haben eenje von Jehova siene Deena?

MOAKST du waut sea schwoaret derch? Veleicht haft een Brooda ooda eene Sesta die met Wieed velazt (Jak. 3:2). Ooda wäa von diene Oabeitspoatna ooda Schoolpoatna haft sikj domm äwa die, wäajen du Jehova deenst (1. Pet. 4:3-4). Ooda diene Famielje moakt die daut schwoa, no de Toopkomes to foaren ooda met aundre von dienen Gloowen to räden (Mat. 10:35-36). Veleicht es die daut doamet soo schwoa, daut du doaraun denkjst opptojäwen. Oba du kaust die secha sennen, daut Jehova die met irjenteenen Trubbel halpen kaun. Jehova woat die de Weisheit jäwen, doamet rajcht omtogonen, un uk de Krauft, daut uttohoolen.

2. Waut sajcht Reema 15:4 doaräwa, woo ons daut Bibelläsen halpen kaun?

² Jehova haft doano jeseenen, daut wie enne Schreft von onvolkomne Menschen läsen kjennen un woo dee met äa schwoaret foadich worden. Wuarom deed hee daut? De Apostel Paulus säd, daut Jehova wull, daut wie doarut lieren sullen (läs Reema 15:4). Wan wie dise Jeschichten läsen, kaun ons daut Hopninj un Troost jäwen. Oba doa es mea met en, aus dee bloos to läsen. Wuarom? Wan dee ons werkjlich waut halpen sellen, mott daut waut aun ons denkjen doonen un ons to Hoaten gonen. Waut kjenn wie biejlikj doonen, wan wie eenen Trubbel haben un ons waut nosieekjen wellen, waut wie doamet doonen sellen? Dan kjenn wie veatlei doonen: (1) bäden, (2) ons doa nenloten, (3) doaräwa nodenkjen un (4) daut nokomen. Well wie nu mol seenen, woo daut krakjt schauft un  woo wie daut doonen kjennen, wan wie äwa dän Kjennich David un dän Apostel Paulus studieren. *

3. Waut saul eena doonen, ea eena aunfangt met Bibelläsen, un wuarom?

³ (1) Bäden. Bäd to Jehova, ea du aunfangst de Bibel to läsen. Soo kaun hee die halpen entowoaren, woo die daut kaun togood komen, waut du läst. Wan du no eenen Rot sieekjst fa eenen Trubbel, dan froag Jehova doano, daut hee die halpt biblische Gruntsauzen to finjen, waut die wiesen, waut du doonen saust (Filip. 4:6-7; Jak. 1:5).

4. Waut kaust du doonen, om die en eene biblische Jeschicht nentoloten?

⁴ (2) Ons doa nenloten. Jehova haft ons soo jemoakt, daut wie ons waut väastalen kjennen. Wan du eene Jeschicht von de Bibel bäta vestonen west, dan proow die daut väatostalen, woo daut to jane Tiet wia un woo daut fa dänjanjen wia, waut daut beläwd. Lot die doa nenn, waut dee veleicht sach un woo dee sikj feeld.

5. Waut es doa aules met en, äwa eene Jeschicht notodenkjen?

⁵ (3) Doaräwa nodenkjen. Eena saul äwalajen, waut et doa sajcht un waut eena doavon lieren kaun. Dan kaun eena daut gaunze noch bäta vestonen un seenen, woo daut met daut tooppaust, waut eena aul jelieet haft. Nodenkjen jeit met een Posel, ooda Toopstalskjlaz, to vejlikjen. Wan eena de Bieta nich toopstalt, kaun eena nich seenen, waut daut fa een Bilt es. Krakjt soo halpt nodenkjen eenem, de veschiedne Bieta tooptostalen un daut gaunze kloara to seenen un to vestonen. Eena wudd kjennen äwa de Froagen nodenkjen: “Waut deed dis Mensch von de Bibeltiet met sienen Trubbel? Woo holp Jehova dän? Un waut kaun ekj doavon lieren, om met mienen Trubbel foadich to woaren?”

6. Wuarom mott wie daut nokomen, waut wie lieren?

⁶ (4) Daut nokomen. Jesus säd, wan wie daut nich wudden nokomen, waut wie lieeden, dan wudd wie soo sennen aus een Mensch, waut sien Hus oppem Saunt bud. Dee must sea schaufen, oba aul siene Oabeit wia vejäfs. Wuarom? Wiels aus de Räajen kjeem un daut Wota un de Wint blosd, dan kjeiweld dän sien Hus toop (Mat. 7:24-27). Wan wie bäden un ons doa nenloten, waut wie jeläst haben, un doaräwa nodenkjen, oba daut nich nokomen, dan es daut aules vejäfs. Wiels wan wie dan oppe Proow jestalt ooda vefolcht woaren, dan woat ons Gloowen nich bestonen. Oba wan wie studieren un daut nokomen, waut wie lieren, dan woa wie kjennen bätre Entscheidungen moaken un Fräd haben un ons Gloowen woat stoakja (Jes. 48:17-18). Nu woa wie mol unjasieekjen, waut de Kjennich David beläwd, un krakjt dise vea Sachen doonen, wua wie jroz von jerät haben.

7. Waut fa eene biblische Jeschicht woa wie nu derchnämen?

⁷ Haft die mol een Frint ooda wäa von diene Famielje ojjerajcht behaundelt? Dan kaun die daut halpen, mol waut äwa dän Kjennich David to studieren. Sien Sän Absalom stald sikj jäajen am un wull en dän siene Städ Kjennich woaren (2. Sam. 15:5-14, 31; 18:6-14).

8. Waut kaust du doonen, daut Jehova die halpt?

⁸ (1) Bäden. Saj Jehova krakjt, woo du die äwa daut schlajchte feelst, waut  se die aunjedonen haben, ea du die met de Jeschicht aufjefst (Psa. 6:7-10). Froag doano, daut du Gruntsauzen finjen kaust, waut die halpen, met dise Sach foadich to woaren.

9. Waut passieed doa tweschen David un Absalom?

⁹ (2) Ons doa nenloten. Stal die väa, woo de Kjennich David sikj feeld. Sien ieejna Sän Absalom schauft joarenlank doaropp, daut de Menschen am jleichen sullen (2. Sam. 15:7). Aus Absalom dan ieescht jleewd, daut et eene paussende Tiet wia, schekjt hee waut von siene Poatna derch daut gaunze Launt met eene Norecht, daut de Menschen am sullen aus Kjennich aunnämen. Hee kjrieech soogoa Ahitofel opp siene Sied, waut eent von David siene baste Frind un Rotjäwa wia. Absalom muak sikj selfst toom Kjennich un hee proowd David fausttonämen un dän omtobrinjen. Veleicht wia David en dee Tiet uk sea krank (Psa. 41:2-10). Aus David doavon hieed, brocht hee sikj von Jerusalem fuat. Tolatst kjeem daut soo rom, daut dee, waut fa Absalom streeden, jäajen dee kjamften, waut opp David siene Sied wieren. David jewonn un sien Sän Absalom wort dootjemoakt.

10. Waut haud de Kjennich David kunt doonen?

¹⁰ Stal die uk väa, woo David sikj mott jefeelt haben. Hee leewd Absalom un vetrud opp Ahitofel. Un doch stalden dise beid Mana sikj jäajen am. Dee enteischten am sea un dee proowden soogoa am omtobrinjen. David haud sikj kunt von aul siene Frind trigjtrakjen un denkjen, daut dee sikj aulmols opp Absalom siene Sied jestalt hauden. Ooda hee haud kunt bloos aun sikj denkjen un doaraun, woo schwoa am daut wia, un sikj auleen fuatbrinjen ooda vetwiewlen un oppjäwen. Oba David deed aul daut nich. Woo kunn hee dan met dise schwoare Loag foadich woaren?

11. Waut deed David en siene schwoare Loag?

¹¹ (3) Doaräwa nodenkjen. Waut fa Gruntsauzen kaust du die ut dise Jeschicht rutnämen? Na, denkj doch mol äwa de Froag no: “Waut deed David met sienen Trubbel?” David deed nich ut Angst haustich Entscheidungen moaken, waut lota schlajcht utkjeemen. Un daut wia uk nich soo, daut hee sikj ut Angst to nuscht mea eenich wort. Enne Städ daut fruach hee Jehova un uk siene Frind no Help. Un hee deed uk fuaz daut, to waut hee sikj wia eenich jeworden. Hee wia sea truarich, oba hee wort nich vehaust ooda vebettat. Hee veleet sikj fa wieda opp Jehova un opp siene Frind.

12. Waut deed Jehova, om David to halpen?

¹² Waut deed Jehova fa David? Wan wie ons een bät waut nosieekjen, dan woa wie seenen, daut Jehova David de Krauft jeef, om met aul daut foadich to woaren (Psa. 3:1-9). Jehova säajend uk David siene Entscheidungen un stunt David siene true Frind bie, waut fa am enstunden un kjamften.

13. Woo kaust du David nodoonen, wan een aundra die sea toosat? (Matäus 18:15-17).

¹³ (4) Daut nokomen. Denkj mol äwa de Froag no: “Woo kaun ekj David nodoonen?” Du wurscht biejlikj sellen fuaz waut met dienen Trubbel doonen. Veleicht kaust du daut doonen, waut Jesus en Matäus, Kapitel 18 sajcht, ooda die doa eene goode Lia von rutnämen (läs Matäus 18:15-17). Pauss opp, daut du nich haustich eene Entscheidunk moakst, wan du doll best. Bäd to Jehova, daut hee die halpt die to berujen un daut hee die Weisheit jeft, daut du daut rajchte doonen kaust. Vetru uk wieda opp diene Frind un nemm dee äare Help aun (Spr. 17:17). Un daut wichtichste es, daut du daut deist, waut Jehova die en sien Wuat toorot (Spr. 3:5-6).

14. Bie waut fa Schwierichkjeiten kaun ons 2. Timotäus 1:12-16; 4:6-11, 17-22 Moot jäwen?

¹⁴ Moakt die wäa von diene Famielje Trubbel wäajen dienen Gloowen? Ooda läfst du en een Launt, wua daut Woakj von Jehova siene Zeijen nich en aule Stekjen frie es ooda soogoa veboden? Dan kaun 2. Timotäus 1:12-16 un 4:6-11, 17-22 die halpen. * Paulus schreef daut, aus hee selfst enjestopt wia.

15. No waut kaust du Jehova froagen?

¹⁵ (1) Bäden. Saj Jehova krakjt, waut dien Trubbel es un woo du die feelst, ea du aunfangst Paulus siene Jeschicht to läsen. Froag Jehova, daut hee die halpt Gruntsauzen to finjen, waut die met dienen Trubbel halpen.

16. Waut beläwd Paulus?

¹⁶ (2) Ons doa nenloten. Stal die daut väa, woo daut fa Paulus wia. Hee wia en Room em Jefenkjnis un en Kjäden. Daut wia nich daut ieeschte Mol, daut se am enstopten. Oba ditmol wia hee sikj secha, daut hee doa nich wudd läwendich rutkomen. Eenje von siene Frind hauden am veloten. Un hee wia aul soo meed, daut hee meist nich mea kunn (2. Tim. 1:15).

17. Waut haud Paulus kunt doonen?

¹⁷ Paulus wudd haben kunt denkjen, daut et bäta jewast wia, nich soo väl to doonen aus Christ, daut se am nich hauden faustjenomen. Ooda hee wudd haben kunt doll sennen äwa dee von Asien, waut am veloten hauden, un denkjen, daut hee sikj uk nich mea opp siene aundre Frind veloten kunn. Oba Paulus deed dit aules nich. Woo kunn hee mootich bliewen un siene Hopninj hoolen?

18. Waut deed Paulus en siene schwoare Loag?

¹⁸ (3) Doaräwa nodenkjen. Denkj äwa de Froag no: “Waut deed Paulus met sienen Trubbel?” Sien Läwen wia en Jefoa, oba fa am wia Jehova ieren daut wichtichste. Un hee docht uk fa wieda doaräwa no, woo hee aundre kunn Moot moaken. Hee veleet sikj opp Jehova un deed emma wada bäden (2. Tim. 1:3). Enne Städ sea aun dee to denkjen, waut am veloten hauden, docht hee leewa aun siene goode Frind, waut am met veschiednet holpen, un wia dankboa fa daut. Un Paulus hieed uk nich opp, Gott sien Wuat to studieren (2. Tim. 3:16-17; 4:13). Un daut wichtichste wia, daut hee sikj gaunz secha wia, daut Jehova un Jesus am leewden. Hee wist, dee hauden am nich em Stäakj jeloten un dee wudden am fa sienen truen Deenst beloonen.

19. Woo deed Jehova Paulus halpen?

¹⁹ Jehova haud Paulus daut aul jesajcht, daut hee wudd vefolcht woaren, wäajen hee een Christ wia (Apj. 21:11-13). Woo holp Jehova am? Hee horcht no Paulus siene Jebäda un jeef am emma wada Krauft (2. Tim. 4:17). Paulus kunn sikj secha sennen, daut hee wudd fa siene true Oabeit beloont woaren. Jehova brocht uk waut von Paulus siene goode Frind bat doa, am met veschiednet to halpen.

20. Waut wist Paulus no Reema 8:38-39 no, un woo kjenn wie am nodoonen?

²⁰ (4) Daut nokomen. Äwalaj mol: “Woo wudd ekj Paulus kjennen nodoonen?” Wie motten ons uk doaropp reedmoaken, daut wie wäajen onsen Gloowen vefolcht woaren (Mar. 10:29-30). Wan wie wellen bie Schwierichkjeiten tru bliewen, dan sell wie nich opphieren met bäden un pinkjlich studieren. Un wie sellen uk doaraun denkjen, daut et sea wichtich es, Jehova to ieren. Wie kjennen ons uk secha sennen, daut Jehova ons emma halpt un daut et kjeena bat doa brinjen kaun, daut Jehova ons nich mea leeft (läs Reema 8:38-39; Heb. 13:5-6).

21. Waut holp Aya un Hector, daut dee met äare Schwierichkjeiten kunnen foadich woaren?

²¹ De Biespels ut de Schreft kjennen die en aule Loagen Moot jäwen. Aya es eene Pionia-Sesta en Jaupaun. See sajcht, daut ar de Jeschicht von Jona jeholpen haft, nich mea soo väl Angst to haben, wan see effentlich prädicht. Un Hector es een Jung von Indoneesien un siene Elren sent nich Jehova siene Zeijen. Daut Biespel von Rut brocht am bat doa, mea von Jehova to lieren un am to deenen.

22. Woo kaust du ut de biblische Videos noch mea rutkjrieen un uk ut de Artikjels “Ahmt ihren Glauben nach”?

²² Wua kaust du noch mea soone biblische Biespels finjen, waut die Moot jäwen? Na, en onse Videos, en de väajeläsde biblische Jeschichten un en de Artikjels “Ahmt ihren Glauben nach”. * Dee sent fein reedjemoakt un kjennen die halpen, die dise Jeschichten noch bäta väatostalen. Froag Jehova no Help, daut du krakjt daut finjst, waut die fält, ea du dise Jeschichten kjikjst, horchst ooda läst. Lot die doa nenn un stal die daut väa, woo daut fa dee wia. Denkj doaräwa no, waut dise true Menschen deeden un woo Jehova an holp, met äare Schwierichkjeiten foadich to woaren. Dan proow daut, waut du jelieet hast, soo goot aus mäajlich notokomen. Dank Jehova uk fa aul daut, waut hee nu aul fa die deit. Un wies, woo dankboa du best, doaderch daut du doaropp schaufst aundre Moot to moaken un dee to halpen.

23. Waut vesprakjt Jehova ons, soo aus Jesaja 41:10, 13 sajcht?

²³ Daut Läwen en dän Soton siene Welt es nich emma leicht un eenjemol weet wie nich, waut wie doonen sellen (2. Tim. 3:1). Oba wie brucken nich Angst haben. Jehova weet, waut wie derchmoaken. Un wan ons Help fält, dan woat hee ons met siene stoakje rajchte Haunt hoolen, soo aus hee daut vesproaken haft (läs Jesaja 41:10, 13). Wie kjennen ons gaunz secha sennen, daut hee ons halpen woat. Un derch de Schreft woa wie de Krauft kjrieen, daut wie kjennen met aul onse Schwierichkjeiten foadich woaren.