10. ARTIKJEL FA DAUT STUDIUM
Jie kjennen junt “de oole Natua” uttrakjen
“Trakjt junt de oole Natua ut met äare Woakjen” (KOL. 3:9, NW)
LEET 29 Wie sent no Gott sienen Nomen jenant
WAUT WIE SEENEN WOAREN *
1. Woo wia ons Läwen, ea wie aunfungen de Bibel to studieren?
WOO wia dien Läwen, ea du met Jehova siene Zeijen de Bibel studieezhd? Väle von ons wellen doa nich mol äwa nodenkjen. Soo aus wie jesonnen wieren un woo wie ons oppstalden, wia krakjt soo aus daut, waut de Welt fa rajcht un orrajcht tald. Wie hauden dan “nuscht to hopen un wieren onen Gott en dise Welt” (Efs. 2:12). Aus wie aunfungen de Bibel to studieren, endat sikj ons gaunzet Läwen.
2. Waut wortst du en, aus du aunfungst de Bibel to studieren?
2 Aus du de Bibel studieezhd, kust du seenen, daut du eenen himlischen Voda hautst, waut die sea leewd. Du wortst uk en, wan du Jehova jefaulen un Poat von siene Famielje sennen wust, dan wurscht du motten väl en dien Läwen un aun diene Jesennunk endren. Du wurscht motten lieren daut to doonen, waut Jehova fa rajcht talt (Efs. 5:3-5).
3. Waut well Jehova no Kolossa 3:9-10 no von ons haben, un waut woa wie en disen Artikjel seenen?
3 Wäajen Jehova ons Schepfa un ons himlischa Voda es, kaun hee bestemmen, woo siene Famielje sikj benämen saul. Un hee velangt, daut wie de oole Natua uttrakjen sellen, ea wie ons deepen loten (läs Kolossa 3:9-10, NW *). * Deejanje, waut sikj wellen deepen loten, woat dis Artikjel halpen dree Froagen to beauntwuaten. 1. Waut es “de oole Natua”? 2. Wuarom well Jehova, daut wie de oole Natua uttrakjen? 3. Woo kjenn wie daut doonen? Un soone, waut sikj aul haben deepen loten, woat dis Artikjel halpen, daut dee nich trigjgonen un wada soo denkjen un haundlen, aus dee ea deeden.
WAUT ES “DE OOLE NATUA”?
4. Waut deit soona, waut von “de oole Natua” kontrolt woat?
4 Soona, waut von “de oole Natua” kontrolt woat, denkjt un haundelt jeweenlich soo, aus daut Fleesch well. Veleicht denkjt dee bloos aun sikj, es leicht doll, es ondankboa un stolt. Dee jleicht daut veleicht uk schwiensche Bilda un Videos to kjikjen un Films, wua Jewault ooda Onmoral bennen es. Secha haft soona eenje goode Sieden, un dee feelt sikj veleicht uk schuldich wäajen daut, waut dee deit un sajcht. Oba sien Wensch es nich stoakj jenuach, daut dee daut endat, woo dee denkjt un waut dee deit (Gal. 5:19-21; 2. Tim. 3:2-5).
Wan wie ons “de oole Natua” uttrakjen, dan woaren de fleeschelje Jesennunk un Woakjen ons nich mea kontrollen kjennen (See Varsch 5) *
5. Kjenn wie de oole Natua gaunz auflajen? Laj daut ut (Aposteljeschicht 3:19).
5 Wäajen wie aula onvolkomen sent, woa wie kjeenmol aule schlajchte Jedanken ooda Wenschen auflajen kjennen. Eenjemol woa wie waut sajen ooda doonen, waut wie lota beschoden (Jer. 17:9, NW; Jak. 3:2). Oba wan wie de oole Natua uttrakjen, dan woaren de fleeschelje Jesennunk un Woakjen ons nich mea kontrollen kjennen. Wie woaren dan gaunz aundre Menschen sennen (Jes. 55:7; läs Aposteljeschicht 3:19).
6. Wuarom rot Jehova ons too, schlajchte Jedanken un schlajchte Wenschen auftolajen?
6 Jehova rot ons too, daut wie schlajchte Jedanken un schlajchte Wenschen auflajen sellen, wäajen hee ons sea leeft un well, daut ons daut goot gonen saul (Jes. 48:17-18). Hee weet, daut wie ons selfst un uk aundre bloos schoden, wan wie schlajchte Wenschen nogonen. Am deit daut wee, wan hee sitt, daut wie ons un uk aundre weedoonen.
7. Waut kjenn wie aula selfst entscheiden no Reema 12:1-2 no?
7 Wan wie proowen ons Läwen to endren, woaren eenje von onse Frind un Famielje aum Aunfank veleicht äwa ons spotten (1. Pet. 4:3-4). Veleicht sajen dee, daut wie daut Rajcht haben to doonen, waut emma ons jankat un daut wie nich brucken no aundre horchen. Oba deejanje, waut sikj nich doano rechten, waut Jehova fa rajcht talt, kjennen uk nich emma daut doonen, waut an jankat. Rajcht jesajcht loten dee too, daut de Welt, waut von dän Soton beharscht woat, an väasajcht (läs Reema 12:1-2). Wie aula kjennen entscheiden, aus wie de oole Natua hoolen wellen, waut soo es aus dän Soton siene Welt, ooda aus wie tooloten, daut Jehova ons halpt, soon gooda Mensch to woaren, aus daut vondoag dän Dach mäajlich es (Jes. 64:7).
WOO KAUST DU DIE DE OOLE NATUA UTTRAKJEN?
8. Waut woat ons halpen een schlajchtet Denkjen un schlajchte Wenschen tochtoloten?
8 Jehova weet, daut daut Tiet brucken woat un daut wie ons aunstrenjen motten, een schlajchtet Denkjen un schlajchte Jewanheiten tochtoloten (Psa. 103:13-14). Oba derch sien Wuat, sienen Jeist un siene Organisazion jeft Jehova ons de Weisheit, Krauft un Help, waut ons fält, daut wie ons Läwen endren kjennen. Onen Twiewel haft hee die aul jeholpen. Nu woa wie eenjet seenen, waut du noch doonen kaust, om de oole Natua auftolajen, soo daut du die kaust deepen loten.
9. Met waut kaun Gott sien Wuat die halpen?
9 Bruck de Schreft, om die fein to unjasieekjen. Gott sien Wuat es soo aus een Spieejel, waut die halpen kaun to seenen, woo du denkjst, rätst un haundelst (Jak. 1:22-25). Dien Bibelliera un uk aundre erfoarne Christen kjennen die Rot jäwen. Dee kjennen die biejlikj met de Schreft halpen to seenen, waut diene goode un schlajchte Sieden sent. Dee kjennen die uk lieren, woo du selfst biblischen Rot finjen kaust, waut die halpen woat, schlajchte Jewanheiten tochtoloten. Jehova es emma reed die to halpen. Hee weet mau rajcht, waut du em Hoat hast (Spr. 14:10; 15:11). Moak die daut to eene Jewanheit to bäden un jieda Dach sien Wuat to studieren.
10. Waut hast du von daut jelieet, waut Elie beläwd?
10 Sie die secha, daut daut, waut Jehova fa rajcht talt, emma daut baste es. Aules, waut Jehova von ons haben well, es ons toom gooden. Dee, waut sikj no daut rechten, waut Jehova fa rajcht talt, woaren sikj selfst waut wieet feelen, eenen Senn em Läwen haben un werkjlich schaftich sennen (Psa. 19:8-12). Oba dee, waut daut nich doonen, woaren de Foljen to späaren kjrieen, waut doa komen, wan dee daut doonen, waut daut Fleesch well. See wie mol, waut Elie doaräwa sajcht, wan eena sikj nich doano recht, waut Gott fa rajcht talt. Hee wort von Elren oppjetrocken, waut Jehova leewden. Oba aus Elie een Jugentlicha wia, socht hee sikj schlajchte Frind. Hee funk aun Droggs to brucken, een schwienschet Läwen to fieren un to stälen. Elie vetalt, daut hee uk emma wuttja wort un Jewault brukt. Hee sajcht: “Ekj deed eefach aul daut, waut ekj jelieet haud, waut een Christ nich doonen sull.” Oba hee vegaut nich, waut hee bie junk jelieet haud. Met de Tiet funk hee wada aun de Bibel to studieren. Hee schauft sea doaraun, daut hee siene schlajchte Jewanheiten tochleet, un aune 2000 leet hee sikj dan deepen. Woo es am daut togood jekomen, no Jehova siene Jesazen un Gruntsauzen to läwen? Elie sajcht: “Nu hab ekj ennalich Fräd un een goodet Jewessen.” * Dise Erfoarunk wiest, daut wie ons selfst bloos weedoonen, wan wie nich no Jehova siene Jesazen un Gruntsauzen läwen. Oba Jehova es mau rajcht dan reed soone to halpen, äa Läwen to endren.
11. Waut haust Jehova?
11 Lia daut to haussen, waut Jehova haust (Psa. 97:10). De Schreft sajcht, daut Jehova “stolte Uagen, eene Tung dee Läajes rät, Henj dee oschuldje Menschen doot moaken”, haust (Spr. 6:16-17). Hee kaun uk “de blootdarschtje un veleidende Menschen” sea schlajcht lieden (Psa. 5:7). Jehova haust soone Jesennunk un soone Woakjen soo sea, daut hee en Noah siene Tiet aule schlajchte Menschen venichten deed, wäajen dee soo väl Jewault oppe Ieed jebrocht hauden (1. Mo. 6:13, NW). Jehova leet uk derch dän Profeet Maleachi sajen, daut hee deejanje haust, waut sikj hinjalestich von äaren oschuldjen Poatna scheeden loten. Gott nemt dee äare Aunbädunk nich aun, un hee woat dee bestrofen, waut soone Sachen doonen (Mal. 2:13-16; Heb. 13:4).
Wan wie waut doonen, waut Jehova fa schlajcht talt, saul ons daut soo jäajenaun sennen aus schlajchtjewordnet Äten (See Varsch 11-12)
12. Waut bediet daut, “een Aufschu [haben] fa daut, waut schlajcht es”?
12 Jehova well, daut wie “een Aufschu [haben] fa daut, waut schlajcht es” (Reem. 12:9). Daut Wuat “Aufschu” beschrift een stoakjet Jefeel. Daut bediet, daut wie waut sea haussen, un daut ons daut äakjelt. Woo wurscht du die feelen, wan doa wäa haben wull, daut du sust waut schlajchtjewordnet äten? Wan du doa noch mau bloos aun dochst, wudd die aul kolkjren. Biejlikj soo sull ons daut aul äakjlen, wan wie noch mau bloos doaraun denkjen, waut to doonen, waut Jehova nich jefelt.
13. Wuarom mott wie oppaussen, waut wie fa Jedanken fieren?
13 Pauss no dien denkjen opp. Daut, waut wie doonen, es krakjt doano, waut wie denkjen. Doawäajen säd Jesus, daut wie nich äwa soont nodenkjen sullen, waut ons bat doa brinjen kunn, eene schwoare Sind to begonen (Mat. 5:21-22, 28-29). Es daut nich soo, daut wie onsen himlischen Voda jefaulen wellen? Doawäajen es daut soo wichtich, daut wie schlajchte Jedanken fuaz aufwiesen, wan dee oppkomen!
14. Woo wiesen onse Wieed, wäa wie sent, un äwa waut vonne Froagen sull wie nodenkjen?
14 Pauss opp, waut du sajchst. Jesus säd: “Waut utem Mul rut kjemt, kjemt utem Hoaten” (Mat. 15:18). Onse Wieed sajen väl doaräwa, woo wie sent. Doawäajen wudd jieda eena doaräwa nodenkjen kjennen: “Saj ekj de Woarheit, wan mie daut uk Trubbel brinjt? Un wan ekj befriet sie, pauss ekj dan doafäa opp, daut ekj nich no aundre schmeichel? Pauss ekj fa schwiensche Wieed krakjt soo sea opp aus fa eene Krankheit? Bliew ekj ruich, wan mie wäa prooft to oajren?” Ons woat daut toom gooden sennen, wan wie äwa soone Froagen nodenkjen. Ons räden kaun soo sennen aus de Kjneep aun de Kjleeda. Wan wie dee opmoaken, dan es daut leichta dee uttotrakjen. Biejlikj soo es daut, wan wie ons aunstrenjen, nich schlajchte Räd to haben un nich to lieejen, dan woat ons daut väl leichta sennen, de oole Natua uttotrakjen.
15. Waut bediet daut, dän oolen Mensch, ooda de oole Natua, aum Pol to noaglen?
15 Sie reed, dien bastet to doonen. De Apostel Paulus brukt een goodet Jlikjnis toom wiesen, woo wichtich daut es, daut wie ons Läwen endren sellen. Hee schreef, daut wie dän oolen Mensch, ooda de oole Natua, sullen aum Pol noaglen (Reem. 6:6). Soo, Jesus wia reed sikj aum Pol noaglen to loten, om Jehova to jefaulen. Wan wie Jesus sien Biespel nodoonen wellen, dan sell wie uk reed sennen, de Jesennunk un Woakjen doottomoaken, waut Jehova haust. Bloos dan woa wie kjennen een reinet Jewessen haben un de Hopninj noch mol fa eewich to läwen (Joh. 17:3; 1. Pet. 3:21). Denkj wie doaraun, daut Jehova daut, waut hee fa rajcht talt, nich no ons aunpaussen woat. Wie motten ons endren, daut wie ons kjennen aun daut aunpaussen, waut Jehova fa rajcht talt (Jes. 1:16-18; 55:9).
16. Wuarom motst du die gaunz eenich sennen, wieda jäajen schlajchte Wenschen to kjamfen?
16 Kjamf fa wieda jäajen schlajchte Wenschen. Mau rajcht wan du aul jedeept best, woascht du wieda motten jäajen schlajchte Wenschen kjamfen. See wie mol, waut Maurício beläwd. Aus hee noch junk wia, funk hee aun sikj met aundre Mana to veläwen. Met de Tiet troff hee dan Jehova siene Deena un funk aun, de Bibel to studieren. Nodäm aus hee sikj dan jeendat haud, leet hee sikj aune 2002 deepen. Wan Maurício Jehova uk aul fa Joaren jedeent haft, sajcht hee: “Ekj mott toostonen, daut ekj emma wada hab must jäajen schlajchte Wenschen kjamfen.” Oba hee lat sikj doavon nich mootloos moaken. Enne Städ daut sajcht hee: “Mie jeft daut Moot, wan ekj doaräwa nodenkj, daut ekj Jehova jefaulen kaun, wan ekj soone Wenschen nich nogo.” *
17. Woo jeft die daut Moot, waut Nabiha beläwd?
17 Bäd Jehova om Help, un velot die opp sienen Jeist un nich opp diene Krauft (Gal. 5:22; Filip. 4:6). Wie motten ons sea aunstrenjen, wan wie onse oole Natua uttrakjen wellen un dee nich mea auntrakjen. Besee wie ons mol een Biespel. Nabiha wia noch mau sas Joa, aus äa Voda ar veleet. See sajcht: “Daut sad mie grulich sea too.” Aus see oppwoss, wort Nabiha sea wuttich un hunjsch. See funk aun Droggs to vekjeepen, wort faustjenomen un must fa een poa Joa em Jefenkjnis nenn. Jehova siene Zeijen, waut doa em Jefenkjnis prädjen deeden, fungen aun met Nabiha de Bibel to studieren un see endad sikj sea. See sajcht: “Eenjet von daut, waut ekj mie aunjewant haud, wia mie nich schwoa opptojäwen. Oba met schmieekjen opptohieren, daut wia noch eene gaunz aundre Sach.” See kjamft mea aus een Joa doamet, daut see sikj daut kunn aufwanen. Woo deed see daut? See sajcht: “Daut dolste, waut mie holp met schmieekjen opptohieren, wia, daut ekj räajelmässich to Jehova bäden deed.” Nu sajcht see emma to aundre: “Wan ekj mie endren kunn, om Jehova to jefaulen, dan kaun jieda eena daut!” *
DU KAUST BAT DOA KOMEN, DIE DEEPEN TO LOTEN!
18. Waut haben väle kunt doonen, soo aus 1. Korinta 6:9-11 sajcht?
18 Mank de Christen ieeschtemma, waut Jehova utjewält haud toom met Christus toop rejieren, wieren soone mank, waut ea een sea schlajchtet Läwen fieeden. Eenje von dee wieren biejlikj Ehebräakja, fieeden een homoseksuellet Läwen ooda wieren Stäla. Oba met de Help von Jehova sienen heiljen Jeist kunnen dee äare oole Natua auflajen (läs 1. Korinta 6:9-11). Krakjt soo haft de Bibel vondoag dän Dach aul millionende Menschen jeholpen, äa Läwen to endren. * Dee kunnen sea schlajchte Jewanheiten tochloten, wua dee sea faust aun wieren. Dee äa Biespel wiest, daut du die uk endren kaust un schlajchte Jewanheiten tochloten, daut du die kaust deepen loten.
19. Waut woat de näakjsta Artikjel ons wiesen?
19 Dee, waut sikj wellen deepen loten, motten sikj nich bloos de oole Natua uttrakjen, oba sikj uk met de niee Natua kjleeden. De näakjsta Artikjel woat ons wiesen, woo wie daut doonen kjennen un woo aundre ons doamet halpen kjennen.
LEET 41 Hia mien Jebäd
^ Daut wie ons kjennen deepen loten, mott wie reed sennen onse Natua to endren. Dis Artikjel woat ons halpen to seenen, waut de oole Natua es, wuarom wie dee uttrakjen sellen un woo wie daut doonen kjennen. De näakjsta Artikjel woat ons dan wiesen, woo wie ons fa wieda de niee Natua auntrakjen kjennen, mau rajcht wan wie aul jedeept sent.
^ Kolossa 3:9-10 (NW): “Doot junt unjarenaunda nich väalieejen. Trakjt junt de oole Natua ut met äare Woakjen, un kjleet junt met de niee Natua, waut derch de woare Erkjantnis nie jemoakt woat, no daut Bilt von dän, waut dee jemoakt haft.”
^ WIEED UTJELAJCHT: De Sauz “trakjt junt de oole Natua ut” meent, daut eena soone Enstalunk ooda soone Wenschen auflajcht, waut Jehova nich jefaulen. Doamet saul eena aunfangen, ea eena sikj deepen lat (Efs. 4:22).
^ Doatoo jeit noch mea notoläsen en dän Artikjel “Die Bibel hat ihr Leben verändert – ‘Ich musste zu Jehova zurückkehren’” em Wachtturm vom 1. Aprell 2012.
^ Doatoo jeit noch mea notoläsen en dän Artikjel “Die Bibel hat ihr Leben verändert – ‘Sie waren sehr nett zu mir’” em Wachtturm vom 1. Mei 2012.
^ Doatoo jeit noch mea notoläsen en dän Artikjel “Die Bibel hat ihr Leben verändert – ‘Ich war reizbar und explosiv’” em Wachtturm vom 1. Oktooba 2012.
^ See dän Kausten “ De Schreft haft äa Läwen veendat”.
^ BILTBESCHRIEWUNK: Krakjt soo aus eena sikj eenen oolen Wanikj uttrakjt, soo mott wie uk doaraun schaufen, soone Jesennunk un Woakjen auftolajen, waut schlajcht sent.
