1. Waut felt väle Intressieede opp, waut no onse Toopkomes komen? (See uk daut Bilt.)

 STAL die mol väa, eene Lied sent toom ieeschte Mol biem Vesaumlungshus von Jehova siene Zeijen. Dee jeit daut sea to Hoaten, woo an oppjenomen woat un woo de Breeda un Sestren sikj unjarenaunda Leew bewiesen. Oppem Wajch no Hus sajcht de Fru to äaren Maun: “Jehova siene Zeijen sent gaunz aundasch. Mie jeit daut scheen, met dee toop sennen.”

2. Wuarom haben eenje oppjehieet, Jehova to deenen?

² De Leew enne Vesaumlunk es waut sea besondret. Oba Jehova siene Zeijen sent nich volkomen (1. Joh. 1:8). Je dolla wie onse Breeda un Sestren kjanen lieren, je leichta es daut, daut wie dee äare Fäla uk seenen (Reem. 3:23). Daut es schod, daut eenje oppjehieet haben, Jehova to deenen, wäajen de Breeda un Sestren äare Fäla.

3. Aun waut sent Jesus siene woare Nofolja to kjanen? (Johanes 13:34-35).

³ Kjikj noch eemol no dän Teemavarsch (läs Johanes 13:34-35). Waut sajcht daut doa, aun waut Christus siene woare Nofolja wudden to kjanen sennen? Daut wia de Leew, nich daut dee wudden volkomen sennen. Denkj uk doaraun, daut Jesus nich säd: “Dan woa jie seenen, daut jie miene Jinja sent”. Hee säd: “[Dan] woat aulemaun seenen, daut jie miene Jinja sent.” Met dit lieed Jesus, daut nich bloos siene Deena, oba uk dee, waut nich to de Vesaumlunk jehieeden, siene woare Nofolja aun de Leew kjanen wudden, waut dee unjarenaunda hauden.

4. Waut wellen eenje veleicht äwa de woare Christen weeten?

 ⁴ Eenje, waut nich Jehova siene Zeijen sent, kunnen denkjen: Woo wiest de Leew, wäa Jesus siene woare Nofolja sent? Woo wees Jesus siene Apostel Leew? Un woo kjenn wie Jesus sien Biespel nodoonen? Mau rajcht dee, waut aul jedeept sent, sellen äwa dise Froagen nodenkjen. Daut woat an halpen, mea Leew to wiesen, besonda wan dee met aundre äare Fäla motten foadich woaren (Efs. 5:2).

5. Laj Jesus siene Wieed en Johanes 15:12-13 ut.

⁵ Jesus lieed, daut siene Nofolja wudden aun eene besondre Leew to kjanen sennen (läs Johanes 15:12-13). Jesus säd to an: “Dit es mien Jeboot, daut jie junt unjarenaunda soo goot sent, aus ekj junt goot sie.” Waut meent daut? Daut meent, daut eena aundre dolla leeft aus sikj selfst. Daut es eene Leew, waut Christen wudd bat doa brinjen, fa äare Breeda to stoawen, wan daut needich wia. b

6. Woo wiest Gott sien Wuat, daut Leew wichtich es?

⁶ Gott sien Wuat lieet, daut Leew sea wichtich es. Väl Menschen äare baste Bibelvarzhen sent dise: “Gott es Leew” (1. Joh. 4:8, NW). “Du saust dienen Noba jrod soo goot sennen aus die selfst” (Mat. 22:39). “Leew dakjt väle Sinden too” (1. Pet. 4:8). “Leew haft kjeen Enj” (1. Kor. 13:8). Dise un uk aundre Bibelvarzhen moaken dietlich, woo wichtich daut es, aun Leew to schaufen un dise besondre Ieejenschoft to bewiesen.

7. Wuarom kaun de Soton de Menschen nich bat doa brinjen, woare Leew to haben un veeent to sennen?

⁷ Väl Menschen wundren: “Woo kaun  eena dän woaren Gloowen finjen? Aule Jemeenten sajen, daut see de Woarheit lieren, oba dee lieren aula veschiednet äwa Gott.” De Soton haft väl faulsche Jemeenten oppjestalt un Menschen doaderch dral jemoakt. Oba hee kaun nich eene Jemeent oppstalen, waut oppe gaunze Welt soo es aus eene Famielje un wua dee sikj aula leewen. Bloos Jehova kaun daut doonen. Un daut es to vestonen, wiels woare Leew kjemt von Jehova. Bloos dee, waut Jehova sienen Jeist un sienen Säajen haben, kjennen woare Leew unjarenaunda haben (1. Joh. 4:7). Un daut es uk, wuawäajen Jesus säd, daut bloos siene Nofolja woare Leew haben wudden.

8-9. Waut haft daut aun väle jedonen, de woare Leew to seenen, waut mank Jehova siene Zeijen es?

⁸ Soo aus Jesus verutsäd, haben väle siene woare Nofolja doaraun jekjant, wiels dee Leew unjarenaunda hauden. Een Brooda biejlikj, dee Ian heet, weet noch, woo daut wia, aus hee daut ieeschte Mol oppem Kongress wia bie een Sport-Stadion. Ian wia een poa Moonat trigj bie daut Stadion jewast fa een Sportspäl. Hee sajcht: “De Menschen oppem Kongress stalden sikj gaunz aundasch opp aus dee bie daut Sportspäl. De Zeijen wieren respakjtvoll un hauden sikj schmock aunjetrocken, un äare Kjinja stalden sikj fein opp.” Hee sajcht noch: “Daut wichtichste wia: Dise Menschen leet frädlich un tofräd. Daut wia krakjt, waut ekj mie em Läwen sea wenscht. Ekj hab vejäten, von waut de Räden sikj haundelden, oba ekj weet noch krakjt, woo de Zeijen sikj oppstalden.” c Soon Vehoolen hab wie, wiels wie woare Leew unjarenaunda haben. Wäajen wie onse Breeda un Sestren leewen, sent wie leeftolich un respakjtvoll to dee.

⁹ Eenen Brooda, waut John heet, jinkj daut krakjt soo, aus hee aunfunk, no de Toopkomes to wanken. Hee sajcht: “Dee stalden sikj soo fein opp, . . . daut ekj eefach soo docht, daut wieren Heilje. De woare Leew, waut dee hauden, wees mie kloa, daut ekj dän woaren Gloowen jefungen haud.” d Soone Erfoarungen jeft daut emma wada un daut bewiest, daut Jehova siene Deena de woare Christen sent.

10. Wanea hab wie eene besondre Jeläajenheit, aundre christelje Leew to bewiesen? (See uk de Footnoot.)

¹⁰ Soo aus wie ieescht aul jesajcht haben, es nich eena von onse Breeda un Sestren volkomen. Noch mol woat doa wäa waut sajen ooda doonen, waut ons oajat (Jak. 3:2). e Dan jroz hab wie de besondre Jeläajenheit to wiesen, daut wie woare Leew haben, derch daut, waut wie sajen un doonen. Woo kaun Jesus sien Biespel ons halpen, dit to doonen? (Joh. 13:15).

11. Waut vonne Schwakheiten hauden Jakobus un Johanes? (See uk daut Bilt.)

¹¹ Jesus velangd nich, daut siene Nofolja volkomen wieren. Enne Städ daut holp hee an leeftolich, aun äare Schwakheiten to schaufen un Endrungen to moaken, om Jehova to jefaulen. Eemol hauden Jakobus un Johanes biejlikj äare Mutta doatoo berät, Jesus no een huaget Aumt en sien Kjennichrikj to froagen (Mat.  20:20-21). Waut Jakobus un Johanes deeden, wees, daut dee stolt wieren un daut dee wullen wichtja sennen aus aundre (Spr. 16:18).

12. Wieren daut bloos Jakobus un Johanes, dee doa schwake Sieden hauden? Laj daut ut.

¹² Oba nich bloos Jakobus un Johanes äare schwake Sieden wieren don to seenen. Kjikj mol, woo de aundre Apostel sikj oppstalden: “Aus de Tieen daut hieeden, wieren see oajalich äwa dee beid Breeda” (Mat. 20:24). Wie kjennen ons väastalen, daut Jakobus un Johanes un de aundre Apostel sikj jesträden haben. Veleicht säden de aundre soo waut aus dit: “Waut ploacht junt, daut jie no soon huaget Aumt em Kjennichrikj froagen? Jie sent nich de eensje, waut met Jesus toop schwoa jeschauft haben. Wie vedeenen daut krakjt soo sea, een huaget Aumt to kjrieen, aus jie!” Wie weeten nich, waut dee krakjt jesajcht haben. Oba endoont woo daut wia, de Apostel hauden opp dise Sauz vejäten, daut dee emma sullen eena dän aundren Leew wiesen.

13. Woo jinkj Jesus met de schwake Sieden von siene Apostel om? (Matäus 20:25-28).

¹³ Woo jinkj Jesus met dise Loag om? Hee wort nich doll. Hee säd nich, daut hee no bätre Apostel sieekjen wudd; Mana, waut deemootja wieren un waut eena dän aundren emma wudden leeftolich behaundlen. Enne Städ daut wia Jesus jeduldich met dee, wiels hee wist, dee  wullen daut rajchte doonen (läs Matäus 20:25-28). Hee hieed nich opp, dee leeftolich to behaundlen, wan dee sikj uk aul foaken doaräwa jesträden hauden, wäa de jratsta mank an wia (Mar. 9:34; Luk. 22:24).

14. Woo wieren Jesus siene Apostel oppjewossen?

¹⁴ Fa secha docht Jesus doaraun, woo siene Apostel oppjewossen wieren (Joh. 2:24-25). De Jemeentenleidasch to dee Tiet lieeden, daut bloos dee, waut een huaget Aumt hauden, wichtje Menschen wieren (Mat. 23:6; see uk daut Video “Die vorderen Sitze in der Synagoge” en de Erkjläarunk toom studieren von Matäus 23:6 en de Studiabibel nwtsty). Un dee dochten uk, daut see bäta wieren aus aundre (Luk. 18:9-12). f Jesus wist, daut dit waut doaraun deed, woo siene Apostel äwa sikj selfst un äwa aundre dochten (Spr. 19:11). Hee velangd nich, daut siene Jinja kjeenmol Fäla muaken. Un hee wia leeftolich to dee, wan dee uk nich emma daut rajchte deeden. Hee wist, dee wieren goode Menschen, un doawäajen holp hee an jeduldich, deemootja to sennen un sikj unjarenaunda to leewen, enne Städ emma proowen, de jratsta to sennen.

15. Waut kjenn wie von Jakobus un Johanes äare Jeschicht lieren?

¹⁵ Waut kjenn wie von Jakobus un Johanes äare Jeschicht lieren? Daut wia orrajcht, daut dee no een huaget Aumt em Kjennichrikj fruagen. Oba de aundre Apostel wieren uk orrajcht, wäajen dee sagen doa nich no, daut dee veeent bleewen. Jesus oba jinkj leeftolich met aule 12 Apostel om. Waut lia wie doavon? Waut doa talt, es nich bloos, waut aundre doonen, oba uk, woo wie met dee äare Fäla un schwake Sieden omgonen. Waut kaun ons doabie halpen? Wan wie ons met eenen Gloowesbrooda doll woaren, dan kjenn wie ons dit froagen: “Wuarom oajat mie daut? Wiest mie daut, daut ekj eene Schwakheit hab, wua ekj aun schaufen saul? Kaun daut sennen, daut deejanja, wäa mie doll jemoakt haft, derch schwoare Trubbels jeit? Wan ekj uk jleew, daut ekj Uasoak hab, doll to sennen, kaun ekj dän Leew wiesen un dän daut eefach vejäwen?” Je leeftolja wie onse Breeda behaundlen, je kloara wies wie, daut wie Jesus siene woare Nofolja sent.

16. Waut kjenn wie noch von Jesus lieren?

¹⁶ Von Jesus sien Biespel lia wie uk, daut wie onse Breeda un Sestren sellen proowen to vestonen (Spr. 20:5). Na jo, Jesus wist, waut de Menschen em Hoat hauden, un wie nich. Oba wie kjennen met aundre Breeda un Sestren jeduldich sennen, wan dee ons beleidjen (Efs. 4:1-2; 1. Pet. 3:8). Un ons woat daut leichta sennen, wan wie ons doa nennloten, woo dee oppjewossen sent. See wie mol een Biespel.

17. Woo holp eenen Kjreisoppsechta daut, eenen Gloowesbrooda bäta kjanen to lieren?

¹⁷ Een Kjreisoppsechta kaun sikj von eenen Brooda von eene Vesaumlunk en Oost-Afrika besennen. Ieeschtlich haud de Kjreisoppsechta jedocht, daut de Brooda nich leeftolich wia. Hee sajcht: “Ekj wort mie eenich, dän Brooda bäta kjanen to lieren, enne Städ dän bloos utem Stich to gonen.” Wiels de Kjreisoppsechta  dit deed, wort hee en, woo de Brooda oppjewossen wia un waut daut doamet to doonen haud, woo hee to aundre wia. De Kjreisoppsechta sajcht noch: “Aus ekj daut enwort, woo schwoa disen Brooda daut wia, sikj to endren, daut hee met aundre kunn delenjd komen, un woo sea hee aul jeendat haud, must ekj dän eefach bewundren. Wie worden goode Frind.” Daut es werkjlich soo. Wan wie ons en onse Breeda un Sestren äare Loagen nennloten, dan es ons daut leichta, dee Leew to wiesen.

18. Waut vonne Froagen kjenn wie ons stalen, wan ons wäa beleidicht haft? (Spricha 26:20).

¹⁸ Eenjemol feelt sikj ons daut soo, wie motten met dän räden, waut ons beleidicht haft. Oba daut ieeschte sell wie äwa soone Froagen aus dit nodenkjen: “Weet ekj neiw, waut doa väajegonen es?” (Spr. 18:13). “Kaun daut sennen, daut dee daut nich met Fliet jedonen haft?” (Liera 7:20). “Hab ekj uk mol soonen Fäla jemoakt?” (Liera 7:21-22). “Wudd de Trubbel bloos noch jrata woaren, wan ekj dän doa wudd von aunräden?” (Läs Spricha 26:20.) Wan wie ons Tiet nämen, äwa soone Froagen notodenkjen, dan kaun daut sennen, daut wie ons eenich woaren, dän Brooda Leew to wiesen un daut eefach to vejäten.

19. Waut best du die eenich to doonen?

¹⁹ Jehova siene Zeijen wiesen, daut see Jesus siene woare Nofolja sent. Un jieda eena von ons wiest, daut hee uk eena von Jesus siene woare Nofolja es, wan hee siene Breeda un Sestren woare Leew wiest, wan dee uk Fäla moaken. Wan wie woare Leew haben, halp wie aundre, dän woaren Gloowen to finjen un met ons toop Jehova auntobäden, dee Leew es. Well wie ons eenich sennen, wieda soone Leew to wiesen, aun dee de woare Christen to kjanen sent.