1. Waut wenschen Elren sikj?

 JIE Elren, wie weeten, daut jie june Kjinja halpen wellen, Jehova emma bäta kjanen to lieren un am to leewen. Oba wie kjennen Jehova nich seenen. Woo schauft daut dan, daut jie june Kjinja halpen kjennen, daut see Jehova aus eene werkjelje Persoon seenen un am emma noda komen? (Jak. 4:8).

2. Woo kjennen Elren äare Kjinja mea äwa Jehova siene Ieejenschoften lieren?

² Kjinja kjennen Jehova emma noda komen, wan met dee de Bibel studieet woat (2. Tim. 3:14-17). Oba de Bibel rät noch von waut aundret, woo Kjinja von Jehova lieren kjennen. En Spricha es oppjeschräwen, woo een Voda to sienen Sän doavon räd, daut hee kjeenmol Jehova siene Ieejenschoften vejäten sull, waut en de Schepfunk to seenen sent (Spr. 3:19-21). See wie nu mol eenjet, woo Elren de Schepfunk brucken kjennen, om äare Kjinja to wiesen, woo Jehova es.

3. Met waut sellen Elren äare Kjinja halpen?

³ De Bibel sajcht, daut Gott siene “onsechtboare Ieejenschoften … kloa to seenen [sent] von don, aus de Welt jeschaufen wort, wäajen dee sent to erkjanen derch de Sachen, waut jemoakt worden” (Reem. 1:20, NW). Secha jeit junt daut scheen, wan jie met june Kjinja toop kjennen buten sennen. Brukt dise Tiet toom june Kjinja wiesen, woo dee Sachen, “waut jemoakt worden”, met Jehova siene Ieejenschoften toophenjen. See wie mol, waut de Elren en dän Stekj von Jesus lieren kjennen.

4. Woo brukt Jesus de Schepfunk, om siene Jinja waut to lieren? (Lukas 12:24, 27-30).

 ⁴ Kjikj mol, woo Jesus de Schepfunk brukt toom aundre lieren. Hee säd opp eene Sauz to siene Jinja, dee sullen no de Kraujen un no de Lelje kjikjen (läs Lukas 12:24, 27-30). Daut es intressaunt, daut Jesus von soon Voagel un soone Bloom räd, waut siene Jinja goot kjanden, wäajens hee haud goot kunt von waut aundret räden. Veleicht haben de Jinja daut jroz beoobacht, daut de Kraujen äwa an fluagen, ooda dee haben jroz eene Bloom jeseenen. Stal die väa, woo Jesus doa hanwiest, aus hee an dit Jlikjnis vetalt. Doahinja lieet hee siene Jinja, daut äa Voda em Himmel sea friejäwrich un frintlich es. Jehova woat siene true Deena Äten un Kjleedie jäwen, krakjt soo aus hee sikj uk om de Kraujen un de Lelje oppe Stap kjemmat.

5. Woo wudden Elren de Schepfunk brucken kjennen, om äare Kjinja waut von Jehova to lieren?

⁵ Jie Elren, woo kjenn jie Jesus nodoonen, wan jie june Kjinja lieren? Eene Iedee wudd sennen, wan du to june Kjinja von soon Tia ooda soone Plaunt rätst, waut du daut dolste jleichst. Daut wudd uk goot sennen, wan du an dan sajchst, waut see doavon äwa Jehova lieren kjennen. Eene aundre Iedee wudd sennen, jun Kjint to froagen, waut von Tia ooda Plaunt dee daut dolste jleicht. Wan du äwa soont rätst, waut jun Kjint aulmols aul intressieet, dan woat dän daut leichta sennen tootohorchen, wan du dän proofst, waut von Jehova to lieren.

6. Waut von goodet Biespel wia Christopher siene Mame?

⁶ Motten de Elren sikj nu ieescht aules von een Tia ooda eene Plaunt noforschen, ea see äare Kjinja wiesen kjennen, waut see doavon äwa Jehova lieren kjennen? Nich onbedinjt. Jesus biejlikj haft uk nich lang utjelajcht, woo daut schauft, daut de Kraujen äa Fräten kjrieen. Hee räd uk nich lang doavon, woo daut krakjt oabeit, daut de Lelje waussen kaun. Secha wudd jun Kjint daut eenjemol sea intressieren, een bät mea von soont to weeten, oba foaken rieekjt daut too, bloos een bät waut to beoobachten ooda eene kjliene Froag to stalen, om jun Kjint to halpen. See wie mol, waut Christopher em Denkj jehoolen haft von siene Kjintheit. Hee sajcht: “Miene Mame säd foaken waut, waut ons holp, noch eene jratre Wieetschazunk to kjrieen fa de Schepfunk. Wan wie biejlikj dicht bie de Boaj wieren, dan säd see soowaut aus: ‘Kjikjt mol, woo huach un schmock de Boaj sent! Haft Jehova dee nich butajeweenlich jemoakt?’ Ooda wan wie aune Kaunt Mäa wieren, dan säd see: ‘Kjikjt mol, woo väl Krauft dise Walen haben! Es Gott nich sea majchtich?’ Daut see ons opp soont oppmoakjsom muak, brocht ons toom nodenkjen un deed sea väl aun ons.”

7. Woo kaust du june Kjinja daut lieren, äwa de Schepfunk notodenkjen?

⁷ Wan june Kjinja ieescht ella sent, dan kaust du dee lieren, daut dee selfst mea äwa Jehova lieren derch de Schepfunk. Du wurscht biejlikj kjennen äwa waut räden, waut Jehova jemoakt haft, un dan froagen: “Waut wiest die daut von Jehova?” Du woascht die veleicht wundren, waut dee doatoo sajen woaren (Mat. 21:16).

8. Waut vonne Jeläajenheiten hauden de Israeliten, wan dee hinjawäajes wieren?

⁸ Bie de Israeliten sullen de Elren de Kjinja von Jehova siene Jebooten lieren, wan dee “oppem Wajch [jinjen]” (5. Mo. 11:19). De Wäaj en Israel wieren irjentwua oppem Launt un doa wieren foaken  een deel Tieren, Väajel un Bloomen to seenen. Wan eene israelitische Famielje doa wua hinjawäajes wia, dan hauden de Elren foaken de Jeläajenheit, äare Kjinja soont to wiesen, waut Jehova jemoakt haud. Jie Elren haben uk sea soone Jeläajenheiten, june Kjinja von de Schepfunk to lieren. See wie mol, woo een poa Elren daut jedonen haben.

9. Waut kaust du von Punitha un Katya lieren?

⁹ Punitha es eene Mame, waut en eene groote Staut en Indien wont. See sajcht: “Wan wie no ons Frintschoft oppem Launt foaren, dan jeft daut emma eene goode Jeläajenheit, onse Kjinja waut von Jehova siene Schepfunk to lieren. Mie späat sikj daut emma soo, daut onse Kjinja daut väl bäta bejriepen kjennen, wan dee nich enne Staut oppe volle Gaussen sent.” Jie Elren, june Kjinja woaren dee Tiet kjeenmol vejäten, waut jie met an toop en de Natua vebrocht haben. Katya, eene Sesta en Moldawien, sajcht: “Waut mie noch daut dolste denkjt von miene Kjintheit, es dee Tiet, aus miene Elren met mie toop oppem Launt wieren. Ekj sie soo dankboa, daut dee mie von kjlien aun jelieet haben, de Natua to beoobachten un doaderch Jehova to seenen.”

10. Waut kjennen Elren doonen, wan dee nich de Mäajlichkjeit haben, enne Natua nenntofoaren? (See dän Kausten “ Waut Elren halpen kaun”.)

¹⁰ Oba waut, wan daut fa die nich mäajlich es, enne Natua nenntofoaren? Amol, waut uk en Indien wont, sajcht: “Doa, wua ekj won, motten de Elren sea lang schaufen un daut kaun sea dia komen, wan eena enne Natua nennfoaren well. Oba daut jeft uk sea goode Mäajlichkjeiten oppem Park ooda opp een opnet Dak de Schepfunk to beoobachten un met de Kjinja äwa Jehova siene goode Ieejenschoften to räden.” Secha kaust du uk doa dicht bie junt soone Sachen finjen, waut du june  Kjinja wiesen kaust (Psa. 104:24). Daut kaun soowaut sennen aus Väajel, Ojjezeffa, irjent Plaunten ooda sestwaut. Karina von Dietschlaunt sajcht: “Miene Mame jleicht sea Bloomen. Aus ekj een Mejalkje wia, wees see mie aulawäajen de schmocke Bloomen, wan wie toop buten wieren.” Aus Elren kjenn jie uk de Videos un Bieekja brucken, waut wie äwa de Schepfunk haben. Endoont wua jie wonen, jie kjennen june Kjinja halpen, no daut to kjikjen, waut Jehova jemoakt haft. See wie nu waut von Jehova siene Ieejenschoften, waut jie june Kjinja wiesen kjennen.

11. Woo kjennen Elren äare Kjinja halpen, Jehova siene Leew to seenen?

¹¹ Wan du june Kjinja halpen west, Jehova siene Leew to seenen, dan wudd jie toop kjennen beoobachten, woo Tieren met äare Junge omgonen (Mat. 23:37). Du wurscht dee uk doaropp oppmoakjsom moaken kjennen, woo veschieden aules jemoakt es. Karina, von dee wie aul ea räden, säd uk noch: “Wan wie toop buten wieren, säd miene Mame foaken to mie, ekj sull mol wachten un no de Bloomen kjikjen, woo schmock jieda eenselne Bloom sach un woo Jehova siene Leew doaderch to seenen wia. Nu sent aul Joaren vegonen, oba ekj kjikj noch emma sea neiw no de Bloomen. Wan ekj dee see, denkj ekj emma doaraun, woo sea Jehova ons leeft.”

12. Woo kjennen Elren äare Kjinja halpen, Jehova siene Weisheit to seenen? (Psalm 139:14). (See uk daut Bilt.)

¹² Halp june Kjinja uk, Jehova siene Weisheit to seenen. Jehova weet soo väl mea aus wie (Reem. 11:33). Wan jie biejlikj no de Wolkjen kjikjen, wurscht du dee sajen kjennen, daut et en Werkjlichkjeit Wota es, waut doa vom Wint romjeweit woat, aus wudd daut nuscht wäajen (Hiob 38:36-37). Oba du wurscht uk kjennen doavon räden, woo besonda ons Kjarpa es (läs Psalm 139:14). Daut deed een Voda, waut Vladimir heet. Hee vetalt: “Ons Jung wia mol metem Beisikjel omjestalpt un haud sikj aufjeruppat. Oba no een poa Doag wia de Wund aul wiet jeheelt. Dan deeden ekj un miene Fru am utlajen, daut Jehova onsen Kjarpa soo jemoakt haft, daut dee sikj selfst repäaren kaun. Wie säden am uk, daut soone Sachen, waut von Menschen  jemoakt worden, soont nich deeden. Biejlikj eene Koa deit sikj no een Ekjsident nich eefach selfst wada repäaren. Daut holp onsen Jung, daut dee Jehova siene Weisheit bäta vestonen kunn.”

13. Woo kjennen Elren äare Kjinja halpen, Jehova siene Macht to seenen? (Jesaja 40:26).

¹³ Jehova rot ons uk too, daut wie nom Himmel kjikjen sellen un äwa siene groote Macht nodenkjen, woo hee aules opp sienen Plauz hoolen kaun (läs Jesaja 40:26). Du kaust june Kjinja daut uk tooroden. Eene Sesta von Taiwan, waut Tingting heet, vetalt von äare Kjintheit: “Eemol fuaren ekj un miene Mame toop wajch un wie schleepen em Zelt. Wäajen daut wiet auf von de Lichta en de Staut wia, kunn wie dän Stiernhimmel sea kloa seenen. Daut wia krakjt en eene Tiet, wua ekj mie sea väl Sorjen muak, aus ekj wudd kjennen tru bliewen, wäajen miene Schoolpoatna mie daut sea schwoa muaken, Jehova jehuarsom to bliewen. Miene Mame holp mie dan denkjen, daut wan Jehova soo väl Macht haud, daut dee aule Stierns moaken kunn, dan wudd hee uk jenuach Krauft haben, mie met irjent Schwierichkjeiten to halpen. Doaderch kunn ekj Jehova noch bäta kjanen lieren un ekj wia mie noch eenja, daut ekj am tru bliewen wull.”

14. Woo kjennen Elren de Schepfunk brucken, om äare Kjinja to wiesen, daut Jehova Spos jleicht?

¹⁴ De Schepfunk wiest, daut Jehova sea Spos jleicht, un hee well uk, daut wie schaftich sent. Forscha haben rutjefungen, daut de mieeschte Tieren opp irjenteene Oat spälen, mau rajcht Väajel un Fesch (Hiob 40:20). Haben june Kjinja aul mol must lachen, wäajen dee sagen, woo een Tia späld? Veleicht spälden doa een poa Miezkjes toop ooda waut kjliene Hunjkjes wieren sikj omzajcht hinjaraun. Daut näakjste Mol, wan june Kjinja äwa soont lachen, dan wurscht du dee doavon vetalen kjennen, daut Jehova Spos jleicht (1. Tim. 1:11, NW).

15. Waut kaun Elren halpen to weeten, waut äare Kjinja denkjen? (Spricha 20:5). (See uk daut Bilt.)

¹⁵ Eenjemol kaun daut fa Elren schwoa sennen to weeten, waut fa Trubbels äare Kjinja haben. Wan daut bie junt soo es,  woo kaust du dan weeten, waut june Kjinja denkjen? (Läs Spricha 20:5.) Fa eenje Elren es daut leichta, met äare Kjinja to räden, wan dee toop buten enne Natua sent. Daut es ieeschtlich soo, wäajen doa weinja Auflenkjungen sent fa de Kjinja, oba uk fa de Elren. Een Voda en Taiwan, waut Masahiko heet, rät noch von waut aundret, wuarom daut leichta es. Hee sajcht: “Onse Kjinja sent fa jeweenlich jelotna, wan wie toop buten sent un irjentwaut doonen, soo aus enne Boaj ooda aune Kaunt Mäa romgonen. Dan es daut leichta, met dee to räden un to weeten, waut en dee äaren Kopp aunjeit.” Katya, von dee wie aul ea räden, sajcht: “Miene Mame neem mie foaken no de School met nom Park. Opp dee schmocke Städ wia daut fa mie leichta, ar to sajen, waut doa enne School aules aunjegonen wia ooda äwa waut ekj mie Sorjen muak.”

16. Woo kaun eene Famielje sikj vereiwen un Spos haben, wan dee en de Natua sent?

¹⁶ Wan de Famieljes toop Freid aun de Schepfunk haben, kjennen dee sikj vereiwen un toop Spos haben. Doaderch kjennen dee sikj dolla vebungen feelen. De Schreft sajcht uk, “lachen haft siene Tiet” un “daunzen [ooda romhupsen] haft siene Tiet” (Liera 3:1, 4). Jehova haft soo väl schmocke Städen oppe Ieed jemoakt, wua wie soone Sachen doonen kjennen, waut ons scheen gonen. Väl Famieljes jleichen daut, toop enne Natua to sennen, biejlikj oppem Launt ooda enne Boaj ooda uk bie de Kaunt Mäa. De mieeschte Kjinja jleichen sea oppem Park romtoranen un to spälen ooda uk Tieren to beoobachten un em Wota to spälen. Aul dit sent sea feine Mäajlichkjeiten, een Scheengonen to haben mank aul daut schmocke, waut Jehova jemoakt haft!

17. Wuarom sellen Elren äare Kjinja halpen, Freid aun Gott siene Schepfunk to haben?

¹⁷ Em Paradies woaren de Elren un de Kjinja noch väl mea Freid aun Jehova siene Schepfunk haben kjennen. Dan woaren dee nich mea Angst haben brucken fa de wille Tieren un de Tieren woaren uk nich mea Angst haben fa ons (Jes. 11:6-9). Wie woaren dan eewich Tiet haben, om aules to beoobachten, waut Jehova jemoakt haft (Psa. 22:27). Oba aus Elren bruck jie nich bat dan luaren, daut jie june Kjinja halpen, de Natua wieettoschazen. Wan jie de Schepfunk nu aul brucken, om june Kjinja waut von Jehova to lieren, dan woaren dee veleicht uk soont sajen, aus de Kjennich David säd: “Kjeena kaun daut doonen waut du deist” (Psa. 86:8).