Wuarom docht jana, waut daut ieeschte fa Rut oppkomen sull, daut daut siene Famielje, ooda sien Oafgoot, schoden wudd, wan hee sikj met ar befried? (Rut 4:1, 6).

Wan enne Bibeltiet een Maun storf, onen Kjinja to haben, wäa wudd dan aul dän sien Launt oawen? Wudd de Nomen von dän siene Famielje utstoawen? Moses sien Jesaz jeef de Kloarheit doaräwa.

Waut passieed met daut Flekj von eenen Maun, wan dee storf ooda wan dee oam wia un daut vekjeepen must? Dän sien Brooda ooda eena von dän sien Frintschoft kunn daut Launt trigjkjeepen, un soo wudd daut enne Famielje bliewen (3. Mo. 25:23-28; 4. Mo. 27:8-11).

Woo kunn de Famieljennomen von eenen, waut jestorwen wia, wiedajejäft woaren, wan dee nich Kjinja haud? Soo aus Rut äare Jeschicht wiest, must de Brooda von dänjanjen, waut jestorwen wia, sikj met de Wätfru befrieen. Daut Junkje, waut dee dan wudden toop haben, wudd dän Nomen von dän Vestorwnen haben un uk dän sien Launt oawen. Derch dit leeftolje Jeboot wort fein fa de Wätfru jesorcht (5. Mo. 25:5-7; Mat. 22:23-28).

See wie doatoo mol de Jeschicht von Noomi. See wia met eenen Maun befriet, waut Elimelech heet. Aus hee un dee äare twee Säns storwen, bleef doa enne Famielje kjeen Maun mea, waut fa ar sorjen kunn (Rut 1:1-5). Aus see wada trigj en Juda wia, wia doa een Maun, waut Boas heet, un dee wia em Frintschoft met Elimelech. Noomi säd to äare Schwieedochta Rut, see sull Boas froagen, aus hee nich wull daut Launt von äaren Maun trigjkjeepen (Rut 2:1, 19-20; 3:1-4). Oba Boas wist, daut doa eena wia, waut daut ieeschte fa Rut oppkomen sull, wiels dee noch dichta em Frintschoft wia. Jana haud ver am daut Rajcht, daut Launt trigjtokjeepen (Rut 3:9, 12-13).

Ieeschtlich wull jana de Famielje uthalpen (Rut 4:1-4). Hee wist, daut hee waut Jelt jäwen must toom daut Launt kjeepen. Oba hee wist uk, daut Noomi too oolt wia toom noch een Kjint haben, waut Elimelech sien Launt oawen kunn. Soo wudd daut Launt dan to sien Oafgoot jehieren. Daut späad sikj am soo, daut wudd sikj noch betolen.

Oba aus deejanja enwort, daut hee sikj wudd motten met Rut befrieen, endad hee siene Meeninj. Hee säd: “En däm Faul, lot ekj mie daut rajcht vebie gonen. Wan dit Flekj dan nich en miene Famielje blift, dan saj ekj to die, kjeep däm” (Rut 4:5-6). Wuarom endad hee siene Meeninj?

Wan deejanja ooda irjent sestwäa sikj wudd met Rut befrieen un see eenen Sän haud, dan wudd dee Sän Elimelech sien Launt oawen. Wuarom jeef deejanja dan auntovestonen, daut daut siene Famielje, ooda sien Oafgoot, schoden wudd? De Schreft sajcht daut nich krakjt, oba daut jeft een poa Mäajlichkjeiten.

• Ieeschtens: Hee wudd aul daut Jelt vespälen, waut hee utjeef, om Elimelech sien Launt to kjeepen, oba daut wudd lota nich sien Launt sennen, wiels daut wudd dan Rut äaren Sän jehieren.

• Tweedens: Hee wudd motten fa beid oppkomen, fa Noomi un uk fa Rut.

• Dreddens: Veleicht haud hee selfst aul Kjinja. Wan hee dan met Rut noch mea Kjinja haben wudd, dan wudden dee Kjinja sikj sien Oafgoot motten met siene Kjinja endeelen.

• Vieedens: Wan hee selfst nich Kjinja haud, dan wudd Rut äa Sän daut Launt von Elimelech oawen un uk sient. Wan de Maun dan storf, wudd sien Launt daut Kjint jehieren, waut Elimelech sienen Nomen wiedajeef un nich sienen. Soo, deejanja kunn met eenst sien ieejnet Oafgoot vespälen toom Noomi uthalpen; un doatoo wia hee nich reed. Hee leet leewa Boas daut Rajcht, waut daut näakjste em Frintschoft wia. Un Boas deed daut fa Elimelech, “om dän Famielje Nomen wieda to droagen” (Rut 4:10).

Daut späat sikj soo, dänjanjen jinkj daut dolla om sienen Nomen un sien Oafgoot. Hee docht dolla aun sikj selfst. Oba wan deejanja uk sea fa sienen Nomen street, weet wie vondoag dän Dach nich mol, woo dee heet. Hee vespäld uk daut groote Väarajcht, waut Boas kjrieech: Boas wort eent von Jesus Christus, dän Messias, siene Väafoaren. Woo truarich es daut, daut deejanja bloos aun sikj docht un nich reed wia, wäm uttohalpen, dän daut fäld! (Mat. 1:5; Luk. 3:23, 32).