1-2. Wuarom wurscht du nich sellen mootloos woaren, wan du noch nich reed best, die deepen to loten? (See daut Bilt oppe väaschte Sied.)

 WAN du die west deepen loten, hast du die waut sea feinet väajenomen. Oba best du uk reed doatoo? Wan du denkjst jo un de Eltestasch daut uk soo seenen, dan nemm de näakjste Jeläajenheit woa. Du hast een scheenet Läwen em Deenst fa Jehova ver die.

² Oba waut, wan se die jesajcht haben, daut du noch aun waut schaufen motst, ea du die kaust deepen loten? Ooda veleicht best du daut uk selfst enjeworden. Dan woa nich mootloos. Du kaust daut bat doa brinjen, daut du disen Schrett moaken kaust, krakjt endoont woo oolt du best.

3. Waut fruach een Huachbeaumta von Ätiopien Filippus, un waut vonne Froag kjemt opp? (Aposteljeschicht 8:36, 38).

³ Läs Aposteljeschicht 8:36, 38. Een Huachbeaumta von Ätiopien fruach Filippus: “Wuarom sull ekj mie nich deepen loten?” Dis Maun haud dän Wensch, sikj deepen to loten; oba wia hee uk werkjlich reed, disen wichtjen Schrett to moaken?

4. Woo wees de Maun von Ätiopien, daut hee mea lieren wull?

⁴ De Maun von Ätiopien “wia no Jerusalem jefoaren auntobäden” (Apj. 8:27). Daut meent, daut hee woomäajlich dän Judengloowen aunjenomen haud. Secha haft hee en de Hebräische Schreften väl äwa Jehova jelieet. Oba hee wull noch mea lieren. Waut krakjt deed de Maun, aus Filippus am hinjawäajes bejäajend? Hee läsd enne Schreftroll von dän Profeet Jesaja (Apj. 8:28). Daut wieren deepe Lieren.  Hee wia nich tofräd met bloos de eefache Sachen vestonen; hee wull noch mea weeten.

5. Waut deed de Maun von Ätiopien wäajen daut, waut hee jelieet haud?

⁵ De Maun wia een Huachbeaumta un von de Kjennijin Kandake aunjestalt, “äare Schauzkoma to vewaulten” (Apj. 8:27). Soo, hee haud secha een drocket Läwen un väl Veauntwuatunk. Un doch neem hee sikj Tiet toom Jehova deenen. Hee wull nich bloos de Woarheit lieren, oba daut uk nokomen. Krakjt doawäajen reisd hee von Ätiopien bat Jerusalem, om Jehova doa em Tempel auntobäden. Daut wia eene lange Reis un daut kjeem secha uk dia, oba am wia nuscht too schod, wan daut doarom jinkj, Jehova to deenen.

6-7. Woo wort dän Maun von Ätiopien siene Leew fa Jehova emma jrata?

⁶ De Maun von Ätiopien haud väl nieet von Filippus jelieet, biejlikj wäa de Messias wia (Apj. 8:34-35). Secha jinkj am daut sea to Hoaten to lieren, waut Jesus fa am jedonen haud. Waut wudd hee nu doonen? Hee haud kunt eefach soo wiedamoaken un bie dän Judengloowen bliewen. Oba siene Leew fa Jehova un Jesus wort jrata. Un dise Leew brocht am doatoo, de wichtje Entscheidunk to moaken, daut hee sikj wull deepen loten aus een Nofolja von Jesus Christus. Filippus sach, daut de Maun doa reed too wia, un hee deept dän.

⁷ Du kaust uk reed sennen, die deepen to loten, wan du daut krakjt soo deist aus de Maun von Ätiopien. Du woascht die dan uk kjennen gaunz eenich sennen un sajen: “Wuarom sull ekj mie nich deepen loten?” Well wie nu mol seenen, woo du kaust dän sien Biespel nodoonen: Hee wull mea lieren, hee kjeem daut no, waut hee lieed, un siene Leew fa Gott wort emma jrata.

8. Waut rot Johanes 17:3 die too?

⁸ Läs Johanes 17:3. Väle von ons haben wäajens disen Varsch aunjefongen, de Schreft to studieren. Wia daut bie die uk soo? Wull Jesus met dise Wieed uk sajen, daut wie noch emma mea lieren kjennen? Krakjt. Wie woaren kjeenmol opphieren met “dän eensich woaren Gott . . . kjanen lieren” (Liera 3:11). Wie woaren fa de gaunze Eewichkjeit wieda lieren kjennen. Je mea wie von Jehova lieren, je noda woa wie am komen (Psa. 73:28).

9. Waut mott wie doonen, wan wie de ieeschte Lieren aul vestonen haben?

⁹ Daut ieeschte, waut eena äwa Jehova lieet, sent soo to sajen de eefache Lieren. En sienen Breef aun de Hebräa nand de  Apostel Paulus dee Lieren “dän Aunfank von Gott sien räden”. Hee wull doamet nich sajen, daut dee nich wichtich wieren, wiels hee vejlikjt dee met Malkj, waut een Bäbe fält (Heb. 5:12; 6:1). Oba hee muntad de Christen opp, nich bloos bie dise ieeschte ooda eefache Lieren to bliewen, oba deepa to gonen en Gott sien Wuat. Jeit die daut scheen, de deepe Lieren von de Bibel to vestonen? Wurscht du noch wellen em jeisteljen waussen, daut meent, mea äwa Jehova un sien Väanämen to lieren?

10. Wuarom es daut fa eenje schwoa to studieren?

¹⁰ Väle von ons felt daut studieren sea schwoa. Woo es daut bie die? Hast du enne School fein läsen un studieren jelieet? Denkjst du, du hast een deel jelieet, un jinkj die daut scheen? Ooda denkjst du veleicht, du best aulmols bloos hoatlierich? Wan jo, dan hool em Denkj, daut du nich de eensja best, waut soo denkjt. Jehova kaun die halpen. Hee es volkomen un hee es de basta Liera, waut daut jeft.

11. Wuarom kjenn wie sajen, daut Jehova de “Groota Liera” es?

¹¹ Jehova sajcht selfst, daut hee “dien Groota Liera” es (Jes. 30:20, NW; 30:21). Hee es een jeduldja un leeftolja Liera, waut die vestonen kaun. Hee kjikjt emma no daut goode bie siene Schiela (Psa. 130:3). Un hee velangt kjeenmol mea von ons, aus waut wie doonen kjennen. Hool em Denkj, hee haft dien Vestaunt jemoakt, un daut es een grootet Jeschenkj (Psa. 139:14). Hee haft ons soo jemoakt, daut wie waut lieren wellen. Ons Schepfa well, daut wie eewich lieren sellen un daut ons daut saul scheen gonen. Doawäajen es daut uk goot, “een velangen” to kjrieen, de Woarheit ut de Schreft to lieren (1. Pet. 2:2). Waut kaun die halpen? Nemm die waut väa, waut du uk nokomen kaust, un doo pinkjlich enne Schreft läsen un dee studieren (Jos. 1:8). Met Jehova siene Help woascht du daut emma dolla jleichen, äwa am to läsen un mea to lieren.

12. Wuarom wudd wie sellen mea äwa Jesus sien Läwen un sienen Deenst studieren?

¹² Doo pinkjlich äwa Jesus sien Läwen un sienen Deenst nodenkjen. Wan wie Jehova deenen wellen, es daut sea wichtich Jesus notodoonen, besonda en dise schwoare Tiet (1. Pet. 2:21). Jesus muak siene Nofolja doaropp reed, daut see wudden Schwierichkjeiten haben (Luk. 14:27-28). Oba hee wia sikj gaunz secha, daut siene Nofolja wudden kjennen Gott tru bliewen, krakjt soo aus hee deed (Joh. 16:33). Studia äwa Eenselheiten von Jesus sien Läwen un proow daut dan uk notodoonen.

13. No waut wurscht du Jehova sellen froagen, un wuarom?

¹³ Bloos väl to weeten es nich jenuach. Daut halpt die bloos dan, wan du toolatst, daut du mea von Jehova lieescht un soone Ieejenschoften kjrichst aus Leew un Gloowen (1. Kor. 8:1-3). Wan du mea lieren deist, froag Jehova uk doano, die mea Gloowen to jäwen (Luk. 17:5). Jehova beauntwuat soone Jebäda wellich. Wie kjennen bloos dan dän woaren Gloowen haben, wan wie de Woarheit äwa Gott weeten. Daut woat die sea halpen, em jeisteljen verauntokomen (Jak. 2:26).

14. Woo wees de Apostel Petrus, woo wichtich daut es, daut notokomen, waut wie lieren? (See uk daut Bilt.)

¹⁴ De Apostel Petrus räd von, woo wichtich daut fa Jesus siene Nofolja wia, daut dee daut uk nokjeemen, waut dee lieeden. Hee räd von Noah siene Jeschicht. Jehova  säd, daut hee aule schlajchte Menschen met eene Äwaschwamunk venichten wudd. Daut bloos to weeten, wudd nich toojerieekjt haben, daut see kunnen jerat woaren. See musten uk waut doonen. Daut es intressaunt, daut Petrus de Tiet ver de Sintflut de Tiet nant, “aus Noah daut Schepp bud” (1. Pet. 3:20). Soo, Noah un siene Famielje deeden waut. Dee buden dän Noahkausten – een grootet Schepp (Heb. 11:7). Petrus vejlikjt de Doop met daut, waut Noah deed, un säd, daut de Doop ons raden deit (1. Pet. 3:21, NW). Aules, waut du deist, om die fa de Doop reedtomoaken, es soo aus aul de Joaren, waut Noah un siene Famielje brukten toom dän Kausten buen. Waut motst du noch doonen, daut du reed best, die deepen to loten?

15. Woo kjenn wie wiesen, aus wie werkjlich een Leetsennen haben?

¹⁵ Eent von daut ieeschte, waut du doonen motst, es, een Leetsennen haben äwa diene Sinden (Apj. 2:37-38). Wan die daut opp iernst leet es, dan woascht du uk werkjlich waut endren. Hast du aul oppjehieet, soont to doonen, waut Jehova nich jleicht, soo aus een orreinet Läwen fieren, schmieekjen, schwiensche Räd haben ooda growe Wieed brucken? (1. Kor. 6:9-10; 2. Kor. 7:1; Efs. 4:29). Wan du daut noch nich jeendat hast, dan proow, doa wieda aun to schaufen. Räd met dienen Bibelliera ooda froag de Eltestasch von diene Vesaumlunk no Help un no Rot. Wan du noch tus wonst, dan froag diene Elren, aus dee die halpen kjennen, met de schlajchte Jewanheiten opptohieren, soo daut du die kaust deepen loten.

16. Waut es bie de jeistelje Jewanheiten aules met en?

¹⁶ Daut es uk sea needich, daut du die aun de jeistelje Jewanheiten helst. Daut wudd bedieden, bie de Toopkomes to sennen un doa uk mettomoaken (Heb. 10:24-25). Wan du aul soo wiet best, daut du prädjen jeist, dan doo daut räajelmässich. Je foakna du daut deist, je scheena woat die daut gonen (2. Tim. 4:5). Wan du noch tus wonst, dan äwalaj mol: “Motten miene Elren mie noch emma denkjen halpen, daut wie wellen no de Toopkomes  ooda em Prädichtdeenst foaren? Ooda doo ekj daut ut mie selfst?” Wan du daut ut die selfst deist, dan wiest du, daut du Gloowen hast un daut du Jehova leefst un dankboa best fa aules, waut hee fa die jedonen haft. Wan du daut deist, dan wiest du uk, daut du proofst, “fromm to läwen”, un Jehova uk waut jäwen west (2. Pet. 3:11; Heb. 13:15). Aules, waut wie Jehova friewellich jäwen, jleicht hee sea (see uk 2. Korinta 9:7). Un wie doonen daut, wäajen wie daut jleichen, Jehova ons bastet to jäwen.

17-18. Waut woat die halpen, bat de Doop to komen, un wuarom? (Spricha 3:3-6).

¹⁷ Wan du die fa de Doop reedmoakst, woaren uk noch Schwierichkjeiten oppkomen. Eenje Menschen woaren sikj veleicht domm haben äwa dienen nieen Gloowen. Dee woaren veleicht jäajen die sennen ooda die vefoljen (2. Tim. 3:12). Veleicht proofst du, von eene schlajchte Jewanheit loostokomen, oba daut kaun passieren, daut du bieaun trigjfelst. Ooda du woascht mootloos, wiels sikj die daut soo späat, daut du kjeenmol bat de Doop komen woascht. Waut woat die halpen nich opptojäwen? Daut es diene Leew fa Jehova.

¹⁸ Diene Leew fa Jehova es waut gaunz besondret – daut baste, waut du kaust haben (läs Spricha 3:3-6). Dise groote Leew fa Gott kaun die halpen, met Trubbels foadich to woaren. Enne Schreft läs wie foaken von Jehova siene truhoatje Leew fa siene Deena. Daut meent, hee woat siene Deena kjeenmol veloten ooda opphieren, dee to leewen (Psa. 100:5). Un du best no Gott sien Bilt jemoakt (1. Mo. 1:26). Woo kaust du dan dise Leew krakjt nodoonen?

19. Woo kaust du noch dankboara sennen fa aules, waut Jehova fa die jedonen haft? (Galata 2:20).

¹⁹ Schauf aun diene Dankboakjeit (1. Tess. 5:18). Äwalaj jieda Dach: “Woo haft Jehova mie jewäsen, daut hee mie leeft?” Un dan dank Jehova fa eenselne Sachen, waut hee fa die jedonen haft. Proow to vestonen, daut Jehova fa die goodet deit, wiels hee die leeft. Krakjt soo sach de Apostel Paulus daut uk (läs Galata 2:20). Denkj äwa dit no: “Well ekj Jehova uk wiesen, daut ekj am leew?”  Diene Leew fa Jehova woat die halpen, Vesieekjungen to wadastonen un en schwoare Loagen uttohoolen. Dee woat die halpen, bie diene jeistelje Jewanheiten to bliewen un Jehova jieda Dach to wiesen, woo sea du am leefst.

20. (a) Waut es bie de Hangow aules met en? (b) Woo wichtich es dise Entscheidunk?

²⁰ Met de Tiet woat diene Leew fa Jehova die bat doa brinjen, een besondret Jebäd to sajen. En dit Jebäd woascht du die Jehova hanjäwen. Wan du die ieescht Jehova hanjejäft hast, woascht du kjennen fa aule Eewichkjeit am jehieren. Waut fa eene wundascheene Hopninj daut nich es! Wan du die Jehova hanjefst, vesprakjst du am, am en goode uk en schlajchte Tieden to deenen. Dit Vespräakjen moakt eena bloos eemol en sien Läwen. Doawäajen es daut uk eene sea wichtje Entscheidunk. Du woascht en dien Läwen väle Entscheidungen moaken, uk eenje sea goode. Oba daut jeft kjeene bätre aus dise – daut du die Jehova hanjefst (Psa. 50:14). De Soton woat proowen, diene Leew fa Jehova schwaka to moaken, soo daut du saust opphieren, am to deenen. Oba lot daut kjeenmol too! (Hiob 27:5, NW). Diene groote Leew fa Jehova woat die halpen, dien Vespräakjen notokomen, am fa emma to deenen, un am doaderch uk emma noda to komen.

21. Wuarom es de Doop noch mau de Aunfank?

²¹ Nodäm daut du die hast Jehova hanjejäft, räd met de Eltestasch von diene Vesaumlunk doaräwa, daut du die west deepen loten. Hool emma em Denkj, daut du nich bloos west bat de Doop komen, oba daut daut noch mau de Aunfank es, Jehova fa eewich to deenen. Kjikj doano, daut diene Leew fa dienen himlischen Voda nu aul emma jrata woat. Nemm die väa, daut du jieda Dach kaust een jratra Frint woaren met am. Doaderch woascht du bat de Doop komen. Daut woat een wundascheena Dach sennen – de ieeschta von de Eewichkjeit, wua diene Leew fa Jehova un Jesus emma jrata woaren woat!