1-2. Woo es daut foaken, wan eenje sikj deepen loten, un waut woa wie nu seenen?

 HAST du mol soone beoobacht, waut sikj wellen deepen loten? Du hieezhd daut aun de Stemmen, woo secha dee sikj wieren, aus dee de twee Froagen beauntwuaten deeden. Aus dee utem Wota rutkjeemen, sachst du, woo schaftich dee kjikjten, un hieezhd, woo de aundre sikj enne Henj klautschen deeden. Du sachst, woo schaftich dee äare Famielje un Frind wieren. Jieda Wäakj wälen dusende sikj disen Wajch un jäwen sikj Jehova han un loten sikj aus eent von Jehova siene Zeijen deepen.

² Woo steit daut met die? Wan du doaräwa nodenkjst, die deepen to loten, dan best du gaunz aundasch aus dise schlajchte Welt, wiels du best dee, waut “no Gott [sieekjt]” (Psa. 14:1-2). Dis Artikjel es fa die jeschräwen, endoont woo oolt du best. Un dee, waut aul jedeept sent, woaren eenen jratren Wensch kjrieen, Jehova fa emma to deenen. Daut jeft een deel Jrind, wuarom wie Jehova deenen, oba well wie ons nu mol dree unjastonen.

3. Wuarom jleichen Jehova siene Deena de Woarheit un de Jerajchtichkjeit? (Psalm 119:128, 163).

³ Jehova jeef de Menschen daut Jeboot, de Woarheit to leewen (Sach. 8:19). Jesus säd to siene Nofolja, daut dee sullen no de Jerajchtichkjeit sträwen (Mat. 5:6). Daut bediet, daut wie sellen dän Wensch haben, daut to doonen, waut Jehova fa rein un jerajcht un goot aunsitt. Leefst du de Woarheit un de Jerajchtichkjeit? Gaunz secha deist du. Du jleichst de Ojjerajchtichkjeit un daut schlajchte nuscht un haust de Läajes (läs Psalm 119:128, 163). De Läajes wiesen,  woo de Soton es, waut äwa dise Welt harscht (Joh. 8:44; 12:31). De Soton funk em Goaden Eden aul aun, Läajes to vebreeden äwa Jehova. Dee behaupt, daut Jehova een onopprechtja Gott es un goodet von de Menschen trigjhelt (1. Mo. 3:1, 4-5). Dän Soton siene Läajes doonen noch emma waut aun de Menschen. Wan de Menschen nich de Woarheit leewen wellen, dan kaun de Soton dee bat doa brinjen, aule Sorten Ojjerajchtichkjeit to doonen (Reem. 1:25-31).

4. Woo wiest Jehova, daut hee de “trua Gott” es? (See uk daut Bilt.)

⁴ Jehova es de “trua Gott” un hee lieet soone, waut am leewen, wellich de Woarheit (Psa. 31:6). Doaderch halpt hee dee, von dän Soton siene Läajes frietokomen. Jehova lieet siene Deena uk, opprechtich un jerajcht to sennen. Un doawäajen kjennen dee sikj selfst mea wieet feelen un ennalichen Fräd haben (Spr. 13:5-6). Haft Jehova daut uk fa die jedonen? Du hast jelieet, daut Jehova siene Wäaj de baste sent fa de Menschen, uk fa die perseenlich (Psa. 77:14). Un doawäajen west du uk fa de Jerajchtichkjeit enstonen (Mat. 6:33). Du west de Woarheit veteidjen un bewiesen, daut daut nich soo es, waut de Soton äwa Jehova säd. Woo kaust du daut doonen?

5. Woo kaust du fa de Leew un de Jerajchtichkjeit enstonen?

⁵ Du kaust soo läwen, daut daut to seenen es, daut du nuscht von dän Soton siene Läajes weeten west un fa de Woarheit ensteist. Du kaust uk bewiesen, daut du bloos Jehova aus dienen Harscha haben west un daut doonen, waut hee fa rajcht talt. Woo kaust du daut? Jeff die Jehova derch een Jebäd han un bewies daut dan ver aulem met diene Doop. Leew fa de Woarheit un fa de Jerajchtichkjeit brinjt eenem bat doa, sikj deepen to loten.

6. Waut vonne Jrind finj wie en Psalm 45:4, wuarom wie Jesus leewen?

⁶ Wuarom leefst du Jesus? See wie mol, waut Psalm 45:4, NW b doatoo sajcht (läs). Jesus wia bekaunt fa siene Deemoot, Jerajchtichkjeit un daut hee emma de Woarheit räd. Wan du uk de Woarheit un de Jerajchtichkjeit jleichst, dan es daut dietlich, daut du uk Jesus Christus sea leefst. Denkj  bloos mol doaraun, woo Jesus fa de Woarheit un de Jerajchtichkjeit enstunt (Joh. 18:37). Un woo lieet Jesus ons, deemootich to sennen?

7. Waut jleichst du besonda aun Jesus siene Deemoot?

⁷ Jesus jeft een goodet Biespel fa deemootich sennen. Hee jeef sienen Voda emma aule Iea (Mar. 10:17-18; Joh. 5:19). Woo jeit die daut, wan du äwa Jesus sien Biespel nodenkjst? Brinjt die daut nich bat doa, Gott sienen Sän to leewen un am notodoonen? Jesus es deemootich, wäajen hee sienen Voda nodeit, waut uk deemootich es (Psa. 18:35, NW; Heb. 1:3). Feelst du die nich no Jesus jetrocken, waut sienen Voda siene Ieejenschoften volkomen nodeit?

8. Wuarom räakjen wie Jesus aus onsen Kjennich sea väl?

⁸ Wie räakjnen Jesus aus onsen Kjennich sea väl, wäajen hee de basta Kjennich es. Jehova selfst haft Jesus utjelieet un aus Kjennich enjesat (Jes. 50:4-5). Denkj bloos mol doaraun, waut vonne groote Leew Jesus ons wees (Joh. 13:1). Wäajen Jesus ons Kjennich es, haft hee sikj onse Leew vedeent. Hee nant dee, waut am leewen, siene Frind. Un aus siene Frind wies wie onse Leew doaderch, daut wie am jehorchen (Joh. 14:15; 15:14-15). Es daut nich eene groote Iea, daut wie Frind von Gott sienen Sän sennen kjennen?

9. En waut fa Stekjen likjent sikj Jesus siene Doop met onse Doop?

⁹ Eent von Jesus siene Jebooten wia, daut siene Nofolja sikj sullen deepen loten (Mat. 28:19-20). Hee leet sikj uk deepen. Oba Jesus siene Doop wia nich krakjt soo aus dee von siene Nofolja (see uk dän Kausten “ Waut es de Unjascheet tweschen Jesus siene Doop un de Doop von siene Nofolja?”). En jewesse Stekjen sent dee oba uk äwareen. Derch siene Doop wees Jesus, daut hee reed wia, bloos sienen Voda sienen Wellen to doonen (Heb. 10:7). Un biejlikj soo es daut uk met Jesus siene Nofolja. Wan dee sikj Gott hanjäwen un deepen loten, dan wiesen dee, daut Gott sienen Wellen doonen fa an nu daut wichtichste es un daut see nich mea fa sikj selfst läwen. Doaderch doonen see daut Biespel von onsen Leida Jesus no.

10. Wuarom leefst du Jesus, un to waut saul die daut brinjen?

¹⁰ Du weetst, daut Jesus Jehova sien eensja Sän es. Un du best schaftich, daut Jehova am aus Kjennich äwa die aunjestalt haft. Du jleefst uk, daut Jesus Jehova en aules krakjt nodeit. Un du hast uk jelieet, daut Jesus de Hungaje to äten jeef, dee, waut onen Moot wieren, wada Moot jeef un daut hee de Kranke heelen deed (Mat. 14:14-21). Du hast daut uk selfst jeseenen, woo hee de Vesaumlunk vondoag dän Dach aunleiden deit (Mat. 23:10). Un du weetst, daut hee en de komende Tiet noch väl mea doonen woat. Woo kaust du wiesen, daut du Jesus sea väl räakjenst? Wan du sien Biespel nodeist (Joh. 14:21). Daut ieeschte wurscht du die kjennen Jehova hanjäwen un die deepen loten.

11. Woont es de wichtichsta Grunt, die deepen to loten, un wuarom?

¹¹ Woont es de wichtichsta Grunt, sikj deepen to loten? Jesus wees daut, aus hee säd: “Du saust dän Harn, dienen Gott, von gaunzem Hoaten, met gaunze Seel, met aule Jedanken un aul diene Krauft goot sennen” (Mar. 12:30). Es diene Leew fa Gott soo, aus daut hia sajcht?

12. Wuarom leefst du Jehova? (See uk daut Bilt.)

¹² Daut jeft soo väl Uasoak, Jehova to leewen. Biejlikj hast du jelieet, daut von am “aulet Läwen kjemt” un daut “aule goode  Sachen un aule volkomne Gowen” von am komen (Psa. 36:10; Jak. 1:17). Aules, waut die scheen jeit, kjemt von onsen leeftoljen Gott.

13. Wuarom es daut Leesjelt soon besondret Jeschenkj?

¹³ Daut Leesjelt es een grootet Jeschenkj, waut Jehova ons jejäft haft. Wuarom kjenn wie daut sajen? Wäajen Jehova un Jesus soone groote Frind sent. Jesus säd: “Mien Voda es mie . . . goot” un “ekj [sie] dän Voda goot” (Joh. 10:17; 14:31). Un doaderch, daut see beid fa billionende Joaren toopschauften, worden see emma jratre Frind (Spr. 8:22-23; 8:30, NW). Denkj mol han, woo schwoa daut mott fa Jehova jewast sennen, aus hee sach, woo sien Sän lieden un stoawen must. Jehova leeft de Menschen un uk die soo sea, daut hee reed wia, sienen eensjen Sän aus Leesjelt to jäwen, daut de Menschen kjennen daut eewje Läwen kjrieen (Joh. 3:16; Gal. 2:20). Daut es de wichtichsta Grunt, wuarom wie Gott leewen.

14. Woont es daut baste Läwen, waut eena haben kaun?

¹⁴ Diene Leew fa Gott es jrata jeworden, wiels du mea von am lieezhd. Secha west du am nu aul bäta kjanen lieren un uk fa emma – un du kaust daut uk. Hee well haben, daut du am schaftich moakst (Spr. 23:15-16). Du kaust daut nich  bloos met diene Wieed, oba uk met diene Woakjen doonen. Derch dien Läwen kaust du wiesen, daut du Jehova werkjlich leefst (1. Joh. 5:3). Daut es daut baste Läwen, waut eena haben kaun.

15. Woo kaust du diene Leew fa Jehova wiesen?

¹⁵ Woo kaust du wiesen, daut du Jehova leefst? Du motst een besondret Jebäd sajen un die Jehova gaunz un goa hanjäwen (Psa. 40:9). Dan motst du daut, waut du fa die auleen jedonen hast, ver aundre derch diene Doop bewiesen. Dis Dach von diene Doop es een scheena un een sea wichtja Dach, wiels doa fangt dien nieet Läwen aun, waut bloos fa Jehova es (Reem. 14:8; 1. Pet. 4:1-2). Hieet sikj daut nich no eene sea wichtje Entscheidunk? Jo, un daut es uk. Doaderch kaust du daut baste Läwen kjrieen, waut daut jeft. Soo aus woo?

16. Woo woat Jehova dee beloonen, waut äa Läwen fa am brucken, soo aus 1. Johanes 2:25 wiest?

¹⁶ Jehova es dee, waut daut gaunz friejäwrichste es. Hee woat die emma väl mea jäwen, aus waut du am jefst (Mar. 10:29-30). Hee woat die nu aul, en dise oole Welt, daut scheenste Läwen jäwen, waut die daut dolste tofräd moakt. Un daut es noch mau bloos de Aunfank! No diene Doop kaun dien Läwen fa emma wiedagonen. Du kaust dienen himlischen Voda fa emma deenen. Diene Leew fa am kaun emma jrata woaren un du kaust soo lang läwen, aus Jehova läft – fa aule Eewichkjeit (läs 1. Johanes 2:25).

17. Waut kaust du Jehova jäwen, waut hee noch nich haft?

¹⁷ Wan du die eenich woascht, die Jehova hantojäwen un die deepen to loten, kaust du dienen himlischen Voda waut gaunz besondret jäwen. Hee haft die aules jejäft, waut du hast un waut die jeemols scheen jegonen haft. Un dan kaust du am waut jäwen, waut hee ea nich haud – daut es dien trua Deenst fa am (Hiob 1:8; 41:3, JHF; Spr. 27:11). Daut es daut baste, waut du en dien Läwen doonen kaust. Diene Leew fa Jehova es de jratsta Grunt, die deepen to loten.

18. Äwa woone Froagen wurscht du kjennen nojreblen?

¹⁸ Waut wurscht du dan nu sajen, wan die wäa fruach: “West du die deepen loten?” De Auntwuat kaust bloos du weeten. Oba proow mol, äwa dit to denkjen: “Wuarom wacht ekj?” (Apj. 8:36). Denkj mol aun de dree Sachen, waut wie nu jeseenen haben. Ieeschtens: Du leefst de Woarheit un de Jerajchtichkjeit. Äwalaj mol: Jankat die dän Dach to beläwen, wua aule woaren de Woarheit sajen un daut rajchte doonen? Tweedens: Du leefst Jesus Christus. Denkj mol han: West du Jesus aus dienen Kjennich haben un sien Biespel nodoonen? Dreddens, waut uk daut wichtichste es: Du leefst Jehova. Äwalaj mol: West du Jehova schaftich moaken un am aus dienen Gott deenen? Wan du to aul dise Froagen jo sajen kaust, dan äwalaj: “Wuarom well ekj noch wachten met mie deepen loten?” (Apj. 16:33).

19. Wuarom wurscht du nich sellen twiewlen, aus du die west deepen loten? Jeff een Biespel (Johanes 4:34).

¹⁹ Wan du noch emma em Twiewel best, aus du die saust deepen loten, dan denkj mol äwa daut Jlikjnis no, waut Jesus säd (läs Johanes 4:34). Kjikj, Jesus vejlikjt Gott sienen Wellen doonen met Äten. Wuarom? Na, Äten es goot fa ons. Un Jesus wist, Jehova wudd kjeenmol soont von ons velangen, waut ons schoden kunn. Well Jehova haben, daut du die saust deepen loten? Jo (Apj. 2:38). Na, dan kaust du uk doaropp vetruen, daut daut woat goot fa die sennen, die deepen to loten. Krakjt soo aus du doa nich wurscht aun twiewlen, die eene scheene Moltiet derchgonen to loten, soo wurscht du uk nich twiewlen brucken, die deepen to loten.

20. Waut woa wie en dän näakjsten Artikjel seenen?

²⁰ Wuarom wachten? Väle sajen, daut see noch nich reed sent, sikj deepen to loten. Un daut es uk eene von de wichtichste Entscheidungen, waut du en dien Läwen moaken kaust. Daut brukt Tiet un du motst goot doaräwa nodenkjen un die aunstrenjen, daut du die kaust deepen loten. Oba wan du werkjlich bat de Doop komen west, waut kaust du dan nu aul doonen, om die fa daut reedtomoaken? Daut woa wie en dän näakjsten Artikjel seenen.