1-2. Waut fa Säajnungen woa wie beläwen, wan wie ons deepen loten?

 WIE sent schaftich, wan wie ons deepen loten un Poat von Jehowa siene Famielje woaren. Un dauts eene Iea fa ons, daut wie kjennen goode Frind met Jehowa sennen. Wie denkjen uk soo aus de Psalmenschriewa David, waut to Jehowa säd: “Jesäajent sent dee, dee du die wälst un no die nemst, bie die opp däm Tempelhoff to wonen” (Psa. 65:5).

² Woone Menschen kjennen en Jehowa sienen Templehoff wonen, ooda met am Frind sennen? Soo aus wie en dän väajen Artikjel jeseenen haben, kjemt Jehowa dee noda, waut daut wiesen, daut dee wellen met am goode Frind sennen (Jak. 4:8). Wan du die Jehowa hanjefst un die deepen latst, kaust du opp eene besondre Wajch sien Frint sennen. Du kaust die secha sennen, daut hee no diene Doop “eenen Säajen rauf schedden [woat], soo daut … daut äwarant” (Mal. 3:10; Jer. 17:7-8).

3. Waut vonne groote Veauntwuatunk haben deejanje, waut sikj haben hanjejäft un deepen jeloten? (Liera 5:3-4).

³ De Doop es de Aunfank von dienen Deenst fa Jehowa. No diene Doop woascht du proowen, dien Bastet to jäwen, om dien Vespräakjen to hoolen, Jehowa tru to deenen, mau rajcht wan du aufjeprooft woascht, waut Schlajchtet to doonen ooda derch waut Schwoaret jeist (läs Liera 5:3-4). Aus eent von Jesus siene Nofolja woascht du proowen, soo goot aus mäajlich sien Biespel notodoonen un siene Jebooten notokomen  (Mat. 28:19-20; 1. Pet. 2:21). Dis Artikjel woat die halpen, daut to doonen.

DOO JESUS “WIEDA NOFOLJEN”, WAN DU WAUT SCHWOARET BELÄFST UN AUFJEPROOFT WOASCHT

4. Waut meend Jesus doamet, aus hee säd, daut siene Nofolja wudden motten eenen “Liedenspol” droagen? (Lukas 9:23).

⁴ De Trubbels woaren no diene Doop nich opphieren. Oba daut Jäajendeel! Jesus muak dietlich, daut siene Nofolja wudden “jieda Dach” motten eenen “Liedenspol” droagen (läs Lukas 9:23). Meend Jesus doamet, daut siene Nofolja emma wudden lieden motten? Nä. Hee meend eefach, daut see wudden Schwoaret beläwen mank aul de Säajnungen, waut see kjrieen wudden. Eenjemol kjennen de Schwierichkjeiten uk noch sea schwoa woaren (2. Tim. 3:12).

5. Waut fa Säajnungen vespruak Jesus deejanje, waut doa reed wieren, waut opptojäwen?

⁵ Veleicht hast du daut aul beläft, daut du Jäajenstaunt enne Famielje hautst ooda du hast must waut em tieteljen oppjäwen, daut du daut Kjennichrikj kust aune ieeschte Städ stalen (Mat. 6:33). Wan daut soo wia, dan kaust du die secha sennen, daut Jehowa daut jeseenen haft, waut du aules fa am jedonen hast (Heb. 6:10). Veleicht hast du daut aul selfst beläft, daut et werkjlich soo es, aus Jesus säd: “Kjeena haft Hus ooda Breeda ooda Sestren ooda siene Mutta ooda sienen Voda ooda Kjinja ooda Flekja wäajen mie ooda wäajen de goode Norecht veloten, dee nich en dise Tiet aul woat 100 mol soo väl kjrieen – soo aus Hiesa, Breeda, Sestren, Mitta, Kjinja un Flekja; wan uk met Vefoljunk – un en de komende TIET daut eewje Läwen” (Mar. 10:29-30). De Säajnungen, waut du jekjräajen hast, sent väl jrata aus daut, waut du hast must oppjäwen (Psa. 37:4).

6. Wuarom motst du no diene Doop noch wieda jäajen “de Fleescheslost” kjamfen?

⁶ Du motst no de Doop uk wieda jäajen “de Fleescheslost” kjamfen (1. Joh. 2:16, JHF). Daut es, wäajen wie onvolkomne Nokomen sent von Adam. Veleicht feelst du die eenjemol uk soo aus de Apostel Paulus. Hee schreef: “Ennalich jleich ekj Gott sien Jesaz werkjlich sea. Oba ekj see en mienen Kjarpa noch een aundret Jesaz, waut jäajen daut Jesaz von mien Vestaunt kjamft. Daut moakt mie to eenen Faustjenomnen von de Sind äa Jesaz, waut en mienen Kjarpa es” (Reem. 7:22-23). Veleicht feelst du die eenjemol mootloos, wäajen die daut jankat, waut Orrajchtet to doonen. Oba doaräwa notodenkjen, daut du Jehowa een Vespräakjen jejäft hast, woat die de Krauft jäwen, daut nich notogonen, wan du aufjeprooft woascht. Well wie mol seenen woo.

7. Woo woat die daut halpen, Jehowa tru to bliewen, daut du die am hanjejäft hast?

⁷ Wan du die Jehowa hanjefst, läfst du nich mea fa die selfst. Daut bediet, daut du nich mea diene ieejne Wenschen nojeist, waut Jehowa nich jefaulen (Mat. 16:24). Wan du dan aufjeprooft woascht ooda derch waut Schwoaret jeist, woascht du nich mol doaräwa jreblen, waut du doonen saust. Du woascht die dan gaunz eenich sennen, waut du doonen woascht – daut es, Jehowa tru bliewen un am jefaulen. Dan woascht du soo sennen aus Hiob. Wan hee uk waut sea Schwoaret derchjinkj, säd hee oba: “Ekj woa tru bliewen!” (Hiob 27:5, NW).

8. Woo kaun ons daut halpen, Vesieekjungen to wadastonen, wan wie doaräwa nodenkjen, waut wie Jehowa vespruaken, aus wie ons am hanjeewen?

⁸ Wan du äwa daut Vespräakjen nodenkjst, aus du die Jehowa hanjeefst, woat  die daut de Krauft jäwen, jieda Vesieekjunk to wadastonen. Wurscht du biejlikj aunfangen, no wäm to schmeichlen, waut befriet es? Secha nich! Du hast je Jehowa aul jesajcht, daut du daut nich wurscht. Wan du soone Jefeelen en die nich mol oppkomen latst, dan brukst du doa lota nich wada met schaufen, dee loostowoaren. Du woascht die von “de gottloose äaren Stich” gaunz wajchhoolen (Spr. 4:14-15).

9. Woo kaun ons daut noch halpen, daut Jeistelje aune ieeschte Städ to stalen, wan wie doaräwa nodenkjen, waut wie Jehowa vespruaken, aus wie ons am hanjeewen?

⁹ Oba waut es, wan die wäa eene Oabeit aunbeet, wua du dan oba nich mea wurscht kjennen räajelmässich bie de Toopkomes sennen? Dauts gaunz dietlich, waut du doonen wurscht. Aul lang ea die wäa dise Oabeit aunboot, wieescht du die aul eenich, daut du soone Oabeit nich wurscht aunnämen. Du woascht nich mol äwalajen, aus du de Oabeit woascht aunnämen un dan noch proowen, Jehowa opp irjenteene Wajch aune ieeschte Städ to stalen. Jesus wia sikj eenich, bloos daut to doonen, waut sien Voda haben wull. Doaräwa notodenkjen, kaun die uk halpen, fuaz aules auftowiesen, waut Gott nich jefelt, dän du die hanjejäft hast (Mat. 4:10; Joh. 8:29).

10. Waut woat die halpen, Jesus no diene Doop “wieda notofoljen”?

¹⁰ Doano waut du deist, wan doa Trubbels un Vesieekjungen oppkomen, wiest du, aus du die eenich best, Jesus “wieda notofoljen”. Du kaust die secha sennen, daut Jehowa die doabie halpen woat. De Bibel sajcht: “Gott es tru, un hee woat daut nich tooloten, daut jie schwanda vesocht woaren, aus jie Krauft haben. Hee woat fa eenen Wajch sorjen, ut de Vesieekjunk rut to  komen, soo daut jie daut vedroagen kjennen” (1. Kor. 10:13).

WOO WIE JESUS WIEDA NOFOLJEN KJENNEN

11. Waut es eent von daut Baste, woo wie Jesus wieda nofoljen kjennen? (See uk daut Bilt.)

¹¹ Jesus deend Jehowa von Hoaten un bäd foaken to am (Luk. 6:12). Eent von de baste Wajch, woo wie Jesus no onse Doop wieda nofoljen kjennen es, wan wie soont doonen, waut ons noda no Jehowa brinjt. De Bibel sajcht: “Krakjt endoont woo wiet wie aul sent veraunjekomen, well wie doawäajen ordentlich wieda opp dänselwjen Wajch gonen” (Filip. 3:16, NW). Wie woaren emma wada mol Erfoarungen hieren von Breeda un Sestren, waut sikj eenich wieren, mea em Deenst fa Jehowa to doonen. Veleicht sent dee no de School fa Kjennichrikjsvekjindja jegonen ooda sent wua hanjetrocken, wua daut aun mea Help fäld. Wan du de Mäajlichkjeit hast, die soont väatonämen, dan doo daut. Jehowa siene Deena sieekjen no Mäajlichkjeiten, woo dee noch mea fa am doonen kjennen (Apj. 16:9). Oba waut es, wan du nu jroz nich de Mäajlichkjeit hast? Denkj nich, daut du weinja wieet best aus dee, waut daut kjennen. Daut, waut doa talt es, daut du nich oppjefst (Mat. 10:22). Vejät nich, daut Jehowa sea schaftich es, wan du daut deist, waut du en diene Loag jroz doonen kaust. Dauts eene goode Wajch, woo wie Jesus no onse Doop wieda nofoljen kjennen (2. Kjen. 20:3).

12-13. Waut kaust du doonen, wan die dän Deenst fa Jehowa nich mea soo scheen jeit? (1. Korinta 9:16-17). (See uk daut Hock “ Bliew em Rees”.)

¹² Oba waut es, wan du die soo feelst, daut du nich mea von Hoaten bätst ooda daut die dän Deenst ooda daut Bibelläsen nich mea soo scheen jeit aus ea? Wan du  die met de Tiet soo feelst, dan denkj nich, daut du nich mea Jehowa sienen Jeist hast. Wäajen wie onvolkomen sent, endat sikj daut eenjemol, woo wie ons feelen. Wan ons de Sachen nich mea soo scheen gonen aus ea, dan kjenn wie aun dän Apostel Paulus sien Biespel denkjen. Wan hee uk proowd, Jesus notodoonen, wist hee oba, daut hee eenjemol nich wudd soonen grooten Wunsch haben, daut to doonen, waut hee sull (läs 1. Korinta 9:16-17). Hee säd: “Wan ekj daut nich jieren doo, doo ekj daut doch, wiels mie daut es oppjedroacht worden.” Daut bediet, Paulus wia sikj gaunz eenich, sienen Deenst to volbrinjen, wan hee dan jroz uk nich soonen grooten Wunsch haud, daut to doonen.

¹³ Doo daut soo aus Paulus un moak nich doano Entscheidungen, woo du die feelst. Sie die eenich, daut Rajchte to doonen, wan die daut uk nich jankat. Wan du doawäajen wieda daut Rajchte deist, dan woat die daut met de Tiet bäta gonen. En de Tweschentiet hool die aun diene jeistelje Jewanheiten; daut woat die halpen, Jesus no diene Doop wieda notofoljen. Wan diene Breeda un Sestren daut seenen, daut du uthelst un Jehowa wieda deenst, woat dee daut mau rajcht Moot jäwen (1. Tes. 5:11).

“UNJASIEEKJT JUNT” UN “PROOFT DAUT SELFST UT”

14. Waut saust du foaken doonen, un wuarom? (2. Korinta 13:5).

¹⁴ Dauts sea wichtich, daut du die foaken selfst unjasieekjst no diene Doop (läs 2. Korinta 13:5). Du saust emma wada mol seenen, aus du jieda Dach bätst, de Bibel läst un studieescht, no de Toopkomes wankst un prädjen jeist. See, waut du doonen kaust, om mea Freid bie dise Sachen to haben. Denkj biejlikj äwa dise Froagen no: “Kaun ekj aundre de Gruntlieren ut de Bibel utlajen? Waut kaun ekj doonen, daut mie dän Deenst scheena jeit? Bäd ekj äwa Eenselheiten un wiesen miene Jebäda, daut ekj mie gaunz opp Jehowa velot? Sie ekj bie aule Toopkomes? Waut kaun ekj doonen, daut ekj bie de Toopkomes nich aufjelenkjt woa un doa dolla metmoaken kaun?”

15-16. Waut kaust du von daut lieren, waut een Brooda beläwd?

¹⁵ Dauts uk wichtich, daut du weetst, woont diene Schwakheiten sent. Een Brooda, waut Robert heet, beläwd mol waut, waut daut dietlich moakt. Hee sajcht: “Aus ekj rom 20 Joa oolt wia, deed ekj utschaufen. Eenen Dach no de Oabeit, kroagd een Oabeitspoatna mie no äa Hus. See säd, wie wudden doa auleen sennen un ons wudd daut sea scheen gonen. Ieeschtlich socht  ekj no eene Uträd. Oba entlich säd ekj daut auf un säd ar uk, wuarom ekj nich no ar komen wudd.” Dauts sea to lowen, daut Robert tru bleef. Oba lota docht hee doa wada äwa no un wort en, hee haud kunt bäta met de Loag omgonen. Hee sajcht: “Ekj säd daut nich fuaz gaunz auf, soo aus Josef daut met Potifar siene Fru deed (1. Mo. 39:7-9). Enne Werkjlichkjeit must ekj mie wundren, woo schwoa mie daut wia, daut auftosajen. Dit wees mie, daut ekj doaraun schaufen sull, een jratra Frint met Jehowa to woaren.”

¹⁶ Die kaun daut sea togood komen, die selfst to unjasieekjen, soo aus Robert daut deed. Mau rajcht wan du bie eene Proow tru jebläwen best, kaust du doaräwa nodenkjen: “Woo lang dieed mie daut, de Vesieekjunk auftosajen?” Wan du dan enwoascht, daut du die en irjentwaut vebätren kaust, dan woa nich mootloos. Sie leewa schaftich, daut du daut nu weetst, woont diene schwake Sied es. Bäd to Jehowa äwa diene Schwakheit un doo waut, daut du die noch eenja sennen kaust, am emma to jehorchen (Psa. 139:23-24).

17. Waut deed daut aun Jehowa sienen Nomen, daut Robert tru bleef?

¹⁷ Doa es noch waut, waut wie von Robert siene Jeschicht lieren kjennen. Hee sajcht noch: “Aus ekj de Fru daut aufsäd, säd see to mie: ‘Sea fein jedonen!’ Ekj fruach, waut see doamet meend. See säd, daut eent von äare Frind, waut ea eent von Jehowa siene Zeijen wia, to ar jesajcht haud, daut aule junge Menschen mank Jehowa siene Zeijen em plietschen waut Orrajchtet deeden, wan dee de Jeläajenheit hauden. See haud to äaren Frint jesajcht, see wudd daut bie mie utfinjen, aus daut soo wia. Kjenn jie junt daut väastalen, woo schaftich ekj wia, daut ekj Jehowa sien Nomen jeieet haud?”

18. Waut best du die eenich to doonen no diene Doop? (See uk daut Hock “ Twee Artikjels, waut die sea halpen woaren”.)

¹⁸ Wan du die Jehowa hanjefst un deepen latst, dan wiest du doamet, daut du sienen Nomen emma ieren west, endoont waut doa kjemt. Sie die secha, daut Jehowa daut weet, waut du fa Schwierichkjeiten hast, un daut hee daut sitt, wan du am tru blifst, wan du aufjeprooft woascht. Velot die doaropp, daut hee die derch sienen heiljen Jeist de Krauft jäwen woat, waut die doatoo fält (Luk. 11:11-13). Met Jehowa siene Help woascht du Jesus no diene Doop wieda nofoljen kjennen.