1. Äwa waut wundren eenje true Deena veleicht?

 DAUT freit ons sea to weeten, daut Jehowa met siene Deena em auljemeenen tofräd es! De Bibel sajcht je: “De HAR freit sikj to sien Volkj” (Psa. 149:4). Oba eenje feelen sikj mol mootloos un wundren soogoa: “Es Jehowa met mie perseenlich tofräd?” Väl true Deena von de Bibeltiet wia daut uk schwoa to jleewen, daut Jehowa met äant tofräd wia (1. Sam. 1:6-10; Hiob 29:2, 4; Psa. 51:13).

2. Met wäm es Jehowa tofräd?

² De Bibel wiest kloa, daut Jehowa kaun met onvolkomne Menschen tofräd sennen. Oba waut mott wie doonen? Wie motten wiesen, daut wie aun Jesus Christus jleewen un ons deepen loten (Joh. 3:16). Soo wies wie uk, daut wie een Leetsennen haben un daut wie Gott vesproaken haben, sienen Wellen to doonen (Apj. 2:38; 3:19). Jehowa freit sikj sea, wan wie dit doonen, daut wie kjennen met am Frind woaren. Soolang aus wie ons Bastet doonen, ons aun daut Vespräakjen to hoolen, daut wie am deenen woaren, es hee tofräd met ons un talt ons aus siene groote Frind (Psa. 25:14, NW).

3. Woone dree Froagen woa wie ons nu unjastonen?

³ Wuarom denkjen eenje veleicht, daut Gott met äant nich tofräd es? Woo wiest Jehowa, daut hee met ons tofräd es? Woo kaun eena sikj secha sennen, daut Gott met eenem tofräd es?

 WUAROM SIKJ EENJE VELEICHT SOO FEELEN, DAUT JEHOWA NICH MET ÄANT TOFRÄD ES

4-5. Äwa waut kjenn wie ons gaunz secha sennen, wan wie ons wieetloos feelen?

⁴ Een deel von ons haben sikj von kjlien aun wieetloos jefeelt (Psa. 88:16). Een Brooda, waut Adrián heet, sajcht: “Ekj hab mie noch emma wieetloos jefeelt. Mie denkjt daut noch, aus ekj een kjliena Jung wia, daut ekj bäd, daut miene Famielje sull em Paradies nennkomen, wan ekj uk wist, daut ekj nich goot jenuach wia doatoo.” Tony, waut nich enne Woarheit oppwoss, sajcht: “Miene Elren haben mie kjeenmol jesajcht, daut dee mie leewden ooda daut see brow wieren met mie. Daut jeef mie emma daut Jefeel, daut ekj mie noch vebätren sull.”

⁵ Wan wie ons eenjemol mootloos feelen, dan kjenn wie doaraun denkjen, daut Jehowa selfst ons no sikj jetrocken haft (Joh. 6:44). Hee sitt daut Goode en ons, waut wie selfst veleicht nich seenen, un hee kjant ons Hoat (1. Sam. 16:7; 2. Chr. 6:30). Doawäajen kjenn wie ons gaunz opp am veloten, wan hee sajcht, daut wie bie am väl wieet sent (1. Joh. 3:19-20, NW).

6. Woo feeld de Apostel Paulus sikj äwa de Sinden, waut hee ea jedonen haud?

⁶ Eenje haben veleicht waut jedonen, ea dee de Woarheit kjanen lieeden, wua see sikj noch emma äwa schuldich feelen (1. Pet. 4:3). Mau rajcht eenje, waut Jehowa aul lang tru deenen, haben noch emma jäajen schlajchte Wenschen to kjamfen. Feelst du die eenjemol soo, daut Jehowa die nich vejäwen woat? Wan jo, dan kaun die daut treesten, daut Jehowa siene true Deena sikj ieeschtemma krakjt soo feelden. Biejlikj de Apostel Paulus feeld sikj sea schlajcht, wan hee äwa siene Onvolkomenheit nodocht (Reem. 7:24). Paulus haud een Leetsennen äwa siene Sinden un leet sikj deepen. Oba hee säd von sikj selfst: “Ekj sie de jerinjsta von de Apostel” un “de oajchsta” Sinda (1. Kor. 15:9; 1. Tim. 1:15).

7. Waut sell wie em Denkj hoolen äwa onse Sinden, waut wie ea jedonen haben?

⁷ Ons himlischa Voda vesprakjt, daut hee ons vejäwen woat, wan wie een Leetsennen haben (Psa. 86:5). Wan ons daut opp iernst leet es, waut wie jedonen haben, dan kjenn wie ons gaunz doaropp veloten, wan Jehowa sajcht, hee haft ons vejäft (Kol. 2:13).

8-9. Waut kjenn wie doonen, daut wie nich emma daut Jefeel haben, daut wie nich jenuach jäwen kjennen?

⁸ Wie aula wellen Jehowa soo goot aus mäajlich deenen. Oba eenje denkjen, daut see kjeenmol woaren jenuach doonen kjennen, daut Jehowa met äant tofräd es. Eene Sesta, waut Amanda heet, sajcht: “Ekj hab emma daut Jefeel, daut wan ekj Jehowa daut Baste jäwen well, dan mott ekj noch mea doonen. Ekj velang foaken von mie selfst mea, aus ekj jäwen kaun. Wan ekj daut nich nokom, waut ekj mie väajenomen hab, dan woa ekj met mie selfst mootloos un denkj, daut Jehowa uk woat.”

⁹ Waut kjenn wie doonen, daut wie nich emma daut Jefeel haben, daut wie nich jenuach fa Jehowa doonen? Denkj doaraun, daut Jehowa nich too väl von ons velangt. Hee weet, woo väl wie jäwen kjennen un hee velangt bloos daut. Hee räakjent daut sea väl, waut wie fa am doonen, soolang aus wie ons Bastet jäwen. Denkj mol aun eenje von de Bibeltiet, waut Jehowa met äa gaunzet Hoat deenden. Paulus biejlikj strenj sikj fa Joaren sea aun, reisd dusende Kilomeeta un stald väl Vesaumlungen opp. Oba aus sien Läwen sikj endad, kunn hee nich mea soo väl prädjen, aus hee ea haud kunt. Wia Jehowa nu ontofräd met am? Nä.  Hee jeef Jehowa wieda sien Bastet un wort doafäa säajent (Apj. 28:30-31). Wie kjennen Jehowa uk nich emma jlikjen väl jäwen. Oba waut bie am talt es, wuarom wie am deenen. Well wie nu mol een poa Sachen seenen, woo Jehowa wiest, daut hee met ons tofräd es.

WOO WIEST JEHOWA, DAUT HEE MET ONS TOFRÄD ES?

10. Woo sajcht Jehowa to ons, daut hee met ons tofräd es? (Johanes 16:27).

¹⁰ Derch de Bibel. Jehowa sieekjt no Mäajlichkjeiten, om siene Deena to wiesen, daut hee äant leeft un tofräd es met äant. En de Schreft säd Jehowa twee Mol to Jesus, daut hee sien leewa Sän wia un daut hee met am tofräd wia (Mat. 3:17; 17:5). Wurscht du daut jleichen, wan Jehowa mol to die säd, daut hee met die tofräd es? Jehowa woat ons daut nu nich von utem Himmel sajen, oba hee rät derch de Bibel to ons. Wan wie daut läsen, waut Jesus en de vea Evangelien säd, dan kjenn wie Jehowa siene Stemm hieren (läs Johanes 16:27). Jesus deed sienen Voda krakjt no. Soo, wan wie daut läsen, daut Jesus to siene true Nofolja säd, daut hee met äant tofräd wia, wan dee uk onvolkomen wieren, kjenn wie ons daut väastalen, daut Jehowa dautselwje to ons sajcht (Joh. 15:9, 15).

11. Wuarom sell wie nich denkjen, daut Jehowa met ons ontofräd es, wan wie Schwoaret beläwen? (Jakobus 1:12).

¹¹ Hee jeft ons daut Needje. Jehowa well ons jieren halpen; hee jeft ons biejlikj emma daut Needje. Oba eenjemol lat hee daut uk too, daut wie derch waut Schwoaret gonen, krakjt soo aus hee daut bie Hiob deed (Hiob 1:8-11). Wan wie Schwoaret beläwen, dan sell wie nich denkjen, daut Jehowa ontofräd met ons es. Enne Städ daut hab wie de Jeläajenheit to bewiesen, woo sea wie Gott leewen un woo sea wie opp am vetruen (läs Jakobus 1:12). En soone schwoare Tieden woat hee ons uk wiesen, woo sea hee ons leeft, un woat ons halpen, staunthauft to bliewen.

12. Waut kjenn wie von daut lieren, waut Dmitrii beläwd?

¹² Räd wie mol von Dmitrii, een Brooda en Asien. Am wort de Oabeit aufjesajcht un hee kunn fa Moonaten nich eene fresche finjen. Oba hee wull Jehowa wiesen, daut hee opp am vetrud un doawäajen wort hee sikj eenich, mea em Deenst to gonen. Miere  Moonat lota haud hee noch emma nich eene fresche Oabeit jefungen. Un dan wort hee noch sea krank un kjeem gaunz em Bad nenn. Hee funk uk aun to denkjen, daut hee nich een feina Ehemaun un Voda wia, un wundad, aus Jehowa nich mea met am tofräd wia. Oba eenen Owent schreef siene Dochta de Wieed von Jesaja 30:15 opp een Papia nopp, wua daut sajcht: “Wan jie stell bliewen un vetruen hoolen, woa jie stoakj sennen”. Dan brocht siene Dochta am daut Papia, un säd: “Pape, wan du die schlajcht feelst, dan denkj aun disen Bibelvarsch”. Dmitrii wort en, Jehowa haud doano jeseenen, daut siene Famielje doawäajen Äten, Kjleeda un een Dak äwarem Kopp haud. Hee sajcht: “Ekj sull bloos ruich bliewen un wieda opp Gott vetruen.” Wan du mol soowaut beläfst, dan vetru doaropp, daut Jehowa om die bekjemmat es un die halpen woat uttohoolen.

13. (a) Wäm brukt Jehowa toom ons wiesen, daut hee met ons tofräd es? (b) Woo deit hee daut?

¹³ Derch onse Breeda un Sestren. Jehowa brukt de Breeda un Sestren toom ons wiesen, daut hee met ons tofräd es. Biejlikj brinjt hee eenje bat doa, ons krakjt to de rajchte Tiet Moot tootospräakjen. Eene Sesta en Asien beläwd krakjt dit, aus see daut eemol sea schwoa haud. See haud äare Oabeit veloaren un wia sea krank jeworden. Äa Maun haud uk eene growe Sind begonen un kunn nich mea Eltesta sennen. See sajcht: “Ekj kunn daut nich vestonen, wuarom dit passieed. Ekj docht, veleicht haud ekj waut Orrajchtet jedonen un Jehowa wia ontofräd äwa mie.” De Sesta bäd Jehowa doarom, daut dee ar wiesen sull, aus hee tofräd wia met ar. Woo wees Jehowa ar daut? See sajcht: “De Eltestasch räden met mie un weesen mie, daut Jehowa mie noch leewd”. Lota fruach see Jehowa wada no  Help. See sajcht: “Ekj kjrieech dänselwjen Dach noch eenen Breef von waut Breeda un Sestren von miene Vesaumlunk. Aus ekj dee scheene Wieed läsd, wort mie daut dietlich, daut Jehowa mie jehieet haud.” Jehowa wiest ons foaken, daut hee met ons tofräd es, derch aundre äare leeftolje Wieed (Psa. 10:17, JHF).

14. Woo wiest Jehowa noch, daut hee met ons tofräd es?

¹⁴ Jehowa brukt de Breeda un Sestren toom ons Rot jäwen, wan daut fält. Soo wiest hee uk, daut hee met ons tofräd es. Toom Biespel brukt Jehowa dän Apostel Paulus ieeschtemma, om 14 Breew aun de Breeda to schriewen. En dise Breew jeef hee strenjen Rot, oba hee deed daut opp eene leeftolje Wajch. Wuarom wull Jehowa, daut Paulus äant soonen Rot jeef? Wiels hee een gooda Voda es un siene Kjinja trajchtwiest, “to … [dee] hee sikj freit” (Spr. 3:11-12). Soo, wan ons wäa Rot ut de Bibel jeft, dan wiest daut nich, daut Jehowa met ons ontofräd es, oba daut wiest, daut hee ons noch leeft (Heb. 12:6). Woo wiest Jehowa noch, daut hee met ons tofräd es?

NOCH MEA BEWIES, DAUT JEHOWA MET ONS TOFRÄD ES

15. (a) Wäm jeft Jehowa sienen heiljen Jeist? (b) Äwa waut kjenn wie ons secha sennen?

¹⁵ Jehowa jeft deejanje sienen heiljen Jeist, met wäm hee tofräd es (Mat. 12:18). Wie kjennen nu mol äwa nodenkjen: “Wies ekj en mien Läwen eenjet von dän Jeist siene Frucht?” Best du nu biejlikj jeduldja met aundre aus ea, ea du Jehowa kjanen jelieet hautst? Je dolla du lieescht, de Ieejenschoften von dän Jeist siene Frucht to wiesen, je sechra kaust du die sennen, daut Jehowa met die tofräd es! (See daut Hock “ Dän Jeist siene Frucht es . . . ”)

16. (a) Wäm brukt Jehowa toom de goode Norecht prädjen? (1. Tessalonicha 2:4). (b) Woo feelst du die doaräwa?

¹⁶ Jehowa haft deejanje daut Evangelium, ooda de goode Norecht, aunvetrut, met wäm hee tofräd es (läs 1. Tessalonicha 2:4). See wie mol, woo eene Sesta, waut Jocelyn heet, daut togood kjeem, daut see to aundre äwa de goode Norecht räd. Eenen Dach wuak Jocelyn opp un feeld sikj gaunz dol. See sajcht: “Mie späad sikj daut soo, aus wan ekj tonuscht to brucken wia. Oba daut wia mien Dach fa  dän Prädichtdeenst, wäajen ekj Pionia wia. Doawäajen bäd ekj to Jehowa un jinkj em Deenst.” Disen Vermeddach räd Jocelyn met Mary, eene leeftolje Fru, waut een Bibelstudium aunneem. Eenje Moonaten lota säd Mary, daut see krakjt dan jroz jebät haud un Gott om Help jefroacht haud, aus Jocelyn aun äare Däa jeputtat haud. Waut lieed Jocelyn von dise Erfoarunk? See sajcht: “Ekj feeld mie soo, aus wan Jehowa to mie säd, ‘ekj sie tofräd met die’”. Dauts kloa, daut nich aule no ons horchen woaren em Prädichtdeenst. Oba wie kjennen ons secha sennen, daut Jehowa ons väl räakjent, wan wie proowen, ons Bastet to doonen toom met aundre äwa de goode Norecht räden.

17. Waut kjenn wie von daut lieren, woo Vicky äwa daut Leesjelt docht? (Psalm 5:13).

¹⁷ Derch daut Leesjelt vejeft Jehowa deejanje, met wäm hee tofräd es (1. Tim. 2:5-6). Oba waut, wan wie ons soo feelen, daut Jehowa met ons nich tofräd es, wan wie uk aun daut Leesjelt jleewen un ons haben deepen loten? Denkj doaraun, daut wie nich emma opp onse Jefeelen vetruen kjennen – oba wie kjennen opp Jehowa vetruen. Hee talt deejanje fa jerajcht, waut aun daut Leesjelt jleewen, un vesprakjt dee to säajnen (läs Psalm 5:13; Reem. 3:26). Vicky haft daut jeholpen, äwa daut Leesjelt notodenkjen. Eenen Dach aus see deep äwa daut Leesjelt nodocht, wort ar daut dietlich: “Jehowa haft soo lang jeprooft, mie siene Leew to wiesen. . . . Oba daut wia soo, aus wan ekj to am säd: ‘Du kaust soonen Mensch aus mie nich leewen. Daut Leesjelt es nich jenuach toom miene Sinden vejäwen.’” Aus see äwa dit groote Jeschenkj nodocht, feeld see eene groote Leew von Jehowa. Wie kjennen ons uk von Jehowa jeleeft feelen un ons secha sennen, daut hee tofräd es met ons, wan wie äwa daut Leesjelt nodenkjen.

18. Äwa waut kjenn wie ons secha sennen, wan wie onsen himlischen Voda wieda leewen?

¹⁸ Wan wie veleicht uk emma wada proowen, daut notokomen, waut wie en disen Artikjel jelieet haben, kaun daut oba sennen, daut wie eenjemol mootloos woaren un wundren, aus Jehowa noch met ons tofräd es. Wan daut soo es, dan denkj emma doaraun, daut Jehowa met dee tofräd es, dee am wieda leewen (Jak. 1:12). Komm Jehowa emma noda un kjikj no dee Sachen, waut bewiesen, daut hee met die tofräd es. Vejät kjeenmol, daut Jehowa “von jiedren eenen nich wiet auf” es (Apj. 17:27).