1. Waut von Säajen beläw wie en Jehowa siene Organisazion?

 DAUTS werkjlich een Säajen, daut wie kjennen Poat von Jehowa siene Organisazion sennen en dise latste, schwoare Tiet. Met dise Welt jeit daut bloos boajauf, oba Jehowa haft ons Breeda un Sestren jejäft, waut ons halpen kjennen (Psa. 133:1). Hee halpt ons, daut wie aus Famielje fein toopschaufen kjennen (Efs. 5:33 – 6:1). Un hee jeft ons de Weisheit, waut wie brucken toom ennalichen Fräd haben.

2. Waut mott wie doonen, un wuarom?

² Wie motten ons aunstrenjen, daut wie Jehowa wieda tru deenen kjennen. Wuarom? Wäajen wie ons eenjemol beleidicht feelen äwa daut, waut onse Breeda un Sestren sajen un doonen. Veleicht feel wie ons uk eenjemol mootloos wäajen onse ieejne Fäla – besonda wan wie deeselwje Fäla emma wada moaken. Wie motten en Jehowa sienen Deenst staunthauft bliewen, (1) wan een Brooda ooda eene Sesta ons beleidicht, (2) wan wie von dän Ehepoatna enteischt woaren un (3) wan wie ons wäajen onse ieejne Fäla mootloos feelen. En disen Artikjel woa wie von dise dree Loagen räden. Wie woaren uk doavon räden, waut wie von eenje true Menschen von de Bibel lieren kjennen.

BLIEW STAUNTHAUFT, WAN DIE WÄA BELEIDICHT

3. Waut fa Schwoaret beläwen Jehowa siene Deena?

³ De Trubbel. Ons baudat daut, woo eenje Breeda un Sestren daut haben. Veleicht deit doa wäa waut, waut ons truarich moakt ooda behaundelt ons nich leeftolich. De Eltestasch moaken uk eenjemol Fäla. Dise Sachen kjennen eenje bat doa brinjen, daut dee doaraun twiewlen, aus dit werkjlich Gott siene Organisazion es. Veleicht wellen dee Gott dan nich mea met äare Breeda un Sestren toop “en Eenichkjeit . . . deenen”. Ooda  dee hieren mau rajcht opp, met dee to räden, waut äant beleidicht haben, ooda hieren gaunz opp, no de Toopkomes to wanken (Zef. 3:9, NW). Es daut kluak? See wie mol, waut wie von eenen Maun ut de Bibel lieren kjennen, waut sea dautselwje beläft.

4. Waut fa Schwoaret beläwd de Apostel Paulus?

⁴ Een Biespel ut de Schreft. De Apostel Paulus wist daut, daut siene Breeda un Sestren onvolkomen wieren. Biejlikj jleewden eenje von de Vesaumlunk en Jerusalem daut nich, daut hee een Jinja wia (Apj. 9:26). Lota räden eenje schlajcht äwa am toom am eenen schlajchten Nomen moaken (2. Kor. 10:10). Paulus sach daut uk, woo een veauntwuatlicha Brooda eene schlajchte Entscheidunk muak, waut aundre veleicht toom stolpren brocht (Gal. 2:11-12). Un Markus, eena von Paulus siene baste Poatna, schmäad am sea aun (Apj. 15:37-38). Paulus wudd sikj haben kunt eenich woaren, nich mea met soone toop to sennen, waut am beleidicht hauden. Oba hee räakjend siene Breeda un Sestren doawäajen noch sea väl un deend Jehowa wieda tru. Waut holp Paulus, staunthauft to bliewen?

5. Waut holp Paulus, wieda met siene Breeda un Sestren tooptoschaufen? (Kolossa 3:13-14). (See uk daut Bilt.)

⁵ Paulus leewd siene Breeda un Sestren. Daut holp am, no dee äare goode Sieden to kjikjen enne Städ no dee äare Fäla. De Leew holp Paulus uk, aundre to vejäwen. Hee säd en Kolossa 3:13-14, daut wie dautselwje doonen sullen (läs). See wie mol, woo Paulus met Markus omjinkj. Wan Markus am en siene ieeschte Missionsreis uk hinjawäajes veloten haud, bleef Paulus am doawäajen nich doll. Lota, aus hee een leeftoljen Breef aun de Vesaumlunk en Kolossä schreef, lowd hee Markus, wiels hee een wieetvolla Metoabeida wia, un säd, daut hee “een Troost jewast” wia fa am (Kol. 4:10-11). Aus Paulus em Room enjestopt wia, bestald hee uzhent, daut Markus am sull halpen komen (2. Tim. 4:11). Daut es kloa, daut Paulus siene Breeda un Sestren vejäwen deed un wieda met dee toopschauft. Waut kjenn wie von Paulus lieren?

6-7. Woo kjenn wie onse Breeda wieda Leew wiesen, wan dee uk Fäla moaken? (1. Johanes 4:7).

⁶ De Lia fa ons. Jehowa well, daut wie onse Breeda un Sestren wieda Leew wiesen (läs 1. Johanes 4:7). Wan ons wäa nich soo behaundelt, aus daut eenen Christ tookjemt, dan well wie bloos soo denkjen, daut dee daut ditmol bloos nich bedocht haft un daut dee sikj aun de biblische Gruntsauzen hoolen well (Spr. 12:18). Gott leeft siene true Deena, wan dee uk Fäla moaken. Hee  sajcht nich, daut wie dan nich mea kjennen siene Frind sennen, un hee blift ons uk nich doll (Psa. 103:9). Dauts sea wichtich, daut wie onsen himlischen Voda nodoonen un aundre uk vejäwen! (Efs. 4:32 – 5:1).

⁷ Well wie daut nich vejäten, daut wie met onse Breeda un Sestren motten fein toopschaufen, je noda daut Enj kjemt. Veleicht woa wie lota noch mea Vefoljunk haben. Ooda veleicht kom wie soogoa em Jefenkjnis nenn wäajen onsen Gloowen. Dan woat ons daut aun onse Breeda needja fälen aus jeemols ea (Spr. 17:17). See wie mol, waut Josep, a een Eltesta von Spaunien, beläwd. Hee un waut aundre Breeda worden toop opp deeselwje Städ enjestopt, wäajen dee nich wullen em Millitäa gonen. Hee sajcht: “Em Jefenkjnis wia daut schwoa, daut wie ons unjarenaunda nich beleidjen deeden, wäajen wie rein emma aula toop wieren. Wie musten ons vedroagen un wellich vejäwen. Daut holp ons, veeent to bliewen. Soo kunn wie ons uk unjarenaunda beschitzen fa de Jefangne, waut Jehowa nich deenden. Opp eene Sauz haud ekj mien Oarm velazt un wäajen dee enjezement wia, kunn ekj eenjet nich selfst doonen. Oba eent von de Breeda deed miene Wausch wauschen un kjemmad sikj uk en aundre Stekjen om mie. Mie wort de woare Leew jewäsen, aus mie daut aum Dolsten fäld.” Wie haben werkjlich goode Uasoak, nu aul onse Trubbels unjarenaunda to fiksen!

STAUNTHAUFT BLIEWEN, WAN DIEN EHEPOATNA DIE ENTEISCHT

8. Waut fa Schwoaret kaun een Ehepoa beläwen?

⁸ De Trubbel. Jieda Ehestaunt haft Schwierichkjeiten. De Schreft räd aul von “dän Trubbel”, waut befriede Menschen haben woaren (1. Kor. 7:28). Wuarom? Wiels derchem befrieen sent twee onvolkomne Menschen toop, waut veschieden sent un veschiednet jleichen. Dee sent veleicht von veschiedne Kulturen ooda veschieden oppjewossen. Met de Tiet komen doa veleicht soone Ieejenschoften opp, waut dee nich haben kunt kjanen lieren verem befrieen. Soont kaun eenje Trubbels veuasoaken. Foaken doonen dee de Schult bloos opp dän aundren schuwen, wan see uk beid Fäla moaken, enne Städ fein tooptoschaufen, om dän Trubbel to leesen. Veleicht haben eenje uk noch de Iedee, daut et wudd de Leesunk sennen, uteneentogonen ooda sikj scheeden to loten. Oba es daut de Leesunk? b Well wie mol seenen, waut wie von eene Fru ut de Bibeltiet lieren kjennen, waut staunthauft bleef, wan see uk eenen sea schwoaren Ehestaunt haud.

9. Waut fa Schwoaret beläwd Abigajil?

⁹ Een Biespel ut de Schreft. Abigajil wia met Nabal befriet. De Bibel sajcht, daut hee een schlajchta Maun un schwoa to lieden wia (1. Sam. 25:3). Daut mott schwoa jewast sennen, met soonen Maun tooptoläwen. Wudd see haben eene Mäajlichkjeit jehaut, met äare Ehe een Enj to moaken? Jo, see haud de Jeläajenheit, aus David, waut lota Israel äa Kjennich sennen wudd, kjeem, om äaren Maun doottomoaken, wäajen dee am un siene Mana utjeflieekjt haud (1. Sam. 25:9-13). Abigajil wudd haben kunt wajchranen, daut David sienen Plon derchfieren kunn. Oba see deed daut nich. Enne Städ daut beräd see David, daut dee sull Nabal aum läwen loten (1. Sam. 25:23-27). Waut brocht ar woomäajlich bat doa?

10. Waut brocht Abigajil veleicht bat doa, staunthauft to bliewen, wan see uk eenen schwoaren Ehestaunt haud?

 ¹⁰ Abigajil leewd Jehowa un doawäajen haud see krakjt soo väl Respakjt fa dän Ehestaunt aus hee. See wist secha krakjt, waut Gott to Adam un Eva jesajcht haud, aus hee dee toopbrocht (1. Mo. 2:24). Abigajil wist, daut de Ehestaunt bie Jehowa heilich wia. See wull Gott jefaulen. Doawäajen deed see aules, waut see kunn, om Nabal to raden un uk dee, waut to äa Hus jehieeden. See deed fuaz waut, daut David Nabal nich dootmuak. See wia reed, om Vejäwunk to froagen, wan see selfst uk nuscht Orrajchtet jedonen haud. Dauts nich toom wundren, daut Jehowa dise äwanämende Fru sea leewd, waut dolla om aundre todoonen wia aus om sikj selfst. Waut kjennen Ehefrues un Ehemana von Abigajil lieren?

11. (a) Waut velangt Jehowa von een Ehepoa? (Efeesa 5:33). (b) Waut kaust du von Carmen lieren, waut sikj sea aunstrenjd, äare Ehe to beschitzen? (See uk daut Bilt.)

¹¹ De Lia fa ons. Jehowa well, daut een Ehepoa toop blift, wan daut uk nich leicht es, met dän Ehepoatna tooptoläwen. Jehowa es sea schaftich, wan hee sitt, daut een Ehepoa sikj aunstrenjt, de Trubbels to leesen un sikj unjarenaunda Leew un Respakjt wiesen (läs Efeesa 5:33). See wie mol daut Biespel von Carmen. Aus see soo bie sas Joa befriet wia, fungen Jehowa siene Zeijen aun, met Carmen de Bibel to studieren, un lota leet see sikj deepen. See sajcht: “Mien Maun jleicht daut nuscht. Am oajad daut, daut ekj mie Tiet neem fa Jehowa. Hee flieekjt mie ut un säd, daut hee mie veloten wudd.” Oba Carmen bleef staunthauft. Fa 50 Joa strenjd see sikj sea aun, äaren Maun to leewen un Respakjt to wiesen. See sajcht: “Met de Joaren kunn ekj bäta vestonen, woo mien Maun sikj feeld un lieed uk, leeftolich met am to räden. To weeten, daut de Ehestaunt bie Jehowa heilich es, holp mie, daut ekj aules deed, waut ekj kunn, om onsen Ehestaunt to beschitzen. Wäajen ekj Jehowa leew, hab ekj kjeenmol jeprooft, mienen Maun to veloten.” c Soo, wan daut en dienen Ehestaunt schwoa dreit, dan kaust du gaunz doaropp vetruen, daut Jehowa die halpen un unjastetten woat, daut du kaust staunthauft bliewen.

BLIEW STAUNTHAUFT, WAN DU EENEN GROOTEN FÄLA MOAKST

12. Waut fa Schwoaret beläwen soone, waut groote Sinden begonen haben?

¹² De Trubbel. Wan wie eene groote Sind begonen, dan feel wie ons veleicht sea mootloos. De Bibel sajcht, wie kjennen “een  veenjstet, jebroaknet Hoat” haben, wäajen onse Sinden (Psa. 51:19). Een Brooda, waut Robert heet, haud sikj fa väle Joaren aunjestrenjt, daut hee kunn aus een Deenstaumthelpa deenen. Oba hee bejinkj eene groote Sind un wort Jehowa ontru. Hee sajcht: “Mie ploagd daut Jewessen sea, un ekj feeld mie grulich sea schlajcht. Ekj road un bäd to Jehowa. Oba ekj docht, daut hee kjeenmol mea no miene Jebäda horchen wudd, wäajen ekj am ontru jewast wia.” Wan wie eene Sind begonen, dan kjenn wie veleicht denkjen, daut sikj daut nich mea loont, Jehowa wieda to deenen, wiels wie dan denkjen, daut Jehowa ons veloten haft (Psa. 38:5, JHF). Wan die daut soo jeit, dan denkjt aun de Jeschicht von eenen Maun ut de Bibel, waut Jehowa wieda deend, wan hee uk eene groote Sind begonen haud.

13. (a) Waut vonne growe Sind bejinkj de Apostel Petrus? (b) Woo kjeem daut bat doa?

¹³ Een Biespel ut de Schreft. Dee Nacht, ea se Jesus dootmuaken, muak de Apostel Petrus veschiedne Fäla, waut am bat doa brochten, eene growe Sind to begonen. Daut Ieeschte wia, daut Petrus too sea opp sikj selfst vetrud. Hee säd, wan aule aundre Apostel Jesus uk veloten wudden, hee wudd nich (Mar. 14:27-29). Lota, aus see em Goaden Getsemane wieren, schleep Petrus emma wada en un bleef nich waka (Mar. 14:32, 37-41). Dan, aus de Grupp Menschen kjeemen, om Jesus fausttonämen, leet Petrus am auleen (Mar. 14:50). Un dan kjeem daut bat doa, daut Petrus Jesus dree Mol veluach. Hee säd mau rajcht, daut doa een Fluch opp am komen sull, wan hee nich de Woarheit säd (Mar. 14:66-71). Waut deed hee nu, aus hee enwort, daut hee eene growe Sind begonen haud? Hee bruak ennalich toop un funk aun, sea to roaren. Hee mott sikj secha sea schuldich jefeelt haben (Mar. 14:72). Kaust du die väastalen, woo Petrus sikj mott jefeelt haben, aus hee enwort, daut sien Frint Jesus lota omjebrocht wort? Hee mott sikj werkjlich wieetloos jefeelt haben!

14. Waut holp Petrus staunthauft em Deenst fa Jehowa to bliewen? (See daut Bilt.)

¹⁴ Daut jeft miere Uasoaken, wuarom Petrus staunthauft bleef em Deenst fa Jehowa. Hee trock sikj nich trigj un wia wada met de aundre Apostel toop, waut am secha Moot muaken (Luk. 24:33). Un nodäm Jesus vom Doot oppjestonen wia, leet hee sikj von Petrus seenen un haft am secha Moot toojesproaken (Luk. 24:34; 1. Kor. 15:5). Lota säd Jesus noch to siene Frind, daut Petrus noch mea Veauntwuatunk kjrieen wudd, enne Städ daut hee Petrus fa siene  Fäla trajchtwees (Joh. 21:15-17). Petrus wist daut goot, daut hee schwoa jesindicht haud, oba hee proowd doawäajen wieda, daut Rajchte to doonen. Wuarom? Wäajens hee sikj secha wia, daut Jesus am doawäajen noch leewd. Un Petrus siene jeistelje Breeda haben am wieda unjastett. Waut kjenn wie von Petrus sien Biespel lieren?

15. Äwa waut sell wie ons secha sennen? (Psalm 86:5; Reema 8:38-39). (See uk daut Bilt.)

¹⁵ De Lia fa ons. Jehowa well, daut wie ons doaräwa em kloaren sent, daut hee ons leeft un reed es, ons to vejäwen (läs Psalm 86:5; Reema 8:38-39). Wan wie sindjen, dan feel wie ons schlajcht – un daut es gaunz jeweenlich un uk rajcht. Oba wie sellen nienich denkjen, daut Jehowa ons nich mea leeft ooda ons nich vejäwen woat. Wie sellen leewa fuaz no Help sieekjen. Robert, von dän wie ea aul räden, sajcht: “Ekj haud eene Sind begonen, wäajen ekj bloos opp mie selfst vetrut haud, aus ekj aufjeprooft wort”. Hee wort en, daut hee must met de Eltestasch räden. Hee sajcht: “Aus ekj daut ieescht jedonen haud, kunn ekj daut fuaz späaren, woo Jehowa mie derch de Eltestasch siene Leew wees. Ekj kunn daut seenen, daut de Eltestasch mie uk leewden. Dee holpen mie to seenen, daut Jehowa mie nich veloten haud.” Wie kjennen ons uk aula secha sennen, daut Jehowa ons leeft un ons vejäwen woat, wan ons daut leet es, waut wie jedonen haben, un no Help sieekjen un ons aunstrenjen, nich wada dänselwjen Fäla to moaken (1. Joh. 1:8-9). Wan wie ons doaräwa secha sennen, dan woa wie nich oppjäwen un woaren Jehowa wieda deenen, wan wie uk Fäla moaken.

16. Wuarom best du die eenich, staunthauft to bliewen em Deenst fa Jehowa?

¹⁶ Jehowa räakjent daut sea väl, wan wie ons aunstrenjen, am en dise schwoare, latste Doag to deenen. Met siene Help kjenn wie staunthauft bliewen, mau rajcht wan wie ons uk eenjemol mootloos feelen. Wie kjennen onse Breeda un Sestren wieda Leew wiesen un dee vejäwen, wan dee ons beleidjen. Wie kjennen uk wiesen, daut wie Gott sea leewen un daut wie dän Ehestaunt fa heilich talen, wan wie aules doonen, waut wie kjennen, om de Trubbels to leesen, waut enne Ehe oppkomen. Un wan wie eene Sind begonen haben, dan sell wie bie Jehowa no Help sieekjen. Wie sellen daut aunnämen, daut hee ons doawäajen noch leeft un vejeft. Un wie kjennen am wieda deenen un ons secha sennen, daut “wan wie nich mootloos woaren, woa wie arnten, wan daut ieescht Tiet doatoo es” (Gal. 6:9).