1-2. Waut lia wie to doonen, wan wie em jeisteljen wiedakomen? Met waut jeit daut to vejlikjen?

STAL die mol väa, een kjlienet Kjint kjricht een Jeschenkj. De Elren sajen: “Saj dankscheen!” Daut Kjint deit daut, wiels see daut väasajen, oba nich ut sikj selfst. Oba wan dee ieescht ella woat, dan vesteit dee, wuarom de Elren denkjen, daut eena dankscheen sajen saul, wan aundre waut goodet fa eenem doonen. Un lota sajcht dee ut sikj selfst dankscheen, wiels dee jelieet haft dankboa to sennen.

² Biejlikj soo wia daut bie ons, aus wie Jehova kjanen lieeden. Dan lieed wie, woo needich daut wia, daut to doonen, waut Jehova haben wull. Oba wan wie em jeisteljen veraunkomen, lia wie mea äwa Jehova sien denkjen – waut hee jleicht un waut hee nich jleicht un woo hee veschiednet sitt. Wan wie lieren, soo to denkjen aus Jehova, dan woat daut aun onse Woakjen un aun onse Entscheidungen to seenen sennen.

3. Wuarom kaun daut waut opp sikj haben, soo to denkjen aus Jehova?

³ Daut jeit scheen, wan wie lieren, soo to denkjen aus Jehova, oba daut kaun uk waut opp sikj haben. Eenjemol es daut schwoa, wäajen wie onvolkomen sent. Biejlikj weet wie, woo hee äwa een orreinet Läwen denkjt, äwa tieteljet, äwa daut Prädichtwoakj un äwa daut Bloot ooda sestwaut. Oba daut kaun  eenjemol schwoa sennen to vestonen, wuarom hee soo denkjt. Woo kjenn wie dan lieren, emma dolla soo to denkjen aus Jehova? Un woo woat ons daut halpen, nu un uk lota goot to entscheiden?

4. Waut meent daut, derch onse “niee Jesennunk veendat woaren”?

⁴ Läs Reema 12:2. De Apostel Paulus säd, waut wie doonen motten, om to lieren, soo to denkjen aus Jehova. Hee säd: “Stalt junt nich soo han aus dise Welt deit”. Soo aus wie en dän väajen Artikjel jeseenen haben, meent daut, daut wie de Welt äa denkjen un Benämen motten tochloten. Oba Paulus säd uk noch: “Jie sellen derch june niee Jesennunk veendat woaren”. Daut bediet, wie motten Gott sien Wuat studieren, siene Jedanken vestonen un äwa dee nodenkjen un ons aunstrenjen uk soo to denkjen aus Jehova.

5. Waut es studieren?

⁵ Studieren es mea aus bloos bowenäwa waut läsen ooda bloos de Auntwuaten fa de Froagen to tieekjnen. Wan wie studieren, sell wie nodenkjen, waut ons daut äwa Jehova lieet un äwa daut, waut hee deit un woo hee denkjt. Wie sellen proowen to vestonen, wuarom Gott well, daut wie jewesset doonen un aundret tochloten. Wie sellen uk doaräwa nodenkjen, wua wie ons denkjen un Läwen noch endren kjennen. Daut es veleicht nich emma mäajlich, äwa jieda Eenselheit notodenkjen, wan wie studieren. Oba daut es goot, wan wie jiedatsmol biem studieren de Halft von de Tiet brucken toom äwa daut nodenkjen, waut wie jeläst haben (Psa. 119:97; 1. Tim. 4:15, NW).

6. Woo woat daut utkomen, wan wie äwa Gott sien Wuat nodenkjen?

⁶ Wan wie räajelmässich äwa Gott sien Wuat nodenkjen, dan woa wie waut scheenet enwoaren. Ons woat daut kloa woaren, daut Jehova sien denkjen volkomen es. Un met de Tiet woa wie Sachen soo seenen, aus Jehova dee sitt, un soo denkjen aus hee. Onse “Jesennunk [woat] veendat” un wie kjrieen een nieet denkjen, wiels wie lieren emma dolla soo to denkjen aus Jehova.

7-8. (a) Woo sitt Jehova de tietelje Sachen? (See de Bilda aum Aunfank.) (b) Waut woat ons daut wichtichste sennen, wan wie de tietelje Sachen soo seenen aus Jehova?

⁷ Onse Jedanken doonen väl doaraun, waut wie doonen (Mar. 7:21-23; Jak. 2:17). Well wie mol een poa Biespels seenen, waut daut kloa moaken. De Evangelien wiesen ons krakjt, woo Jehova äwa tietelje Sachen denkjt. Gott wäld sikj selfst Josef un Maria ut toom sienen Sän opptrakjen, wan dee uk nich väl Jelt hauden (3. Mo. 12:8; Luk. 2:24). Aus Jesus jebuaren wort, läd Maria “am en de Foodakjrebb; wiels em Gausthus kjeen Rum to finjen wia” (Luk. 2:7). Wan Jehova daut jewult haud, wudd hee daut haben kunt soo moaken, daut Jesus opp eene bätre Städ jebuaren wort. Oba waut fa Jehova tald, wia, daut eene jeistelje Famielje fa sienen Sän sorjd un am opptrock.

⁸ Von de Jeschicht äwa Jesus siene Jeburt kjenn wie lieren, woo Jehova äwa daut tietelje denkjt. Eenje Elren wellen, daut äare Kjinja de baste Sachen em tieteljen haben, uk wan dee daut em jeisteljen schot. Oba fa Jehova es daut jeistelje daut gaunz wichtichste. Denkjst du aul soo aus Jehova? Waut wiesen diene Woakjen? (Läs Hebräa 13:5.)

9-10. Wan daut om wäm tofaul brinjen jeit, woo kjenn wie wiesen, daut wie uk soo denkjen aus Jehova?

 ⁹ Een aundret Biespel es, woo Jehova äwa soone denkjt, waut aundre tofaul brinjen. Jesus säd: “Wäa eent von dise kjliene, dee aun mie jleewen, eene Uasoak jeft to faulen, fa däm wia daut bäta, daut am een Molsteen aum Jenekj jehongen un em Mäa jeschmäten wort” (Mar. 9:42). Daut es kloa to seenen, daut Jesus soont fa eene iernste Sach talt. Un wie weeten, daut Jesus krakjt soo es aus sien Voda. Doawäajen weet wie, daut Jehova daut uk nich jleicht, wan wäa met Fliet waut deit, waut eent von Jesus siene Nofolja tofaul brinjt (Joh. 14:9).

¹⁰ See wie dise Sach uk soo aus Jehova un Jesus? Waut wiesen onse Woakjen? Saj wie mol, eena jleicht eene jewesse Mood, woo eena sikj auntrakjt ooda oppfikst, waut eenje en de Vesaumlunk stieet ooda soogoa opp orreine Jedanken brinjt. Es onse Leew fa onse Gloowesbreeda jrata aus dee Mood, waut wie jleichen? (1. Tim. 2:9-10).

11-12. Wuarom es daut needich, daut wie lieren, ons selfst to beharschen un daut to haussen, waut Jehova haust?

¹¹ Een dreddet Biespel es: Jehova haust Ojjerajchtichkjeit (Jes. 61:8). Hee weet, daut et fa ons nich emma leicht es, daut rajchte to doonen, wiels wie onvolkomen sent. Oba hee well doawäajen, daut wie sellen soo denkjen aus hee un daut schlajchte haussen (läs Psalm 97:10). Wan wie doaräwa nodenkjen, wuarom Jehova daut schlajchte haust, woat ons daut halpen, uk soo to denkjen aus hee, un wie woaren de Krauft kjrieen, soont nich to doonen.

¹² Wan wie lieren, daut schlajchte to haussen, dan woa wie uk enwoaren, daut eenje Sachen orrajcht sent, wan de Schreft doa uk nich von rät. Toom Biespel woat eene Sort orreinet Benämen, de Schoot-Daunz (Lap-Dance), emma dolla Mood enne Welt. Eenje denkjen, daut soont nuscht baudat, wäajen daut nich dautselwje es, aus met wäm jeschlajchtlich toopkomen. * Oba woo denkjt Jehova doaräwa? Wie motten em Denkj hoolen, daut Jehova aul daut schlajchte haust. Doawäajen well wie wiet auf bliewen von aules, waut schlajcht es, un lieren, ons selfst to beharschen un daut to haussen, waut Jehova haust (Reem. 12:9).

13. Wuarom sell wie em verut äwalajen, woo Jehova äwa eenjet denkjt?

¹³ Daut es goot, wan wie biem studieren doaräwa nodenkjen, woo Jehova äwa eenje Loagen denkjt, waut wie lota noch mol beläwen kunnen. Daut woat ons halpen, wan wie dan mol en soone Loag sent un fuaz motten eene Entscheidunk trafen (Spr. 22:3). Well wie mol waut Biespels seenen.

14. Waut lia wie von daut, waut Josef deed, aus Potifar siene Fru am veleiden wull?

¹⁴ Aus Potifar siene Fru Josef veleiden wull, wia hee sikj fuaz eenich, nuscht schlajchtet to doonen. Doaraun wia to seenen, daut Josef doa aul haud äwa nojedocht, woo Jehova äwa Ehebruch docht (läs 1. Mose 39:8-9). Josef säd to Potifar siene Fru: “Woo kunn ekj dan bloos soon schlajchtet doonen un jäajen Gott sindjen?” Dit wiest, daut Josef  soo docht aus Jehova. Woo steit daut met ons? Waut wudd wie doonen, wan een Oabeitspoatna aunfunk no ons to schmeichlen? Ooda wan ons wäa äwa Fon waut orreinet schreef ooda schwiensche Bilda schekjt? * Daut es väl leichta, Jehova tru to bliewen, wan wie aul ea jelieet haben, woo hee äwa soont denkjt, un ons aul sent eenich jeworden, waut wie en soone Omstend doonen wudden.

15. Woo kjenn wie Jehova tru bliewen, soo aus de dree Hebräa?

¹⁵ See wie mol daut Biespel von de dree Hebräa Schadrach, Meschach un Abed-Nego. Aus de Kjennich Nebukadnezar säd, see sullen sikj ver een goldnet Stauntbilt bekjen, wieren dee sikj gaunz eenich, daut nich to doonen. Aun dee äare Auntwuat wia kloa to seenen, daut see aul ea äwa nojedocht hauden, waut doa met en wia Jehova tru to bliewen (2. Mo. 20:4-5; Dan. 3:4-6, 12, 16-18). Waut wudd wie doonen, wan ons Wieet ons fruach, aus wie wullen Gowen jäwen fa een Fast, waut met eenen faulschen Gloowen to doonen haud? Enne Städ luaren, bat soowaut väakjemt, es daut goot, wan wie nu aul äwa nodenkjen, woo Jehova äwa soont denkjt. Un wan dan mol soowaut väakjemt, dan woat ons daut leichta sennen, daut rajchte to sajen un to doonen, soo aus de dree Hebräa.

16. Wuarom sell wie nu aul äwalajen, woo Jehova denkjt, un nich luaren, bat wie eene drinjende Doktarie haben?

¹⁶ Doaräwa nodenkjen, woo Jehova denkjt, woat ons uk halpen am tru to bliewen, wan wie mol eene drinjende Doktarie haben. Wie sent ons gaunz eenich, ons nich Bloot ooda von de vea Hauptpoat vom Bloot enlakjen to loten (Apj. 15:28-29). Oba daut jeft eenje Doktarieen, wua Bloot met en es, wua jieda Christ fa sikj selfst no biblische Gruntsauzen no entscheiden mott. Nu es de baste Tiet toom äwalajen, waut eena doonen saul, un nich, wan eena ieescht em Hospitol es un veleicht groote Weedoag haft ooda unja Druck es un haustich waut entscheiden mott. Wie motten aul ea nosieekjen un Papieren utfellen, wua wie dietlich  moaken, waut wie wellen, un uk met onsen Dokta räden. *

17-19. Wuarom es daut nu wichtich to lieren, woo Jehova äwa jewesse Sachen denkjt? Jeff een Biespel.

¹⁷ Tolatst denkj wie mol äwa Jesus siene haustje Auntwuat, aus Petrus haben wull, daut Jesus aun sikj selfst denkjen sull. Jesus haud secha aul ea väl doaräwa nojedocht, fa waut Gott am jeschekjt haud un uk äwa de Profezeiungen von sien Läwen oppe Ieed un sienen Doot. Aul dit to weeten un to vestonen holp Jesus, Jehova tru to bliewen un sien Läwen aus Leesjelt to jäwen (läs Matäus 16:21-23).

¹⁸ Vondoag dän Dach well Gott, daut wie siene Frind sent un ons bastet doonen toom de goode Norecht prädjen (Mat. 6:33; 28:19-20; Jak. 4:8). Oba krakjt soo aus Petrus daut bie Jesus deed, roden eenje Menschen ons veleicht utem gooden Senn doavon auf. Saj wie mol, dien Wieet wudd die eene bätre Oabeit aunbeeden, wua du mea kust vedeenen, oba waut die wudd de Tiet wajchnämen, waut du nu fa de Toopkomes un dän Prädichtdeenst brukst. Ooda waut, wan du no de School jinjst un eene Jeläajenheit kjrieechst von tus to trakjen, om die noch hecha uttolieren? Wurscht du motten wachten, bat du en soone Loag wieescht, ea du bäden, noforschen un met diene Elren ooda Eltestasch doaräwa räden deetst? Daut es bäta, wan du nu aul lieescht, äwa soone Sachen soo to denkjen aus Jehova. Wan se die dan mol soowaut aunbeeden, woascht du veleicht en, daut die daut nich mol sea jankat. Du weetst, waut du die em jeisteljen väajenomen hast, un du best die gaunz eenich un brukst daut bloos noch doonen.

¹⁹ Daut jeft uk noch aundre Loagen, wua daut doaropp aunkjemt Jehova tru to bliewen. Secha kjenn wie ons nich opp aules reedmoaken, waut onverhofs väakomen kaun. Oba wan wie biem studieren doaräwa nodenkjen, woo Jehova denkjt, dan woat ons daut en eene schwoare Loag woomäajlich wada biefaulen un wie woaren leichta weeten, waut wie doonen sellen. Doawäajen mott wie, wan wie studieren, doaropp achten, woo Jehova Sachen sitt, un lieren, soo to denkjen aus hee, un äwalajen, woo Jehova siene Jedanken ons halpen kjennen, wan wie nu ooda lota waut entscheiden motten.

20-21. (a) Wuarom woa wie en de niee Welt kjennen Freid haben aun onse Frieheit? (b) Woo kjenn wie vondoag dän Dach aul Freid haben?

²⁰ Wie freien ons aul to de niee Welt. De mieeschte von ons haben de Hopninj, fa emma en een Paradies oppe Ieed to läwen. Unja Gott sien Kjennichrikj woa wie frie sennen von aul de Sorjen, waut wie nu en dise Welt haben. Un en de niee Welt woa wie noch emma de Frieheit haben, ons uttoläsen, waut wie jleichen un waut ons scheen jeit.

²¹ Oba daut bediet nich, daut wie en aule Stekjen woaren Frieheit haben. En de niee Welt woaren deemootje Menschen sikj no Jehova siene Jesazen un no sien denkjen rechten, wan daut doarom jeit, waut rajcht un orrajcht es. Un daut woat groote Freid un Fräd brinjen (Psa. 37:11). Oba bat dee Tiet kjemt, kjenn wie doawäajen nu aul Freid haben, wan wie soo denkjen, aus Jehova denkjt.