1. Wuarom bruck wie aula Troost?

ONS fält daut aula aun Troost. Veleicht hab wie väl Sorjen, Angst ooda woaren foaken enteischt. Ooda wie motten lieden, wäajen wie eene Krankheit haben ooda ella woaren ooda wäajen doa wäa jestorwen es, waut wie väl jeräakjent haben. Eenje von ons woaren uk schlajcht behaundelt un de Menschen rom ons woaren emma schlemma. De “jreslich schwoare Tieden”, waut wie nu beläwen, sent een Bewies doafäa, daut wie “en de latste Doag” läwen un daut de niee Welt jieda Dach noda kjemt (2. Tim. 3:1). Oba wie haben woomäajlich aul lang no daut jeluat, waut Jehova vesproaken haft, un ons Läwen woat emma schwanda. Woo kjenn wie dan Troost finjen?

2-3. (a) Waut weet wie äwa Habakuk? (b) Wuarom woa wie nu mea Eenselheiten äwa daut Buak Habakuk seenen?

² En daut Buak Habakuk woa wie seenen, woo wie Troost finjen kjennen. De Nomen Habakuk bediet woomäajlich “leeftolich omoarmen”. Daut kaun een Bilt doafäa sennen, daut Jehova ons soo treest, aus wan hee ons wudd leeftolich omoarmen, ooda doafäa, daut wie ons faust aun am hoolen. En de Schreft es nich väl äwa Habakuk sien Läwen jeschräwen,  oba sien Buak jeft ons väl Moot. De Profeet Habakuk stald Jehova eenje Froagen. Jehova auntwuad am un leet am daut aula oppschriewen, wäajen hee wist, daut wie doa väl wudden von lieren kjennen (Hab. 2:2).

³ Daut eensje, waut de Schreft von Habakuk sajcht, es de Vetal tweschen dän truajen Profeet un Jehova. Habakuk sien Buak jehieet to daut, waut “verhäa jeschräwen wia”, un es een Poat von Gott sien Wuat, “daut wie derch de Jedult un dän Troost en de Schreft wudden Hopninj haben” (Reem. 15:4). Waut kjenn wie von daut Buak Habakuk lieren? Daut kaun ons halpen to vestonen, waut daut meent, sikj opp Jehova to veloten. Habakuk siene Profezeiunk vesechat ons uk, daut wie kjennen ennalich Fräd finjen un hoolen, krakjt endoont waut vonne Trubbels ooda Schwierichkjeiten wie haben. Well wie nu mol mea Eenselheiten äwa dit Buak seenen.

4. Wuarom wia Habakuk soo truarich?

⁴ Läs Habakuk 1:2-3. Habakuk läwd en eene sea schwoare Tiet. Hee wia sea truarich, wäajen de Menschen rom am wieren sea schlajcht un grausom. Wanea wudd daut mol een Enj nämen? Wuarom leet Jehova daut soo lang toch? Aulawäajen, wua Habakuk hankjikjt, sach hee, daut de Israeliten sikj unjarenaunda ojjerajcht un grausom behaundelden. Hee feeld sikj halploos un doawäajen prachad hee Jehova om Help. Veleicht späad Habakuk sikj daut soo, daut Jehova nich mea om sien Volkj bekjemmat wia ooda daut hee daut too lang tochleet. Hast du die uk mol soo jefeelt?

5. Waut kjenn wie von daut Buak Habakuk lieren? (See daut Bilt aum Aunfank.)

⁵ Veleet Habakuk sikj nich mea opp Jehova? Jleewd hee nich mea aun daut, waut Gott vesproaken haud? Nä, daut wia nich daut! Hee fruach je Jehova no Help wäajen siene Sorjen un Trubbels un daut bewiest, daut hee noch nich haud Hopninj oppjejäft. Hee veleet sikj noch opp Jehova. Am wia daut bloos schwoa, wäajen hee nich wist, wanea Jehova doa waut met doonen wudd ooda wuarom hee soo lieden must. Derch daut, waut Jehova Habakuk äwa siene Sorjen oppschriewen leet, lieet hee ons waut wichtjet. Jehova well ons weeten loten, daut wie nich brucken Angst haben, am von onse Sorjen ooda Twiewel to vetalen. Hee wenscht sikj, daut wie to am bäden un am aules sajen, waut ons oppem Hoaten licht (Psa. 50:15; 62:9). En Spricha 3:5 sajcht daut noch: “Velot die opp däm HARN met dien gaunzet Hoat, un velot die nich opp dien ieejnet Vestaunt.” Secha kjand Habakuk dise Wieed un kjeem dee uk no.

6. Wuarom sell wie bäden?

⁶ Habakuk veleet sikj opp sienen Frint un Voda Jehova un schauft doaropp, dän noda to komen. Hee muak sikj nich bloos Sorjen un proowd selfst, de Trubbels to fiksen. Enne Städ daut säd hee Jehova, woo am daut jinkj un waut am schwoa wia. Daut es een goodet Biespel fa ons. Jehova hieet onse Jebäda un hee wenscht sikj, daut wie ons opp am veloten un am sajen, waut ons oppem Hoaten licht (Psa. 65:3). Wan wie daut doonen, dan woa wie beläwen, woo Jehova onse Jebäda beauntwuat. Wan hee ons treest un leit, dan es daut soo, aus wan hee ons leeftolich omoarmt (Psa. 73:23-24). Hee woat ons halpen to vestonen, woo hee äwa onse Loag denkjt, endoont waut vonne Schwierichkjeiten wie haben. Wan wie von Hoaten bäden, dan bewies wie, daut wie ons gaunz opp Gott veloten.

7. Waut deed Jehova, aus Habakuk am von siene Sorjen vetald?

⁷ Läs Habakuk 1:5-7. Nodäm daut Habakuk siene Trubbels un Sorjen en Jehova siene Henj leet, wundad hee veleicht, waut Jehova nu doonen wudd. Wäajen Jehova een leeftolja Voda es, vestunt hee, woo Habakuk sikj feeld. Hee wist, daut dee am no Help prachad, wäajen dee schwoaret derchmuak. Doawäajen deed Jehova dän nich trajchtwiesen, oba säd am, daut hee de ontrue Juden boolt bestrofen wudd. Veleicht wia Habakuk de ieeschta, waut Jehova daut weeten leet, waut hee met dee doonen wudd.

8. Wuarom wia Jehova siene Auntwuat aundasch, aus Habakuk docht?

⁸ Jehova wees Habakuk, daut daut nich mea lang dieren wudd. Hee wudd meist fuaz de Chaldäa, ooda Babelonia, brucken toom de schlajchte un grausome Menschen von Juda bestrofen. Jehova säd: “Ekj woa en june Tiet waut doonen”. Daut wiest, daut Habakuk un de aundre Israeliten daut noch beläwen wudden. Jehova siene Auntwuat wia gaunz aundasch, aus waut Habakuk sikj väajestalt haud. De Babelonia wieren sea grausom. Dee wieren noch oaja aus de Israeliten, waut weens wisten, waut Jehova velangd. Wuarom wull Jehova dan dit grausome heidnische Volkj brucken toom sien Volkj bestrofen? Dan wudden de Menschen von Juda bloos noch dolla lieden motten. Woo wurscht du die en Habakuk siene Städ jefeelt haben?

9. Waut wull Habakuk weeten?

⁹ Läs Habakuk 1:12-14, 17. Habakuk wist nu, daut Jehova de Babelonia brucken wudd toom de schlajchte Menschen rom am bestrofen, oba hee kunn daut doawäajen noch nich gaunz foten. Un doch säd hee deemootich, daut Jehova wieda wudd sien “Schutz” sennen (5. Mo. 32:4; Jes. 26:4). Habakuk wuach sikj mau rajcht, dän noch mea to froagen, wäajen hee sikj noch emma doaropp veleet, daut Gott leeftolich un frintlich wia. Hee wull weeten, wuarom Jehova daut tooloten wudd, daut et en Juda noch schlemma woaren wudd un daut sien Volkj noch dolla wudd lieden motten. Wuarom deed Jehova doa nich fuaz waut met? Wuarom bleef de Aulmajchtja stell, wan de Menschen doch emma schlajchta worden? Jehova es je de “Heilja”, un siene “Uagen sent too rein, daut . . . [hee] beeset oppe Lenjd aunseenen” kaun.

10. Wuarom jeit ons daut eenjemol veleicht uk soo aus Habakuk?

¹⁰ Eenjemol jeit ons daut veleicht uk soo aus Habakuk. Wie horchen no Jehova un vetruen opp am. Un wie läsen un studieren sien Wuat, waut ons Hopninj jeft. Wie lieren uk derch Jehova siene Organisazion von daut, waut hee vesproaken haft. Oba veleicht wunda wie doawäajen noch: “Wanea woat ons Lieden mol een Enj nämen?” Well wie mol seenen, waut Habakuk wieda deed.

11. Waut wort Habakuk sikj eenich to doonen?

¹¹ Läs Habakuk 2:1. Aus Habakuk met Jehova räd, jeef am daut ennalich Fräd. Hee wort sikj eenich, daut hee wudd wachten, bat Jehova waut deed. Un lota säd hee noch eemol, hee wudd “stell wachten bat dän Dach wan daut vedoawen daut Volkj [troff]” (Hab. 3:16). Aundre von Gott siene true Deena luaden uk jeduldich, bat Jehova waut deed. Dee äa Biespel jeft ons Moot un halpt ons, nich opptojäwen un no Jehova to wachten (Micha 7:7; Jak. 5:7-8).

12. Waut kjenn wie von Habakuk lieren?

 ¹² Waut kjenn wie von Habakuk lieren? Daut ieeschte es, daut wie kjeenmol opphieren sellen met bäden, endoont waut fa Trubbels wie haben. Daut tweede es, daut wie no daut horchen sellen, waut Jehova ons derch sien Wuat un derch siene Organisazion sajcht. Un daut dredde es, daut wie jeduldich no Jehova wachten sellen un doaropp vetruen, daut hee ons to rajchte Tiet halpen woat, wan wie lieden motten. Wan wie Habakuk nodoonen, dan woa wie ennalich Fräd kjrieen un uthoolen kjennen. Onse Hopninj woat ons halpen, jeduldich un schaftich to sennen, endoont waut fa Trubbels wie haben (Reem. 12:12).

13. Woo treest Jehova Habakuk?

¹³ Läs Habakuk 2:3. Wie kjennen ons secha sennen, daut Jehova daut jefoll, daut Habakuk no am wachten wull. De Aulmajchtja wist krakjt, waut Habakuk derchmuak. Doawäajen deed hee dän Profeet treesten un leet am leeftolich weeten, daut hee sea boolt wudd een Enj moaken met daut, waut Habakuk Sorjen muak. Daut wia soo, aus wan Jehova to Habakuk säd: “Sie bloos jeduldich un velot die opp mie. Ekj woa dien Jebäd beauntwuaten, wan daut uk soo lat, daut daut lang dieet.” Jehova holp Habakuk denkjen, daut hee eene Tiet bestemt haud, wanea hee daut doonen wudd, waut hee vesproaken haud. Doawäajen rod hee Habakuk too, wieda to wachten. Habakuk wudd sikj nich aunschmäaren.

14. To waut sell wie ons gaunz eenich sennen, wan wie schwoaret derchmoaken?

¹⁴ Wan wie jeduldich no Jehova wachten un krakjt no daut horchen, waut hee ons sajcht, dan woa wie ons noch dolla opp am veloten un ennalich Fräd haben, endoont waut wie derchmoaken. Jesus rot ons too, ons daut nich met “de Tieden un Doag” schwoa to moaken, wua Gott noch nuscht von jesajcht haft (Apj. 1:7). Wie sellen ons doaropp veloten, daut Jehova krakjt weet, wanea daut Tiet es, waut to doonen. Doawäajen sell wie nich oppjäwen, oba deemootich un jeduldich sennen un ons opp Gott veloten. Un äwadäm waut wie wachten, sell wie onse Tiet rajcht brucken un Jehova deenen, soo goot aus wie kjennen (Mar. 13:35-37; Gal. 6:9).

15-16. (a) Waut vonne Vespräakjungen finj wie en daut Buak Habakuk? (b) Waut kjenn wie von dee lieren?

¹⁵ Jehova haft de Jerajchte, waut sikj opp am veloten, vesproaken: “Wäa rajcht haundelt, woat läwen, wiels hee sikj aun Gott helt” un “de gaunze Ieed woat enseenen, woo harlich Gott es” (Hab. 2:4, 14). Dee, waut jeduldich sent un opp Gott vetruen, woaren daut eewje Läwen kjrieen.

¹⁶ Denkj wie mol aun daut Vespräakjen, waut wie en Habakuk 2:4 finjen. Daut wia dän Apostel Paulus soo wichtich, daut dee en siene Breew dreemol doavon schreef (Reem. 1:17; Gal. 3:11; Heb. 10:38). Wan wie Jehova tru bliewen un ons opp am veloten, dan woa wie beläwen, woo hee daut erfelt, waut hee vesproaken haft, endoont waut vonne Schwierichkjeiten wie uk haben. Jehova well haben, daut wie daut goode em Uag hoolen, waut noch komen woat.

17. Waut woa wie beläwen kjennen, wan wie ons opp Jehova veloten?

¹⁷ Aul dee, waut en de latste Tiet läwen, kjennen väl von daut Buak Habakuk lieren. Jehova vesprakjt deejanje eewjet Läwen, waut jerajcht sent un sikj opp am veloten. Well wie wieda onsen Gloowen  stoakjen un ons noch dolla opp Gott veloten, endoont waut vonne Schwierichkjeiten un Sorjen wie haben. Daut, waut Jehova to Habakuk säd, wiest ons, daut hee ons unjastetten un raden woat. Hee wenscht sikj, daut wie ons opp am veloten un jeduldich no de Tiet wachten, waut hee bestemt haft, daut sien Kjennichrikj äwa de Ieed rejieren woat. Dan woat de gaunze Ieed voll von schaftje un frädelje Menschen sennen, waut am deenen (Mat. 5:5; Heb. 10:36-39).

18. Waut deeden Jehova siene Wieed aun Habakuk?

¹⁸ Läs Habakuk 3:16-19. Jehova siene Wieed deeden sea väl aun Habakuk. Hee docht äwa aul daut besondre no, waut Jehova ieeschtemma aul fa sien Volkj jedonen haud, un daut stoakjt sien Vetruen opp Jehova. Hee wia sikj secha, daut Jehova boolt waut doonen wudd. Daut wia een Troost fa am, wan hee uk wist, daut hee veleicht noch een Stootje wudd lieden motten. Habakuk twieweld nich mea. Enne Städ daut vetrud hee gaunz opp Jehova, daut dee am raden wudd. Waut hee to Jehova säd, jehieet to de scheenste Wieed, waut wie en de Schreft äwa Vetruen finjen. Eenje Jelieede jleewen, daut siene Wieed en Varsch 18 bedieden: “Ekj woa fa Freid hupsen em Harn; ekj woa fa Freid daunzen en Gott.” Woo väl wie nich von de Varzh 16-19 lieren kjennen! Jehova haft ons fa lota wundascheenet vesproaken un hee lat ons uk weeten, daut hee nu aul doaropp schauft, daut sikj daut aula erfellen woat.

19. Woo kjenn wie dänselwjen Troost finjen aus Habakuk?

¹⁹ Von daut Buak Habakuk lia wie waut sea wichtjet: Wie motten ons aun Jehova hoolen, ooda opp am veloten (Hab. 2:4). Toom ons wieda opp am veloten, mott wie emma jratre Frind met am woaren. Woo kjenn wie daut? Ieeschtens mott wie aunhoolent bäden un Jehova aules sajen, waut ons Sorjen moakt. Tweedens mott wie krakjt no daut horchen, waut Jehova ons derch sien Wuat un siene Organisazion sajcht, un dreddens mott wie ons opp Jehova veloten un jeduldich wachten, bat hee siene Vespräakjungen erfelt. Soo deed Habakuk daut. Aus hee sien Buak aunfunk, wia hee sea truarich, oba opp Enj von sien Buak haud hee wada Moot un Freid. Wan wie Habakuk nodoonen, dan woa wie uk Jehova sienen Troost späaren, soo aus wan hee ons leeftolich omoarmen wudd. Daut es de basta Troost, waut wie en dise schlajchte Welt kjrieen kjennen!