Ekj sie aune 1983 jebuaren. Bie kjlien wia ekj krakjt soo aus de aundre Kjinja. Oba aus ekj tieen Joa wia, kjrieech ekj met eemol groote Weedoag en mienen gaunzen Kjarpa. Un twee Joa no daut wuak ekj eenen Zemorjes opp un kunn nich mea miene Been rieren. Krakjt endoont woo sea ekj daut proowd, ekj haud kjeene Krauft. Von dan aun hab ekj kjeenmol mea jegonen. Un ekj deed uk nich mea waussen un doawäajen sie ekj noch emma krakjt soo nat aus een Kjint.

Wäajen miene Krankheit wia ekj aul een poa Moonat bloos tus jewast un dan kjeemen Jehova siene Zeijen no ons. Jeweenlich leet ekj mie nich seenen, wan wie Jast kjrieejen. Oba dän Dach räd ekj met de Sestren. Eene von dee wia Florence. Aus dee von daut Paradies räden, docht mie von dee Tiet, aus ekj ojjefäa fief Joa wia. Don studieed Jethro, een Missionoa, met mienen Voda de Bibel. Dee wond en Surinam un kjeem eemol de Moonat hia no onse Renzh. Jethro wia emma sea leeftolich un ekj jleicht dän sea. Un miene Groofrasch neemen mie eenjemol met no de Toopkomes von Jehova siene Zeijen. Wäajen aul daut säd ekj fuaz jo, aus Florence mie fruach, aus ekj mea lieren wull.

Florence kjeem daut näakjste Mol met äaren Maun Justus toop un dee beid studieeden met mie de Bibel. Aus dee enworden, daut ekj nich vestunt to läsen, holpen dee mie, daut to lieren. Met de Tiet kunn ekj dan selfst läsen. Eenen Dach säden dee to mie, daut see wudden no Surinam jeschekjt woaren, om doa to prädjen. Daut wia mie sea schod, daut doa en Orealla kjeena wia, waut met mie wieda de Bibel studieren kunn. Oba Jehova deed nich von mie vejäten.

Daut dieed nich lang, dan kjeem Floyd no Orealla. Hee wia Pionia un hee funk mie, aus hee von Hus to Hus prädjen jinkj. Aus hee doavon räd, daut hee met mie wull de Bibel studieren, must ekj een bät lachen. Hee fruach: “Wuarom lachst du?” Ekj säd to dän, daut ekj daut Heft Waut velangt Gott von ons? aul studieet haud un met daut Buak Erkenntnis, die zu ewigem Leben führt  * aunjefongen haud. Un ekj vetald dän daut, wuarom ekj oppjehieet haud. Dan studieed Floyd met mie wieda en dit Buak, bat hee uk no eene aundre Städ jeschekjt wort. Nu wia ekj wada onen eenen, waut met mie de Bibel studieren deed.

Daut endad sikj aune 2004, aus twee Breeda, waut Granville un Joshua heeten, aus Sondapionieren no Orealla jeschekjt worden. Dee troffen  mie, aus dee von Hus to Hus prädjen jinjen. Aus dee mie fruagen, aus ekj wudd wellen de Bibel studieren, must ekj een bät lachen. Ekj fruach dee, aus dee wudden wellen met mie daut Erkenntnis-Buak von Aunfank aun studieren. Ekj wull mol seenen, aus dee mie dautselwje lieren wudden aus de aundre. Granville vetald mie, daut dee en onse Renzh uk Toopkomes hauden. Ekj wia aul soo bie tieen Joa bloos tus jewast, oba ekj wull doa doawäajen han. Aus daut dan bat doa wia, kjeem Granville no ons, sad mie oppem Foastool un fieed mie nom Vesaumlungshus.

Lota muntad Granville mie opp, bie de School fa dän christeljen Deenst mettomoaken. Hee säd: “Ekj weet, daut du behindat best, oba du kaust je räden. Eenen Dach woascht du eene Räd haben fa aulemaun. Un daut woat soo romkomen.” Daut jeef mie väl Moot.

Ekj funk aun, met Granville toop to prädjen. Oba bie ons wieren väl Ieedwäaj too schlajcht toom doa metem Foastool foaren. Doawäajen fruach ekj Granville, aus hee mie nich wull met de Mestkoa fieren. Daut schauft sea fein. En Aprell 2005 leet ekj mie deepen. Nodäm lieeden de Breeda mie, woo ekj mie om daut Lässtoff un daut Lautspieker-Jereetschoft em Vesaumlungshus kjemren kunn.

Aune 2007 passieed dan waut sea schlemmet. Mien Voda haud een Ojjlekj metem Boot un storf. Daut sad onse Famielje sea too. Granville bäd met ons toop un treest ons met een poa Bibelvarzh. Twee Joa lota passieed wada waut sea schlemmet. Granville haud uk een Ojjlekj metem Boot un storf.

Fa onse kjliene Vesaumlunk wia daut sea schwoa, wiels nu haud wie kjeenen Eltesten mea un mau bloos eenen Deenstaumthelpa. Daut Granville storf, muak mie sea truarich, wiels wie wieren goode Frind. Hee holp mie emma em jeisteljen un uk met aundre Sachen. Bie daut ieeschte Toopkomen no sienen Doot wia ekj de Läsa bie daut Woaktorm-Studium. Aus ekj de ieeschte beid Varzh jeläst haud, must ekj soo sea roaren, daut ekj nich mea opphieren kunn. Ekj kunn nich lenja oppem Plautform bliewen.

Ekj feeld mie bäta, aus eenje Breeda von eene aundre Vesaumlunk no Orealla kjeemen, om ons to halpen. Daut Betel schekjt ons uk eenen Sondapionia, waut Kojo heet. Ekj freid mie uk sea, aus miene Mutta un mien jinjra Brooda aunfungen de Bibel to studieren un sikj deepen leeten. En Moaz 2015 wort ekj Deenstaumthelpa. Een Stoot lota haud ekj dan miene ieeschte Räd fa aulemaun. Dan docht ekj wada aun daut, waut Granville Joaren trigj mol to mie säd: “Eenen Dach woascht du eene Räd haben fa aulemaun. Un daut woat soo romkomen.” Ekj must lachen un roaren tojlikj.

Bie de Videos von JW Broadcasting^® hab ekj jeseenen, daut et noch aundre Breeda un Sestren jeft, waut uk behindat sent. Un doch kjennen dee väl doonen un sent schaftich. Un ekj kaun uk noch veschiednet doonen. Ekj wull aul miene Krauft fa Jehova brucken un doawäajen wort ekj Pionia. Un en Septamba 2019 kjrieech ekj dan waut to hieren, wua ekj nich aun jedocht haud! Ekj wort Eltesta en onse Vesaumlunk, wua daut ojjefäa 40 Vekjindja jeft.

Ekj sie de leewe Breeda un Sestren sea dankboa, waut met mie studieeden un mie holpen Jehova to deenen. Un besonda dankboa sie ekj Jehova, wiels Jehova haft nich von mie vejäten.