1. Opp waut vonne Reis sent wie no Matäus 7:13-14 no?

WIE aula sent oppe Reis no de niee Welt, wua Jehova leeftolich äwa ons rejieren woat. Jieda Dach strenj wie ons aun, opp dän Wajch to bliewen, dee toom Läwen fieet. Oba soo aus Jesus säd, es dis Wajch schmaul un daut es nich emma leicht, doabowen to gonen (läs Matäus 7:13-14). Wiels wie onvolkomen sent, wudd wie doa leicht kjennen von aufkomen (Gal. 6:1).

2. Waut woa wie en disen Artikjel lieren? (See uk dän Kausten “ Deemootich sennen halpt ons, opp dän schmaulen Wajch to bliewen”.)

² Wan wie opp dän schmaulen Wajch bliewen wellen, dee toom Läwen fieet, dan mott wie reed sennen, ons denkjen to endren un onse Enstalunk un daut, waut wie doonen. De Apostel Paulus säd to de Christen en Korint: “Loht junt vemohne” (2. Kor. 13:11, Friesenbibel). Dis Rot es uk fa ons. Dis Artikjel woat ons wiesen, woo de Schreft ons halpen kaun, ons to endren, un woo erfoarne Frind ons halpen kjennen, oppem Läweswajch to bliewen. Wie woaren seenen, wuarom daut eenjemol schwoa es, daut to doonen, waut Jehova siene Organisazion ons sajcht. Un wie woaren uk seenen, woo de Deemoot ons doabie halpt, ons to endren un Jehova wieda met Freid to deenen.

3. Waut kaun Gott sien Wuat ons wiesen?

³ Daut es goanich soo leicht, onse Jedanken un onse Jefeelen to unjasieekjen. Wuarom? Wäajen de Menschen äa Hoat es “hinjarigjsch un vedorwen” un kaun dee oppem orrajchten Wajch leiden (Jer. 17:9). Doawäajen wudd wie ons leicht kjennen selfst aunschmäaren (Jak. 1:22). Daut es, wuarom wie Gott sien Wuat brucken motten toom ons unjasieekjen. Gott sien Wuat kaun ons wiesen, woo wie  werkjlich sent un waut fa “Jedanken un Enstalungen” en ons Hoat sent (Heb. 4:12-13). Gott sien Wuat es soo aus eene Maschien toom derchdachen, waut ons wiest, woo wie ennalich sent. Oba wie motten deemootich sennen, daut wie dän Rot nokomen kjennen, waut Gott ons derch de Schreft jeft ooda derch dee, waut hee äwa ons aunjestalt haft.

4. Aun waut wia daut to seenen, daut de Kjennich Saul stolt wort?

⁴ Aun dän Kjennich Saul es daut to seenen, woo daut utkomen kaun, wan wie nich deemootich sent. Saul wort soo stolt, daut hee daut selfst nich jleewd, daut hee sien denkjen un siene Woakjen endren must (Psa. 36:2-3; Hab. 2:4). Daut wia to seenen, aus Jehova am krakjt säd, waut hee doonen sull, nodäm daut hee de Amalekita jewonnen haud. Oba Saul horcht nich no Jehova. Un aus de Profeet Samuel dän doavon aunräd, stunt hee sienen Fäla nich too. Hee proowd sikj doa ruttoräden un schoof de Schult opp aundre (1. Sam. 15:13-24). Un daut wia nich daut ieeschte Mol, daut Saul soont deed (1. Sam. 13:10-14). Sien Hoat wia stolt jeworden. Wäajen hee sien denkjen nich endad, stroft Jehova am un wia nich mea sien Frint.

5. Waut kjenn wie von daut lieren, woo daut met Saul utkjeem?

⁵ Waut kjenn wie von daut lieren, woo daut met Saul utkjeem? Wie wudden mol kjennen äwa de Froagen nodenkjen: “Wan ekj waut en Gott sien Wuat läs, jleew ekj dan, mie traft daut nich? Denkj ekj dan: ‘Daut, waut ekj doo, es je goanich soo schlemm’? Schuw ekj de Schult emma opp aundre?” Wan wie soont doonen, dan mott wie ons denkjen endren. Sest wudd wie kjennen soo stolt woaren, daut Jehova nich mea wudd wellen ons Frint sennen (Jak. 4:6).

6. En waut wieren de Kjennich Saul un de Kjennich David veschieden?

⁶ De Kjennich David wia gaunz aundasch aus de Kjennich Saul. David leewd “däm HARN sien Jesaz” (Psa. 1:1-3). Hee wist, daut Jehova de Deemootje rad un daut am de Huachmootje jäajenaun wieren (2. Sam. 22:28). David stald sien denkjen doano en, waut Gott sien Jesaz säd. Hee schreef: “Ekj low dän HARN, dee mie Rot jeef; en de Nacht belieet mie soogoa mien ieejnet Hoat” (Psa. 16:7).

7. Waut woa wie doonen, wan wie deemootich sent?

⁷ Wan wie deemootich sent, dan woa wie ons denkjen no Gott sien Wuat enstalen, ea wie waut orrajchtet doonen. Gott sien Wuat woat fa ons dan soo sennen aus eene Stemm, waut doa sajcht: “Daut es de Wajch. Go doa.” Daut woat fa ons eene Woarnunk sennen, wan wie wudden wellen vom rajchten Wajch aufdreien (Jes. 30:21). Daut brinjt väl goodet, wan wie no Jehova horchen (Jes. 48:17). Dan bruck wie ons biejlikj nich schlajcht feelen, wäajen aundre ons Rot jäwen motten. Un wie komen Jehova noda, wiels wie enwoaren, daut hee sikj soo om ons kjemmat aus een leeftolja Voda (Heb. 12:7).

8. Woo kjenn wie Gott sien Wuat no Jakobus 1:22-25 no aus eenen Spieejel brucken?

⁸ Wie kjennen Gott sien Wuat soo brucken aus eenen Spieejel (läs Jakobus 1:22-25). De mieeschte von ons kjikjen aum zemorjes ieescht em Spieejel, ea see von tus veloten. Soo kjenn wie seenen, aus bie ons noch fält waut aundasch to moaken, ea aundre ons seenen. Soo es daut uk, wan wie jieda Dach de Bibel läsen. Wie woaren dan seenen, wua wie ons denkjen un onse Enstalunk noch endren kjennen.  Fa väle es daut eene Help, wan dee jieda Zemorjes dän Varsch fa dän Dach läsen, ea dee von tus veloten. Dan stalen dee äa denkjen no daut en, waut dee jeläst haben, un kjikjen, woo see daut dän Dach nokomen kjennen. Un wie sellen uk jieda Dach en Gott sien Wuat läsen un doaräwa nodenkjen. Daut hieet sikj no eene kjliene Sach, oba daut woat ons sea halpen, opp dän schmaulen Läweswajch to bliewen.

9. Wanea jeft een Frint ons veleicht Rot?

⁹ Hast du mol waut jedonen, waut die wudd haben kunt von Jehova aufbrinjen? (Psa. 73:2-3). Wan een erfoarna Frint soo äwanäment wia un die Rot jeef, deetst du dan no dän horchen? Wan daut soo wia, dan wia daut krakjt daut rajchte un du best dienen Frint secha dankboa doafäa (Spr. 1:5).

10. Waut sell wie doonen, wan een Frint ons Rot jeft?

¹⁰ De Schreft sajcht: “Eenen Frint kaust du vetruen, wan hee die uk wee deit” (Spr. 27:6). Waut bediet daut? Doatoo mol een Jlikjnis: Stal die mol väa, du steist aun eenen grooten Wajch un west doa äwagonen. Un wäajen du no dien Fon kjikjst, kjikjst du nich no daut, waut doa kjemt. Oba krakjt dan pakt een Frint die aum Oarm un ritt die trigj. Dee pakt die soo sea en, daut du doa eene bleiwe Plak kjrichst, oba die fua kjeena unja. Wurscht du dienen Frint doll sennen, wan die de Plak uk noch een poa Doag weedeed? Secha nich! Du wurscht froo sennen, daut hee die jeholpen haud. Krakjt soo es daut uk, wan een Frint ons sajcht, daut wie waut jesajcht ooda jedonen haben, waut Gott nich fa rajcht talt. Veleicht deit ons daut fuaz een bät wee. Oba oaja die nich un sie uk nich beleidicht, wiels daut wudd nich kluak sennen (Liera 7:9). Sie leewa schaftich, daut dien Frint dän Moot haud un die Rot jeef.

11. Wuarom nämen eenje von eenen Frint nich gooden Rot aun?

¹¹ Wuarom wudd eena nich wellen eenen gooden Rot aunnämen von eenen leeftoljen Frint? Veleicht wiels eena stolt es. Soone Menschen jleichen daut, wan aundre an “de Uaren kjitlen”, un wellen nich “de Woarheit” hieren (2. Tim. 4:3-4). Dee jleewen, daut see bäta sent aus de aundre. Oba de Apostel Paulus schreef: “Wan irjentwäa denkjt, daut et met am waut es, wan daut doch nuscht es, dee schmäat sikj selfst aun” (Gal. 6:3). De Kjennich Salomo säd, woo daut wia. Hee schreef: “Weisheit haben, wan eena uk junk un oam es, es bäta aus een oola Kjennich sennen, dee schoslich es, un nich Rot aunnemt” (Liera 4:13).

12. Waut sajcht Galata 2:11-14 äwa Petrus, un waut lia wie doavon?

¹² Waut deed de Apostel Petrus, aus Paulus am ver aulem Rot jeef? (Läs Galata 2:11-14.) Petrus wudd haben kunt väajäwen, daut Paulus daut nich oppe rajchte Wajch säd ooda daut hee daut nich haud sult ver aundre doonen. Hee wudd haben kunt doll woaren, oba hee wia weis un neem dän Rot aun. Enne Städ sikj to vebetren, schreef hee lota, daut Paulus een “leewa Brooda” wia (2. Pet. 3:15).

13. Waut sell wie em Denkj hoolen, wan wie wäm Rot jäwen wellen?

¹³ Aun waut wudd wie sellen denkjen, wan wie eenen Frint eenen Rot jäwen wellen? Ea wie met dän räden, wudd wie sellen äwalajen: “Denkj ekj too sea, daut ekj ‘em rajchten’ sie?” (Liera 7:16). Wäa soo denkjt, kjikjt dolla doano, waut hee fa rajcht talt, un nich no daut, waut Jehova deit, un haft woomäajlich nich väl Metjefeel. Waut sell wie doonen, wan wie ons  daut goot äwalajcht haben un noch emma jleewen, daut onsen Frint Rot fält? Dan sell wie dän krakjt sajen, waut de Trubbel es, un dän Froagen stalen, daut dee vestonen kaun, wuarom daut nich rajcht wia, waut hee jedonen haft. Kjikj doano, daut dien Rot sikj emma oppe Schreft stett, un denkj doaraun, daut Jehova de Menschen rechten deit un nich du (Reem. 14:10). Velot die opp dän weisen Rot en Gott sien Wuat un sie krakjt soo metfeelent aus Jesus, wan du wäm Rot jefst (Spr. 3:5; Mat. 12:20). Wuarom? Wiels Jehova woat krakjt soo to ons sennen, aus wie to aundre sent (Jak. 2:13).

14. Waut deit Gott siene Organisazion fa ons?

¹⁴ Woo leit Jehova ons opp dän Läweswajch? Derch daut Poat von siene Organisazion, waut oppe Ieed es. Dee seenen doano, daut wie Videos, Bieekja un Toopkomes haben, waut jiedrem eenen von ons halpen, dän Rot ut Gott sien Wuat notokomen. Opp aul dit kaun eena sikj veloten, wiels sikj daut oppe Schreft stett. Un de Väastaunt velat sikj opp dän heiljen Jeist, wan dee entscheiden, woo daut Prädichtwoakj daut baste kaun jedonen woaren. De Väastaunt unjasteit sikj daut uk emma wada, aus doa irjentwaut en de Organisazion jeendat saul. Wuarom? Wiels “soo aus dise Welt nu es, daut woat vegonen” un Gott siene Organisazion kjikjt doano, waut en jieda Loag daut baste es (1. Kor. 7:31).

15. Waut wia fa eenje nich leicht?

¹⁵ Secha näm wie daut wellich aun, wan Gott siene Organisazion eene biblische Lia bäta vesteit ooda ons wiest, woo wie Jehova siene Jebooten bäta nokomen kjennen. Oba waut doo wie, wan Gott siene Organisazion waut aundret endat? Biejlikj en de latste Joaren es daut sea väl diera jeworden, een Vesaumlungshus to buen ooda to unjahoolen. Doawäajen wort de Väastaunt sikj eenich, daut jieda Vesaumlungshus von soo väl Vesaumlungen jebrukt woaren sull aus mäajlich. Eenjemol worden von miere Vesaumlungen eene jemoakt un waut Vesaumlungshiesa worden vekoft. Von daut Jelt kunnen se dan doa Vesaumlungshiesa buen, wua daut daut needichste fäld. Wan du en soone Jäajent wonst, wua daut soone Endrungen jeef, dan kaun daut veleicht schwoa sennen, die to daut niee to wanen. Eenje Breeda motten nu wieda foaren, wan dee  no de Toopkomes wellen. Un aundre haben veleicht sea aun een Vesaumlungshus jeschauft toom daut buen ooda unjahoolen un wundren nu, wuarom daut mott vekoft woaren. Dee späat sikj daut soo, aus wan aul äare Oabeit vejäfs wia. Daut es sea to lowen, daut dise Breeda daut unjastetten, wan daut uk nich leicht es.

16. Woo halpt Kolossa 3:23-24 ons, daut wie onse Freid hoolen?

¹⁶ Wan wie doaraun denkjen, daut aules, waut wie doonen, fa Jehova es un daut hee siene Organisazion leit, dan woa wie onse Freid hoolen (läs Kolossa 3:23-24). Waut kjenn wie von dän Kjennich David lieren? Aus hee Gowen jeef toom dän Tempel buen, säd hee: “Waut sie ekj? Waut es mien Volkj, daut wie em staund wieren soo väl friewellich to jäwen? Aules es von die jekomen, uk dise Gowen hab wie ieescht von die jekjräajen un dan die jejäft” (1. Chr. 29:14). Wan wie Gowen jäwen, dan jäw wie Jehova von daut, waut hee ons jejäft haft. Oba Jehova räakjent daut doawäajen väl, wan wie onse Tiet, Krauft un Jelt brucken toom sien Woakj unjastetten (2. Kor. 9:7).

17. Wuarom sell wie nich mootloos woaren, wan wie uk mol waut endren motten?

¹⁷ Daut wie opp dän schmaulen Läweswajch bliewen kjennen, mott wie aula en Jesus siene Footspoaren gonen (1. Pet. 2:21). Woa nich mootloos, wan du enwoascht, daut du waut endren motst. Daut kaun een goodet Tieekjen sennen, wiels daut wiest, daut du no Jehova horchen west. Hool em Denkj, daut Jehova weet, daut wie nich volkomen sent un daut wie Jesus sien Biespel uk nich emma volkomen nodoonen kjennen.

18. Waut mott wie doonen, daut wie no de niee Welt komen?

¹⁸ Well wie emma no daut kjikjen, waut doa komen woat, un reed sennen ons denkjen, onse Enstalunk un onse Woakjen to endren (Spr. 4:25; Luk. 9:62). Well wie deemootich bliewen, onse Freid hoolen un Rot aunnämen. Dan woat “ons leeftolja un frädelja Gott” met ons sennen (2. Kor. 13:11). Un wie woaren eene scheene Reis haben no de niee Welt.