1-2. (a) Wuarom sellen de junge Lied opp Jehova vetruen? (Psalm 37:3-4). (b) Waut woa wie en disen Artikjel seenen?

WOASCHT du die boolt befrieen ooda hast du die jroz befriet? Wan daut soo es, dan freist du die secha aul sea, daut du kaust met dänjanjen toopläwen, waut du sea leefst. Oba daut befriede Läwen es nich emma eefach, un daut jeft wichtje Sachen, waut junge Lied entscheiden motten. Daut jie kjennen schaftich sennen, mott jie rajcht met june Schwierichkjeiten omgonen un junt fa daut rajchte entscheiden. Wan jie junt opp Jehova veloten, dan woa jie goode Entscheidungen moaken, een bätret befriedet Läwen haben un schaftja sennen. Oba wan jie Jehova sienen Rot nich nokomen, dan woa jie en jun befriedet Läwen secha Trubbels kjrieen un jie woaren nich schaftich sennen (läs Psalm 37:3-4).

² En disen Artikjel jeit daut hauptsechlich om soone, waut sikj jroz befriet haben, oba dee rät uk von soone Schwierichkjeiten, waut aule Befriede haben kjennen. Wie woaren uk seenen, waut wie von Frues un Mana von de Bibeltiet lieren kjennen. Dise biblische Biespels lieren ons veschiednet fa daut Läwen, uk fa daut befriede Läwen. Wie woaren uk seenen, waut wie von eenje Lied von de vondoagsche Tiet lieren kjennen.

3-4. Waut fa Schwierichkjeiten woaren junge Lied veleicht haben?

³ Eenje roden de junge Lied too, soon Läwen to fieren, aus de Menschen em auljemeenen doonen. Biejlikj doonen de Elren ooda aundre Vewaunte dee veleicht unja  Druck saten, daut dee soo schwind aus mäajlich sellen Kjinja haben. Ooda Frind un Famielje sajen, dee sellen sikj een Hus kjeepen un väl Sachen toom daut utstraumen.

⁴ Wan een Poa Lied nich väasechtich es, dan wudden dee sikj kjennen en eene groote Schult enducken. De Maun un de Fru wudden dan veleicht beid sea schaufen motten, daut see äare Schult betolen kunnen. Dan wudden dee nich mea jenuach Tiet haben toom de Bibel studieren un fa daut Famieljenstudium un fa dän Deenst. Veleicht vesiemen dee mau rajcht Toopkomes, wäajen dee äwa Tiet schaufen motten, om mea Jelt to vedeenen ooda om nich de Oabeit to velieren. Oba doaderch woaren dee dan goode Jeläajenheiten vespälen, mea fa Jehova to doonen.

5. Waut lia wie von Klaus un Marisa?

⁵ Väle haben daut aul beläft, daut eenem daut nich werkjlich schaftich moakt, wan eena bloos no daut tietelje sträft. Besee wie ons mol daut Biespel von Klaus un Marisa. * Aus dee sikj befrieden, schauften dee beid fa voll toom een jemieteljet Läwen haben. Oba en Werkjlichkjeit wieren dee nich schaftich. Klaus sajcht: “Wie hauden em tieteljen äwajenuach, oba wie hauden ons nuscht em jeisteljen väajenomen. Wie hauden väl em dreien un wie feelden ons eenjemol äwafoddat.” Veleicht hab jie uk aul jemoakjt, daut eenem daut nich werkjlich tofräd moakt, wan eena bloos no daut tietelje sträft. Wan daut bie junt soo es, dan woat nich mootloos. Denkjt äwa goode Biespels no, waut junt halpen, Sachen to endren. Räd wie mol daut ieeschte von de Ehemana, waut dee von dän Kjennich Joschafat lieren kjennen.

6. Woo deed Joschafat krakjt daut, waut Spricha 3:5-6 sajcht, aus een deel Soldoten jäajen am kjeemen?

⁶ Jie Ehemana, feel jie junt eenjemol äwafoddat met june Veauntwuatunk? Wan jo, dan kaun junt daut Biespel von dän Kjennich Joschafat halpen. Aus Kjennich haud hee de Veauntwuatunk, daut daut gaunze Volkj daut goot jinkj! Woo kjeem hee dise Veauntwuatunk no? Joschafat deed aules, waut hee kunn, om daut Volkj to beschitzen. Hee vesechad de Städa en Juda un stald een majchtjet Kjrichshäa von äwa 1 160 000 Soldoten toop (2. Chr. 17:12-19). Lota wia Joschafat dan en groote Schwierichkjeiten. Eene groote Armee von Amonita, Moabita un Mana von de Seir-Boaj kjeemen jäajen am un siene Famielje un jäajen daut Volkj (2. Chr. 20:1-2). Waut deed Joschafat dan? Hee fruach Jehova no Help. Hee deed krakjt daut, waut  Spricha 3:5-6 ons toorot (läs). Sien deemootjet Jebäd, waut en 2. Chronik 20:5-12 steit, wiest, woo sea hee opp sienen leeftoljen himlischen Voda vetrud. Woo beauntwuad Jehova daut Jebäd von Joschafat?

7. Woo beauntwuad Jehova Joschafat sien Jebäd?

⁷ Jehova räd to Joschafat derch dän Levit Jahasiel. Hee säd: “Blieft stonen un kjikjt too, woo ekj, de HAR, fa junt siejen woa” (2. Chr. 20:13-17). Dit wia nich, woo eena jeweenlich em Kjrich kjamfen deed! Oba dise Aunwiesungen kjeemen nich von eenen Mensch, oba von Jehova selfst. Joschafat vetrud gaunz opp Gott un deed, waut hee am säd. Aus hee met daut Volkj toop de Fiend entjäajen jinkj, stald hee nich de stoakjste Soldoten väaren aun, oba de Sinja, waut nuscht toom kjamfen hauden. Jehova leet Joschafat nich em Stäakj un jewonn de Fiend (2. Chr. 20:18-23).

8. Waut kjennen de Ehemana von Joschafat lieren?

⁸ Jie Ehemana, jie kjennen von Joschafat sien Biespel lieren. Jie haben de Veauntwuatunk, daut june Famielje daut goot jeit, un doawäajen strenj jie junt aun, dee to beschitzen un to halpen. Wan du Schwierichkjeiten hast, dan denkjst du veleicht, daut du dee selfst leesen kaust. Oba velot die nich opp diene ieejne Krauft. Enne Städ daut froag Jehova no Help un bäd uk iernstlich met diene Fru toop. Sieekj die Rot bie Jehova, doaderch daut du de Bibel studieescht un uk de Bieekja von Jehova siene Organisazion, un proow dän Rot notokomen. Eenje sent doa veleicht nich met envestonen, daut du de Bibel to Help nemst, om Entscheidungen to moaken, un sajen veleicht, daut du onkluak best. Veleicht sajen dee, daut daut Jelt ooda daut, waut eena sikj doamet kjeepen kaun, fa diene Famielje de jratste Sechaheit es. Oba denkj aun Joschafat. Hee vetrud opp Jehova un bewees daut derch siene Woakjen. Jehova veleet disen truen Maun nich un hee woat die uk nich (Psa. 37:28; Heb. 13:5). Waut kjennen de Befriede noch doonen, om toop een schaftjet Läwen to haben?

9. Waut weet wie von dän Profeet Jesaja un siene Fru?

⁹ Fa Jesaja un siene Fru wia Jehova deenen daut wichtichste. Hee wia een Profeet, un daut schient soo, daut siene Fru uk profezeien deed, wiels see woat “de Profeetin” jenant (Jes. 8:3, JHF; Jes. 8:1-2, 4). Daut lat soo, daut Jesaja un siene Fru toop doano sträwden, soo väl aus mäajlich fa Jehova to doonen. Dee sent een sea goodet Biespel fa de Befriede vondoag dän Dach!

10. Woo kaun de Befriede daut halpen, Jehova äa bastet to jäwen, wan dee de biblische Profezeiungen studieren?

¹⁰ Befriede kjennen Jehova vondoag dän Dach uk äa bastet jäwen. Dee kjennen äa Vetruen opp Jehova stoakjen, wan dee toop de biblische Profezeiungen studieren un seenen, woo sikj dee emma erfellen (Tit. 1:2). * Dee kjennen doaräwa nodenkjen, woo see methalpen  kjennen, daut jewesse Profezeiungen sikj erfellen. Biejlikj kjennen dee methalpen, daut Jesus siene Profezeiunk sikj erfelt, daut de goode Norecht oppe gaunze Welt jeprädicht woat, ea daut Enj kjemt (Mat. 24:14). Je dolla dee sikj doaropp veloten, daut de biblische Profezeiungen sikj emma erfellen, je eenja woaren dee sikj sennen, Jehova äa bastet to jäwen.

11. Waut kunnen Priszilla un Aquilla doonen, un wuarom?

¹¹ Junge Lied kjennen von Priszilla un Aquilla lieren, een judischet Poa Lied, waut en de Staut Room wond. Dee hauden de goode Norecht von Jesus jehieet un wieren Christen jeworden. Secha wieren dee gaunz tofräd met äa Läwen. Oba dan endad dee äa Läwen sikj haustich, wäajen de Kjeisa Klaudius aule Juden ut Room rutschekjt. Waut bedied daut nu fa Aquilla un Priszilla? Dee musten von de Jäajent veloten, wua see sikj tus feelden, eene fresche Woninj sieekjen un äare Oabeit aus Zeltmoaka wada aunfangen. Wudd daut jeistelje bie dee nu hinjastalich bliewen? Secha weetst du de Auntwuat. Aus see dan en Korint wonden, holpen see doa enne Vesaumlunk met un deeden met dän Apostel Paulus toop de Breeda stoakjen. Lota trocken dee uk noch no aundre Städen, om doa mettohalpen, wua daut aun mea Help em Prädichtdeenst fäld (Apj. 18:18-21; Reem. 16:3-5). Dee hauden een drocket, oba schaftjet Läwen!

12. Wuarom sellen Befriede sikj em jeisteljen waut väanämen?

¹² De Befriede kjennen von Priszilla un Aquilla lieren, wan daut doarom jeit, Gott sien Kjennichrikj aun de ieeschte Städ to stalen. Wanea es daut aul de baste Tiet, doaräwa to räden, waut eena em Deenst fa Jehova doonen well? Daut es, wan eena sikj kjanen lieet. Wan beid sikj toop waut em jeisteljen väanämen un doaropp schaufen, daut uk to doonen,  dan woaren dee väl foakna beläwen, woo Jehova an halpt (Liera 4:9, 12). Räd wie mol äwa daut, waut Russell un Elizabeth beläwden. Russell sajcht: “Ea wie ons befrieden, räd wie äwa Eenselheiten, waut wie en Jehova sienen Deenst doonen wullen.” Elizabeth sajcht: “Wie räden doaräwa, wiels wie wullen nich Entscheidungen moaken, waut ons lota wudden doavon aufhoolen, daut notokomen, waut wie ons väajenomen hauden.” Russell un Elizabeth kunnen lota dan en Mikroneesien deenen, wua daut aun mea Help em Deenst fäld.

13. Waut woat no Psalm 28:7 no doabie rutkomen, wan wie opp Jehova vetruen?

¹³ Väl Befriede sent sikj eenich jeworden, een eefachet Läwen to fieren un soo väl aus mäajlich to prädjen un to lieren, soo aus Russell un Elizabeth. Wan een Poa Lied sikj väanemt, soo väl aus mäajlich fa Jehova to doonen, un toop proowen daut notokomen, dan woat doa väl goodet bie rutkomen. Dee woaren beläwen, woo Jehova fa an sorcht, un dee woaren dolla opp Jehova vetruen un sea schaftich sennen (läs Psalm 28:7).

14. Woo weesen de Apostel Petrus un siene Fru, daut see doaropp vetruden, waut daut en Matäus 6:25, 31-34 sajcht?

¹⁴ Befriede kjennen uk von dän Apostel Petrus un siene Fru lieren. Rom sas Moonat ooda een Joa nodäm Petrus Jesus daut ieeschte Mol jetroffen haud, must hee waut wichtjet entscheiden. Petrus deed feschen, om fa siene Famielje to sorjen. Aus Jesus am dan fruach, aus hee am wull fa voll nofoljen, must hee uk aun siene Fru denkjen, ea hee sikj doatoo eenich wort (Luk. 5:1-11). Petrus wort sikj eenich, met Jesus mettogonen un to prädjen, un daut wia de rajchte Entscheidunk! Secha wia Petrus siene Fru doamet envestonen. De Schreft wiest, daut siene Fru no Jesus sien oppstonen mol met Petrus toop opp siene Prädichtreisen wia (1. Kor. 9:5). Onen Twiewel kunn Petrus de Befriede gooden Rot jäwen, wäajen siene Fru selfst een goodet Biespel wia (1. Pet. 3:1-7). Wie kjennen ons väastalen, daut Petrus un siene Fru doaropp vetruden, daut Jehova fa an sorjen wudd, wan see Gott sien Kjennichrikj aun de ieeschte Städ stalden (läs Matäus 6:25, 31-34).

15. Waut lia wie von Tiago un Esther?

¹⁵ Wan jie aul een poa Joa befriet sent, woo kjenn jie dan doano sträwen, mea fa Jehova to doonen? Eene Mäajlichkjeit wudd sennen, wan jie junt aun aundre Ehelied een Biespel neemen. Jie wudden biejlikj kjennen de Artikjels läsen “Dee wieren wellich reed toom halpen”. Soone Artikjels holpen Tiago un Esther von Brasilien, dän stoakjen Wensch to kjrieen, doa to deenen, wua mea Help fäld. Tiago sajcht: “Aus wie läsden, woo Jehova siene Deena en de vondoagsche Tiet halpen deit, wull wie daut uk beläwen, woo hee ons halpt, wan wie sienen Rot nokomen.” Met de Tiet trocken dee dan no Paraguay, wua dee von 2014 aun opp Portugiesisch prädjen. Esther sajcht: “Een Bibelvarsch, waut wie beid sea jleichen, es Efeesa 3:20. Wie haben emma wada beläft, woo sikj dise Wieed en onsen Deenst erfelt haben.” En dän Breef aun de Efeesa vespruak Paulus,  daut Jehova väl mea doonen wudd, aus wie no froagen. Doa kjenn wie ons gaunz opp veloten!

16. Wäm wudden de junge Lied kjennen no Rot froagen?

¹⁶ Junge Lied kjennen sikj dee toom Väabilt nämen, waut daut jelieet haben, sikj opp Jehova to veloten. Eenje Befriede sent aul fa Joaren em Voltietdeenst jewast. Jie wudden dee kjennen no Rot froagen, wan jie doaräwa nodenkjen, no waut jie sträwen wellen. Dit es eene aundre Wajch, woo jie wiesen kjennen, daut jie opp Jehova vetruen (Spr. 22:17, 19). Eltestasch kjennen junge Lied uk Rot jäwen, woo dee no jeisteljet sträwen kjennen.

17. Waut beläwden Klaus un Marisa, un waut kjenn wie von dee lieren?

¹⁷ Eenjemol nemt eena sikj väa, mea fa Jehova to doonen, oba daut kjemt nich soo ut, aus eena jedocht haft. Denkj wie aun daut Biespel von Klaus un Marisa, von dee wie ea aul räden. Aus see dree Joa befriet wieren, trocken dee von tus wajch un holpen bie daut Betel en Finnlaunt biem buen met. Oba dan worden dee en, daut see doa nich wudden lenja bliewen kjennen aus sas Moonat. Ieeschtlich wieren dee een bät mootloos doaräwa. Oba een Stootje lota worden dee dan enjelot, Arabisch to lieren, un nu kjennen dee en een aundret Launt opp Arabisch prädjen. Nu sajcht Marisa: “Ekj haud Angst, waut to doonen, waut ekj noch kjeenmol ea haud, un ekj must gaunz opp Jehova vetruen. Oba ekj hab jeseenen, daut Jehova ons emma jeholpen haft, mau rajcht doa, wua wie nich met jeräakjent hauden. Nu daut wie dit beläft haben, es mien Vetruen opp Jehova noch stoakja jeworden.” Dise Erfoarunk wiest, daut jie junt kjennen secha sennen, daut Jehova junt emma beloonen woat, wan jie junt gaunz opp am veloten.

18. Woo kjennen Befriede fa wieda opp Jehova vetruen?

¹⁸ Daut befriede Läwen es een Jeschenkj von Jehova (Mat. 19:5-6). Hee well, daut jie toop schaftich sent (Spr. 5:18). Jie junge Lied, no waut wudd jie kjennen sträwen? Doo jie aules, waut jie kjennen, om Jehova fa aul daut june Dankboakjeit to wiesen, waut hee fa junt jedonen haft? Bät to Jehova. Sieekjt en sien Wuat no Gruntsauzen fa june Loag. Dan prooft dän Rot von Jehova notokomen. Jie kjennen junt secha sennen, daut jie een schaftjet un tofrädnet Läwen haben woaren, wan jie soo väl aus mäajlich fa Jehova doonen!